ဖေဖော်ဝါရီ ၂၃၊ ၂၀၁၉
M-Media
– လာမယ့်တစ်ပတ် အမေရိကန်သမ္မတ ဒေါ်နယ်ထရမ့်နဲ့ ထိပ်သီးအစည်းအဝေးအတွက် မြောက်ကိုရီးယားခေါင်းဆောင် ကင်ဂျုံအွန်ဟာ ဒီကနေ့မှာ ရထားနဲ့ ဗီယက်နမ်နိုင်ငံကို ထွက်ခွာသွားတယ်လို့ သိရပါတယ်။
ဗီယက်နမ်နိုင်ငံကလည်း မြောက်ကိုရီးယားခေါင်းဆောင်ဟာ လာမယ့်ရက်အနည်းငယ်အတွင်း နိုင်ငံကို တရားဝင်အလည်အပတ် လာရောက်မယ်လို့ ဒီကနေ့မနက်မှာပဲ ကြေငြာချက် ထုတ်ပြန်ခဲ့ပါတယ်။
ထရမ့်နဲ့ ကင်တို့ဟာ တစ်နှစ်အတွင်း ဒုတိယအကြိမ်မြောက်အဖြစ် လာမယ့်တစ်ပတ် ဗုဒ္ဓဟူးနေ့ ကြာသာပတေးနေ့တွေမှာ ဟနွိုင်းမှာ တွေ့ဆုံဆွေးနွေးကြမှာ ဖြစ်ပါတယ်။ ပထမအကြိမ် ဆွေးနွေးမှုကို ပြီးခဲ့တဲ့နှစ် ဇွန်လက စင်ကာပူနိုင်ငံမှာ ပြုလုပ်ခဲ့ပါတယ်။
ကင်ဂျုံအွန်ရဲ့ ခရီးစဉ်အသေးစိတ်ကို မထုတ်ပြန်ပေမယ့် ရထားနဲ့လာမယ့် ခရီးဟာ ၂ ရက်ခွဲ လောက် ကြာမြင့်မှာဖြစ်ပါတယ်။ ကင်ဟာ ရထားနဲ့ တရုတ်နိုင်ငံကို အရင်ဆုံးသွားမှာဖြစ်ပြီး အဲဒီကနေ ဗီယက်နိမ်နိုင်ငံနယ်စပ်ကို ရထားနဲ့ လာရောက်မှာ ဖြစ်ပါတယ်။ ဆွေးနွေးပွဲပြုလုပ်မယ့် ဟနွိုင်းမြို့ကို နယ်စပ်ကနေ ကားနဲ့ သွာရောက်ဖို့ ရှိနေပါတယ်။
ခေါင်းဆောင်နှစ်ဦး ထိပ်သီးအစည်းအဝေးအတွက် ဟနွိုင်းမြို့က ကိုလိုနီခေတ်အဆောက်အဦး အစိုးရဧည့်ရိပ်သာ Government Guesthouse ကို လျာထားတယ်လို့ သတင်းတွေ ထွက်ပေါ်နေပါတယ်။
Ref: CNA