Author: Ko Lay

မတ် ၂၊ ၂၀၂၂
M-Media

-နော်၀ေ ဆက်သွယ်ကုမ္ပဏီ Telenor က မြန်မာနိုင်ငံမှာရှိတဲ့ သူတို့ရဲ့ ဆက်သွယ်ရေးလုပ်ငန်းကို ရောင်းချရာမှာ မြန်မာဘဏ်တွေမှာ သိမ်းဆည်းထားတဲ့ ကန်ဒေါ်လာ သန်း ၁၀၀ လွှဲပြောင်းပေးဖို့လည်း ပါ၀င်တယ်လို့ ဒီကိစ္စနဲ့ နီးစပ်တဲ့ ရင်းမြစ်တွေကို ကိုးကားပြီး ရိုက်တာသတင်းဌာနက ဒီကနေ့မှာ ဖော်ပြပါတယ်။

အာဏာသိမ်းစစ်ကောင်စီနဲ့ ပူးပေါင်းလုပ်ဆောင်ရင် နိုင်ငံတကာအသိုင်းအ၀ိုင်းရဲ့ စီးပွားရေး ပိတ်ဆို့အရေးယူမှု ဒဏ်ကို ခံရမှာ၊ သုံးစွဲသူတွေရဲ့ အချက်အလက်တွေကိုတောင်းတာ၊ ကြားဖြတ်နားထောင်တဲ့ ဆော့ဖ်၀ဲ တပ်ဆင်တာလို လူ့အခွင့်အရေး ချိုးဖောက်မှုတွေ လုပ်ဆောင်ခိုင်းတာ၊ ၀န်ထမ်းတွေရဲ့ လုံခြုံရေးကို စိုးရိမ်ရတာတွေကြောင့် မြန်မာနိုင်ငံက ဆက်သွယ်ရေးလုပ်ငန်း ‘တယ်လီနောမြန်မာ’ ကို ရောင်းချတော့မယ်လို့ Telenor က ပြီးခဲ့တဲ့နှစ်မှာ ကြေငြာခဲ့ပါတယ်။

အစပိုင်းက လက်ဘနွန်အခြေစိုက် M1 ကုမ္ပဏီကို ဒေါ်လာ ၁၀၅ သန်းနဲ့ ရောင်းချမယ်လို့ ပြောခဲ့ပေမယ့် စစ်ကောင်စီက သူတို့နဲ့ နီးစပ်တဲ့ ‘ရွှေဗျိုင်းဖြူ ကုမ္ပဏီ’ နဲ့ ပူးတွဲ၀ယ်ယူဖို့ ညွှန်ကြားခဲ့ပါတယ်။ အဲဒီအထဲက ၅၅ သန်းကို ချက်ခြင်းပေးချေရမှာ မဟုတ်ဘဲ နောက်ထပ် ၅ နှစ်အတွင်း ပေးချေရမှာ ဖြစ်ပါတယ်။

ဒီအရောင်းအ၀ယ်နဲ့ နီးစပ်သူ ၃ ဦးက မြန်မာဘဏ်တွေမှာ အပ်နှံထားတဲ့ တယ်လီနောရဲ့ ၀င်ငွေ သန်း ၁၀၀ ကို ပိုင်ရှင်အသစ်တွေထံ လွှဲပြောင်းပေးရေးလည်း သဘောတူညီချက်မှာ ပါ၀င်တယ်လို့ ရိုက်တာသတင်းဌာနကို ပြောကြားခဲ့ပါတယ်။ ဒီအချက်ဟာ Telenor က မြန်မာနိုင်ငံကနေ အလျင်အမြန်ထွက်သွားဖို့ ကြိုးစားနေမှုကို မီးမောင်းထိုးပြနေတာလည်း ဖြစ်ပါတယ်။

လက်ရှိမှာ ဒီအရောင်းအ၀ယ်ကို စစ်ကောင်စီရဲ့ ကုန်သွယ်ရေးဌာနက အတည်ပြုထားပြီး၊ ပြည်ပ ရင်းနှီးမြှုပ်နှံမှုဌာနရဲ့ ခွင့်ပြုချက်ကို စောင့်ဆိုင်းနေတာ ဖြစ်ပါတယ်။

အခုပေါက်ကြားလာတဲ့ ဒေါလာ သန်း ၁၀၀ ကိစ္စကို Telenor က ဖြေကြားဖို့ ငြင်းဆန်ခဲ့ပြီး M1 ကုမ္ပဏီကလည်း ဒါဟာ အခြေအမြစ်မရှိတဲ့စကားဖြစ်တယ်လို့ ပြောကြားတုန့်ပြန်ခဲ့ပါတယ်။ ရွှေဗျိုင်းကုမ္ပဏီကလည်း ဖြေကြားဖို့ ငြင်းဆန်ခဲ့ပါတယ်။

