မတ် ၂၉၊ ၂၀၂၀
M-Media

မလေးရှားတွင် တစ်ရက်တာသေဆုံးမှု စံချိန်တင်

မလေးရှားနိုင်ငံမှာ COVID-19 ကြောင့် ဒီကနေ့ ၇ ဦးသေဆုံးခဲ့ပြီး ဒါဟာ တစ်ရက်အတွင်း စံချိန်တင်သေဆုံးမှု ဖြစ်ပါတယ်။ ဒါ့ကြောင့် စုစုပေါင်း သေဆုံးသူအရေအတွက်ဟာ ၃၄ ဦးအထိ ရှိလာပါပြီ ထပ်မံကူးစက်သူအရေအတွက်က ၁၅၀ ရှိခဲ့တာကြောင့် ၂၄၇၀ အထိ ရောက်လာတာ ဖြစ်ပါတယ်။ ပြန်လည်သက်သာသူကတော့ ၃၈၈ ဦး ရှိပါတယ်။

ကူးစက်သူ ရုတ်တရက်မြင့်တက်လာသည့် အင်ဒိုနီးရှား

အင်ဒိုနီးရှားနိုင်ငံမှာ ဒီကနေ့ လူ ၁၃၀ ထပ်မံကူးစက်ခဲ့ပြီး စုစုပေါင်း ကူးစက်သူအရေအတွက် ၁၂၈၅ ဦးအထိ ရှိလာတာပါ။ မြို့တော် ဂျကာတာရဲ့ အုပ်ချုပ်ရေးအဖွဲ့က အရေးပေါ်အခြေအနေ ကြေငြာထားမှုကို နောက်ထပ် ၂ ပတ်သက်တမ်းတိုးမယ်လို့ မနေ့မှာ ပြောကြားခဲ့ပါတယ်။ သန်းရာနဲ့ချီတဲ့ အင်ဒိုနီးရှားပြည်သူတွေဟာ ရမ်ဇာန်ဥပုသ်လအကုန်မှာ ဇာတိရပ်ရွာပြန်ကာ ဝါကျွတ်အီဒ်းပွဲတော် ဆင်နွှဲတဲ့ ဓလေ့ရှိပြီး အစိုးရက ဒီဓလေ့ကို ဒီနှစ်မှာ ပိတ်ပင်ဖို့ စီစဉ်နေပါတယ်။ ဗိုင်းရပ်စ်ကြောင့် သေဆုံးသူက ၁၀၂ ဦး ရှိလာပြီဖြစ်ပါတယ်။

COVID-19 ပြန့်နှံ့သည်ဆိုသည့်သတင့်ကြောင်း ထိုင်းနိုင်ငံတွင် ထောင်ဆူ

ထိုင်းနိုင်ငံမှာတော့ ဒီကနေ့အထိ ဗိုင်းရပ်စ်ကူးစက်သူအရေအတွက်ဟာ ၁၃၃၈ ဦး ရှိလာပြီဖြစ်ပါတယ်။ ဒီကနေ့တစ်နေ့တည်း ၁၄၃ ဦးကူးစက်ခဲ့တာပါ။ သေဆုံးသူက စုစုပေါင်း ၇ ဦး ရှိနေပါတယ်။ နိုင်ငံအရှေ့မြောက်ပိုင်း ဘူရီရမ်ပြည်နယ်က အကျဉ်းထောင်တစ်ခုမှာလည်း COVID-19 ပြန့်နှံ့နေတယ်ဆိုတဲ့သတင်းကြောင့် ဒီကနေ့မှာ ထောင်ဆူကာ၊ အကျဉ်းသားတစ်ချို့ ထောင်ဖောက်ပြေးမှု ဖြစ်ပွားခဲ့ပါတယ်။

Ref: CNA