Author: M-Media

ဘ၀ရှင်သန်မှု အတွက် လှေဖြင့် ထွက်ပြေးသည့် လမ်းကိုသာ ရွေးချယ်နေကြရသည့် ရိုဟင်ဂျာများ

ဇွန်၂၀ ၊ ၂၀၁၅
M-Media

– ပင်လယ်ပြင်တွင် စွန့်ပစ်ခံရသည့် အန္တရာယ်နှင့် နယ်စပ်များတွင် တင်းကြပ်သည့် ထိန်းချုပ်မှုများ ရှိနေသော်လည်း မြန်မာနိုင်ငံ အနောက်ပိုင်း ရခိုင်ပြည်နယ်တွင် နေထိုင်ကြသည့် ရိုဟင်ဂျာများက တိုင်းပြည်အားစွန့်ခွာရန် နည်းလမ်းများကို ဆက်လက် ရှာဖွေနေကြလေသည်။

ပင်လယ်ပြင်တွင် မျောပါနေကြသော ရွှေ့ပြောင်းလာသူများ၏ ခြောက်ခြားဖွယ်ပုံရိပ်များမှာ ၎င်းတို့၏ ဒုက္ခသုက္ခများ အတွက် နိုင်ငံတကာ အသိုင်းအ၀ိုင်း၏ အာရုံစိုက်မှုကို ခံခဲ့ရသည်။ ထိုအထဲမှ ၄၀၀၀ ကျော်မှာ ကယ်တင်ခံခဲ့ရပြီး အင်ဒိုနီးရှား၊ မလေးရှားနှင့် မြန်မာနိုင်ငံတို့က ယာယီနေရာချထားပေးထားသည်ဟု ဆိုသည်။

အချို့သော စောင့်ကြည့်အဖွဲ့များကမူ နောက်ထပ် လူ ၂၀၀၀ ကျော်မှာ ပင်လယ်ထဲတွင် ရှိကောင်းရှိနိုင်သည်ဟု ပြောကြားခဲ့သည်။ ရိုဟင်ဂျာအများစုအတွက်မူ ဘ၀အသစ်က အရာရာတိုင်းကို စွန့်စားမှပင် ရရှိနိုင်မည်ဖြစ်သည်။

မြန်မာနိုင်ငံမှ ရိုဟင်ဂျာအများစုက ၎င်းတို့မှာ လူကုန်ကူးသူများနှင့် ခရီးသွားရခြင်း၏ အန္တရာယ်ကို သတိမူမိကြသည်ဟုဆိုသည်။ သို့သော်လည်း ထိုကဲ့သို့အန္တရာယ်ကို ရင်ဆိုင်စွန့်စားမှသာလျှင် အနည်းဆုံး မျှော်လင့်ချက်မှုန်းဝါးဝါးကို ရရှိကြသည်။

“ကျွန်တော်တို့ ဒီမှာနေရင် ကျွန်တော်တို့ရဲ့ဘ၀က ဆိုးရွာလာမှာပါ။ အခြားနေရာမှာ ပိုပြီး သက်တောင့်သက်သာရှိတဲ့ ဘ၀ကို မျှော်လင့်နိုင်တာကြောင့် ကျွန်တော်တို့ စွန့်ခွာကြတာပါ။ ကျွန်တော်တို့ဟာ ဒီမြေကမဟုတ်ဘူး၊ ဒီမှာနေလို့မရဘူး၊ ကျွန်တော်တို့ဟာ ကျူးကျော်သူတွေဖြစ်တယ်လို့ ပြောပြီး အာဏာပိုင်တွေက ကျွန်တော်တို့ကို ခြိမ်းခြောက်ကြပါတယ်။ ကျွန်တော်တို့ ရွာခေါင်းဆောင်ကို ခြိမ်းခြောက်တာမျိုးအပါအ၀င် သူတို့က ကျွန်တော်တို့ကို အကြိမ်တော်တော်များများ ခြိမ်းခြောက်နေကြပါတယ်။ ကျွန်တော်တို့ရဲ့ နေ့စဉ်ဘ၀က ကျွန်တော်တို့အတွက် ခက်ခဲပါတယ်” ဟု ရခိုင်ပြည်နယ်မှ ရိုဟင်ဂျာတစ်ဦးဖြစ်သူ အီလီယက်စ်က ပြောကြားခဲ့သည်။

ရခိုင်လူမျိုးများက ရိုဟင်ဂျာဆိုင်တစ်ဆိုင်အား မီးရှို့ဖျက်ဆီးခဲ့မှုကို ပြောပြ၍ ရိုဟင်ဂျာများမှာ နေ့စဉ် ကြောက်ရွံ့မှုအောက်တွင် မည်ကဲ့သို့ နေရသည်ကို ၎င်းက မီးမောင်းထိုးပြခဲ့သည်။

“ဈေးအရှေ့မှာ လုံခြုံရေးတပ်ဖွဲ့ဝင်တွေ ရှိပါတယ်။ သူတို့ကကြည့်နေပြီး ရခိုင်တွေကို မဖမ်းပါဘူး။ ရခိုင်တွေကလည်း သူတို့လုပ်တာကို လုံခြုံရေးတပ်ဖွဲ့တွေ ကြည့်နေတယ်ဆိုတာ သိပါတယ်။ သူတို့ မီးရှို့ကြပြီး အခြား ဆိုင် ၁၀ ဆိုင်က ပစ္စည်းတွေကို ခိုးယူကြပါတယ်။ ဘာမှမကျန်ပါဘူး” ဟု အီလီယက်စ်က ထပ်လောင်းပြောကြားခဲ့သည်။

အင်တာဗျူးမှုအား တစ်ဦးတစ်ယောက်က မြင်သွားမည်ကို စိုးရိမ်သည့်အတွက် အီလီယက်စ်နှင့် အင်တာဗျူးမှာ တိုတောင်းခဲ့လေသည်။ ထိုအချင်းအရာက မြို့၏ လူဦးရေ အများစုဖြစ်သော်လည်း မောင်တောမြို့ရှိ ရိုဟင်ဂျာများ အတွင်း ကိန်းဝပ်နေသည့် အကြောက် တရားပင် ဖြစ်သည်။

သို့သော်လည်း အီလီယက်စ်၏ ပြောကြားမှုများကို ရခိုင်ပြည်နယ်ဝန်ကြီးချုပ် ဦးမောင်မောင်အုန်းက လုံးဝ ပယ်ချခဲ့သည်။

“အဓိပ္ပါယ်မရှိပါဘူး။ ကျွန်တော်လက်မခံပါဘူး။ မောင်တောမှာ လူဦးရေရဲ့ ၉၇ ရခိုင်နှုန်းက ဘင်္ဂါလီတွေပါ။ ၃ ရာခိုင်နှုန်းသာ ရခိုင်တွေပါ။ ဘာ့ကြောင့် လူများစုတွေက ရခိုင်လူနည်းစုတွေကို ကြောက်ရသလဲဆိုတာ ခင်ဗျားမေးရပါမယ်။ ကျွန်တော့်ရဲ့မေးခွန်းက ဘယ်သူတွေက တကယ် ကြောက်ရလဲဆိုတာပါပဲ?” ဟု ၎င်းက ပြန်လည်ဖြေကြားခဲ့လေသည်။

မြန်မာအာဏာပိုင်များ အသုံးပြုသည့် ဘင်္ဂါလီဟူသော စကားလုံးကို လက်မခံဘဲ ရိုဟင်ဂျာဟူ၍သာ ဖော်ပြနေပါက နိုင်ငံသား အခွင့်အရေးနှင့် ပတ်သက်၍ သဘောတူညီရန် နှစ်ဘက်စလုံးအတွက် ခက်ခဲမည်ဟု အစိုးရက အစဉ်တစ်စိုက် ပြောကြားထားသည်။

အဆိုပါ အခွင့်အရေးများသည်ပင်လျှင် ရွှေ့ပြောင်းပြဿနာများ၏ အခြေခံအကြောင်းအရင်းတစ်ခုအဖြစ် သတ်မှတ်ကြလေသည်။

