Tag: turkey

အောက်တိုဘာ ၁၂၊ ၂၀၂၄
M-Media

Anka-3 လို့ အမည်ပေးထားတဲ့ ပြည်တွင်းဖြစ် တိုက်ပွဲ၀င် ဒရုန်းအသစ်တစ်ခုကို တူရကီက ပြီးခဲ့တဲ့ရက်ပိုင်းမှာ ထုတ်ပြခဲ့ပြီး လေကြောင်းကာကွယ်ရေး နည်းပညာမှာ ပြတ်ကျန်မနေခဲ့ဘူးဆိုတာ ကမ္ဘာကို သိစေခဲ့ပါတယ်။

ဒီဒရုန်းဟာ Anka မိသားစု၀င် ဒရုန်းတွေထဲက တတိယမျိုးဆက်ဖြစ်ပြီး ကိုယ်ပျောက်နိုင်စွမ်း၊ အင်ဂျင်အင်အားနဲ့ ၀န်သယ်ဆောင်နိုင်မှုကို အဆင့်မြှင့်တင်ထားပါတယ်။ အမြီးပျောက် တာဘိုဖန်အင်ဂျင် တပ်ဆင်ထားတဲ့ တူရကီရဲ့ ပထမဆုံး ဒရုန်းလည်း ဖြစ်ပါတယ်။

အမြင့်ပေ ၄ သောင်းအထိ ရောက်နိုင်ပြီး ၁၀ နာရီကြာ ဆက်တိုက်ပျံသန်းနိုင်ပါတယ်။ ၁၂၀၀ ကီလိုဂရမ်အထိ ၀န်တင်ဆောင်နိုင်မှုရှိပြီး၊ ဒရုန်းဗုံးအားလုံးနီးပါးကို တပ်ဆင်အသုံးပြုလို့ရတယ်လို့ ဆိုပါတယ်။ ၀ေးလံခေါင်ဖျားတဲ့ ဒေသတွေကိုလည်း အလျင်အမြန် တပ်ဖြန့်ချထားနိုင်ပါတယ်။

၂၀၂၂ ခုနှစ်မှာ စတင်ထုတ်လုပ်ခဲ့ပြီး ၂၀၂၃ ခုနှစ် နှစ်ကုန်ပိုင်းမှာ ပထမဆုံးအကြိမ် စမ်းသပ်ပျံသန်းနိုင်ခဲ့တဲ့ Anka-3 ဟာ ထောက်လှမ်းရေး၊ ဆက်သွယ်ရေး၊ တိုက်ပွဲ၀င်ရေး စတဲ့ ဘက်ပေါင်းစုံမှာ အသုံးပြုလို့ရတဲ့ ဒရုန်းလည်း ဖြစ်ပါတယ်။

Ref: Daily Sabah

အောက်တိုဘာ ၉၊ ၂၀၂၄
M-Media

-ဂါဇာနဲ့ လက်ဘနွန်မှာ တိုက်ခိုက်သတ်ဖြတ်မှုတွေ ကျူးလွန်နေတဲ့ အစ္စရေးဟာ ဇီယွန်အကြမ်းဖက်အဖွဲ့အစည်း အဖြစ် တူရကီသမ္မတ အာဒိုဂန်က ၀ေဖန်ရှုတ်ချလိုက်ပါတယ်။
“ပါလက်စတိုင်းကလေးငယ်တွေ၊ အမျိုးသမီးတွေနဲ့ အရပ်သား ထောင်သောင်းချီ သွေးမြေကျမှုမှာ တာ၀န်ရှိတဲ့ မကောင်းဆိုး၀ါးကို အားပေးနေတဲ့ ဘယ်သူ့ကိုမဆို သမိုင်းက ခွင့်လွှတ်မှာ မဟုတ်ပါဘူး” လို့ အောက်တိုဘာ ၉ ရက်နေ့ လွှတ်တော် မိန့်ခွန်းမှာ အာဒိုဂန်က ထည့်သွင်းပြောကြားခဲ့ပါတယ်။
ဂါဇာမှာ တစ်နှစ်အတွင်း လူပေါင်း ၄၂၀၀၀ ကျော်၊ လက်ဘနွန်မှာ ၂ ပတ်အတွင်း လူ ၂၀၀၀ ကျော်ကို သတ်ဖြတ်ထားတဲ့ အစ္စရေးကို အာဒိုဂန်က အရင်ကတည်းက ၀ေဖန်ရှုတ်ချခဲ့တာဖြစ်ပါတယ်။
ဒေသတွင်း အခြေအနေတွေဟာ စားပွဲ၀ိုင်းမှာ စကားပြောဖို့၊ ရင်ကြားစေ့ဖို့ ပိုမိုလိုအပ်တယ်ဆို ပြသနေကြောင်း ယုံကြည်တယ်လို့လည်း အာဒိုဂန်က ထည့်သွင်းပြောဆိုခဲ့ပါတယ်။
Ref: Aljazeera

