မတ် ၁၅၊ ၂၀၁၇
M-Media
– အမေရိကန်နှင့် ဆော်ဒီအာရေဗျနှင့် ဆက်ဆံရေးမှာ သမိုင်းဝင် အလှည့်အပြောင်းဖြစ်ခဲ့ပြီဟု အမေရိကန်သမ္မတ ဒေါ်နယ်ထရမ့်နှင့် တွေ့ဆုံပြီးနောက် ဆော်ဒီ ဒုတိယအိမ်ရှေ့မင်းသား မိုဟာမက် ဘင် ဆလ်မန်က ပြောကြားလိုက်သည်။
ခေါင်းဆောင်နှစ်ဦးမှာ ယမန်နေ့က အိမ်ဖြူတာ်၌ တွေ့ဆုံခဲ့ပြီး ဇန်န၀ါရီ ၂၀ ထရမ့် အာဏာရယူပြီးကတည်းက ဆော်ဒီ အကြီးတန်း တာဝန်ရှိသူတစ်ဦးနှင့် ပထမဆုံး တွေ့ဆုံခြင်းဖြစ်သည်။ မိုဟာမက် ဘင် ဆလ်မန်မှာ ဆော်ဒီ၏ ဘဏ္ဍာရေးကို စီမံခန့်ခွဲနေပြီး ကာကွယ်ရေးဝန်ကြီးလည်း ဖြစ်သည်။
“ဒီနေ့တွေ့ဆုံမှုက ကိစ္စရပ်တွေကို သူတို့ရဲ့ လမ်းကြောင်းမှန်ပေါ် ပြန်လည်ရောက်ရှိစေခဲ့ပြီး နှစ်နိုင်ငံရဲ့ နိုင်ငံရေး၊ စစ်ရေး၊ လုံခြုံရေးနဲ့ စီးပွားရေးကိစ္စတွေမှာ ကြီးမားတဲ့ ပြောင်းလဲမှုကို ဖြစ်တည်စေခဲ့ပါတယ်” ဟု မင်းသား မိုဟာမက်၏ အကြီးတန်းအကြံပေးက ကြေငြာချက်တွင် ပြောကြားခဲ့သည်။
၂၀၁၅ ခုနှစ် အီရန်နှင့် အင်အားကြီး ၆ နိုင်ငံတို့ နျူကလီးယားသဘောတူညီချက် ရရှိပြီးနောက်ပိုင်း အိုဘားမားအစိုးရလက်ထက်တွင် ဆော်ဒီနှင့် အမေရိကန်တို့၏ ဆက်ဆံရေးမှာ မပြေမလည်ဖြစ်ခဲ့ပြီး ယမန်နေ့တွေ့ဆုံမှုတွင် ထိုကိစ္စအား ပြောကြားခဲ့ဖွယ် ရှိနေသည်။
ကြောငြာချက်တွင် မင်းသားက အီရန်နှင့် နျူသဘောတူညီချက်မှာ အလွန် အန္တရာယ်ရှိကြောင်း၊ အီရန်၏ ဒေသတွင်း သြဇာချဲ့ထွင်မှု လုပ်ရပ်များ၏ အန္တရာယ်နှင့်ပတ်သက်၍ ခေါင်းဆောင်နှစ်ဦးမှာ တူညီသောအမြင်များရှိကြောင်း အကြံပေးက ထည့်သွင်းပြောကြားခဲ့သည်။
အမေရိကန်က မွတ်စလင် ၆ နိုင်ငံအား ပြည်ဝင်ခွင့်ပိတ်ခြင်းမှာ မွတ်စလင်နိုင်ငံများ သို့မဟုတ် အစ္စလာမ်သာသနာကို ပစ်မှတ်ထားသည်ဟု မင်းသားက မမှတ်ယူကြောင်း၊ ထရမ့်ထံမှ အစ္စလာမ်နှင့်ပတ်သက်သည့် အမြင်များကို ရှင်းရှင်းလင်းလင်းကြားရမှုနှင့် အပြုသဘောဆောင်သည့် သဘောထားအတွက် ကျေနပ်မိကြောင်း ကြေငြာချက်တွင် ဖော်ပြထားသည်။
ခေါင်းဆောင်နှစ်ဦးမှာ ဆော်ဒီတွင် အမေရိကန် ကုမ္ပဏီများ ရင်းနှီးမြှုပ်နှံရေးအတွက်လည်း ဆွေးနွေးခဲ့ကြသည်။
Ref: Aljazeera