Ref: Channelnewsasia

June 20, 2015
ကောက်ယူခဲ့တဲ့ သန်းခေါင်စာရင်းနှင့် ထုတ်ပြန်လိုက်သည့် အစီရင်ခံစာ

ဇွန် ၂၀ ၊ ၂၀၁၅
M-Media
မာန်ထက်သျှံ ရေးသည်။

ပြီးခဲ့တဲ့ ရက်သတ္တပတ် များက သက်ဆိုင်ရာမှ ၂၀၁၄ခုနှစ် လူဦးရေနှင့် အိမ်အကြောင်းအရာ သန်းခေါင်စာရင်း ပင်မအစီရင်ခံစာ ကိုထုတ်ပြန်လိုက်ပါတယ်။ အစီရင်ခံစာကို လေ့လာမိသောအခါ မြန်မာနိုင်ငံရဲ့ လူဦးရေနှင့် ပြည်သူလူထုရဲ့ လူမှုစီးပွားဘ၀ အခြေအနေကို ဆန်းစစ်နိုင်မှာ ဖြစ်ပါတယ်။

လေ့လာမိသမျှ သန်းခေါင်စာရင်း ကောက်ယူမှုအမျိုးမျိုးရှိပါတယ်။ လူဦးရေနှင့် အိမ်အကြောင်းအရာ သန်းခေါင်စာရင်း၊ လယ်ယာမြေ သန်ခေါင်းစာရင်း၊ သစ်တော သန်းခေါင်စာရင်း နဲ့ စက်မှုလက်မှု အကြောင်းအရာ သန်းခေါင်စာရင်းတွေပါပဲ။ ၂၀၁၄ခုနှစ်အတွင်း မြန်မာပြည်မှာ ကောက်ယူခဲ့တာကတော့ လူဦးရေနှင့် အိမ်အကြောင်းအရာ သန်းခေါင်စာရင်းပါ။

ကောက်ယူခဲ့တဲ့ သန်းခေါင်စာရင်းကို လုပ်ငန်းကဏ္ဍ လေးဆင့်နဲ့ ဆောင်ရွက်ရာ ၂၀၁၁ခုနှစ်မှစပြီး ကြိုတင်ပြင်ဆင်ခြင်း၊ စာရင်းကောက်ယူခြင်း၊ Data Processing လုပ်ခြင်းနဲ့ ယခု ပင်မ အစီရင်ခံစာ ထုတ်ပြန်ခြင်းပဲဖြစ်ပါတယ်။ ထုတ်ပြန်လုက်တဲ့ အစီရင်ခံစာပါ အချက်အလက်များသည် ၂၀၁၄ခုနှစ် မတ်လ၂၉ရက်နေ့ ညဉ့်သန်းခေါင်ယံ (ည၁၂နာရီတိတိ) အချိန် သန်းခေါင်စာရင်း ရည်ညွှန်းချိန်ပေါ် မူတည်၍ ကောက်ယူရရှိသော အချက်အလက်များကို ပြုစုထုတ်ပြန်ခြင်းပါ။

၂၀၁၄ခုနှစ် မတ်လ ၃၀ရက်နေ့မှ ဧပြီလ၁၀ရက်နေ့အထိ ကောက်ယူခဲ့တဲ့ သန်းခေါင်စာရင်းဆိုင်ရာ အချက်အလက်များကို မနှစ်က သြဂုတ်လလောက်က ရှေ့ပြေးအစီရင်ခံစာ ထုတ်ခဲ့ပါသေးတယ်။ ခေတ်အဆက်ဆက် ကောက်ယူခဲ့သော သန်းခေါင်စာရင်းများအရ ၁၈၈၁ခုနှစ်တွင် လူဦးရေ သုံးသန်း၊ ၁၈၉၁ ခုနှစ်တွင် ကိုးသန်း၊ ၁၉၄၁ ခုနှစ်စာရင်းအရ ၁၆သန်းရှီပြီး ၁၉၇၂ခုနှစ်တွင် လူဦးရေ ၂၈သန်း ရှိနေကြောင်း သိရပါတယ်။ မဆလ အစိုးရ လက်ထက် နောက်ဆုံးကောက်ယူခဲ့သော ၁၉၈၃ခုနှစ် သန်းခေါင်စာရင်းအရ လူဦးရေ ၃၅ဒဿမ၃ သန်းရှိနေခဲ့ပါတယ်။

ယခင်က မြန်မာပြည်ရဲ့ လူဦးရေကို ၂၀၁၃ခုနှစ် အောက်တိုဘာ၁ရက်နေ့ အစိုးရ တွက်ချက်စာရင်းအရ ၆၁.၅၇သန်း၊ အာရှဖွံ့ဖြိုးရေးဘဏ်က သန်း ၆၀၊ အပြည်ပြည်ဆိုင်ရာ ငွေကြေးရန်ပုံငွေအဖွဲ့ က ၆၄ သန်း ဟုအသီးသီး ခန့်မှန်းခဲ့ကြပေမဲ့ ယခုဆို မြန်မာနိုင်ငံရဲ့ ပကတိ လူဦးရေစာရင်း တစ်ခုကို သိရှိရပြီ ဖြစ်သည်။ နှစ်၃၀ကျော်ကြာမှ ပြန်လည်ကောက်ယူခဲ့သော သန်းခေါင်စာရင်း အရ မြန်မာနိုင်ငံရဲ့ လက်ရှိလူဦးရေမှာ ၅၁.၄ သန်းကျော်ရှိနေကြောင်း တွေ့ရပါတယ်။

လူဦးရေ စာရင်းတစ်ခုသိရုံနှင့်ပင် နိုင်ငံရဲ့ နှစ်စဉ် ဘတ်ဂျက်လျာထား ဆောင်ရွက်မှုများ၊ နိုင်ငံတော်ရဲ့ သယံဇာတ ရင်းမြစ်များနှင့် စားနပ်ရိက္ခာ ဖူလုံရေးဆိုင်ရာ ရေတိုရေရှည် ချမှတ်ဆောင်ရွက် နိုင်ရေးအတွက် များစွာ အထောက်အကူပြုပါတယ်။

အိမ်ထောင်စု ဆယ်သန်းကျော်အနက် အမျိုးသားဦးရေ ၂၄သန်းကျော်နှင့် အမျိုးသမီးဦးရေ ၂၆သန်းကျော် ရှိနေပါတယ်။ ရာခိုင်နှုန်းအားဖြင့် အမျိုးသား ၄၈.၂၂ ရာခိုင်နှုန်း၊ အမျိုးသမီး ၅၁.၇၈ ရာခိုင်နှုန်း အချိုးဖြစ်ပါတယ်။ ကျေးလက်နဲ့ မြို့ပြနေထိုင်မှုမှာ ၇၀ အချိုး ၃၀ဖြစ်ပါတယ်။ ဒေသ အလိုက် လူဦးရေပြန့်နှံ့မှုတွင် ရန်ကုန်တိုင်းဒေသကြီးတွင် အများဆုံးဖြစ်ပြီး ကယားပြည်နယ်မှာတော့ လူဦးရေ သိပ်သည်းဆ အနည်းဆုံးဖြစ်ပါတယ်။

လူတစ်ဦးချင်းစီရဲ့ ပျှမ်းမျှမျှော်မှန်း သက်တမ်းမှာလည်း အမျိုးသားနှင့် အမျိုးသမီး ခန့်မှန်းခြေ ၆နှစ်လောက် ကွာဟနေတာကို ပင်မ အစီရင်ခံစာက မီးမှောင်ထိုးပြနေပါတယ်။ မွေးကင်းစနဲ့ အသက် ၅နှစ်အောက် ကလေးငယ်များ သေဆုံးနှုန်းဟာလည်း တစ်နိုင်ငံလုံးအတိုင်းအတာအရ မြင့်မား ဆဲပင်ဖြစ်ပါတယ်။ ယခင်က နှစ်စဉ်လူဦးရေတိုးနှုန်းဟာ ၀. ၉၇ ရာခိုင်နှုန်း ဟုခန့်မှန်း တွက်ချက်သော်လည်း ယခုဆို နှစ်စဉ် လူဦးရေတိုးနှုန်းဟာ ၀.၈၉ ရာခိုင်နှုန်းဟု ကိန်းဂဏန်း တစ်ခု ထွက်လာပြီလည်း ဖြစ်ပါတယ်။

