မြောက်ကိုရီးယားကို နျူဒုံးကျည် အလုံး ၈၀ နဲ့ ချိန်ထားတော့မယ့် အမေရိကန်

ဧပြီ ၂၈၊ ၂၀၂၃

M-Media

-အမေရိကန်နဲ့ တောင်ကိုရီးယားသမ္မတတို့ရဲ့ အခုတစ်ပတ် ဆွေးနွေးမှုမှာ သမိုင်းတွင်မယ့် သဘောတူညီချက်တစ်ခု ရရှိခဲ့ပါတယ်။

အဲဒါကတော့ အမေရိကန်ရဲ့ နည်းပညာမြင့် နျူလက်နက်တပ် ရေငုပ်သင်္ဘောတစ်စင်း တောင်ကိုရီးယားမှာ ချထားဖို့ ဖြစ်ပါတယ်။ ဒါဟာ ၁၉၈၁ ခုနှစ်နောက်ပိုင်း အမေရိကန်က တောင်ကိုရီးယားမှာ ပထမဆုံး ရေငုပ်သင်္ဘော ထားရှိမယ့် အစီအစဥ်ပါ။

“ကျွန်တော်တို့ နှစ်နိုင်ငံမှာ သံမဏိ ကာကွယ်ရေးသဘောတူညီချက် ရှိပါတယ်။ နျူကလီးယားခြိမ်းခြောက်မှုကို ကာကွယ်ရေးအပါအ၀င် ဘယ်လို အန္တရာယ်မျိုးကိုမဆို ကာကွယ်ပေးမယ်ဆိုတဲ့ သဘောတူညီချက်မျိုးပါ” လို့ အိမ်ဖြူတော်မှာ ‘၀ါရှင်တန် ကြေငြာစာတမ်း’ ကို တောင်ကိုရီးယားသမ္မတနဲ့ လက်မှတ်ရေးထိုးအပြီး အမေရိကန်သမ္မတ ဂျိုးဘိုင်ဒန်က ပြောကြားခဲ့ပါတယ်။

ဗုံးကြဲသင်္ဘော

တောင်ကိုရီးယားမှာ အမေရိကန်ရဲ့ Ohio-class အမျိုးအစား ရေငုပ်သင်္ဘော ထားရှိမှာပါ။

အမေရိကန်မှာ Ohio-class ရေငုပ်သင်္ဘော ၁၄ စင်းရှိပြီး ၀ါရှင်တန်ပြည်နယ်မှာ ၈ စီး၊ ဂျော်ဂျီယာပြည်နယ်မှာ ၆ စီး ထားရှိပါတယ်။

ပေ ၅၆၀ ရှည်တဲ့ ဒီသင်္ဘောတွေဟာ ‘ဗုံးကြဲသမားများ’ လို့လည်း အမည်တွင်ပါတယ်။ နျူစွမ်းအင်သုံးအင်ဂျင် တပ်ဆင်ထားတာပါ။

ရေအောက်မှာ ၇၇ ရက် တစ်ဆက်တည်းငုပ်နိုင်ပြီး ရေပေါ်မှာ ၃၅ ရက် ပြုပြင်ထိန်းသိမ်းဖို့ သတ်မှတ်ထားပါတယ်။ ဒီသင်္ဘောတွေမှာ တာ၀န်ထမ်းဆောင်မယ့် တပ်သား စုစုပေါင်း ၁၅၅ ဦးရှိပြီး ‘အပြာအသင်း’ နဲ့ ‘ရွှေရောင်အသင်း’ ခွဲထားပါတယ်။

