ဇန်န၀ါရီ ၈၊ ၂၀၁၉
M-Media
– မြောက်ကိုရီးယားခေါင်းဆောင် ကင်ဂျုံအန်ဟာ ၄ ရက်ကြာခရီးစဉ်အဖြစ် တရုတ်နိုင်ငံကို ရောက်ရှိနေပြီး သမ္မတ ရှီကျင့်ဖျင်နဲ့ တွေ့ဆုံဖို့လည်း ရှိနေပါတယ်။
တရုတ်သမ္မတ ရှီကျင့်ဖျင်ရဲ့ ဖိတ်ကြားချက်ကြောင့် ကင်နဲ့အဖွဲ့ဟာ မနေ့ကနေ့လည်ပိုင်းမှာ ပြုံယမ်းကနေ အထူးရထားနဲ့ တရုတ်နိုင်ငံကို ရောက်ရှိလာတာဖြစ်ပြီး အမေရိကန်သမ္မတ ဒေါ်နယ်ထရမ့်နဲ့ ဒုတိယမြောက်တွေ့ဆုံဖို့စီစဉ်မှု လိပ်ခဲတည်းလည်းဖြစ်နေတဲ့အချိန်မှာ ဒီခရီးစဉ် ပေါ်ထွက်လာတာ ဖြစ်ပါတယ်။
မနှစ်က ကင်ဟာ ၃ ကြိမ်တိုင်တိုင် တရုတ်နိုင်ငံကိုသွားရောက်ကာ ရှီကျင့်ဖျင်နဲ့ တွေ့ဆုံခဲ့ပြီး တောင်ကိုရီးယား သမ္မတ၊ အမေရိကန်သမ္မတတို့နဲ့ မတွေ့ဆုံခင်ရော တွေဆုံအပြီးမှာပါ ဒီလိုသွားတွေ့ခဲ့တာပါ။
ပြီးခဲ့တဲ့နှစ်အတွင်း စင်ကာပူမှာ ထရမ့်နဲ့ တွေ့ဆုံမှုအတွင်း ကင်က ကိုရီးယားကျွန်းဆွယ် နျူကင်းစင်ရေး ဆောင်ရွက်မယ်လို့ ကတိပြုခဲ့ပေမယ့် အသေးစိတ်ဆောင်ရွက်မှုကိစ္စတွေမှာ သဘောတူညီချက် မရတဲ့အတွက် တိုးတက်မှု သိပ်မရှိပါဘူး။
အခုနှစ်အတွင်း ထရမ့်နဲ့ ကင်တို့ နောက်တစ်ကြိမ် တွေ့ဆုံဖို့ရှိနေပြီး ဘယ်နေရာမှာ တွေ့မလဲဆိုတာကို မဆုံးဖြတ်ရသေးဘူးလို့ ထရမ့်က တနင်္ဂနွေနေ့မှာ ပြောကြားခဲ့ပါတယ်။
Ref: CNA