နိုင်ငံတွင်းရှိ ၆၉.၃ ရာခိုင်နှုန်းသော ပြည်သူများဟာ နိုင်ငံသားစိစစ်ရေးကတ်ကို ကိုင်ဆောင်ထားသော်လည်း ယာယီသကသေခံကတ် ၀ှိုက်ကတ်နှင့် ဘာကတ်မှ မကိုင်ဆောင်ထားသူတွေဟာလည်း ၂၈ ရာခိုင်နှုန်း နီးပါးရှိနေသေးပါတယ်။ အများအားဖြင့် ၀ှိုက်ကတ်နှင့် ဘာကတ်မှ မကိုင်ဆောင်ထားသူတွေဟာ နယ်စပ်ဒေသမှ ပြည်သူတွေဖြစ်လို့ ခိုးဝင်လာသူတွေပါလို့ ယတိပြတ်ပြောလို့ မရပါဘူး။ နိုင်ငံသား တစ်ယောက်ကို နိုင်ငံသား အဖြစ် အသိအမှတ် မပြုခြင်းဟာလည်း နိုင်ငံသား အခွင့်အရေး ဆုံးရှုံးမှု တစ်ရပ်ပါပဲ။ ထိုသူများကို နိုင်ငံသား စိစစ်ရေး လုပ်ငန်းစဉ်ဖြင့် နိုင်ငံသား အခွင့်အရေး ပေးမှာလား။ ဒါမှမဟုတ် ထိုသူများကို ရှေ့ဆက် ဘယ်လိုဆောင်ရွက်မယ်ဆိုတာ အစိုးရအတွက် မေးခွန်းတစ်ခု ဖြစ်လာပါတယ်။ ဒါလက်ရှိ အသေးစိတ် ကိုင်တွယ် ဖြေရှင်းရမယ့် ပြဿနာ တစ်ရပ်အဖြစ် သန်းခေါင်စာရင်းက ညွှန်းဆိုနေပါတယ်။

စွမ်းအင်ကဏ္ဍကို ခြုံငုံသုံးသပ်ကြည့်သော် အလင်းရောင်ရရှိမှုအတွက် လျှပ်စစ်မီး အသုံးပြုမှုဟာ တပြည်လုံး အတိုင်းအတာအရ သုံးပုံ တစ်ပုံခန့်သာရှိပြီး အစားအစာ ချက်ပြုတ်စားသောက်ရာမှာလည်း သစ်သား၊ ထင်း၊ မီးသွေး၊ လောင်စာတောင့်များကို အဓိက အားထားရဆဲဖြစ်ပါတယ်။ ဒါဟာ ဘာကိုပြသ သလဲဆိုရင် ပြည်သူတွေ လျှပ်စစ်မီး လုံလုံလောက်လောက် မရတာဟာ မြို့ပြနှင့် ကျေးလက်များ အကြားတွင် သိသာစွာ ကွာခြားနေပါတယ်။ သဘာဝပစ္စည်းများဖြစ်တဲ့ ရုပ်ကြွင်းလောင်စာ သစ်သား၊ ထင်း၊ မီးသွေး စတာတွေ အသုံးပြုမှု မြင့်မားနေတာဟာ သစ်တောများနှင့် သဘာဝ ပတ်ဝန်းကျင်အတွက် အလွန် အန္တရာယ် ရှိနေတယ်ဆိုတာ ညွှန်ပြနေပါတယ်။

ပြည်သူတွေ ရေကောင်းရေသန့် မရရှိမှုမှာ လူထုရဲ့ ပျှမ်းမျှ သုံးပုံ တစ်ပုံနီးပါး ရှိတာကိုတွေ့ရပြီး သန့်ရှင်းသော သောက်ရေ၊ သုံးရေ ရရှိရေးအတွက်လည်း မည်ကဲ့သို့ ဆောင်ရွက်ရမည်ကို အဖြေရှာရမှာ ဖြစ်ပါတယ်။ တဖက်က ပြည်သူ့ ကျန်းမာရေး အမြင်အရ ကြည့်လျှင် မသန့်ရှင်းသော အိမ်သာ သုံးစွဲမှုဟာ ပြည်သူတစ်ရပ်လုံးရဲ့ ၄ချိုး ၁ချိုး ရှိနေပြီး အဲ့ဒီအနက် ၁၄ရာခိုင်နှုန်းကျော်ကလည်း အိမ်သာမရှိဘဲ သုံးစွဲနေတာကို တွေ့ရပါတယ်။ နေအိမ်များရဲ့ ၇၀ ရာခိုင်နှုန်းဟာ သန့်ရှင်းသော ရေနှင့် မိလ္လာစနစ်များ ပိုင်ဆိုင်ထားသော်လည်း ပြည်နယ် အချို့တွင် ထိုစနစ်များ ချို့ယွင်းနိမ့်ကျနေဆဲပဲဖြစ်ပါတယ်။ သို့ဆိုလျှင် ပြည်သူ့တစ်ရပ်လုံးကို လွှမ်းခြုံသော ပြည်သူ့ကျန်းမာရေးစနစ်များကို ဘယ်လို ဖော်ဆောင်မှာလဲဆိုတာ အဖြေရှာကြည့်ရမှာ ဖြစ်ပါတယ်။

နိုင်ငံတွင်း မှီခိုသူ အချိုးမှာ ထက်ဝက်ကျော်ရှိသဖြင့် အလုပ်လက်မဲ့ လူဦးရေမှာ မည်မျှရှိကြောင်းလည်း ခန့်မှန်းနိုင်ပါတယ်။ အိမ်ရာ ပိုင်ဆိုင်မှုမှာ အိမ်ငှားနေသူနှင့် အခြားသော အိမ်ရာများတွင် နေထိုင်သူများ အတိုင်းအတာ တစ်ရပ်အနေနဲ့ ရှိနေပါသေးတယ်။ လက်ကိုင်ဖုန်း သုံးစွဲမှုမှာ လူဦးရေ ၁၀၀ လျှင် ၃၃ယောက် နီးပါးကိုင်နိုင်ပြီး အဆိုပါ Data ဟာ ၂၀၁၄ခုနှစ် သန်းခေါင် စာရင်း ကောက်ယူသည့် အချိန်တွင်ရှိသော အချက်တစ်ခုဖြစ်ပြီး ယခုအခါ နိုင်ငံတကာ အော်ပရေတာ များနှင့် ပြည်တွင်း အော်ပရေတာများ သုံးစွဲသူ များပြားလျက်ရှိရာ သုံးစွဲမှု ပိုမို မြင့်မားနေပြီဖြစ်ကြောင်း ခန့်မှန်းနိုင်ပါတယ်။ မြို့ရွာ ကျေးလက်အနှံ့တွင် သယ်ယူပို့ဆောင်ရေးအတွက် မော်တော်ဆိုင်ကယ်၊ စက်ဘီးများကိုသာ အဓိက သုံးစွဲနေပြီး မော်တော်ကား သုံးစွဲမှုမှာ ၃ ရာခိုင်နှုန်းရှိရာ မြို့ပေါ်များတွင် သုံးစွဲမှု များပြားနိုင်ပါသည်။

