မေ ၁၄၊ ၂၀၁၈
M-Meida
– မလေးရှားဝန်ကြီးချုပ်ဟောင်း နာဂျစ်ရာဇတ် ခြစားမှုနဲ့ပတ်သက်ပြီး တိုင်ကြားချက်နှစ်ခုကို ယခင် အစိုးရတာဝန်ရှိသူဟောင်းတစ်ဦးက ခြစားမှုတိုက်ဖျက်ရေးကော်မရှင် (MACC) ထံ ပို့ဆောင်ထားတယ်လို့ သိရပါတယ်။
နာဂျစ်ဟာ ၀န်ကြီးချုပ်ဆိုတဲ့ရာထူးကို အသုံးချကာ ခြစားမှုတွေ လုပ်ခဲ့ကြောင်း၊ နောက်ကြောင်းလိုက်လို့မရတဲ့ ပိုင်ဆိုင်မှုတွေ ရှိနေကြောင်း ဒီတိုင်ကြားချက်နှစ်ခုမှာ ဖော်ပြထားပါတယ်။
“ခြစားမှုတိုက်ဖျက်ရေးကော်မရှင် (MACC) က အလျင်အမြန် အရေးယူလို့ရအောင် ကျွန်တော့်အနေနဲ့ ဒီလို တိုင်ကြားချက်တွေ ပြုလုပ်ခဲ့တာ ဖြစ်ပါတယ်” လို့ MACC အကြီးတန်းတာဝန်ရှိသူဟောင်း အဘ်ဒူလ် ရာဇတ် အီဒရစ်က ပြောကြားခဲ့ပါတယ်။
နာဂျစ်နဲ့ပတ်သက်ပြီး နောက်ထပ် တိုင်ကြားချက်တစ်ခုကို MACC ဒါမှမဟုတ် ရဲတပ်ဖွဲ့ကို ပေးပို့ဖို့ ရှိနေတယ်လို့လည်း သူက ဆိုပါတယ်။
ဒီလိုတိုင်ကြားမှုလုပ်ဖို့အတွက် ‘အကြီးအကဲဟောင်း’ က တိုက်တွန်းခဲ့တာဖြစ်ကြောင်း၊ အရင်အစိုးရလက်ထက်မှာ တိုင်ကြားမှုတွေ မလုပ်တာဟာ အလုပ်မဖြစ်မှန်းသိတဲ့အတွက်ဖြစ်ကြောင်း သူက ထည့်သွင်းပြောဆိုခဲ့ပါတယ်။ သူ့ကို တိုက်တွန်းသူ ဘယ်သူဘယ်ဝါဖြစ်တယ်ဆိုတာကိုတော့ မထုတ်ဖော်ခဲ့ပါဘူး။
မလေးရှား ခြစားမှုတိုက်ဖျက်ရေးကော်မရှင် MACC အကြီးအကဲ ဇွလ်ကီဖလီ အဟ်မဒ်ဟာ ဒီကနေ့မနက်မှာ အစိုးရထံ နှုတ်ထွက်စာတင်ကာ နှုတ်ထွက်သွားခဲ့ပါတယ်။
ဝန်ကြီးချုပ်ဟောင်း နာဂျစ်ရာဇတ်ဟာ နိုင်ငံပိုင် 1MDB လုပ်ငန်းကနေ ဒေါ်လာ ဘီလီယံချီ ရယူခဲ့တယ်ဆိုပြီး ပြီးခဲ့တဲ့ နှစ်တွေမှာ သတင်းထွက်ခဲ့ပါတယ်။
ဝန်ကြီးချုပ်သစ် မဟာသီယာမိုဟာမက် ဦးဆောင်တဲ့ အစိုးရလက်ထက်မှာ နာဂျစ်ကို ခြစားမှုဆိုင်ရာ ကိစ္စတွေနဲ့ စုံစမ်းစစ်ဆေးမှုတွေ ပြုလုပ်နေပါတယ်။ နာဂျစ်တို့ဇနီးမောင်နှံကို ပြည်ပထွက်ခွင့် ပိတ်ထားသလို၊ သူတို့ရဲ့ ကိုပိုင်အိမ်ကိုလည်း ရဲတပ်ဖွဲ့က ၀ိုင်းရံပိတ်ဆို့ စောင့်ကြပ်ထားပါတယ်။
Ref: Aljazeera