ဒီဇင်ဘာ ၁၉၊ ၂၀၁၇
M-Media
(ကိုတင်ရီ တင်ဆက်သည်)
ဗလီဝင်းအတွင်းမှ မြင်ကွင်းတစ်ခု
– နျူဂျဲ (Niujie) ဗလီဝတ်ကျောင်းတော်ဟာ တရုတ်နိုင်ငံ ဘေဂျင်းမြို့က သက်တမ်းအရင့်ဆုံး ရှေးဟောင်းဗလီဝတ်ကျောင်းတော်တစ်လုံးဖြစ်ပါတယ်။ သက္ကရာဇ် ၉၉၆ ခုနှစ် လျောင်မင်းဆက် (Liao) လက်ထက်မှာ တည်ဆောက်ခဲ့တာဖြစ်ပြီး ချင်မင်းဆက်(Qing) က ဧကရာဇ်ကန်းရှီ (Kangxi – ၁၆၆၁-၁၇၇၂) လက်ထက်မှာ ပြန်လည်ပြုပြင် တိုးချဲ့ခဲ့ပါတယ်။
ဘေဂျင်းမြို့ ရှီချန်ရပ်ကွက် (Xicheng) မှာ ရှိနေတဲ့ အဲဒီ နျူဂျဲ ဗလီဝတ်ကျေင်းတော်ဟာ ဒေသတစ်ဝိုက်မှာနေတဲ့ အစ္စလာမ်ဘာသာဝင် ၁၀၀၀၀ ရဲ့ ၀တ်ပြုရာနေရာ ဖြစ်ပါတယ်။ ရှီချန်ဟာ ဘေဂျင်းက အစ္စလာမ်ဘာသာဝင်အများစုရှိရာ ရပ်ကွက်လည်း ဖြစ်ပါတယ်။
ဗလီဝတ်ကျောင်းတော်ဟာ ဟန်လူမျိုးတို့ရဲ့ ဗိသုကာပညာကို အစ္စလာမ့်ဗိသုကာနဲ့ ပေါင်းစပ်တည်ဆောက်ထားတာဖြစ်ပါတယ်။ အပြင်ကနေ ဗလီဝတ်ကျောင်းတော်ကို ကြည့်မယ်ဆိုရင် တရုတ်လူမျိုးတို့ရဲ့ ရိုးရာဗိသုကာလက်ရာကို မြင်ရမှာဖြစ်ပြီး အတွင်းပိုင်းမှာတော့ အစ္စလာမ့် စာပန်းချီလက်ရာ၊ တရုတ် အနုပညာလက်ရာ
တွေနဲ့ ထုံးမွှမ်းချယ်သထားပါတယ်။
စကွဲယားမီတာ ၆၀၀ လောက်ကျယ်တဲ့ အဓိက ၀တ်ပြုခန်းမှာ တစ်ကြိမ်တည်း လူပေါင်း ၁၀၀၀ ကျော်လောက် ၀တ်ပြုနိုင်ပါတယ်။ နျူဂျဲ ဗလီဝတ်ကျောင်းတော်ကို သစ်သားနဲ့ ဆောက်လုပ်ထားတာ ဖြစ်ပါတယ်။
သမိုင်းကြောင်း
ဗလီမုခ်ဦး
ဘေဂျင်းက ဗလီဝတ်ကျောင်းတော်တွေထဲမှာ အကြီးဆုံးဖြစ်တဲ့ နျူဂျဲ ဗလီဝတ်ကျောင်းတော်ကို လျောင်မင်းဆက် (၉၁၆-၁၁၂၅) အုပ်စိုးစဉ် သက္ကရာဇ် ၉၉၆ ခုနှစ်မှာ တည်ဆာက်ခဲ့တာ ဖြစ်ပါတယ်။
ဒေသတွင်းက တရုတ်မွတ်စလင်တွေဟာ ရိုးရာ တရုတ်ဗိသုကာ လက်ရာတွေနဲ့ ဗလီဝတ်ကျောင်းတော်ကို တည်ဆောက်ခဲ့တာဖြစ်ပြီး အတွင်းပိုင်းမှာတော့ အာရဘီ စာပန်းချီတွေ၊ အဆိုအမိန့် ကားချပ်တွေနဲ့ ဆင်ယင်ထားပါတယ်။ ဗလီဝတ်ကျောင်းတော်ရဲ့ ဒီဇိုင်းကို လျောင်မင်းဆက်လက်ထက်မှာ နာမည်ကြီးတဲ့ ဗိသုကာပညာရှင် နာဇာရုဒ်ဒင်က ဆွဲပေးခဲ့တာဖြစ်ပါတယ်။ ၁၂၁၅ ခုနှစ် ဂျစ်ဂျစ်ခန်ရဲ့ မွန်ဂိုတပ်တွေ တရုတ်ပြည်ကို သိမ်းပိုက်မှုအတွင်း အခြားသော ၀တ်ပြုရာအဆောက်အဦးတွေနည်းတူ နျူဂျဲ ဗလီဝတ်ကျောင်းတော်လည်း မီးရှို့ဖျက်ဆီးခံခဲ့ရပါတယ်။