ယခုထုတ်ပြန်လိုက်တဲ့ သန်းခေါင်စာရင်း ပင်မအစီရင်ခံစာမှာ ပညာရေး၊ အလုပ်၊ အလုပ်အကိုင်၊ လူမျိုး၊ ဘာသာ တွေနဲ့ ပတ်သက်တဲ့ အချက်အလက်တွေတော့ မပါဝင်သေးပါဘူး။ နိုင်ငံတွင်း၊ ဒေသအလိုက် လူမျိုးရေးနှင့် ဘာသာဝင်လူဦးရေ သိပါမှ လူမျိုးစု၊ မျိုးနွယ်စုများရဲ့ တာဝန်၊ ပိုင်ခွင့်၊ အခွင့်အရေးများ နှင့် သာသနာရေးဆိုင်ရာ စီမံချက်များကို ဖော်ဆောင်နိုင်မှာ ဖြစ်ပါတယ်။ အလားတူ ပညာရေး ၊ အလုပ်အကိုင် စတဲ့ အချက်တွေ သိပါမှ တပြည်လုံး လွှမ်းခြုံနိုင်တဲ့ အမျိုးသား ပညာရေး စနစ်များနဲ့ အလုပ်အကိုင် အခွင့်အလမ်းဆိုင်ရာ စီမံချက်များကို အကောင်အထည်ဖော်ဆောင်ရွက်ရမှာ ဖြစ်ပါတယ်။ ထိုအချက်အလက်များကို စနစ်တကျစီမံ ခန့်ခွဲနိုင်ဖို့အတွက် ၂၀၁၆ ခုနှစ်ထဲမှာ အသေးစိတ် အစီရင်ခံစာကို ထုတ်ပြန်ဖို့ စီစဉ်ထားတယ်လို့လည်း သိရပါတယ်။

အချုပ်အားဖြင့် လူဦးရေနှင့် အိမ်အကြောင်းအရာ သန်းခေါင်စာရင်း ကောက်ယူမှုဟာ နိုင်ငံတစ်နိုင်ငံအတွက် အလွန် အရေးကြီးလှ ပါတယ်။ လူဦးရေ ကိန်းဂဏန်း မှန်ကန်စွာ သိပါမှ ပြည်သူတို့၏ ပညာရေး၊ ကျန်းမာရေး၊ စီးပွားရေး၊ ဘာသာရေး၊ ဆက်သွယ်ရေး၊ စားနပ်ရိက္ခာ၊ ပို့ဆောင်ရေး၊ မြို့ပြအိမ်ရာများနှင့် လူနေမှုစနစ်များ၊ စီမံကိန်းများ ဖော်ထုတ်နိုင်ရေး စတဲ့ ကဏ္ဍအသီးသီးကို စနစ်တကျ လျာထား စီမံခန့်ခွဲနိုင်မှာလည်း ဖြစ်ပါတယ်။ တိုင်းပြည်တွင်းရှိ လူဦးရေနှင့် လုပ်သားအင်အား၊ လူ့စွမ်းအား အရင်းအမြစ်များ၊ နိုင်ငံတော်ဖွံ့ဖြိုးရေး လုပ်ငန်းများအတွက်လည်း သန်းခေါင်စာရင်း အချက်အလက်များက အထောက်အကူပြုပါတယ်။ အဆိုပါ ကဏ္ဍတွေအတွက် သုတေသနလုပ်ငန်းများ စဉ်ဆက်မပြတ်ဆောင်ရွက်နေဖို့ လိုပါတယ်။

ဒါကြောင့် ကောက်ယူခဲ့တဲ့ သန်းခေါင်စာရင်းနဲ့ ထုတ်ပြန်လိုက်တဲ့ အစီရင်ခံစာဟာ ပြည်သူတစ်ရပ်လုံးနဲ့သက်ဆိုင်ပြီး မိမိတို့ရဲ့ လူနေမှုဘ၀များစွာကို အကျိုးသက်ရောက်နေတယ်ဆိုတာကို နားလည်ထားရပါမယ်။

အထက်ကဖော်ပြခဲ့သော အကြောင်းအရာများသည် သန်းခေါင်စာရင်း ပင်မအစီရင်ခံစာပါ အချက်အလက်များကို အခြေပြု၍ အကျဉ်းချုပ် သုံးသပ်တင်ပြခြင်းသာ ဖြစ်ပါတယ်။ ဆက်လက်၍လည်း ၂၀၁၆ခုနှစ်မှာ ထုတ်ပြန်မယ့် သန်းခေါင်စာရင်း အချက်အလက်များကို ခေါင်းစဉ် အလိုက် ကဏ္ဍအလိုက် အသေးစိတ် လေ့လာဆန်းစစ်ကာ ပြည်သူ့ဘ၀ တိုးတက်ရေးအတွက် ပြည်သူတစ်ရပ်လုံး ၀ိုင်းဝန်းဆောင်ရွက်ရဦးမည်သာ။ ။

မာန်ထက်သျှံ

June 20, 2015
အစ္စလာမ် ဘာသာဝင်များ ၀တ်ပြုရန် ဖိတ်ခေါ်သည့် ဝတ်တက် နှိုးဆော်သံဆိုတာ ဘာလဲ?

ဇွန် ၁၉ ၊ ၂၀၁၅
M-Media

ယခု ရက်များအတွင်း မန္တလေးမြို့၊ မဟာအောင်မြေမြို့နယ် ၄၁ လမ်း မှာရှိတဲ့ ပန်းဆက်ဗလီမှ အစ္စလာမ် ဘာသာဝင်များ နေ့စဉ် (၅) ကြိမ် ဝတ်ပြုချိန်၌ ဝတ်တက်နှိုးဆော်သံကို အကြောင်းပြုပြီး “ဂျီဟာဒ်ရှေ့ပြေး လက္ခဏာ” ခေါင်းစဉ်ဖြင့် လုပ်ကြံဝါဒဖြန့်မှုများ ဆိုရှယ်မီဒီယာ မှာ ပြန့်နှံ့လျက်ရှိပါတယ်။

ဒါကြောင့် အစ္စလာမ် ဘာသာဝင်များ ၀တ်ပြုရန်ဖိတ်ခေါ်သည့် ဝတ်ပြုရန် နှိုးဆော်သံ(ဝါ) အာဇာန် အသံကို အစ္စလာမ်ဘာသာဝင် မဟုတ်သူများ အဓိပ္ပါယ်နှင့် တကွ သိရှိစေ၇န် အတွက် ယခု ဗီဒီယိုကလစ်ကို ပြန်လည်တင်ဆက်လိုက်ပါတယ်။
———————————————-
via Pensri Pro

(Myanmar Sub-title) New York မြို့  ခရစ်ယာန်ဘုရားရှိခိုးကျောင်း Interfaith Dialogue တွင် ဆိုပြခဲ့သော အစ္စလာမ်များ၏ ဗလီဝတ်ကျောင်းတော်များတွင် ၀တ်ပြုရန်ဖိတ်ခေါ်သည့် ဝတ်ပြုနှိုးဆော်သံ (သို့) အာဇာန် (Athan) ဖြစ်သည်။

ဗဟုသုတအဖြစ် မျှဝေပေးလိုက်ပါသည်။

(Translated into Myanmar language and sub-titled by Pensri Pro Creative Common. Any error is Pensri Pro CC’s responsibility).

