သြဂုတ် ၁၁၊ ၂၀၂၄
M-Media
-တောင်ကိုရီးယား သမ္မတကတော် ကင်ကွန်ဟီ၊ အတိုက်အခံခေါင်းဆောင်ဟောင်း လီဂျယ်မြွန်တို့ ပါ၀င်တဲ့ ခြစားမှုကိစ္စတွေကို စုံစမ်းစစ်ဆေးမှုမှာ ပါ၀င်သူ အကြီးတန်းအရာရှိတစ်ဦးကို သြဂုတ်လ ၉ ရက်နေ့က နေအိမ်မှာ သေဆုံးလျက် တွေ့ခဲ့ရပါတယ်။
ခြစားမှုတိုက်ဖျက်ရေးဗျူရိုရဲ့ ညွှန်ချုပ်အဖြစ် တာ၀န်ထမ်းဆောင်နေတဲ့ အဲဒီအရာရှိဟာ ရုံးကိုမလာတဲ့အတွက် လုပ်ဖော်ကိုင်ဖက်တစ်ဦးက နေအိမ်ကို သွားရောက်ကြည့်ရှုရာမှာ သေဆုံးနေတာကို တွေ့ခဲ့ရတာပါ။ မိမိကိုယ်ကို သတ်သေကြောင်း သေဆုံးသူက စာချန်ထားခဲ့ပြီး အာဏာပိုင်တွေက သေဆုံးရခြင်း အကြောင်းအရင်းကို ဆက်လက် စုံစမ်းနေဆဲ ဖြစ်ပါတယ်။
ဇန်န၀ါရီလက လီဂျယ်မြွန် ပုဂ္ဂလိကရဟတ်ယာဥ် ငှားယမ်းအသုံးပြုတဲ့ကိစ္စ၊ သမ္မတကတော် ဒေါ်လာ ၁၀၀၀၀ တန် လက်ကိုင်အိတ် လက်ဆောင်ယူထားတဲ့ကိစ္စတွေ အပါအ၀င် နိုင်ငံရေး ထိပ်ပိုင်းအလွှာကသူတွေရဲ့ ခြစားမှု သံသယ ကိစ္စတော်တော်များများကို စုံစမ်းစစ်ဆေးမှုမှာ ဒီအရာရှိက ပါ၀င်ပတ်သက်နေပါတယ်။
လက်ကိုင်အိတ်ကိစ္စမှာ သမ္မတကတော် အပြစ်မရှိဘူးလို့ ခြစားမှုတိုက်ဖျက်ရေးဗျူရိုက ဆုံးဖြတ်ခဲ့ပေမယ့် ဒီအမှုကို ပိတ်ဖို့ ထိပ်ပိုင်းအရာရှိတွေက ဖိအားပေးခဲ့ကြောင်း၊ ဒီစိတ်ဖိစီးမှုတွေကြောင့် ဘ၀ဖြတ်သန်းရာမှာ အလွန်ခက်ခဲနေကြောင်း အရာရှိက သူငယ်ချင်းတစ်ယောက်ကို မသေခင်မှာ ဖုန်းဆက်ပြောကြားခဲ့တယ်လို့ တောင်ကိုရီးယား မီဒီယာတွေက ဖော်ပြပါတယ်။
Ref: New Strait Times
