Author: Ko Lay

မတ် ၂၊ ၂၀၂၄

M-Media

-ပြီးခဲ့တဲ့နှစ် အောက်တိုဘာ ၇ ရက်နေ့က စတင်ခဲ့တဲ့ ဂါဇာက အစ္စရေးရဲ့ တစ်ကျော့ပြန်လူသတ်ပွဲမှာ အသတ်ခံရသူအရေအတွက်ဟာ ၃၀၃၂၀ ဦး ရှိလာပြီ ဖြစ်ပါတယ်။

မတ်လ ၁ ရက်နေ့ ဂါဇာတောင်ပိုင်းက ဒုက္ခသည်စခန်းတွေမှာ အစ္စရေးရဲ့ တိုက်ခိုက်သတ်ဖြတ်မှုကိုခံရသူ ၉၂ ဦးရှိပြီး ၁၅၆ ဦး ဒဏ်ရာရခဲ့ပါတယ်။ 

၅ လနီးပါး အစ္စရေးရဲ့ အကြမ်းဖက်မှုအတွင်း ဂါဇာမှာ ဒဏ်ရာရသူအရေအတွက်က ၇၁၅၃၃ ဦးရှိပြီး၊ အဆောက်အဦးတွေကြားမှာ ပိတ်မိပျောက်ဆုံးနေသူ တစ်သောင်းနီးပါး ရှိပါတယ်။ 

ဂါဇာကမ်းမြှောင်က အဆောက်အဦးတွေရဲ့ ၈၅ ရာခိုင်နှုန်းကိုလည်း အစ္စရေးက ဖျက်ဆီးထားပါတယ်။ 

အစုလိုက်အပြုံလိုက် သတ်ဖြတ်မှု

—————-

အာဖရိကသမဂ္ဂ အကြီးအကဲ မူဆာ ဖာကီ မဟ်မတ်က အစ္စရေးဟာ ပါလက်စတိုင်းတွေကို အစုလိုက်အပြုံလိုက် သတ်ဖြတ်နေပြီး နိုင်ငံတကာအသိုင်းအ၀ိုင်းက စုံစမ်းစစ်ဆေးမှုတွေလုပ်ဖို့ တိုက်တွန်းခဲ့ပါတယ်။ 

ကုလရဲ့ အကူအညီ သွားယူသူတွေကို အစ္စရေးက ပစ်မှတ်ထား တိုက်ခိုက်တဲ့ ရာဇ၀တ်မှုကို မဟ်မတ်က အဓိက ထောက်ပြခဲ့ပါတယ်။ 

ဖေဖော်၀ါရီ ၂၉ ရက်နေ့ ဂါဇာမြောက်ပိုင်းမှာ အစ္စရေးရဲ့ ဒီအကြမ်းဖက်မှုကြောင့် အကူအညီလာယူသူ ၁၁၅ ဦး သေဆုံးကာ အနည်းဆုံး ၇၅၀ လောက် ဒဏ်ရာရရှိခဲ့ပါတယ်။ 

“အစ္စရေးတပ်ဖွဲ့တွေရဲ့ လက်ချက်ကြောင့် လူသားချင်းစာနာထောက်ထားမှုဆိုင်ရာ အကူအညီလာယူသူ ၁၀၀ ကျော် သေဆုံးဒဏ်ရာရတဲ့ တိုက်ခိုက်မှုကို အာဖရိကသမဂ္ဂကော်မရှင် အကြီးအကဲ မူဆာ ဖာကီ မဟ်မတ်က ပြင်းပြင်းထန်ထန် ရှုတ်ချပါတယ်” လို့ သမဂ္ဂရဲ့ ဆိုရှယ်မီဒီယာမှာ ဖော်ပြခဲ့ပါတယ်။

Ref: Aljazeera 

ဖေဖော်၀ါရီ ၂၆၊ ၂၀၂၄

M-Media 

-ပါလက်စတိုင်းနိုင်ငံ ဂါဇာကမ်းမြှောင်မှာ အစ္စရေးလုပ်နေတဲ့ လုပ်ရပ်တွေဟာ နောက်ထပ် ရှက်စရာကောင်းတဲ့ နက္ကဘာ (Nakba) တစ်ခုကို ဖန်တီးနေတာဖြစ်တယ်လို့ အာဖရိကသမဂ္ဂ ပြောရေးဆိုခွင့်ရှိသူ ဟာဂျာ ဂူ၀ဲလ်ဒစ်ချ်က ပြောပါတယ်။ 