ဆက်စပ်သတင်း
——————-
“ဟပြဆော” အဖွဲ့ ခေါင်းဆောင်နှင့် နေမျိုးဝေတို့ ဖြန့်ဝေနေသည့် လုပ်ကြံ သတင်းကြောင့် မန္တလေး ဒေသခံလူထု စိုးရိမ်နေ

“ဟပြဆော” အဖွဲ့ ခေါင်းဆောင်နှင့် နေမျိုးဝေတို့ ဖြန့်ဝေနေသည့် လုပ်ကြံ သတင်းကြောင့် မန္တလေး ဒေသခံလူထု စိုးရိမ်နေ

June 19, 2015
နှင်းဆီခင်- လှမ်းရအောင် ပျော်ပျော်ရွှင်ရွှင် ကလေးပေါ့

ဇွန် ၁၉ ၊ ၂၀၁၅
M-Media
နှင်းဆီခင် ရေးသည်။

ဘဝမှာကြီးကြီးမားမားပြောင်းလဲရတဲ့ အဆင့်တွေ ရှိနေတတ်ပါတယ်။ မူလအခြေအနေနောက်တစ်ခုကို အလိုက်သင့် လက်ခံနိုင်တာ ပျော်ရွှင်ကြည်နူးမှု အပြည့်နှင့် လှမ်းနိုင်မလှမ်းနိုင် ဆိုတာကတော့ ကာယကံရှင် တစ်ဦးစီရဲ့ ခံယူချကပေါ် မှီနေတယ်လေ။ အပြောင်းအလဲပေါ်မှာ ကိုယ့်ရဲ့အမြင်က အဓိကကျနေတာကိုး။ ခက်ခဲပင်ပန်းလွန်းတယ်ဆိုတဲ့ အဆိုးမြင်စိတ်နှင့် ဆိုရင်တော့ ထင်ထားတဲ့အတိုင်းစိတ်ပင်ပန်းမှုဒဏ်ကို မလွဲမသွေခံစားရမှာပါ။ ဒါမှမဟုတ် ဘဝမှာအခြေအနေ တစ်ခုကနေ နောက် တစ်ခုကို ပြောင်းလဲခြင်း ဆိုတာ ကိုယ့်ကျမှထူးပြီးဖြစ်တာမျိုးမှ မဟုတ်တာ။ သူများတကာတွေလည်း ဒီလိုချည်းပေါ့။ ဒါဟာသဘာဝ တရားပဲလေလို့ ခံယူပြီးအကောင်းမြင်ကြည့်နေမယ်ဆိုရင်တော့ အဆင်ပြေမှာပါ။ စိတ်ခံစားမှုရဲ့နောက်မှာ အရိပ်လိုကပ်ပါလာတတ်တဲ့ အကျိုးဆက်တွေရဲ့ အတွန်းအတိုက်ကို ခံစားကြရမှာလည်း သေချာတဲ့ကိစ္စရပ်တစ်ခုပဲပေါ့။ ကျယ်ပြောလှတဲ့ လူမှုရေးနယ်ပယ်မှာ ကိုယ့်ဘဝလေးရှင်သန်ကြည်နူးစွာ ရှင်သန်ဖို့ကိုယ်တိုင်လုပ်ယူရမဲ့ အချက်အလက်တွေကို ပညာရှင်တွေက အဆိုပြု လမ်းညွှန်ထားကြတယ်။

ဘဝမှာမှတ်မှတ်သားသားပြောကြ စတမ်းဆိုရင် ချိုမြိန်စရာကောင်းတဲ့ အခါ သမယတွေဟာ လူတိုင်း အတွက်ရှိနေဆဲပါ။ တစ်စုံတစ်ခုသော အပြောင်းအလဲ ဆိုတာကလည်း ရုပ်ပိုင်းဆိုင်ရာထက် ရင်ထဲမှာ တစ်စိမ့်စိမ့် ခံစားရင်း မှတ်မှတ်ထင်ထင်ဖြစ်ကြရတာမျိုး။ ဘယ် အသက်အရွယ်ရောက်လို့ ဘယ်လိုပဲလောကဓံနှင့် ဇရာဖိစီးမှုကို ခံရပါစေ။ အခုတွေးကြည့်ရင် ချက်ချင်းဆိုသလို ရင်ထဲမှာ လှိုက်ခနဲကြည်နူးလာတတ်တာကိုး။

ဆိုပါစို့။ ကလေးအရွယ်မှာ အမေ့ရင်ခွင်ထဲ လုံခြုံနွေးထွေးမှု အပြည့်နှင့် သက်တောင့်သက်သာ ကလေးနေနေရာက ကျောင်းနေချိန် အရွယ်ရောက်လာတော့ သူစိမ်းသူရံ တွေကြားမှာ ရောက်သွားတာ တကယ့်ကို အပြောင်းအလဲကြီးတစ်ခုလို့ ဆိုရမယ်။ အဲဒီအခါ နေတတ်ထိုင်တတ်အောင် ကိုယ့်ဘာသာပြုပြင် ယူလိုက်ကြရစမြဲပါပဲ။ အဲဒီလိုကလေးတွေ ဘဝကနေ မမောတမ်း ခရီးရှည်ကြီးလျှောက်ရင်း ပညာတွေသင်၊ ကိုယ့်ခြေထောက်ပေါ်ကိုယ် ရပ်တည်နိုင်အောင်ကြိုးပမ်း စတာတွေနှင့် လုံးချာလိုက်နေရပြန်ပါပြီ။

ရုပ်ပိုင်းဆိုင်ရာက ဘယ်လိုပဲလှုပ်ရှား ရုန်းကန်နေတယ်ပဲထားဦး၊ နှလုံးသား ခံစားချက်ဆိုတာကိုတော့ မေ့ထားလို့မှမရတော့တာပဲ။ အဲဒီအခါ ရင်ခုန်ခံစားခြင်းဆိုတဲ့ ဘဝရဲ့အထင်ကရအဆင့်ကို လှမ်းရပြီပေါ့။ ဒါဟာလည်း ဘဝမှာထင်ရှားတဲ့ အပြောင်းအလဲ တစ်ခုဖြစ်လာပြန်တယ်။ မချစ်ဘူး မချစ်ဘူး ဆိုတော့လည်း အရူးအမူး ခံစားရလောက်ပါတယ်။ “ချစ်တယ်” ဆိုတဲ့ရိုးသားစွာတောင်း ခံလာတဲ့ (ယောင်္ကျားပျိုရဲ့) တောင်းဆိုမှုအပေါ် ချစ်သူမိန်းကလေးရဲ့ ခေါင်းညိတ်ခေါင်းခါ အဖြေတစ်ခုဟာ တစ်ဘဝစာ အရေးပါတာတော့ အမှန်ပါပဲ။ နှစ်ဖက်မိဘ ဆွေမျိုးအသိုင်းအဝိုင်း၊ ဥစ္စာ၊ ပညာ အချက်အလက်ပေါင်း များစွာပေါ်မှာ အခြေခံပြီး အလေးအနက်စဉ်းစား လက်တွဲခဲ့ကြသူတွေ ရှိကြတယ်။ ဒါပေမယ့် ခေါင်းစဉ်မည်မည်ရ မရှိပါဘူး။ နှလုံးသားချင်း နားလည်မှုလေးတစ်ခုတည်းနှင့် ချစ်သွားကြသူတွေကလည်း မနည်းမနော။ ဘယ်လို အခြေအနေကြောင့်ပဲဖြစ်ဖြစ် ရင်ခုန်လှုပ်ရှားရတဲ့ ချစ်သူဘဝဆိုတာ လူတိုင်း နီးပါးကျော်ဖြတ်ဖြစ်ခဲ့ကြတာပဲပေါ့။ အမေတို့ သဘောကျရွေးချယ်ပေးတာကို ရင်ခုန်သံအေးစက်စက်နှင့်ပဲ ဘဝတစ်ခုကို လက်တွဲလျှောက်ကြတာကတော့ ခြွင်းချက်ပေါ့နော်။

ချစ်သူဘဝရဲ့အပျော်လေးတွေမှာ လက်တွေ့ကျတဲ့ ဆန်၊ ဆီ၊ ဆား ကိစ္စတွေကို ထည့်စဉ်စားဖို့မှ မလိုတာပဲလေ။ ပျော်ရွှင်စရာနေ့ရက်တွေ ချည်းပေါ့။ လူငယ်လူရွယ်လေးတွေက စောဒကတတ်ကြတယ်။ ရည်စားဘဝရဲ့ လက်ရှိအပျော်လေးတွေကို ဘဝအမောနှင့် သောကကို ချည်းတွေးရင်း ဖျက်ဆီးပစ်လိုက်ရတော့မှာတဲ့လားတဲ့။

“ဆင်းရဲခြင်းက တံခါးခေါက်တဲ့အခါ အချစ်တို့သည် ပြတင်းပေါက်မှ ခုန်ထွက်ပြေးသွားကြသည်” ဆိုတဲ့ အဆိုအမိန့်တွေကိုချည်း ထပ်ပြန်တလဲလဲ စဉ်းစားရင်းအချစ်ရဲ့ချိုမြိန်မှုတွေကို ဥပေက္ခာပြုလိုက်ရတော့မှာတဲ့လား တဲ့။