ဖေဖော်၀ါရီ ၂၄၊ ၂၀၂၄

M-Media 

-ကမ္ဘာ့ဒရုန်းစျေးကွက်ကို ပြည်တွင်းဖြစ် Bayraktar TB2 နဲ့ စိုးမိုးခဲ့တဲ့ တူရကီဟာ တိုက်လေယာဥ်စျေးကွက်ကိုလည်း ၀င်ရောက်ဖို့ ကြိုးစားလာပါတယ်။ 

၂၀၁၆ ခုနှစ်က စတင်ခဲ့တဲ့ တူရကီရဲ့ တိုက်လေယာဥ် ထုတ်လုပ်ရေး စီမံကိန်း TF-X ဟာ ဇန်န၀ါရီ နှောင်းပိုင်းက Kaan လို့ အမည်ပေးထားတဲ့ မျိုးဆက်သစ် တိုက်လေယာဥ်တစ်စင်းကို စမ်းသပ်မောင်းနှင်ပြခဲ့ပါတယ်။ 

၁၃ မိနစ်ကြာ မောင်းနှင်မှုအတွင်း အမြင့်ပေ ၈ ထောင်အထိ ရောက်ရှိခဲ့ပြီး အမြန်နှုန်းက တစ်နာရီ ၂၃၀ မိုင် ရှိပါတယ်။ 

ရုရှားထံကနေ S-400 ဒုံးခွင်းစနစ် ၀ယ်မယ်ဆိုတဲ့ သတင်းကြောင့် အမေရိကန်ရဲ့ အဆင့်မြင့် F-35 တိုက်လေယာဥ် တူရကီက ၀ယ်မယ့်အစီအစဥ်ဟာ အဆင်မပြေ ဖြစ်ခဲ့ပါတယ်။ 

ဒါ့ကြောင့် မျိုးဆက်သစ် Kaan တိုက်လေယာဥ် ထုတ်လုပ်ရာမှာ အမေရိကန်ထုတ် တိုက်လေယာဥ်တွေမှာ သုံးတဲ့ နည်းပညာမျိုးတွေ အသုံးပြုနိုင်အောင် ပြင်ဆင်ခဲ့ပါတယ်။ 

ဉာဏ်ရည်တုနည်းပညာ AI ထည့်သွင်းထားမယ့် ဆဌမမျိုးဆက် တိုက်လေယာဥ်တွေအထိ ထုတ်လုပ်ဖို့ တူရကီက ရည်မှန်းထားပါတယ်။ 

Kaan တိုက်လေယာဥ်ဟာ စတုတ္ထနဲ့ ပဥ္စမမျိုးဆက်ကြားက အမျိုးအစားမျိုး ဖြစ်ပါတယ်။ ကိုယ်ပျောက်နိုင်စွမ်းရှိပြီး အသံမြန်နှုန်းထက် ၁ ဒဿမ ၈ ဆ ကနေ၊ ၂ ဒဿမ ၂ ဆအထိ မြန်မြန် မောင်းနှင်နိုင်အောင် ဖန်တီးထားတာ ဖြစ်ပါတယ်။ 

တူရကီလေတပ်မှာ လက်ရှိ အသုံးပြုနေတဲ့ အမေရိကန်ထုတ် F-16 တိုက်လေယာဥ်တွေ အနားပေးမယ့် ၂၀၃၀ နောက်ပိုင်းမှာ Kaan ကို အစားထိုးသွားမှာ ဖြစ်ပါတယ်။ 

၂၀၂၄ ရောက်ရင် Kaan တိုက်လေယာဥ် အဆင်း ၃၀၀ လောက် အသုံးပြုနိုင်ဖို့လည်း တူရကီက ရည်မှန်းထားပါတယ်။ လက်ရှိ တူရကီရဲ့ စီးပွားရေးအခြေအနေကြောင့် အမြောက်အများ ထုတ်လုပ်နိုင်မလား ဆိုတဲ့အပေါ် မေးခွန်းထုတ်မှုတွေ ရှိနေပါတယ်။ 

တူရကီရဲ့ TF-X တိုက်လေယာဥ်ထုတ်လုပ်မှု စီမံကိန်းဟာ ပါကစ္စတန်နဲ့ ပူးပေါင်းဆောင်ရွက်တာဖြစ်ပါတယ်။ Kaan လို အဆင့်မြင့်တိုက်လေယာဥ်မျိုး ထုတ်လုပ်လာနိုင်မှုဟာ နောက်ဆုံးပေါ် လက်နက်တွေအတွက် ပါကစ္စတန်က တရုတ်အပေါ် မှီခိုနေရမှုကိုလည်း လျှော့ချပေးနိုင်မှာ ဖြစ်ပါတယ်။ 

တူရကီဟာ Kaan တိုက်လေယာဥ်ကို ကမ္ဘာ့စျေးကွက်တင်မှာဖြစ်ပြီး အမေရိကန်ရဲ့ F-16၊ F-22 နဲ့ F-35 တိုက်လေယာဥ်တွေကို ၀ယ်ယူဖို့ စဥ်းစားနေတဲ့ နိုင်ငံတွေကို ရွေးချယ်စရာ နောက်တစ်ခုအဖြစ် စွဲဆောင်နိုင်ဖို့ မျှော်လင့်နေပါတယ်။ 

Ref: Asia Times