Ref: Reuters

မတ် ၃၊ ၂၀၂၂
M-Media

-မြန်မာနိုင်ငံဆိုင်ရာ အာဆီယံအထူးကိုယ်စားလှယ်ဖြစ်တဲ့ ကမ္ဘောဒီယား နိုင်ငံခြားရေး၀န်ကြီး ပရက်ဆိုခွန်ဟာ အခုလ နှောင်းပိုင်းမှာ မြန်မာနိုင်ငံကို ပထမဆုံးအကြိမ် လာရောက်မယ်လို့ သိရပါတယ်။

၂၀၂၂ ခုနှစ် အာဆီယံ ဥက္ကဌအဖြစ် ဆောင်ရွက်မယ့် ကမ္ဘောဒီယား၀န်ကြီးချုပ် ဟွန်ဆန်က တပည့်ဖြစ်သူ ပရက်ဆိုခွန်ကို အာဆီယံအထူးကိုယ်စားလှယ်အဖြစ် ခန့်အပ်ခဲ့တာပါ။

ပရက်ဆိုခွန်တစ်ယောက် ၂၀ ရက်နေ့က ၂၃ ရက်နေ့အထိ မြန်မာနိုင်ငံကို သွားရောက်မယ်လို့ ကမ္ဘောဒီယားနိုင်ငံခြားရေး၀န်ကြီးဌာန ပြောရေးဆိုခွင့်ရှိသူက ဒီကနေ့မှာ ထုတ်ပြောခဲ့ပါတယ်။ ဒါပေမယ့် အသေးစိတ်အစီအစဥ်ကို ပြောကြားခဲ့ခြင်း မရှိပါဘူး။

မြန်မာနိုင်ငံက ပြဿနာကို ဖြေရှင်းဖို့အတွက် ၂၀၂၁ ခုနှစ် ဧပြီလ ထိပ်သီးအစည်းအ၀ေးမှာ အာဆီယံက သဘောတူညီချက် ၅ ချက် သတ်မှတ်ခဲ့ပါတယ်။ အဲဒီအထဲမှာ အကြမ်းဖက်မှုရပ်တန့်ရေး၊ လူသားချင်းစာနာထောက်ထားမှု အကူအညီတွေ ပေးအပ်ခွင့်ပေးရေး၊ မြန်မာ့နိုင်ငံရေးနယ်ပယ်က သက်ဆိုင်သူအားလုံးနဲ့ အာဆီယံအထူးကိုယ်စားလှယ်တို့ တွေ့ဆုံကာ ဆွေးနွေးညှိနှိုင်းရေးတွေ ပါ၀င်ပါတယ်။

ဒါပေမယ့် မြန်မာအာဏာသိမ်းစစ်ကောင်စီက သဘောတူညီချက်တွေကို အကောင်အထည်ဖော်ဖို့ မကြိုးစားခဲ့တဲ့အတွက် အာဆီယံက အစည်းအ၀ေးတွေမှာ စစ်ခေါင်းဆောင်တွေကို ဖိတ်ကြားခြင်း မပြုပါဘူး။

အထူးကိုယ်စားလှယ်ကို ဖြုတ်ချခံလိုက်ရတဲ့ NLD ပါတီက ခေါင်းဆောင်တွေနဲ့ တွေ့ခွင့်ပေးမှာ မဟုတ်ဘူးလို့ အာဏာသိမ်းစစ်ကောင်စီက အစောပိုင်းမှာ ပြောကြားထားပေမယ့် ဇန်န၀ါရီလ ကမ္ဘောဒီးယား၀န်ကြီးချုပ် ဟွန်ဆန်နဲ့ ဖုန်းပြောဆိုမှုမှာတော့ ပရက်ဆိုခွန် မြန်မာနိုင်ငံကိုလာရင် NLD ခေါင်းဆောင်ပိုင်းနဲ့ တွေ့ခွင့်ပေးမယ်လို့ စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်က ပြောကြားခဲ့ပါတယ်။

ဒါပေမယ့် ပထမဆုံးအကြိမ်မှာ ဖမ်းဆီးထိန်းသိမ်းခံထားရတဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ တွေ့ ခွင့်ရမှာမဟုတ်ဘူးလို့ ပရက်ဆိုခွန်က ၀န်ခံထားပါတယ်။
ကမ္ဘောဒီးယာ၀န်ကြီးချုပ် ဟွန်ဆန်ဟာ အာဏာသိမ်းစစ်ကောင်စီကို အလိုလိုက်တဲ့ ဆက်ဆံရေးမျိုး တည်ဆောက်ချင်ပေမယ့် အခြားအာဆီယံအဖွဲ့၀င်တွေက လက်မခံတဲ့အတွက် မအောင်မြင်ပါဘူး။

Ref: AP