ဒီအသင်းတွေဟာ တစ်လှည့်စီ တာ၀န်ထမ်းဆောင်ရမှာ ဖြစ်ပါတယ်။

ဘာလက်နက်တွေရှိလဲ

Ohio-class ရေငုပ်သင်္ဘောတစ်စီးဟာ မိုင်ပေါင်း ၄၆၀၀ အထိ ပစ်ခတ်နိုင်တဲ့ Trident II ဒုံးကျည် အလုံး ၂၀ စီတင်ဆောင်နိုင်ပါတယ်။ ပစိတ်ဖိတ်၊ အိန္ဒိယနဲ့ အာတိတ် သမုဒ္ဒယာ ဘယ်နားကနေဖြစ်ဖြစ် မြောက်ကိုရီးယားကို တိုက်ရိုက်ပစ်ခတ်နိုင်ပါတယ်။

Trident II ဒုံးကျည်တစ်လုံးဟာ ပဲ့ထိန်း နျူထိပ်ဖူး ၄ ခုစီ တပ်ဆင်နိုင်တာကြောင့် ရေငုပ်သင်္ဘောတစ်စီးဟာ နျူဒုံးကျည် အလုံး ၈၀ အထိ ပစ်ခတ်နိုင်မှာပါ။

Ohio-class ရေငုပ်သင်္ဘော တစ်စီးတည်းနဲ့ မြောက်ကိုရီးယားတစ်နိုင်ငံလုံးကို ချေမွပစ်နိုင်တယ်လို့ ကျွမ်းကျင်သူတွေက သုံးသပ်ပါတယ်။

Ohio-class ရေငုပ်သင်္ဘောရဲ့ နောက်ထပ် အားသာချက်တစ်ခုက ကိုယ်ပျောက်နိုင်စွမ်းပါ။ ရေအောက်မှာ လုံး၀ ဆူညံမှု မရှိတာကြောင့် ယေဘူယျအားဖြင့် ဘယ်ရေအောက်ရေဒါကမှ ဖမ်းမမိနိုင်ပါဘူး။

ခြိမ်းခြောက်မှုတိုး

မြောက်ကိုရီးယားဟာ သူ့ရဲ့ နျူကလီးယားလက်နက် အင်အားကို ပိုမိုတိုးချဲ့လာပြီး ၂၀၂၂ ခုနှစ်အတွင်း စံချိန်တင် စမ်းသပ်မှုတွေ ပြုလုပ်ခဲ့ပါတယ်။

၂၀၂၃ နှစ်သစ်အကြို မိန့်ခွန်းမှာ မြောက်ကိုရီးယားခေါင်းဆောင် ကင်ဂျုံအွန်က တောင်ကိုရီးယားနဲ့ အမေရိကန်တို့ရဲ့ ခြိမ်းခြောက်မှု မြင့်တက်လာတာကြောင့် မိမိတို့ရဲ့ နျူလက်နက်ပိုင်ဆိုင်မှုကို တိုးချဲ့သွားမယ်လို့ ထည့်သွင်းပြောကြားခဲ့ပါတယ်။

အဲဒီနောက်ပိုင်း တောင်ကိုရီးယားမှာ ကိုယ်ပိုင် နျူလက်နက်ထားရှိဖို့ ပြောဆိုတိုက်တွန်းမှုတွေ ရှိလာပါတယ်။

ကိုရီးယားကျွန်းဆွယ်မှာ နျူလက်နက် ပိုမိုပြန့်နှံ့လာမှာ စိုးရိမ်တဲ့အတွက် တောင်ကိုရီးယားက နျူလက်နက်ပိုင်ဆိုင်ဖို့ ကြိုးပမ်းလာရင် အမေရိကန်က ခွင့်ပြုမှာမဟုတ်ပါဘူး။

ဒါပေမယ့် မြောက်ကိုရီးယားရဲ့ နျူရန်ကို အပြည့်အ၀ ကာကွယ်ပေးနိုင်မယ့် ‘၀ါရှင်တန် ကြေငြာစာတမ်း’ နဲ့ တောင်ကိုရီးယားကို ချွေးသိပ်ပေးခဲ့ပါတယ်။

Ref: CNN