နိုဝင်ဘာ ၂၀၊ ၂၀၂၀
M-Media
-အိန္ဒိယနိုင်ငံအရှေ့ပိုင်း ဘီရ်ဟာရ်ပြည်နယ်မှာ မွတ်စလင်အမျိုးသမီးငယ်ကို ဟိန္ဒူအမျိုးသားတစ်ဦးက အရှင်လတ်လတ် မီးရှို့သတ်ဖြတ်မှုဖြစ်ပွားခဲ့ပြီး ဒီကိစ္စမှာ တရားမျှတမှု ဆောင်ကျဉ်းပေးရေးအတွက် အိန္ဒိယပြည်သူတွေ၊ အမျိုးသမီးအဖွဲ့အစည်းတွေနဲ့ နိုင်ငံရေးသမားတွေက တောင်းဆိုနေကြပါတယ်။
အသက် ၂၀ အရွယ် ဂူလ်နက်ဇ်ခါတွန်ဆိုတဲ့ အမျိုးသမီးဟာ အောက်တိုဘာ ၃၀ ရက်နေ့က ရေနံဆီလောင်း မီးရှိုးခံခဲ့ရတာဖြစ်ပြီး ခန္ဓာကိုယ်ရဲ့ ၇၅ ရာခိုင်နှုန်း မီးလောင်ခဲ့တဲ့သူမဟာ ပြီးခဲ့တဲ့ တနင်္ဂနွေနေ့မှာတော့ ရရှိတဲ့ဒဏ်ရာတွေကြောင့် ကွယ်လွန်သွားခဲ့ပါတယ်။
ဟိန္ဒူအမျိုးသား ဆာတစ်ရှ် ကူးမားရ် ရိုင်နဲ့ သူငယ်ချင်း ၂ ယောက်ဟာ မိမိကို လမ်းမှာ တားဆီးဟာ လိင်ပိုင်းဆိုင်ရာ အရှက်ရအောင်လုပ်ခဲ့ကြောင်း၊ အခြားအမျိုးသားတစ်ဦးနဲ့ လက်ထပ်ဖို့ စီစဉ်ထားတာကို ဖျက်သိမ်းပြီး မိမိနဲ့လက်ထပ်ဖို့ ကူးမားရ်က တောင်းဆိုခဲ့သလို သူမဖက်က ငြင်းဆိုခဲ့အခါမှာတော့ ရေနံဆီလောင်းပြီး မီးရှို့ခဲ့ကြောင်း ဂူလ်နက်ဇ်ခါတွန်က မကွယ်လွန်ခင်ပြုလုပ်ခဲ့တဲ့ ဗီဒီယိုမှတ်တမ်းမှာ ပြောကြားခဲ့ပါတယ်။
ဂူလ်နက်ဇ်ခါတွန်ရဲ့ မိဘတေတွက ကူးမားရ်ဟာ လွန်ခဲ့တဲ့ ၃၊ ၄ လလောက်ကတည်းက သမီးဖြစ်သူကို လိုက်လံနှောက်ယှက်ခဲ့ပြီး မိဘတွေကိုသွားပြောပေမယ့် ဘာမှလုပ်ဆောင်ပေးတာမရှိဘူးလို့ ပြောကြားခဲ့ပါတယ်။
ကျူးလွန်သူတွေဟာ လက်ရှိမှာ ထွက်ပြေးလွတ်မြောက်နေပြီး ဖမ်းဆီးဖို့အတွက် အဖွဲ့ ၃ ခု ဖွဲ့စည်းထားတယ်လို့ ခရိုင်ရဲတပ်ဖွဲ့က ပြောကြားခဲ့ပါတယ်။ ရဲတပ်ဖွဲ့ဟာ ကျူးလွန်သူကို ဖမ်းဆီးဖို့ အားထုတ်လုပ်ဆောင်တာမရှိဘူးလို့ သေဆုံးသူရဲ့ မိဘတွေက စွပ်စွဲထားပါတယ်။ အခင်းဖြစ်ပွားရာဒေသရဲ့ ရဲတပ်ဖွဲ့အကြီးအကဲဟာ ဒီကိစ္စကို လစ်လျူရှုမှုအတွက် ရာထူးကနေ ရပ်စဲခံထားရပါတယ်။
ဂူလ်နက်ဇ်ခါတွန် ကွယ်လွန်သွားပြီးတဲ့နောက် မိသားစုဟာ အစိုးရရုံးရှေ့မှာ တနင်္ဂနွေနေ့က ဆန္ဒပြခဲ့ကြပါတယ်။ အခင်းဖြစ်ပွားမှုကို အသေးစိတ်ပြောပြထားတဲ့ ဂူလ်နက်ခါတွန်ရဲ့ ဗီဒီယိုဟာ ဆိုရှယ်မီဒီယာမှာ ပြန့်နှံသွားပြီးတဲ့နောက် အမျိုးသမီးအရေး တက်ကြွလှုပ်ရှားသူတွေ၊ နိုင်ငံရေးသမားတွေက ဒီကိစ္စ အဖြစ်မှန်ပေါ်လာအောင် ဆောင်ရွက်ဖို့ အစိုးရကို တိုက်တွန်းခဲ့ပါတယ်။
Ref: Aljazeera