တကယ်တမ်းပြောမယ်ဆိုရင် အမေတို့၊ အဘွားတို့တုန်းကလည်း အိုးတစ်လုံးဖျာ တစ်ချပ်နှင့်ဘဝကို ရဲရဲဝံ့ဝံ့စခဲ့ကြတာမျိုးတွေ မရှိ မဟုတ်ရှိနှင့်ပြီးသားပါ။ နောက်တော့လည်း သားတစ်ဖျာမြေး တစ်ရာရတဲ့အထိ ပျော်ရွှင်သာယာတဲ့ အိမ်ထောင်လေး တစ်ခုကို တည်ဆောက်နိုင်ခဲ့ကြတယ်။ ဒါဟာဘာကြောင့်များလဲ ဘဝရဲ့အပြောင်းအလဲတစ်ခုကု လှမ်းတဲ့အခါ ခိုင်မာတဲ့ ဘဝအခြေအနေ တစ်ခုရောက်ကို ရောက်ရမယ်ဆိုတဲ့အနေနှင့် ကျားကုန်ကျားခဲကြိုးပမ်းခဲ့ကြလို့ပေါ့။ ဇွဲနှင့်ကြံ့ခိုင်မှုဆိုတာ မရှိမဖြစ် လိုအပ်ချက်တွေဖြစ် သလို သာယာတဲ့ အနာဂတ်ဘဝကို တည်ဆောက်ဖို့ အတွက် ပညာအခြေခံ၊ အတွေးအခေါ်ရင့်သန်မှုဆိုတာတွေလည်းလိုပြန်ရော။

လောကဓံရဲ့အခိုက်အတန့်တွေကို ကြုံလာရတဲ့အခါ ခိုင်မြဲတဲ့ သစ္စာတရား၊ အချင်းချင်းနားလည်စာနာလေးမှုတွေက ပျော်ရွှင်ခြင်း တံခါးကိုရောက်ဖို့ တွန်းအားပေးနေကြတာတွေပဲပေါ့။ နှစ်ယောက်တစ်ဘဝ တည်ဆောက်ရာမှာ လူမှုကျင့်ဝတ်တွေကို မပျက်မယွင်းထိန်းသိမ်းဖို့၊ အကျင့်စာရိတ္တအရာမှာ တစ်ရွေးသားကလေးမှ အပွန်းအပဲ့မခံစေရအောင်တော့ အလေးအနက် ထားကြရမှာပါ။

တစ်ခါက ကျင်းပခဲ့တဲ့ ရွှေရတု အခမ်းအနားတစ်ခုမှာ ကာယကံရှင် အမျိုးသမီးကြီး (အထူးကုဆရာဝန်ကြီးတစ်ဦး) ကပြောဖူးတယ်။

“သမီးရေ အမေတို့အခုလို ရွှေရတုအခမ်းအနား ကျင်းပဖြစ်ဖို့ လွယ်တယ်လို့တော့ မထင်လေနဲ့။ နှစ် (၅၀) အိမ်ထောင်သက်တမ်းမှာ အဆင်မပြေတာတွေ၊ ဒေါသတွေ၊ ဝမ်းနည်းကြေကွဲရတာတွေကို တစ်လှည့်စီကြုံခဲ့ရတာပေါ့။ ဒါပေမယ့် အမေတို့က အခက်အခဲမရှိ ကျော်ဖြတ်နိုင်ခဲ့ကြတယ်။ အဲဒါ ဘာကြောင့်လဲသိလား။”

“ဟုတ်ကဲ့ ပြောပါ အမေ ဆိုတော့”

“သူရောကိုယ်ပါ ပညာတတ်၊ ရာထူးရာခံတွေနဲ့ချည်းဆိုတော့ မာနချင်းပြိုင်ဖို့ အခွင့်အလမ်းကတော်လေး များနေတယ်လေ။ ဒါပေမယ့် အမေတို့က လက်ဆွဲနှုတ်ဆက်တဲ့ သဘောမျိုးအမြဲကျင့်တယ်”

“လက်ဆွဲနှုတ်ဆက်တယ်ဆိုတာကရော”

“ဒီလိုလေ လက်ဆွဲနှုတ်ဆက်ရင် ဘယ်သူ့ ဘယ်သူ့မှ အသာစီးမရှိဘူး။ လက်ချင်းအညီထားကြရတယ်။ အထက်အောက်ထားလို့မှ မရတာ။ ဒီလိုပါပဲ အမေတို့လည်း တစ်ဦးကိုတစ်ဦးလေးစားတန်ဖိုးထားတယ် အပေဒအယူမျှအောင် ကြိုးစားတယ်။ ဒါပါပဲ” တဲ့။