မင်မင်းဆက်လက်ထက် သက္ကရာဇ် ၁၄၄၃ မှာ ဒီဗလီဝတ်ကျောင်းတော်ကို ပြန်လည်တည်ဆောက်ခဲ့ပါတယ်။ ၁၄၉၆ ခုနှစ် ပြန်လည်ပြုပြင်ရေး လုပ်ငန်းမှာ နန်းတွင်းမှာ ခစားရတဲ့ တရုတ်မွတ်စလင် မိန်းမစိုးတွေက ငွေကြေးထောက်ပံ့ပေးခဲ့ပြီး ၁၆၉၆ ခုနှစ် ချင်မင်းဆက်လက်ထက်မှာ ဗလီပရ၀ုဏ်ကို ချဲ့ထွင်ခဲ့ပါတယ်။
အဲဒီအချိန်ကစလို့ ဗလီဝတ်ကျောင်းတော်နဲ့ ခပ်လှမ်းလှမ်းမှာ ဟာလာလ်အသားတွေ ရောင်းတဲ့ နာမည်ကျော်ဈေးတစ်ခု ပေါ်လာခဲ့ပြီး ယနေ့အချိန်အထိ တည်တံ့နေဆဲ ဖြစ်ပါတယ်။ ဒီဗလီရဲ့ မူရင်းအမည်ဟာ လီဘိုင်စီ (Lǐbàisì) ဖြစ်ပြီး ချောင်ဟွာဧကရာဇ် (Chenghua) က သက္ကရာဇ် ၁၄၇၄ မှာ မှည့်ခဲ့တာပါ။ နောက်ပိုင်း နေရာရွှေ့ပြီးတဲ့နောက် နျူဂျဲလို့ အမည်တွင်တာဖြစ်ပြီး တရုတ်နိုင်ငံမြောက်ပိုင်းမှာ ထင်ရှားတဲ့ ဗလီဝတ်ကျောင်းတော်တွေထဲက တစ်လုံးဖြစ်ပါတယ်။
မင်နာရတ်မျှောစင်
၁၉၄၉ ခုနှစ် တရုတ်ပြည်သူသမ္မတနိုင်ငံက တည်ထောင်ပြီးနောက်ပိုင်း ၁၉၅၅၊ ၁၉၇၉ နဲ့ ၁၉၉၆ ခုနှစ်တွေမှာ ဗလီဝတ်ကျောင်းတော်ကို ၃ ကြိမ်တိုင်တိုင် ပြင်ဆင်ခဲ့ပါတယ်။
၂၀၀၂ ခုနှစ်မှာတော့ တရုတ်အစိုးရက နျူဂျဲဗလီဝတ်ကျောင်းတော် ပြင်ဆင်ရေး အထူးစီမံကိန်းတစ်ခုကို ဆောင်ရွက်ခဲ့ပြီး ဗလီတစ်ဝိုက်မှာ မြက်ခင်းပြင်တွေ၊ ရင်ပြင်ကြီးတွေ ထားကာ သာသာယာယာဖြစ်အောင် ဆောင်ရွက်ပေးခဲ့ပါတယ်။
ဖွဲ့စည်းပုံ
ဝတ်ပြုဆောင်
နျူဂျဲ ဗလီဝတ်ကျောင်းတော်က အဓိက အဆောက်အဦးတွေကတော့ အဓိက၀တ်ပြုဆောင်၊ မင်နာရတ်၊ ပိဋကတ်တိုက်၊ ၀ူဇူကိုယ်လက်သန့်စင်ခန်းနဲ့ အမျိုးသမီး ၀တ်ပြုဆောင်တို့ ဖြစ်ပါတယ်။
ကုရ်အာန်ကျမ်းတော်မြတ်ကို ကူးယူရေးသားရာမှာ အသုံးပြုခဲ့တဲ့ အေဒီ ၁၀၃၉ ခုနှစ်က ကြေးဝါဖောင်တိန်ကြီး၊ ရှေးဟောင်း ကုရ်အာန်ကျမ်းတော်မြတ် လက်ရေးမူတွေ၊ ချင်မင်းဆက်၊ မင်မင်းဆက်လက်ထက်တွေက အမွှေးတိုင်းထွန်းအိုးကြီးတွေ စတဲ့ အဖိုးတန် ရှေးဟောင်းပစ္စည်းတွေလည်း ဒီဗလီဝတ်ကျောင်းတော်မှာ ရှိနေပါတယ်။
