နိုဝင်ဘာ ၁၅၊ ၂၀၁၉
M-Media
-အမေရိကန်ပြည်ထောင်စု ကယ်လီဖိုးနီးယားပြည်နယ်က အထက်တန်းကျောင်းတစ်ခုမှာ မနေ့က သေနတ်ပစ်ခတ်မှု ဖြစ်ပွားခဲ့ပြီး အခုနှစ်အတွင်း ၈၅ ကြိမ်မြောက် ကျောင်းတွင်းပစ်ခတ်မှု ဖြစ်ပါတယ်။
လော့စ်အိန်ဂျလိစ်နဲ့ သိပ်မဝေးတဲ့ ဆန်တာ ကလာရီတာမြို့ Saugus အထက်တန်းကျောင်းမှာ အသက် ၁၆ နှစ်အရွယ်ကျောင်းသားတစ်ဦးက ပစ္စတိုသေနတ်နဲ့ အတန်းဖော်တွေကို ပစ်ခတ်ခဲ့တာပါ။ သေနတ်သမားဟာ နောက်ပိုင်းမှာ သူ့ရဲ့ခေါင်းကို ပစ်ခတ်ခဲ့ပေမယ့် မသေဘဲ စိုးရိမ်ရတဲ့ အခြေအနေမှာ ရှိနေတယ်လို့ ရဲတပ်ဖွဲ့က သတင်းထုတ်ပြန်ပါတယ်။
သေဆုံးသွားသူတွေဟာ အသက် ၁၆ နှစ်အရွယ် ကျောင်းသူနဲ့ ၁၄ နှစ်အရွယ် ကျောင်းသားတို့ ဖြစ်ပါတယ်။ အသက် ၁၄ နဲ့ ၁၅ နှစ်အရွယ် ကျောင်းသူ ၂ ဦး၊ ၁၄ နှစ်အရွယ် ကျောင်းသားတစ်ဦးတို့လည်း အခုအဖြစ်အပျက်မှာ ဒဏ်ရာရခဲ့ပါတယ်။
သေနတ်သမားဟာ တစ်ယောက်တည်းကျူးလွန်ခဲ့တာဖြစ်ပြီး ဘာ့ကြောင့် ကျူးလွန်ရတယ်ဆိုတဲ့ နောက်ကွယ်ကအကြောင်းအရင်းကို စုံစမ်းစစ်ဆေးနေတယ်လို့ ရဲတပ်ဖွဲ့က ပြောကြားခဲ့ပါတယ်။
၂၀၁၉ ခုနှစ်အတွင်း အမေရိကန်နိုင်ငံက စာသင်ကျောင်းတွေမှာ ဖြစ်ပွားခဲ့တဲ့ သေနတ်ပစ်ခတ်မှုတွေဟာ ၈၅ ခုအထိ ရှိလာခဲ့ပါတယ်။ နိုင်ငံအတွင်း သေနတ်ပစ်ခတ်မှုတွေမြင့်တက်လာတာကြောင့် သေနတ်ကိုင်ဆောင်ခွင့် ထိန်းချုပ်ရေးအတွက် တက်ကြွလှုပ်ရှားသူတွေက အစိုးရကို ပိုမိုတွန်းအားပေးလာကြပါတယ်။
Ref: Aljazeera