မတ် ၇၊ ၂၀၁၅
M-Media
– အအိပ်အနေနည်းခြင်းမှာ ကျန်းမာရေးအား ထိခိုက်နိုင်သည်ဟု သိရှိထားပြီး စမ်းသပ်မှု အသစ်များအရ နေ့အချိန်တွင် ခဏတဖြုတ် အိပ်စက်ခြင်းက ခန္ဓာကိုယ်၏ ကိုယ်ခံအားကို ကောင်းမွန်စေသည်ကို တွေ့ရှိခဲ့ရသည်။
နေ့ဘက် ခဏတစ်ဖြုတ်အိပ်ခြင်းက စိတ်ဖိစီးမှုနှင့် ကိုယ်ခံစွမ်းအားကို မည်သို့ သက်ရောက်စေသည်နှင့် ပတ်သက်၍ ပြင်သစ်နိုင်ငံ ပဲရစ်မြို့ရှိ Université Paris Descartes-Sorbonne Paris Cité တက္ကသိုလ်တွင် မကြာသေးမီက ပြုလုပ်ခဲ့သော လေ့လာမှုတွင် ထိုကဲ့သို့ တွေ့ရှိခဲ့ရခြင်းဖြစ်ပြီး နေ့လည်နေ့ခင်း မိနစ် ၃၀ ခန့် အိပ်စက်ခြင်းမှာ ကိုယ်ခံစွမ်းအားကို ပြန်လည်ရရှိစေသည်ဟု သုတေသနပညာရှင် ဘရိုက်စ် ဖာရွတ်က ပြောကြားခဲ့သည်။
ဖာရွတ်နှင့် လုပ်ဖော်ကိုင်ဖက်များမှာ ကျန်းမာသော အမျိုးသား ၁၁ ယောက်အား ခေါ်ယူ၍ အစားအသောက်၊ အလင်းတို့ကို ကန့်သတ်ထားပြီး အရက်၊ ကဖင်းနှင့် ဆေးသောက်သုံးမှုတို့ လုံးဝမလုပ်ရသော ဓာတ်ခွဲခန်းတွင် အိမ်စက်ခြင်းနှင့်ပတ်သက်၍ ၃ ရက်စီ ၂ ကြိမ်ခွဲကာ စမ်းသပ်ခဲ့သည်။
ပထမအကြိမ်၌ ၎င်းတို့အား တစ်ညတွင် ပုံမှန်အတိုင်း အိပ်စက်စေခဲ့ပြီး၊ ဒုတိယညတွင် ၂ နာရီသာ အိပ်စက်စေခဲ့ကာ၊ တတိယညတွင် ၎င်းတို့ ကြိုက်သလောက် အိပ်စက်စေခဲ့သည်။ ဒုတိယ အကြိမ်တွင်မူ ထိုကဲ့သို့ပင် အိပ်စက်စေခဲ့ပြီး နေ့ခင်းပိုင်းတွင် နာရီဝက်စီ ခဏတစ်ဖြုတ် အိပ်စက်ခိုင်းခဲ့သည်။
ထို့နောက် ၎င်းတို့၏ ဆီးနှင့် တံတွေးနမူနာတို့ကို နေ့စဉ်ယူကာ စိတ်ဖိစီးမှုဖြစ်သည့်အခါ ခန္ဓာကိုယ်မှ ထုတ်လွှတ်ပေးသော ပဋိပစ္စည်းကို စမ်းသပ်ခဲ့ရာတွင် ညဘက်အိပ်စက်မှုနည်းသောနေ့၌ အဆိုပါ ပဋိပစ္စည်း ထုတ်လွှတ်မှုမှာ ပုံမှန်အိပ်စက်သည့်နေ့ထက် ပိုများနေပြီး နေ့ခင်းဘက် ခဏတစ်ဖြုတ် အိပ်စက်သည့် နေ့တွင်မူ ပုံမှန်အတိုင်းသာ ရှိသည်ကို တွေ့ရှိခဲ့ရသည်။
ထို့ပြင် အအိပ်အနေနည်းခြင်းမှာ ကိုယ်ခံစွမ်းအားကို ထိန်းညှိပေးသော မော်လီကျူးများ ထွက်ခြင်းကို ထိခိုက်စေပြီး နေ့ခင်းဘက် ခဏတစ်ဖြုတ်အိပ်ခြင်းမှာ အဆိုပါ မော်လီကျူးကို ပုံမှန်အတိုင်း ထိန်းထားနိုင်ကြောင်းလည်း တွေ့ရှိခဲ့ရသည်။
ဖာရွတ်ကမူ နေ့ခင်းဘက် ခဏတစ်ဖြုတ်အိပ်ခြင်းမှာ ညဘက်အိပ်ရေးပျက်ခြင်းအတွက် အကောင်းဆုံး ကုစားမှုဖြစ်ပြီး ၎င်းတို့၏ ထိုတွေ့ရှိချက်များကို လက်တွေ့ဘ၀တွင် စမ်းသပ်ရန် လိုအပ်သည်ဟု ထည့်သွင်းပြောကြားခဲ့သည်။
Ref: Channelnewsasia
