Author: Ko Lay

သြဂုတ် ၁၀၊ ၂၀၁၅
M-Media

– နေထိုင်ရာလူ့အဖွဲ့အစည်းအား ပြန်လည်ပေးဆပ်ရန် ရည်ရွယ်၍ လန်ဒန်မြို့ရှိ ဗလီဝတ်ကျောင်းတော်တစ်လုံးမှာ မြို့အတွင်းမှ ချို့တဲ့သူများအတွက် တစ်ပတ်လျှင် တစ်ကြိမ် ရုပ်ပိုင်းဆိုင်ရာနှင့် စိတ်ပိုင်းဆိုင်ရာ ထောက်ပံ့ကူညီမှုများကို ပြုလုပ်ပေးသည်ဟု သိရသည်။

Finsbury Park ဟု အမည်ရသည့် ဗလီဝတ်ကျောင်းတော်ဖြစ်ပြီး အဆိုပါ ကူညီထောက်ပံ့ပေးရေး စီမံကိန်းမှာ ပတ်ဝန်းကျင်ရှိ လူ့အဖွဲ့အစည်းများအား ဖေးမနိုင်ရေးကို ရည်ရွယ်သော ဘာသာရေးဆိုင်ရာ ဆောင်ရွက်ချက်များ၏ အစိတ်အပိုင်းဖြစ်သည်ဟု ဗလီဝတ်ကျောင်းတော်မှ ဒုတိယဒါရိုက်တာဖြစ်သူ မိုဟာမက်အလီက အလ်ဂျာဇီးရားသတင်းဌာနသို့ သြဂုတ်လ ၈ ရက်နေ့တွင် ပြောကြားခဲ့သည်။

ဗလီဝတ်ကျောင်းတော်ရှိ လူမှုကူညီရေး ၀န်ထမ်းများမှာ ဗလီဝတ်ကျောင်းတော်သို့ လာရောက်ကြသည့် ချို့တဲ့သူများအား အစားအသောက်များကို ကူညီထောက်ပံ့ပေးကာ သောကများကို မျှဝေခံစားခဲ့ကြသည်။

အဆိုပါ ထောက်ပံကူညီရေးလုပ်ငန်းတွင် စေတနာ့ဝန်ထမ်းအဖြစ် ပါဝင်ခဲ့သော အီရှီယာကမူ ဗလီဝတ်ကျောင်းတော်သို့ လာရောက်ကြသည့် အိမ်ယာမဲ့များမှာ ၎င်းတို့ဘ၀တွင် မရရှိသည့် လူမှုလုံခြုံမှုကို ရှာဖွေကြသည်ဟုဆိုသည်။ ထို့ပြင် ဗလီဝတ်ကျောင်းတော်မှာ ယခုထက်ပိုမို၍ အစားအသောက်များ ကူညီပေးရန် မျှော်လင့်ထားသည်ဟု ပြောကြားခဲ့သည်။

အလီကမူ “မွတ်စလင်များမှာ လူမှုပေါင်းစည်းရေးတွင် အဆင့်တစ်ခုရှိရမည်” ဟု ထည့်သွင်းပြောကြားခဲ့သည်။

Finsbury Park ဗလီဝတ်ကျောင်းတော်မှာ မွတ်စလင်များနှင့် မွတ်စလင်မဟုတ်သူများကို ပစ်မှတ်ထားသည့် လှုပ်ရှားမှု အများအပြားကို ဦးဆောင်ပြုလုပ်နေပြီး၊ ဘာသာပေါင်းစုံ ချစ်ကြည်ရေးနှင့် ငြိမ်းချမ်းစွာ ယုံကြည်ကိုးကွယ်ရေး ကိစ္စများတွင် လန်ဒန်လူ့အဖွဲ့အစည်းအတွင်း လွန်ခဲ့သည့် ၁၀ နှစ်မှစ၍ အဓိက အချက်အချာနေရာလည်း ဖြစ်လာခဲ့သည်။

ထို့ကဲ့သို့ လူ့အဖွဲ့အစည်းအတွက် ပေးဆပ်မှုများကြောင့် ဗြိတိန် ပရဟိတကော်မရှင်မှ ပေးအပ်ချီးမြှင့်သော Visible Quality Award ဆုကို ရရှိထားသည့် တစ်ခုတည်းသော ဗလီဝတ်ကျောင်းတော်လည်း ဖြစ်သည်။

ဗြိတိန်တွင် အစ္စလာမ်ဘာသာကို သက်ဝင်ယုံကြည်သူဦးရေမှာ ၂.၇ သန်းနီးပါး ရှိနေသည်။ တတ်သိပညာရှင်များအဖွဲ့ဖြစ်သော Demo အဖွဲ့၏ လေ့လာမှုများအရ ယူကေရှိ အစ္စလာမ်ဘာသာဝင်များမှာ အခြားသော ပြည်သူများထက် တိုင်းချစ်ပြည်ချစ်စိတ် ပိုများသည်ဟု သိရှိခဲ့ရသည်။

Ref: Onislam