လက်ဆွဲနှုတ်ဆက်ကြရင်း ကာလအရှည်ကြီးကို လျှောက်ကြရအောင်ပါ။

နှင်းဆီခင်

June 19, 2015
သို့ မြန်မာနိုင်ငံ စာနယ်ဇင်းကောင်စီ။ ကုလားတွေလည်း ကြောက်တတ်ပါတယ်။

ဇွန် ၁၈ ၊ ၂၀၁၅
M-Media
ဆောင်းပါးရှင်- ဒန်ငြာရှိန်း
.
ကုလားဆိုတဲ့စကားလုံး။ ဒီစကားလုံးကို မြန်မာမွတ်စလင်တွေက သူတို့ကို နှိမ်ပြီးခေါ်တဲ့ အသုံးအနှုံးလို့ ယူဆကြတယ်။ စကားလုံးရဲ့ အဓိပ္ပါယ်က ဘယ်လိုပဲ ရှိပါစေ၊ အဲဒီစကားလုံးကို သုံးပြီး တဖက်သား နစ်နာရအောင် ပြုမူပြောဆိုမယ်ဆိုရင် ဒီစကားလုံးက ခွဲခြား ဆက်ဆံတဲ့ စကားလုံးပါပဲ။
.
အချို့အခြေအနေတွေမှာတော့ စကားလုံးတစ်လုံးကို မိမိကိုယ်တိုင် မကြိုက်ပေမယ့်လဲ တဘက်လူနားလည်ဖို့ အဲဒီစကား အတိုင်း ပြောဆိုပေး ရတတ်ပါတယ်။ ဒါက အခုဆောင်းပါးမှာ ကုလားလို့သုံးလိုက်ရတဲ့ အကြောင်းရင်း။
.
တိုင်တန်းမှုတွေ ရှိနေပါလျက်ကယ်နဲ့ ခြိမ်းခြောက်တာတွေ ၊ အမုန်းပွားဖို့ ဆောင်ရွက်တာတွေ တွင်တွင်လုပ်ခွင့်ရနေတဲ့ ဦးနေမျိုးဝေက မြန်မာသတင်းထောက်တွေကို လည်လှီးမယ်လို့ ဆိုပါတယ်။ ဒီအဆိုကို စာနယ်ဇင်းကောင်စီ အတွင်းရေးမှူး ဦးကျော်မင်းဆွေက ‘‘အဓိကကတော့ မိမိအနေနဲ့ ကန့်ကွက်ရှုတ်ချတယ်။ ဒါကို ခွင့်ပြု တာဟာ အစိုးရမှာ တာဝန်ရှိ တယ်။ ပြောတဲ့သူက ပြောပေမယ့်ခွင့်ပြုတဲ့သူမှာ တာဝန်ရှိတယ်။ ပြောတဲ့သူက စည်းမဲ့ကမ်းမဲ့ပြော ပေမယ့် အစိုးရက ဘာကြောင့် ခွင့်ပြုရတာလဲ။ သူဟာ ဘယ်လိုလူ စားလဲဆိုတာ အားလုံးလည်း သိပါတယ်။..” (http://7daydaily.com/story/38192) စသဖြင့် တုန့်ပြန်ပြောကြားခဲ့ပါတယ်။
.
မဘသဂျာနယ်များဖြစ်ကြတဲ့ အောင်ဇေယျတု ၊ သာကီသွေးစတဲ့ ဂျာနယ်တွေမှာ အစ္စလာမ်သာသနာနဲ့ ပတ်သက်ပြီး မဟုတ်မတရားတွေ ရေးတာကြောင့် အစ္စလာမ့် အဖွဲ့အစည်းတွေက သမ္မတဦးသိန်းစိန် နဲ့ သက်ဆိုင်ရာဝန်ကြီးဌာနတွေကို စာပို့တိုင်ကြားခဲ့ကြတယ်။ တိုင်ကြားမှုနဲ့ ပတ်သက်ပြီး သမ္မတက ပြန်ကြားရေးကိုလွှဲ၊ ပြန်ကြားရေးက စာနယ်ဇင်းကောင်စီထံ ဘောလီဘောပြန်ပုတ်။ ဒီအခါမှာ စာနယ်ဇင်းကောင်စီက မဘသနဲ့ မွတ်စလင်အဖွဲ့တွေ ထိပ်တိုက်တွေ့ပြီး ဖြေရှင်းကြဖို့ အကြောင်းပြန်ပါတယ်။ ဂျာနယ်ပါ ဆောင်းပါးတွေရဲ့ အရေးအသားနဲ့ပတ်သက်ပြီး တိုင်တန်းတာကို မှားသည် မှန်သည် မဖြေရှင်းဘဲ နှစ်ပါတီ ထိပ်တိုက်ရင်ဆိုင် ဖြေရှင်းခိုင်းခဲ့တာဖြစ်ပါတယ်။
.
ဦးနေမျိုးဝေက လည်ပင်းလှီးမယ်ဆိုတော့ ” ပြောတဲ့သူက ပြောပေမယ့်ခွင့်ပြုတဲ့သူမှာ တာဝန်ရှိတယ်။” ဖြစ်လာပါရော။ စာနယ်ဇင်းကောင်စီက လေလုံးထွားတဲ့ ဦးနေမျိုးဝေကို ကြောက်စရာ ဘာမှမရှိဘူးဆိုပေမယ့် နောက်ကွယ်က လက်မည်းကြီးတွေ အချက်ပြရင် တကယ်အတီးခံရမှာပဲလို့တော့ တွေးမိကြပါလိမ့်မယ်။
.
ကုလားတွေကတော့ ဦးနေမျိုးဝေကိုရော၊ မဘသကိုရော ကြောက်ပါတယ်။ ဘာကြောင့်လဲဆိုတော့ ဦးနေမျိုးဝေတို့က မြန်မာ ဂျာနယ်လစ်တွေကို တကယ် လုပ်ချင်လည်းလုပ်မယ်၊ မလုပ်ချင်လည်းမလုပ်ဘူး၊ ကုလားကိုကျ တကယ်လုပ်မှာကိုး။ မဘသ ဂျာနယ်တွေနဲ့ မ.ဘ.သ အွန်လိုင်းအကောင့်တွေ ၀ါဒဖြန့်တာကြောင့် ပြည်ထောင်စု ကုလားတွေ သွေးထွက်သံယိုဖြစ်ခဲ့ဖူးတယ်၊ ထပ်ပြီးတော့လည်း ဖြစ်လာနိုင်စရာ ရှိ/မရှိကိုလည်း ဘယ်သူမှ အာမမခံနိုင်ဘူး။ အဲသလို ရှိလေတော့ စာနယ်ဇင်းကောင်စီကို ကျနော်တို့ ပြည်ထောင်စုကုလား မြန်မာမွတ်စလင်တွေက “ပြောတဲ့သူက ပြောပေမယ့် ခွင့်ပြုတဲ့သူမှာ တာဝန်ရှိတယ်။” ဆိုပြီး မေးခွန်း ထုတ်ပိုင်ခွင့်ရှိပါသလား ခင်ဗျား။
.
မဘသ ဂျာနယ်တွေလိုမျိုး အမုန်းတရားဖြန့်ဖြူးရာ စာမျက်နှာသစ် တူမော်ရိုး(Tomorrow) ဂျာနယ်က ဇွန် ၁၆ ရက်နေ့ထုတ်၊ အတွဲ ၂ အမှတ် ၁၅မှာ အိုင်အက်စ် အကြမ်းဖက်သမားတွေ မြန်မာနိုင်ငံထဲကို ၂၀၁၃ ကတည်းက ရောက်နေပြီး ဖြစ်တယ်ဆိုပြီး သွေးထိုး လှုံဆော်ထားပါတယ်။ တူမော်ရိုး ကို ဦးဆောင်ကြတဲ့ သူတွေထဲမှာ မြန်မာနိုင်ငံ စာနယ်ဇင်းကောင်စီအဖွဲ့ဝင်နဲ့ မြန်မာနိုင်ငံ စာနယ်ဇင်းသမဂ္ဂ (MJU) အဖွဲ့ဝင် အဖြစ်ပါဝင်နေတဲ့ ဦးဇော်သက်ထွေး တို့လို လူမျိုးတွေပါနေပါတယ်။ အိုင်အက်စ် အကြမ်းဖက်တွေ မြန်မာနိုင်ငံထဲ စိမ့်ဝင်ပြီးဖြစ်နေတာ တကယ်ဆိုရင်တော့ ဒါဟာ အန္တရာယ်ပဲ။ ဘာကြောင့်လဲဆိုတော့ ပြည်ထောင်စု ကုလားတွေလည်း အိုင်အက်စ်ကိုကြောက်ပါတယ်၊ အစ္စလာမ်ဘာသာရေး သွန်သင်ချက်တွေကနေ သွေဖည်နေတဲ့ အိုက်အက်စ်ရဲ့ အတွေးအခေါ်တွေကြောင့် ကြောက်ရတာပါ။
.
တူမော်ရိုးဂျာနယ်က ဆိုထားတဲ့ အိုင်အက်စ်တွေ မြန်မာပြည်ထဲရောက်နေပြီးပြီဆိုတာကို အတည်ပြုဖို့ အတည်ပြုခံရလောက်ဖွယ် (authentic source) ခေါ် သတင်းအချက်အလက် လိုအပ်ပါတယ်။ တူမော်ရိုးကတော့ https://themuslimissue.wordpress.com ဘလော့ကနေ ကိုးကားထားတာပါ။ ဒီဘလော့က authentic source ဖြစ်ဖို့နေနေသာသာ သူ့ဘလော့မှာပါတဲ့ hate speech ခေါ် အမုန်းတရားကြီးထွားဖွယ်ရာ ဆောင်းပါးတွေကို မှန်မမှန် စစ်ဆေးဖို့ အချိန်မပေးနိုင်ကြောင်း အဲဒီဘလော့ရဲ့ about စာမျက်နှာ အတိအလင်း ကြေညာထားပြီးသားဖြစ်နေတယ်။ ဖော်ပြပါ ဘလော့ရဲ့ about စာမျက်နှာ inaccuracies ခေါ် မတိကျမရေရာ မသေချာမှုများ ဆိုတဲ့ ခေါင်းစဉ်အောက်မှာ ခုလိုရေးထားပါတယ်။
