သြဂုတ် ၁၂၊ ၂၀၁၇
M-Media
– ခေါင်းဆောင်းပုဝါကို အဓမ္မဆွဲချွတ်မှုအတွက် ရဲတပ်ဖွဲ့အား တရားစွဲဆိုထားသည့် ကယ်လီဖိုးနီးယားမှ မွတ်စလင်အမျိုးသမီးတစ်ဦးကို တရားရုံးက အနိုင်ပေးလိုက်ပြီး အစိုးရက နစ်နာကြေး ဒေါ်လာ ၈၅၀၀၀ ပေးဆောင်ရန်လည်း ဆုံးဖြတ်ခဲ့သည်။
ကီရ်စတီ ပါဝဲလ်ဆိုသည့် မွတ်စလင်အမျိုးသမီးမှာ ပြီးခဲ့သည့်နှစ်က သူမ၏ ခင်ပွန်းနှင့်အတူ ခရီးသွားနေစဉ် ခွင့်မပြုသည့် ကားကို စီးနင်းသည်ဟုဆိုကာ ရဲတပ်ဖွဲ့က ဖမ်းဆီးခဲ့သည်။ ပါဝဲလ်မှာ ခရီးသည်သာဖြစ်သော်လည်း သူမ၏နာမည်ပါ ဖမ်းဝရမ်းတစ်ခုကြောင့် ဖမ်းဆီးခံခဲ့ရသည်။
ဇနီးအတွက် ရဲမေက ကိုင်တွယ်ဆောင်ရွက်ရန် ပါဝဲလ်၏ခင်ပွန်းက တောင်းဆိုခဲ့သော်လည်း ရဲများက လက်မခံခဲ့ဘဲ ခေါင်းဆောင်းပုဝါကို အတင်းအဓမ္မ ဆွဲချွတ်ခဲ့သည်။ ရဲစခန်းတွင် တစ်ညတာ နေထိုင်နေရသည့် ပါဝဲလ်မှာ ရဲတပ်ဖွဲ့အနေဖြင့် သူမ၏ ဘာသာရေးလွတ်လပ်ခွင့်ကို ချိုးဖောက်သည်ဟုဆိုကာ နောက်ပိုင်းတွင် တရားရုံး၌ တရားစွဲဆိုခဲ့သည်။
ရဲတပ်ဖွဲ့က ခေါင်းဆောင်းပုဝါမပါသည့် ဓာတ်ပုံကို လိုချင်သည့်အတွက် ပုဝါကို ဆွဲချွတ်ခဲ့ခြင်းဖြစ်သည်ဟု ထွက်ဆိုခဲ့သည်။ တရားရုံးဖိုင်တွင် ထိုကဲ့သို့ ဆောင်ရွက်ခြင်က ဘာသာရေးကို လွတ်လပ်စွာ ကျင့်သုံးခွင့်ကို ပိတ်ပင်ရာရောက်ပြီး ကီရ်စတီ ပါဝဲလ်မှာ အရှက်ရမှု၊ စိတ်မသက်မသာဖြစ်မှု၊ စိတ်ဓာတ်ကျဆင်းမှုကို ခံစားခဲ့ရသည်ဟု ဖော်ပြထားသည်။
တရားရုံးက ကြားနာစစ်ဆေးမှုများ ပြုလုပ်ခဲ့ပြီးနောက် အင်္ဂါနေ့တွင် ပါဝဲလ်အား အနိုင်ပေးခဲ့ပြီး အခင်းဖြစ်ပွားရာ ကယ်လီဖိုးနီးယားပြည်နယ် လောင်းဘီခ်ျမြို့အနေဖြင့် ပါဝဲလ်ကို နစ်နာကြေး ကန်ဒ်ါလာ ၈၅၀၀၀ ပေးဆောင်ရန် အမိန့်ချမှတ်ခဲ့သည်။
အမေရိကန်တွင် အကြီးဆုံး မွတ်စလင်အဖွဲ့အစည်းတစ်ခုဖြစ်သည့် အမေရိကန်-အစ္စလာမ် ဆက်ဆံရေးအဖွဲ့က ထိုဆုံးဖြတ်ချက်အတွက် စိတ်သက်သာရသည်ဟု ပြောကြားခဲ့ပြီး၊ အခြေခံဥပဒေက အပ်နှင်းထားသည့် ရပိုင်ခွင့်ကို ကာကွယ်ခဲ့သည့်အတွက်လည်း ပါဝဲလ်ကို ချီးကျူးခဲ့သည်။
Ref: CNN
