နိုဝင်ဘာ ၈၊ ၂၀၁၈
M-Media
– အမေရိကန်ပြည်ထောင်စု ကယ်လီဖိုးနီးယားပြည်နယ်က ဘားမှာ ဒီကနေ့မနက် အစောပိုင်းက သေနတ်သမားတစ်ဦး ၀င်ရောက်ပစ်ခတ်မှု ဖြစ်ပွားခဲ့ပြီး ရဲတပ်ဖွဲ့ဝင်တစ်ဦးအပါအ၀င် ၁၂ ဦး သေဆုံးခဲ့တယ်လို့ သိရပါတယ်။
ပြည်နယ်တောင်ဘက် ဗန်တူရာခရိုင် သောင်ဆင်အုတ်မြို့က Borderline Bar & Grill ဘားမှာ သေနတ်သမားက အစောင့်ကို တိုက်ခိုက်ကာ ဘားအတွင်း ၀င်ရောက် ပစ်ခတ်ခဲ့တာ ဖြစ်ပါတယ်။
ပစ်ခတ်မှုဖြစ်ပွားတဲ့အချိန်မှာ ကောလိပ်ကျောင်းသားအများစုအပါအ၀င် လူရာချီ ဘားထဲမှာရှိနေတယ်လို့ ရဲတပ်ဖွဲ့က ပြောပါတယ်။ သတင်းပေးပို့မှု ပထမဆုံး ရရှိတဲ့အချိန် ဘားထဲဝင်ရောက်ကာ သေနတ်သမားကို တုန့်ပြန်ဖို့ကြိုးစားခဲ့တဲ့ ရဲတပ်ကြပ် ရွန် ဟီလက်စ်ဟာ သေနတ်ဒဏ်ရာကြောင့် ဆေးရုံမှာ သေဆုံးသွားခဲ့ပါတယ်။
သေနတ်သမားလည်း နေရာမှာ သေဆုံးသွားခဲ့ပြီး ဘယ်လိုကြောင့်သေဆုံးသွားတယ်ဆိုတာနဲ့ ဘယ်သူဘယ်ဝါဖြစ်တယ်ဆိုတာ အာဏာပိုင်တွေက ထုတ်ပြန်ခြင်း မရှိသေးပါဘူး။
ဒဏ်ရာရသူအရေအတွက်ကိုလည်း အသိအကျ မသိရှိရသေးဘဲ ရဲတပ်ဖွဲ့ကတော့ ပြည်သူလူထုကို သတိနဲ့နေကြဖို့ ထုတ်ပြန်ထားပါတယ်။
Ref: CNN