.
“The public provides articles for us to publish. If you have any objections or find inaccuracies in these articles or posts, please provide evidence and post your comment and a link to the article under the article.”
.
ပက်ဘလစ်လို့ခေါ်တဲ့ အစ္စလာမ်ကို မုန်းတီးသူ မည်သူမဆို အဲဒီဘလော့ကို စာတွေရေးပြီး ပေးပို့နိုင်ပါတယ်။ သူတို့ကတော့ စိစစ်ပြီးမှ တင်တာမဟုတ်ဘဲ ၊ မုန်းတီးရေးဆိုပြီးရော ၊ ဘာလာလာ အကုန်တင်ပေးမှာပါ။ ဘာကြောင့်လဲဆိုတော့ သူတို့တင်ထားတဲ့ ဆောင်းပါး အာတီကယ်တွေမှာ တစုံတရာ မှားယွင်းချက်တွေရှာဖွေဖို့ ပက်ဘလစ်ကိုပဲ ပြန်ပြီး တာဝန်ပေးထားလို့ပါပဲ။
.
ကျနော်တို့အနေနဲ့ တူမော်ရိုး အားကိုးတကြီး ကိုးကားထားတဲ့ https://themuslimissue.wordpress.com ဘလော့ပါ အိုင်အက်စ် တွေ ၂၀၁၃ ကတည်းက မြန်မာပြည်ထဲ ရောက်နေပြီးဖြစ်တယ်ဆိုတာကို မှားယွင်းကြောင်း သက်သေပြဖို့ authentic source ခေါ် ယုံကြည်ဖွယ် အထောက်အထားကို ခက်ခက်ခဲခဲ ရှာနေစရာ မလိုတော့ပါဘူး။ အဲဒီအချက်က လေဖမ်း ဒန်းစီးထားတဲ့ ချောက်လုံး တစ်ခုသာဖြစ်တာကြောင့် မြန်မာ့တပ်မတော် ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်က ဂျပန်သတင်းစာ The Mainichi ကို မြန်မာပြည်ကို ခြိမ်းခြောက်လာစရာရှိတဲ့ အိုက်အက်စ် အန္တရာယ်နဲ့ပတ်သက်ပီး အခုလို အဖြေပေးခဲ့တာပေါ့။
.
ဗိုလ်ချုပ်မှူးကြီးက “အချို့လည်း ကျွန်တော်တို့ သတင်းတွေရတာတော့ ရှိပါတယ်။ အခုချိန်ထိတော့ အန္တရာယ်ပြုနိုင်လောက်တဲ့ အနေအထားမျိုး မတွေ့သေးပါဘူး။ ဒါပေမယ့် အခြေအနေကို သတိထားနေတဲ့ အနေအထားလို့ ကျွန်တော်ပြောလိုပါတယ်။” ဆိုပြီး အဖြေပေးခဲ့တာပါ။ (www.facebook.com/seniorgeneralminaunghlaing/posts/1021163294584825:0)
.
တကယ်လို့ ၂၀၁၃ ကတည်းကသာ မြန်မာပြည်ထဲ အိုက်အက်စ် ရောက်ပြီး တိတ်တိတ်ပုန်းနေတာဆိုရင် ဗိုလ်ချုပ်မှူးကြီး မင်းအောင်လှိုင်က မချွင်းမချန် ဖွင့်ဟတော့မှာပါ။ ကျနော်တို့လို ပြည်ထောင်စုကုလား မြန်မာမွတ်စလင်တွေကတော့ ဗိုလ်ချုပ်မှူးကြီး တို့ကို ယုံပါတယ်။ ဘာကြောင့်လဲဆိုတော့ အကယ်၍သာ ၂၀၁၃ကတည်းက အိုက်အက်စ်တွေ မြန်မာ့မြေထဲရောက်နှင့်ပြီးသည်ထားဦးတော့ ၊ ပြည်ထောင်စုကုလားတွေကို ဖိနှိပ်တာတွေ ဖုံးကွယ်နိုင်ဖို့ “အိုက်အက်စ်အကြမ်းဖက်” ဆိုတာက ကမ္ဘာကို အကြောင်းပြချက် လှလှပပ ထယ်ထယ်ဝါ၀ါကြီး ပေးနိုင်တဲ့ ကိစ္စရပ်ပဲ မဟုတ်ပါလားဗျာ။ ကျနော်တို့ ယုံကြည်ရတဲ့ ဗိုလ်ချုပ်မှူးကြီးတို့က ဒီအချက်ကို ဘယ်ချန်ထားရစ်ခဲ့ပါ့မလဲ။ နိုင်ငံတကာဖိအားကြောင့် ဆန့်ငင်ဆန့်ငင်ဖြစ်နေရတဲ့ မြန်မာအစိုးရအတွက်လည်း “အကြမ်းဖက်အိုင်အက်စ်” ဆိုတာက ဆိုင်းနိုင်း ကန္တာရထဲ လမ်းပျောက်နေတဲ့ ပါလစ္စတိုင်း ကုလားလေးတစ်ယောက် အိုအေဆစ် ကြီးသွားတွေ့ သလို ဖြစ်ရပါလိမ့်မယ်။ အဆီတ၀င်းဝင်းနဲ့ အခွင့်ထူးကြီးပါ။
.
အရှေ့တောင်အာရှနိုင်ငံတွေကို အိုက်အက်စ် အကြမ်းဖက်က လူသူအင်အားဖြည့်တင်းဖို့အတွက် ပစ်မှတ်ထားနိုင်တယ်လို့ ဆိုပါတယ်။ ဒီအဆိုကို စင်ကာပူနိုင်ငံ နန်ယန်တက္ကသိုလ်အောက်က S.Rajanatham School of International Studies က သုတေသီ ဂျက်စ်မင်ဒါဆင်းက ဆိုတာပါ။ အခုလို authentic source ခေါ် အတည်ပြုလောက်ဖွယ် သုတေသနဌာနက လာတဲ့ သတင်းကိုကျ ပစ်ပယ်လို့မရတော့ဘူး။
.
S.Rajanatham School of International Studies က သုတေသီ ဂျက်စ်မင်ဒါးဆင်းရဲ့ စာတမ်းက စင်ကာပူဝန်ကြီးချုပ်အထိ တာသွားထိရောက်ခဲ့တဲ့ စာတမ်းပါ။ ဒီတော့ ဂျက်စ်မင်ဒါဆင်းရဲ့ စာတမ်းမှာ အရှေ့တောင်အာရှ တစ်နိုင်ငံဖြစ်တဲ့ မြန်မာပြည်မှာတော့ဖြင့် ၂၀၁၃ ကတည်းက အိုင်အက်စ်တွေ အခြေချပြီးဖြစ်တယ်ဆိုတာ ဖော်ပြထားသလား ဆန်းစစ်ကြည့်တဲ့အခါ တွေ့ရတာက – ဂျက်စ်မင်ဒါဆင်းရဲ့ ဟောဒီ စာတမ်း (www.rsis.edu.sg/wp-content/uploads/2015/05/CO15126.pdf) မှာပေါ့ဗျာ ၊ မြန်မာဆိုတဲ့စကားလုံး တစ်လုံးတောင် မတွေ့ရပါဘူး။ အဲဒီတော့ တူမော်ရိုးဂျာနယ်ရဲ့ တာဝန်ခံ ပုဂ္ဂိုလ်ကြီးတွေဟာ ပြည်ထောင်စု ကုလားတွေကို အခြေအနေတစ်ခုဆီတွန်းပို့ပြီး သူတို့တွေဟာ အိုင်အက်စ် ပစ်မှတ်တွေလို့ ဆိုတာထက် သူတို့ထဲမှာ အိုက်အက်စ်တွေရှိနေပြီလို့ အခြေမခိုင်တဲ့ လေဖမ်းဒန်းစီးထားတဲ့ အန်တီ အစ္စလာမ်ဘလော့ကို ကိုးကားပြီး ဆိုလိုက်တယ်၊ အဲဒီအဆိုကြောင့် ပြည်ထောင်စု ကုလားတွေခမြာ စာနယ်ဇင်းကောင်စီကို ” ပြောတဲ့သူက ပြောပေမယ့်ခွင့်ပြုတဲ့သူမှာ တာဝန်ရှိတယ်။ ပြောတဲ့သူက စည်းမဲ့ကမ်းမဲ့ပြော ပေမယ့် အစိုးရ (စာနယ်ဇင်းကောင်စီ) က ဘာကြောင့် ခွင့်ပြုရတာလဲ။” လို့ မေးလဲမေးချင်ပါရဲ့ ၊ မေးလဲမမေးရဲပါခင်ဗျား။
.
ကျန်းမာချမ်းသာကြပါစေ။

June 18, 2015