News @ M-Media

တူရကီတွင် ‘ကြယ်နှင့်လ’ သဏ္ဍာန် ဗလီသစ်ကြီးတစ်လုံး တည်ဆောက်နေ

စက်တင်ဘာ ၁၂၊ ၂၀၁၇
M-Media

ဗလီဝတ်ကျောင်းတော် ပုံသဏ္ဍာန်

 

– ကြယ်နှင့်လ ပုံသဏ္ဍာန်ရှိမည့် ဗလီဝတ်ကျောင်းတော်တစ်လုံး ဆောက်လုပ်ရန်အတွက် တူရကီမှာ ယမန်နေ့က အုတ်မြစ်ချအခမ်းအနား ပြုလုပ်ခဲ့ပြီး အစိုးရတာဝန်ရှိသူ အများအပြား တက်ရောက်ခဲ့ကြသည်ဟု သိရသည်။

နိုင်ငံအလယ်ပိုင်း ဆီဗက်စ်ပြည်နယ်ရှိ မြေနေရာ ၇၀၀၀ စကွဲယားမီတာတွင် ဆောက်လုပ်မည့် အဆိုပါ ဗလီဝတ်ကျောင်းတော်မှာ ၀တ်ပြုသူပေါင်း ၈၄၀၀ ဆန့်မည်ဖြစ်သည်။

အုတ်မြစ်ချအခမ်းအနားသို့ ပြည်နယ်အုပ်ချုပ်ရေးမှူး၊ အာဏာရ AK ပါတီမှ တာဝန်ရှိသူများ၊ ပြည်သူများတက်ရောက်ခဲ့ကြသည်။

ဗလီဝတ်ကျောင်းတော်တွင် ဈာပနအခမ်းအနား ကျင်းပမည့်နေရာတစ်ခုလည်း ပါဝင်မည်ဖြစ်သောကြောင့် လက်ရှိတွင် ဆီဗက်စ်မြို့လယ်ကောင်ရှိ ဗလီဝတ်ကျောင်းတော်တစ်ခုတွင်သာ ဈာပနအခမ်းအနား ကျင်းပနေရသည့်အတွက် ကားလမ်းကြပ်မှု ပြဿနာကိုလည်း ပြေလည်စေမည်ဖြစ်သည်။

“ကျွန်တော်တို့နိုင်ငံသားတွေရဲ့ လိုအပ်ချက်ကို စဉ်းစားပြီးတော့ ဒီစီမံကိန်းကို ဆောင်ရွက်တာ ဖြစ်ပါတယ်။ ဒီစီမံကိန်းမှာ ပါဝင်ချင်တဲ့သူတွေ ပါဝင်လို့ရအောင် အသင်းတစ်ခုကိုလည်း ကျွန်တော်တို့ ဖွဲ့စည်းထားပါတယ်။ ကျွန်တော်တို့ရဲ့ ရည်ရွယ်ချက်ဟာ ၂၀၁၈ ခုနှစ်မှာ ဗလီဝတ်ကျောင်းတော် ဖွင့်လှစ်နိုင်ဖို့ပါပဲ” ဟု ဆီဗက်စ် စည်ပင်အကြီးအကဲ ဆာမီ အိုင်ဒင်က ပြောကြားခဲ့သည်။

တာဝန်ရှိသူများက မိန့်ခွန်းပြောကြားခြင်း၊ ၀တ်ပြုဆုတောင်းခြင်းတို့ ပြီးစီးသည့်နောက် Yukarı Tekke Ayyıldız ဟု အမည်တွင်မည့် အဆိုပါဗလီဝတ်ကျောင်းတော်ကို အုတ်မြစ်ချခဲ့သည်။ စီမံကိန်းကို ၂၀၁၈ ခုနှစ် နှစ်လယ်ပိုင်းတွင် ပြီးစီးရန် ရည်ရွယ်ထားသည်။

ဗလီဝတ်ကျောင်းတော် ပုံသဏ္ဍာန်
ဗလီဝတ်ကျောင်းတော် ပုံသဏ္ဍာန်

Ref: yenisafak.com