မေ ၇၊ ၂၀၂၀
M-Media
-လက်ရှိ ကြုံတွေ့နေရတဲ့ Covid-19 ကပ်ရောဂါဟာ ပုလဲဆိပ်ကမ်း တိုက်ခိုက်မှု၊ ၉/၁၁ တိုက်ခိုက်မှုတွေထက် ပိုမိုဆိုးရွားတယ်လို့ အမေရိကန်သမ္မတ ဒေါ်နယ်ထရမ့်က ပြောကြားလိုက်ပြီး တရုတ်နိုင်ငံကိုလည်း ထပ်မံ ပြစ်တင်လိုက်ပါတယ်။
ဒုတိယ ကမ္ဘာစစ်အတွင်းက ပုလဲဆိပ်ကမ်းကို ဂျပန်တွေ တိုက်ခိုက်မှု၊ ၂၀၀၁ ခုနှစ် စက်တင်ဘာ ၁၁ ရက်နေ့က နယူးယောက်မှာရှိတဲ့ ကမ္ဘာ့ကုန်သွယ်ရေးစင်တာကို အလ်-ကိုင်းဒါးအဖွဲ့က လေယာဉ်တွေနဲ့ ဝင်တိုက်မှုဟာ အမေရိကန်နိုင်ငံသမိုင်းမှာ အထိနာဆုံး တိုက်ခိုက်မှုတွေ ဖြစ်ပါတယ်။
သမ္မတထရမ့်ကတော့ လက်ရှိ ကြုံတွေ့နေရတဲ့ ကိုဗစ်ကပ်ရောဂါက အဲဒီအခြေအနေတွေထက် ပိုဆိုးတယ်လို့ မနေ့က အိမ်ဖြူတော် သတင်းစာရှင်းလင်းပွဲမှာ ပြောကြားခဲ့ပါတယ်။
“ဒါမျိုးက ဖြစ်ကို မဖြစ်သင့်ပါဘူး။ တရုတ်မှာ စဖြစ်ကတည်းက ရပ်တန့်နိုင်ခဲ့ရမှာပါ။ ဒါပေမယ့် မရပ်တန့်ခဲ့ပါဘူး”
အမေရိကန်မှာ Covid-19 ကူးစက်သူ၊ သေဆုံးသူ အရေအတွက် မြင့်တက်လာတဲ့အချိန် အမေရိကန်အစိုးရကလည်း တရုတ်နိုင်ငံပေါ် ဝေဖန်ပြစ်တင်မှုတွေ တိုးမြှင့်လုပ်ဆောင်လာပါတယ်။
နိုင်ငံခြားရေးဝန်ကြီး ပွမ်ပီယိုက တရုတ်နိုင်ငံဟာ သိလျက်နဲ့ ဗိုင်းရပ်စ်ပြန့်နှံ့မှုကို မတားဆီးခဲ့တဲ့အတွက် ကမ္ဘာပေါ်မှာ လူသိန်းချီသေဆုံးကာ စီးပွားရေး အကြီးအကျယ်ကျဆင်းမှုကို ကြုံတွေ့နေရတာ ဖြစ်တယ်လို့ မနေ့မှာ ပြောကြားခဲ့ပါတယ်။
တရုတ်ကတော့ အမေရိကန်ရဲ့ ဒီပြစ်တင်မှုကို တစ်စိုက်မတ်မတ် ငြင်းဆိုထားပါတယ်။
Ref: Aljazeera