ဒုတိယကမ္ဘာစစ်အတွင်း နာဇီရန်ကြောင့် ဥရောပကနေ ထွက်ပြေးလာရတဲ့ ဂျူးတွေ ပါလက်စတိုင်းထဲ တရားမ၀င် ၀င်လာ၊  လက်နက်ကိုင်အဖွဲ့ ဖွဲ့ပြီး ဌာနေ ပါလက်စတိုင်းတွေကို သတ်ဖြတ်မောင်းထုတ်ကာ ၁၉၄၈ ခုနှစ်မှာ အစ္စရေးနိုင်ငံကို ထူထောင်ခဲ့ပါတယ်။ 

တရားမ၀င်ဂျူးတွေရဲ့လက်ချက်ကြောင့် သိန်းနဲ့ချီတဲ့ ပါလက်စတိုင်းတွေ သတ်ဖြတ်ခံရပြီး နေရပ်စွန့်ခွာ ထွက်ပြေးခဲ့ရကာ နိုင်ငံလည်း ပျောက်ခဲ့ပါတယ်။ 

အာဖရိကသမဂ္ဂ ပြောရေးဆိုခွင့်ရှိသူ ဂူ၀ဲလ်ဒစ်ချ်က ဂါဇာမှာ ပါလက်စတိုင်းပြည်သူတွေ ခံစားနေရတဲ့ ဒုက္ခသုက္ခတွေ၊ ကြောက်စရာအဖြစ်အပျက်တွေဟာ ပြောပြလို့တောင်မရဘဲ ဒီလုပ်ရပ်တွေအတွက် ဘာနဲ့မှ ဆင်ခြေပေးလို့မရဘူး နိုင်ငံတကာ ခုံသမာဓိရုံး ICJ ကို လျှောက်ထားမှုမှာ ထည့်သွင်းပြောဆိုခဲ့ပါတယ်။

အစ္စရေးရဲ့ ရက်စက်ကြမ်းကြုတ်တဲ့ စစ်တပ်ကြောင့် ပါလက်စတိုင်းလူ့အဖွဲ့အစည်း အတိဒုက္ခရောက်ကာ စာသင်ကျောင်းတွေ၊ ၀တ်ပြုရာနေရာတွေ၊ နေအိမ်နဲ့ ဆေးရုံတွေ ဆိုးဆိုး၀ါး၀ါး ဖျက်ဆီးခံရတာကိုလည်း သူမက ထောက်ပြပါတယ်။ 

အစ္စရေးဟာ နိုင်ငံတကာ တရားစီရင်ရေးစနစ်ရဲ့ အရေးယူမှုကနေ လွတ်ကင်းနေမှုကို အဆုံးသတ်ဖို့လည်း အာဖရိကသမဂ္ဂ ပြောရေးဆိုခွင့်ရှိသူက တိုက်တွန်းခဲ့ပါတယ်။ 

ICJ ကို ရောက်လာတဲ့ ဒီကိစ္စဟာ ဘက်တူညီတူအကြား ဖြစ်ပွားတဲ့ အငြင်းပွားမှုမျိုးမဟုတ်ဘဲ တစ်ဖက်က ဖိနှိပ်မှု၊ နောက်တစ်ဖက်က ဒီဖိနှိပ်မှုကို တွန်းလှန်နေတဲ့ တစ်ဖက်သတ်အခြေအနေမျိုး ဖြစ်တယ်ဆိုတာ သတိပြုဖို့လိုအကြောင်း ဂူ၀ဲလ်ဒစ်ချ် နောက်ဆုံးပိတ်မှာ ထည့်သွင်းပြောဆိုခဲ့ပါတယ်။ 

Ref: Aljazeera 

ဖေဖေော်၀ါရီ ၂၆၊ ၂၀၂၄

M-Media 

-ဂါဇာကမ်းမြှောင်မှာ ပါလက်စတိုင်းတွေအပေါ် အကြမ်းဖက်မှု ကျူးလွန်နေတဲ့ အစ္စရေးစစ်သားတွေဟာ သူတို့ရဲ့ ခိုးဆိုးလုယက်မှုတွေကို ကိုယ်တိုင်မှတ်တမ်းတင်ကာ ဆိုရှယ်မီဒီယာမှာ ဖြန့်၀ေမှုတွေ ပြုလုပ်လာပါတယ်။ 