ဗလီပရ၀ုဏ်ရဲ့ အလယ်တည့်တည့်မှာ ဘုံခုနှစ်ဆင့် မင်နာရတ်မျှော်စဉ်တစ်ခုရှိပြီး နေ့စဉ် နိဗ္ဗာန်ဆော်ဖို့နဲ့ လစဉ် လ၀င်၊ လထွက်ကြည့်ဖို့အတွက် အသုံးပြုပါတယ်။ ပိဋကတ်တိုက်မှာတော့ ကုရ်အာန်ကျမ်းစာ အပါအ၀င် အစ္စလာမ့်ရေးရာ ကျမ်းကြီး၊ ကျမ်းငယ်တွေကို သိမ်းဆည်းထားပြီး အဲဒီအထဲမှာ စာကြည့်ခန်း တစ်ခုလည်း ရှိပါတယ်။
ကြေးဝါဒယ်အိုးကြီး
ထူးခြားတာက ဗလီဝင်းထဲက ကြေးဒယ်အိုးကြီးဖြစ်ပြီး ခေတ်အဆက်ဆက် ဗလီဝတ်ကျောင်းတော်တဲ့ အလှူဒါနအစီအစဉ်တွေမှာ မပျက်မကွက် အသုံးတော်ခံခဲ့ပါတယ်။
တရုတ်နိုင်ငံကို ရောက်ရှိကာ တရုတ်လူမျိုးတွေကို အစ္စလာမ်သာသနာနဲ့ ပိတ်ဆက်ပေးခဲ့တဲ့ အရှေ့အလယ်ပိုင်းက မွတ်စလင်သူတော်စင်ကြီးတွေရဲ့ ဂူဗိမာန်တစ်ချို့လည်း နျူဂျဲ ဗလီဝတ်ကျောင်းတော် ပရ၀ုဏ်အတွင်းမှာ တည်ရှိပါတယ်။
စကွဲယားမီတာ ၁၀၀၀၀ နီးပါးလောက် ကျယ်ဝန်းတဲ့ ဗလီဝတ်ကျောင်းမှာ စိမ်းစိုးတဲ့ သစ်ပင်တွေကို စီတန်းစိုက်ပျိုးထားပြီး တရုတ် ရှေးဟောင်း ဗိသုကာလက်ရာတွေ ထင်ဟပ်နေတဲ့ နားနေဆောင်တွေ၊ လျှောက်လမ်းလေးတွေ၊ ရေကန်ငယ်လေးတွေနဲ့ သာယာလှပတဲ့ နေရာတစ်ခုလည်း ဖြစ်ပါတယ်။
ခရီးသွားအချက်အခြာ
တရုတ်အစိုးရဟာ မွတ်စလင်နိုင်ငံတွေက သံတမန်အဖွဲ့တွေ လာရောက်ရင် ဒီ နျူဂျဲ ဗလီဝတ်ကျောင်းတော်ကို လိုက်လံပြသလေ့ရှိနေပါတယ်။ တရုတ်နိုင်ငံကို လာရောက်ကြတဲ့ ကမ္ဘာလှည့် ခရီးသွားတွေအပြင် တရုတ်ပြည်အပြင်ဘက်က ဟန်တရုတ်တွေနဲ့ ဟွေတရုတ်တွေကလည်း ဒီဗလီဝတ်ကျောင်းတော်ကို လာရောက်လည်ပတ်ကြပါတယ်။
နျူဂျဲ ဗလီဝတ်ကျောင်းတော်ဟာ ဗိသုကာလက်ရာမှာ အံချီးဖွယ် အဆောက်အဦး ဖြစ်သလို အစ္စလာမ် သာသနာနဲ့ တရုတ်လူမျိုးတို့ရဲ့ နက်ရှိုင်းတဲ့ ဆက်နွယ်ပတ်သက်မှုကို ထင်ဟပ်စေတဲ့ နေရာတစ်ခုလည်းဖြစ်ပါတယ်။
ဝတ်ပြုရာတွင် ရှေ့ဆောင်အီမာမ် နေရာယူရသည့် နေရာ
ဗလီမြေပုံ
ချင်မင်းဆက်လက်ထက်မှ အမွှေးတိုင်အိုး
အမွှေးနံ့သာအိုးနှင့် မီးတိုင်များ
ဗလီသမိုင်းအကျဉ်း
ပါရှန် သူတော်စင်ကြီး ၂ ပါး၏ အုတ်ဂူ
Ref: Wiki, Top China Travel, Chinahighlights
(တင်ဆက်ပြီးသမျှ အပိုင်းများကို ဤနေရာတွင် သွားရောက်ဖတ်ရှုနိုင်ပါတယ်)
