ဖေဖော်၀ါရီ ၂၀၊ ၂၀၂၄
M-Media
(ဓာတ်ပုံ – သမ္မတ ဂျိုဗန်နဲလ် မိုစီနှင့်အတူ တွေ့ရသည့် သမ္မတကတော် မာတီနီ)
-အာဖရိက ဟေတီနိုင်ငံမှာ ၂၀၂၁ ခုနှစ်က သမ္မတ ဂျိုဗန်နဲလ် မိုစီ လုပ်ကြံသတ်ဖြတ်ခံရမှုအတွင်း သမ္မတကတော် ပါ၀င်ပတ်သက်ခဲ့တယ်ဆိုတဲ့ မှတ်တမ်းတွေ ပေါက်ကြားလာပါတယ်။
ဒီလုပ်ကြံမှုအတွက် သမ္မတကတော် မာတီနီ မိုစီ၊ ၀န်ကြီးချုပ်ဟောင်း ကလော်ဒီ ဂျိုးဆက်နဲ့ ရဲတပ်ဖွဲ့အကြီးအကဲဟောင်း လီယွန်ချားလ်စ် တို့အပါအ၀င် လူ ၅၀ လောက်ကို ဖမ်းဆီးကာ စုံစမ်းစစ်ဆေးဖို့ တရားရုံးက အမိန့်ပေးထားတဲ့ စာမျက်နှာ ၁၂၂ မျက်နှာပါ ရုံးစာတွဲကို ပြည်တွင်း မီဒီယာ AyiboPost က ဖေဖော်၀ါရီ ၁၉ ရက်နေ့မှာ ဖွင့်ချခဲ့တာ ဖြစ်ပါတယ်။
သမ္မတ ဂျိုဗန်နဲလ် မိုစီဟာ ၂၀၂၁ ခုနှစ် ဇူလိုင်လအတွင်း သမ္မတအိမ်တော်မှာ သေနတ်နဲ့ ပစ်ခတ်လုပ်ကြံခံခဲ့ရတာဖြစ်ပါတယ်။ လူကြံသူတွေဟာ လူ ၂၀ လောက်ပါတဲ့ ကိုလံဘီယာ ကြေးစားအဖွဲ့ပါ။ သမ္မတကတော် မာတီနီက ဒီအဖြစ်အပျက်မှာ ဒဏ်ရာရခဲ့ပါတယ်။
တရားရုံးမှတ်တမ်းမှာ မာတီနီရဲ့ ထွက်ဆိုချက်တွေဟာ အကွဲအလွဲတွေများနေပြီး သံသယ၀င်စရာကောင်းနေတယ်လို့ ဖော်ပြပါတယ်။
၀န်ကြီးချုပ်ဟောင်း ဂျိုးဆက်နဲ့ ရဲချုပ်ဟောင်း လီယွန်ချားလ်စ်တို့ကိုတော့ လုပ်ကြံမှုမှာ ပါ၀င်ခဲ့ကြောင်း ခိုင်လုံတဲ့ ဆက်နွယ််မှု တွေ့ရတယ်လို့ တရားရုံးက ဆိုပါတယ်။ သတ်ဖြတ်မှုကို ဘယ်သူက ဦးဆောင်တယ်ဆိုတာနဲ့ ဘယ်သူက ငွေကြေးထုတ်ပေးတယ်ဆိုတာကိုတော့ ဖော်ပြထားခြင်း မရှိပါဘူး။
မာတီနီဟာ ခင်ပွန်းဖြစ်သူကိုသတ်ပြီး သမ္မတနေရာကို ဆက်ခံဖို့ ရည်ရွယ်ခဲ့တယ်လို့ တရားရုံးမှတ်တမ်းမှာ ဖော်ပြထားပါတယ်။
မာတီနီကတော့ သူမဟာ မတရားစွပ်စွဲ ဖမ်းဆီးခံရတာဆိုပြီး ဆိုရှယ်မီဒီယာမှာ ရေးသားခဲ့ပါတယ်။ ၀န်ကြီးချုပ်ဟောင်း ဂျိုးဆက်ကလည်း လက်ရှိ၀န်ကြီးချုပ် အရီယဲလ် ဟင်နရီဟာ တရားရေးစနစ်ကို အသုံးချပြီး အတိုက်အခံတွေကို နှိပ်ကွပ်နေတယ်လို့ ၀ေဖန်ခဲ့ပါတယ်။
ဒီလုပ်ကြံမှုကိစ္စကို တောင်ဖလော်ရီဒါမှာ စီစဥ်ခဲ့ကြောင်း တွေ့ရှိတဲ့အတွက် ဒီကိစ္စမှာ ပါ၀င်ပတ်သက်သူ ၁၁ ဦးကို အမေရိကန်ပြည်ထောင်စု မိုင်ယာမီမှာ စုံစမ်းစစ်ဆေးနေပါတယ်။
အဲဒီအထဲက ၆ ယောက်က လုပ်ကြံရာမှာပါ၀င်ကြောင်း ၀န်ခံခဲ့ပြီး ပထမက မိုစီကို ပြန်ပေးဆွဲဖို့ စီစဥ်ခဲ့ပေမယ့် နောက်ဆုံးမှာ သတ်ဖြတ်ဖို့ အစီအစဥ်ပြောင်းခဲ့တယ်လို့ ဆိုပါတယ်။
ဂျိုဗန်နဲလ် မိုစီ လုပ်ကြံခံရပြီးတဲ့နောက် သမ္မတကတော် မာတီနီလည်း သမ္မတဖြစ်ခွင့် မရခဲ့ပါဘူး။ နိုင်ငံတစ်၀ှမ်း လူဆိုးဂိုဏ်းတွေ ကြီးစိုးလာပြီး သတ်ဖြတ်မှုတွေလည်း မြင့်တက်လာပါတယ်။
လက်ရှိမှာ အတိုက်အခံခေါင်းဆောင် အရီယဲလ် ဟင်နရီက ၀န်ကြီးချုပ်ရာထူးယူကာ တိုင်းပြည်ကို အုပ်စိုးနေပါတယ်။
Ref: Reuters
