သြဂုတ် ၂၇၊ ၂၀၂၄
M-Media
-အကြောက်တရား ရိုက်ထည့်ပေးခြင်းထက်၊ မိမိတို့စွမ်းအားကို ကိုယ်တိုင်မြှင့်တင်ခြင်းနဲ့သာလျင် မွတ်စလင် လူ့အဖွဲ့အစည်း ရှင်သန်ရပ်တည်ရေး ဆောင်ရွက်သွားရမယ်လို့ မလေးရှားက ဘုရင်တစ်ပါးဖြစ်တဲ့ ဆူလ်တန် နဇ်ရင် မူအီဇူဒင်ရှားက ပြောပါတယ်။
အခုတစ်ပတ် အစောပိုင်းက ပြုလုပ်တဲ့ ၇၂ ကြိမ်မြောက် အစ္စလာမ့်ရေးရာကောင်စီ နှစ်ပတ်လည် ညီလာခံမှာ ဘုရင်ကြီးက ပြောကြားခဲ့တာပါ။ ဘုရင် မူအီဇူဒင်ရှားဟာ ကောင်စီဥက္ကဌဖြစ်ပြီး ညီလာခံကို ဦးဆောင်ကျင်းပခဲ့တာ ဖြစ်ပါတယ်။
အခြားဘာသာ၀င်တွေနဲ့ပတ်သက်ပြီး မွတ်စလင်လူ့အဖွဲ့အစည်းမှာ အကြောက်တရား ရိုက်ထည့်ပေးခြင်းဟာ ကလေးငယ်တွေကို သရဲပုံပြင်တွေပြောပြီး ခြောက်လှန့်တာနဲ့ ဆင်တူကြောင်း၊ မွတ်စလင်မဟုတ်တဲ့ လူ့အဖွဲ့အစည်းတွေကိုလည်း စိတ်အနှောက်အယှက်ဖြစ်စေကြောင်း ဘုရင်ကြီးက ဆိုပါတယ်။
“အကြောက်တရားရိုက်ထည့်ခြင်းဟာ လူ့အဖွဲ့အစည်းကို အလွန်ထိခိုက်ပါတယ်။ မိမိကိုယ်ကို ယုံကြည်မှု လျော့ကျစေတယ်။ ကိုယ့်လူ့အဖွဲ့အစည်းရဲ့ ပြင်ပ၊ အထူးသဖြင့် ကမ္ဘာနဲ့ချီပြီး ယှဥ်ပြိုင်ရတဲ့ အခါမျိုးမှာ ကိုယ့်လူ့အဖွဲ့အစည်းရဲ့ စွမ်းဆောင်ရည်ကို ကျဆင်းစေပါတယ်”
လူ့အဖွဲ့အစည်းနဲ့ အစ္စလာမ်သာသနာရဲ့ ဂုဏ်သိက္ခာကို ထိခိုက်ပျက်ဆီးစေတဲ့ လုပ်ရပ်မျိုးတွေကို မွတ်စလင်လူ့အဖွဲ့အစည်းက လုံး၀ လက်မခံဖို့လည်း ဘုရင် မူအီဇူဒင်က တိုက်တွန်းခဲ့ပါတယ်။
ညီလာခံကို မလေးရှား၀န်ကြီးချုပ် အန်၀ါရ် အီဘရာဟင်နဲ့ အစိုးရ၀န်ကြီးတစ်ချို့လည်း တက်ရောက်ခဲ့ပါတယ်။
Ref: The Straits Times