ဇွန် ၂၇၊ ၂၀၂၂
M-Media
– ငလျင်ဒဏ်ခံခဲ့ရတဲ့ အာဖဂန်နိုင်ငံ အရှေ့ပိုင်းမှာ နောက်ဆက်တွဲ ကူးစက်ရောဂါ ပြဿနာတွေ ရင်ဆိုင်ရမယ့် အန္တရာယ် ရှိနေပါတယ်။
ပြီးခဲ့တဲ့တစ်ပတ်က ငလျင်ကြောင့် အနည်းဆုံး လူ တစ်ထောင်လောက် သေဆုံးခဲ့ပြီး၊ နေအိမ်ပေါင်း တစ်သောင်းကျော် ပျက်ဆီးခဲ့ပါတယ်။ ဒဏ်ရာရရှိသူ အရေအတွက်က ၂၀၀၀ လောက် ရှိနေပါတယ်။
သန့်ရှင်းတဲ့ အစားအသောက်နဲ့ သောက်သုံးရေ မရတာကြောင့် ငလျင်ဒဏ် ခံစားရတဲ့ ဒေသတွေမှာ ၀မ်းရောဂါလို ကူးစက်ရောဂါတွေ ဖြစ်လာနိုင်တယ်လို့ ကုလသမဂ္ဂ လူသားချင်း စာနာထောက်ထားမှုဆိုင်ရာရုံး OCHA က ပြောပါတယ်။
တာလီဘန်အစိုးရ ကျန်းမာရေး၀န်ကြီးဌာန ပြောရေးဆိုခွင့်ရှိသူ ရှာရာဖတ် ဇာမန်က သူတို့အစိုးရဟာ တတ်နိုင်သလောက် လုပ်ဆောင်နေပမယ့် လိုအပ်ချက်တွေရှိနေသေးကြောင်း၊ နိုင်ငံတကာအသိုင်းအ၀ိုင်း၊ အကူအညီပေးရေးအဖွဲ့အစည်းတွေအနေနဲ့ အကူအညီတွေပေးပို့ဖို့ မေတ္တာရပ်ခံကြောင်း ပြောကြားထားပါတယ်။
လတ်တလောမှာ ကုလသမဂ္ဂနဲ့ ပြည်ပနိုင်ငံတစ်ချို့က ငလျင်ဒဏ်ခံစားရတဲ့ အာဖဂန်ပြည်သူတွေအတွက် အကူအညီတွေ ပေးပို့ထားပါတယ်။
Ref: CNA