News @ M-Media

မတ်လ ၅ ရက်နောက်ပိုင်း မီးမပြတ်တော့ဟု နိုင်ငံ့ခေါင်းဆောင် ကတိပေး

မတ် ၃၊ ၂၀၂၂
M-Media

-မတ်လ ၅ ရက်နေ့နောက်ပိုင်း မီးပြတ်တာတွေ ထပ်ဖြစ်တော့မှာမဟုတ်ဘူးလို့ သီရိလက်ာသမ္မတက ဂိုတာဘာယာ ရာဂျာပက်ဆာက ကတိပြု ပြောကြားလိုက်ပါတယ်။

ဓာတ်အားပေးစက်ရုံတွေမှာ အသုံးပြုဖို့ လောင်စာဆီ၀ယ်ယူရေး အစိုးရမှာ ငွေကြေးအလုံအလောက် မရှိတဲ့အတွက် သီရိလက်ာနိုင်ငံတစ်၀ှမ်း ဓာတ်အားပြတ်တောက်မှုတွေ ဖြစ်ပွားနေတာဖြစ်ပါတယ်။ နိုင်ငံအတွင်း လောင်စာဆီ မလုံလောက်တာကြောင့် ဆီဆိုင်တွေမှာ လူတန်းရှည် စီနေရမှုဟာ တစ်လလောက်ရှိနေပါပြီ။

သမ္မတ ဂိုတာဘာယာရဲ့ ထုတ်ပြန်ချက်မှာ မတ်လ ၅ ရက်နေ့နောက်ပိုင်း နိုင်ငံတစ်၀ှမ်း ဓာတ်အားပြတ်တောက်မှုရှိတော့မှာ မဟုတ်ဘဲ၊ ဆီဆိုင်တွေမှာလည်း ၄ ရက်နေ့ကနေစတင်ပြီး လောင်စာဆီ အပြည့်အ၀ ရရှိလိမ့်မယ်လို့ ဖော်ပြထားပါတယ်။

နိုင်ငံရဲ့ လောင်စာဆီလိုအပ်ချက်ကို ဖြည့်ဆည်းနိုင်ရေးအတွက် သီရိလက်ာဟာ တစ်လကို ကန်ဒေါ်လာ သန်း ၅၀၀ လောက် လိုအပ်နေတာဖြစ်ပါတယ်။ ဗဟိုဘဏ်က လိုအပ်နေတဲ့ ငွေကြး ထုတ်ပေးမှုကို ရပ်ဆိုင်းထားတဲ့အတွက် လောင်စာဆီ၀ယ်ယူရေး အခက်အခဲ ဖြစ်နေတာပါ။

အစိုးရက ဘယ်လိုစီမံထားလဲဆိုတဲ့ ရိုက်တာသတင်းဌာနရဲ့ မေးမြန်းမှုကို သီရိလက်ာ စွမ်းအင်၀န်ကြီးဌာနက ပြန်လည်ဖြေကြားခြင်းမရှိပါဘူး။

သီရိလက်ာနိုင်ငံ ဓာတ်အားပေးစက်ရုံတွေရဲ့ သုံးပုံတစ်ပုံဟာ လောင်စာဆီနဲ့ လတ်ပတ်တာဖြစ်ပြီး၊ ကျန်တာတွေက ကျောက်မီးသွေး၊ ရေအားနဲ့ လည်ပတ်တာမျိုး ဖြစ်ပါတယ်။

Ref: Reuters