ဇန်န၀ါရီ ၇၊ ၂၀၂၂
M-Media
-ထိုင်၀မ်က နာမည်ကြီးအဆိုတော် ဂျေးချိုဟာ မလေးရှား ဘောလုံး ပရိတ်သတ်တွေရဲ့ ၀ေဖန်မှုကို ခံနေရပါတယ်။
ဂျေးချိုဟာ ဇန်န၀ါရီ ၁၅ ရက်နေ့ ကွာလာလမ်ပူမြို့က ဘူကစ်ဂျာလီ အားကစားကွင်းမှာ ရှိုးပွဲလုပ်ဖို့ စီစဥ်ထားတာပါ။
မလေးရှားဘောလုံးအသင်းက ဒီဇင်ဘာ ၇ ရက်နေ့မှာ AFF Championship ဆီမီးဖိုင်နယ် ပထမအကျော့အဖြစ် ထိုင်းအသင်းနဲ့ ဘူကစ်ဂျာလီကွင်းမှာ ကစားရမှာဖြစ်ပါတယ်။
ဘူကစ်ဂျာလီကွင်းဟာ ပရိတ်သတ် ၈၇၄၁၁ ဦး ဆံ့ပေမယ့် မလေးရှားဘောလုံးအဖွဲ့ချုပ်က လက်မှတ် ၅၉၀၀၀ သာ ရောင်းချထားပါတယ်။ ဂျေးချိုရဲ့ ပွဲအတွက် ထိုင်ခုံတွေဖြုတ်ပြီး စတိတ်စင်ဆောက်ရတာကြောင့် ထိုင်ခုံတွေ လျော့နည်းသွားတာပါ။
ဒီကိစ္စကို မလေးရှားဘောလုံးပရိတ်သတ်တွေက မကျေနပ်ဘဲ ဂျေးချိုရဲ့ ဆိုရှယ်မီဒီယာအကောင့်တွေမှာ သွားရောက်ပြောဆိုမှုတွေ လုပ်ခဲ့ပါတယ်။
ဂျေးချိုကတော့ ရှိုးပွဲကို သူ့ဖက်က ဆိုင်းငံ့ပေးထားနိုင်ပေမယ့် ပွဲစီစဥ်သူတွေနဲ့ မလေးရှားဘောလုံးအဖွဲ့ချုပ်တို့က ဒါမျိုး လုပ်ပေးနိုင်မလားဆိုတာ အရင်မေးဖို့ Instagram စာမျက်နှာကနေတစ်ဆင့် မလေးရှား ဘောလုံးပရိတ်သတ်တွေကို တုန့်ပြန်ခဲ့ပါတယ်။
မလေးရှား အားကစားနဲ့ လူငယ်ရေးရာ၀န်ကြီး ဟန်နာယိုက Twitter စာမျက်နှာကနေတစ်ဆင့် ဒီကိစ္စကို ဖြေရှင်းထားပါတယ်။
ဂျေးချိုဟာ ရှိုးပွဲအတွက် လွန်ခဲ့တဲ့ ၄ နှစ် ၂၀၁၉ မတ်လ ၁၉ ရက်နေ့ကတည်းက ဘောလုံးကွင်းကို ကြိုငှားထားတာဖြစ်ပြီး မလေးရှားဘောလုံးအဖွဲ့ချုပ်က ၂၀၂၀ ခုနှစ် သြဂုတ်လမှ ကွင်းကို ငှားရမ်းတာလို့ ရေးသားခဲ့ပါတယ်။
“ရှိုးပွဲရော၊ ဘောလုံးပွဲပါ နိုင်ငံတကာနဲ့ဆိုင်တဲ့ ကိစ္စဖြစ်ပြီး အစိုးရအတွက် လုပ်ရကိုင်ရခက်တဲ့ အရာတွေပါ။ နိုင်ငံတကာရှိုးပွဲတစ်ခုကို လွယ်လွယ်ကူကူနဲ့ ဖျက်ပစ်လို့ မရပါဘူး” လို့ The New Straits Times သတင်းဌာနကို ဟန်နာယိုက ပြောကြားခဲ့ပါတယ်။
AFF ဆီမီးဖိုင်နယ်ပွဲကြောင့် ဂျေးချိုဟာ ပွဲကို အရင်ကတည်းက ၂ ရက် နောက်ဆုတ်ပေးထားပြီးသား ဖြစ်ပါတယ်
Ref: CNA