အစ္စရေးစစ်သားတွေဟာ ပါလက်စတိုင်းတွေကို ညှင်းပမ်းတာ၊ နေအိမ်၊ စာသင်ကျောင်း၊ ဆေးရုံဆေးခန်းတွေကို ဖျက်ဆီးတာ၊ တန်ဖိုးကြီးပစ္စည်းတွေ လုယက်ယူငင်တာတွေကို ဂုဏ်ယူစွာ မှတ်တမ်းတင်ဗီဒီယို ရိုက်ကူးကြတာ ဖြစ်ပါတယ်။ 

နောက်ပိုင်းမှာ အဲဒီဗီဒီယိုတွေကို ဆိုရှယ်မီဒီယာမှာ ကိုယ်တိုင် လွှင့်တင်ခဲ့ကြပါတယ်။  

ဂါဇာက အိမ်တစ်အိမ်ကနေ အမျိုးသမီးစီး ဖိနပ်တွေကို လုယက်ပြီး စေ့စပ်ထားသူကို လက်ဆောင်ပေးတဲ့ အစ္စရေးစစ်သားတစ်ယောက်ရဲ့ ဗီဒီယိုဟာ ပြီးခဲ့တဲ့ရက်ပိုင်းအတွင်း ဆိုရှယ်မီဒီယာမှာ ၀ေဖန်မှုအများဆုံး ဖြစ်ခဲ့ပါတယ်။

ပါလက်စတိုင်းဆိုင်ရာ ကုလအထူးကိုယ်စားလှယ် ဖရန်စက်စ်ကာ အလ်ဘန်နီစ်က ဒီလုပ်ရပ်တွေကို ရှုတ်ချခဲ့ပါတယ်။ 

“အစ္စရေးစစ်သားတွေဟာ သူတို့ကျူးလွန်တဲ့ ရာဇ၀တ်မှုတွေကို ၀မ်းပမ်းတသာ မှတ်တမ်းတင်နေကြတာဟာ ဂါဇာမှာ ဘယ်လောက် အခြေအနေဆိုးလဲဆိုတာကို ဖော်ပြနေတာဖြစ်ပါတယ်”

ဂါဇာက အစ္စရေးရဲ့ တစ်ကျော့ပြန်လူသတ်ပွဲ ပထမ ၃ လအတွင်း ရွှေ၊ ငွေနဲ့ တန်ဖိုးကြီးပစ္စည်း အနည်းဆုံး ကန်ဒေါ်လာ ၂၅ သန်းဖိုးကို အစ္စရေးစစ်သားတွေက လုယက်ခဲ့တယ်လို့ ဂါဇာအစိုးရ ပြန်ကြားရေးဌာနက ထုတ်ပြန်ထားပါတယ်။ 

Ref: Aljazeera 

ဖေဖော်၀ါရီ ၂၅၊ ၂၀၂၄

M-Media 

-ဂါဇာကမ်းမြှောင်မှာ ပါလက်စတိုင်းလွတ်မြောက်ရေးအဖွဲ့ ဟားမက်စ်ဟာ ကျူးကျော်လာတဲ့ အစ္စရေးစစ်သား ၂၄၀ လောက်ကို သုတ်သင်ထားနိုင်တယ်လို့ သိရပါတယ်။ 

ပြီးခဲ့တဲ့နှစ် အောက်တိုဘာ ၇ ရက်နေ့က စတင်ကာ အစ္စရေးဟာ ဂါဇာမှာ တစ်ကျော့ပြန်လူသတ်ပွဲ လုပ်ဆောင်ခဲ့တာဖြစ်ပါတယ်။ အစ္စရေးမြေပြင်တပ်တွေကတော့ အောက်တိုဘာ ၂၇ ရက်နေ့မှာ ၀င်ရောက် ကျူးကျော် တိုက်ခိုက်ခဲ့ကြပါတယ်။ 

အစ္စရေးလေတပ်နဲ့ မြေပြင်တပ်တွေဟာ အရပ်ဖက်ပစ်မှတ်တွေကို အဓိကထား အကြမ်းဖက်ခဲ့ပြီး ၅ လကျော်အတွင်း ပါလက်စတိုင်းပြည်သူ ၃ သောင်းနီးပါး အသတ်ခံထားရပါတယ်။ 

ဂါဇာကမ်းမြှောင်တစ်ခုလုံးက အရက်ဖက်အဆောက်အဦး ၈၅ ရာခိုင်နှုန်းဟာ အစ္စရေးလက်ချက်ကြောင့် ပျက်ဆီးခဲ့ရပြီ ဖြစ်ပါတယ်။ 

Ref: Aljazeera