Author: Ko Lay

သြဂုတ် ၁၄၊ ၂၀၂၄
M-Media

-လာဘ်စားမှုနဲ့ ထောင်ဒဏ်ကျခံခဲ့ရတဲ့ ရှေ့နေဟောင်း ပီချစ် ချူအန်ဘန်ကို အစိုးရအဖွဲ့၀င်အဖြစ် ခန့်အပ်မှုအတွက် အခြေခံဥပဒေခုံရုံးက ထိုင်း၀န်ကြီးချုပ် ဆရက်သာ သာဗီဆင်ကို သြဂုတ်လ ၁၄ ရက်နေ့ မနက်ပိုင်းမှာ ရာထူးကနေ ဖယ်ရှားလိုက်ပါတယ်။

ပီချစ်ဟာ ထိုင်းစစ်တပ်ရဲ့ ဖယ်ရှားမှုကို ခံခဲ့ရတဲ့ ၀န်ကြီးချုပ်ဟောင်း သက်ဆင် ရှင်နာ၀ပ်ထရာရဲ့ ရှေ့နေဖြစ်ပါတယ်။ ၂၀၀၈ ခုနှစ် သက်ဆင်အတွက် ရှေ့နေလိုက်ပေးစဥ်မှာ တရားရုံးတာ၀န်ရှိသူကို လာဘ်ပေးမှုနဲ့ တရားစွဲဆိုခံရပြီး ထောင်ဒဏ် ၆ လ ချမှတ်ခံခဲ့ရပါတယ်။

နောက်ပိုင်းမှာ ပီချစ်ဟာ သက်ဆင်မိသားစုပါတီ Pheu Thai ရဲ့ ဥပဒေအကြံပေးအဖြစ် ဆောင်ရွက်ခဲ့ပါတယ်။

ပီချစ်ကို ၀န်ကြီးချုပ်ရုံး၀န်ကြီးအဖြစ် ခန့်အပ်မှုဟာ ကျင့်၀တ်ပိုင်းဆိုင်ရာ ဖောက်ဖျက်မှုဖြစ်တယ်လို့ အခြေခံဥပဒေခုံရုံးက ဆုံးဖြတ်ကာ သာဗီဆင်ကို ရာထူးကနေ ဖယ်ရှားလိုက်တာဖြစ်ပါတယ်။

သာဗီဆင်ကတော့ ဆုံးဖြတ်ချက်ကို လက်ခံကြောင်း ပြောကြားခဲ့ပေမယ့် သူ့အနေနဲ့ ကျင့်၀တ်ဖောက်ဖျက် လုပ်ဆောင်ခဲ့တာမရှိကြောင်း၊ ရိုးသားစွာ နိုင်ငံရေးလုပ်ခဲ့တာဖြစ်ကြောင်း ပြောကြားခဲ့ပါတယ်။

၂၀၂၃ ခုနှစ် ရွေးကောက်ပွဲမှာ ဒုတိယမဲအများဆုံး ရခဲ့တဲ့ သက်ဆင်မိသားစုရဲ့ Pheu Thai ပါတီဟာ စစ်တပ်နဲ့ ရင်ကြားစေ့ကာ စစ်တပ်ကြီးစိုးတဲ့ အထက်လွှတ်တော်ရဲ့ မျက်နှာသာပေးမှုနဲ့ သာဗီဆင်ကို ၀န်ကြီးချုပ်နေရာထားပြီး အစိုးရဖွဲ့နိုင်ခဲ့တာ ဖြစ်ပါတယ်။

အခု သာဗီဆင်ကို ဖယ်ရှားလိုက်မှုကြောင့် စစ်တပ်နဲ့ Pheu Thai ပါတီတို့အကြား အကွဲအပြဲ ပြန်ဖြစ်လာတယ်လို့ သတင်းတွေထွက်သလို၊ သက်ဆင်ရဲ့ သမီးဖြစ်ပြီး၊ Pheu Thai ပါတီ ခေါင်းဆောင်ဖြစ်တဲ့ အသက် ၃၇ နှစ်အရွယ် ပေထုံတန် ရှင်နာ၀ပ်ထရာ ၀န်ကြီးချုပ်ဖြစ်လာရေး အကွက်ချ လုပ်ဆောင်တယ်ဆိုတဲ့ သုံးသပ်မှုတွေလည်း ရှိနေပါတယ်။

Ref: CNA

သြဂုတ် ၁၃၊ ၂၀၂၄
M-Media

-ထိုင်းနိုင်ငံ ချွန်ဘူရီမြို့မှာ အိမ်သာသန့် ဆေးရည်နဲ့ ဆိုဒီယမ် ဟိုက်ဒရောက်ဆိုက်တို့ ဓာတ်ပြုရာကနေ ထွက်လာတဲ့ အဆိပ်ငွေ့ကြောင့် သားအမိ ၃ ဦး သေဆုံးတဲ့ ဖြစ်ရပ်တစ်ခု သြဂုတ်လ ၁၂ ရက်နေ့မှာ ဖြစ်ပွားခဲ့ပါတယ်။

အသက် ၆၀ အရွယ် ရဲအရာရှိ အမျိုးသမီး၊ အသက် ၃၄ နှစ်နဲ့ ၂၅ နှစ်အရွယ် သမီး ၂ ဦး စုစုပေါင်း သုံးဦးတို့ကို ရဲလိုင်းခန်းက သူတို့နေထိုင်ရာအခန်းရဲ့ ရေချိုးခန်းမှာ သေဆုံးလျက် တွေ့ရှိခဲ့ရတာ ဖြစ်ပါတယ်။

သေဆုံးသူတွေဟာ ပါးစပ်ကနေ အမြှုပ်ထွက်နေပြီး၊ လက်သည်းတွေလည်း နီနေကာ၊ သူတို့ဘေးနားမှာ အိမ်သာသန့် ဆေးရည်နဲ့ ဆိုဒီယမ် ဟိုက်ဒရောက်ဆိုက် အထုပ်ကို တွေခဲ့ရပါတယ်။ ရဲတပ်ဖွဲ့ကတော့ ကနဦး စုံစမ်းစစ်ဆေးမှုအရ အိမ်သာသန့် ဆေးရည်နဲ့ ဆိုဒီယမ် ဟိုက်ဒရောက်ဆိုက်အမှုန့်တို့ ဓာတ်ပြုရာကနေ ထွက်လာတဲ့ အဆိပ်ငွေ့ကြောင့် သေဆုံးရတာလို့ ထုတ်ပြန်ထားပါတယ်။

အိမ်သာသန့်ဆေးရည်မှာ ပါ၀င်တဲ့ ဓာတုပစ္စည်းဟာ ဆိုဒီယမ် ဟိုက်ဒရောက်ဆိုက်နဲ့ ဓာတ်ပြုရင် အသက်ရှုလမ်းကြောင်းကို ထိခိုက်စေတဲ့ အဆိပ်ဓာတ်ငွေ့ တစ်မျိုးကို ထွက်စေပါတယ်။ ဒီအငွေ့ကို ရှူမိရင် မူးမေ့တတ်ပြီး လေလုံနေတဲ့ အခန်းမျိုးမှာဆို သေဆုံးတဲ့အထိ ဖြစ်နိုင်ပါတယ်။

Ref: The Star