နိုဝင်ဘာ ၆၊ ၂၀၁၉
M-Media
-ရှင်ကျန်းပြည်နယ်က ဝီဂါမွတ်အရေး တက်ကြွလှုပ်ရှားသူတွေရဲ့ မိသားစုတွေ၊ အကျဉ်းစခန်းက လွတ်မြောက်လာသူတွေရဲ့ မိသားစုတွေကို အရှက်တကွဲအကျိုးနည်းအောင်လုပ်တာ၊ ထောင်သွင်းအကျဉ်းချတာတွေ လုပ်ဆောင်နေတဲ့ သတင်းတွေအတွက် စိုးရိမ်မိတယ်လို့ အမေရိကန်က မနေ့မှာ ထုတ်ပြန်လိုက်ပါတယ်။
တရုတ်အစိုးရဟာ ရှင်ကျန်းပြည်နယ်မှာ အကျဉ်းစခန်းတွေ ဆောက်လုပ်ပြီး ဝီဂါလူမျိုးနဲ့ အခြားလူမျိုးစုငယ် ၁ သန်းလောက်ကို ဖိနှိပ်ညှင်းပမ်းနေတယ်လို့ နိုင်ငံတကာ မီဒီယာတွေက ကျယ်ကျယ်ပြန့်ပြန့်ဖော်ပြခဲ့ပြီး နိုင်ငံတကာအသိုင်းအ၀ိုင်းကလည်း ဆန့်ကျင်ရှုတ်ချခဲ့ကြပါတယ်။
တရုတ်ကတော့ ဒါတွေဟာ အကျဉ်းစခန်းတွေမဟုတ်ဘဲ အစွန်းရောက်ဝါဒ တိုက်ဖျက်ရေး အသက်မွေးဝမ်းကြောင်း သင်တန်းကျောင်းတွေ ဖြစ်တယ်လို့ ထုတ်ပြန်ခဲ့ပါတယ်။
ဝီဂါတက်ကြွလှုပ်ရှားသူတွေနဲ့ အကျဉ်းစခန်းက လွတ်မြောက်လာသူတွေရဲ့ မိသားစုတွေက တရုတ်အာဏာပိုင်တွေဟာ သူတို့ကို အရှက်တကွဲအကျိုးနည်းဖြစ်အောင် လုပ်ဆောင်နေတယ်လို့ ပြီးခဲ့တဲ့ ရက်ပိုင်းအတွင်းမှာ ထုတ်ဖော်ပြောဆိုလာခဲ့ပါတယ်။
အမေရိကန်နိုင်ငံခြားရေးဝန်ကြီး မိုက်ပွမ်ပီယိုက တစ်ချို့ကိစ္စတွေမှာ ညှင်းပမ်းမှုတွေဟာ အာဏာပိုင်တွေနဲ့ တွေ့ဆုံပြီးတဲ့နောက် ဖြစ်ပွားခဲ့တာဖြစ်တယ်လို့ မနေ့က ထုတ်ပြန်ချက်မှာ ပြောကြားခဲ့ပါတယ်။
စက်တင်ဘာလက ကုလအထွေထွေညီလာခံမှာ မိန့်ခွန်းပြောကြားသူတွေထဲက တစ်ဦးဖြစ်တဲ့ ဝီဂါအရေးတကကြွလှုပ်ရှားသူ ဇွမ်ရတ် ဒါဝုဒ်အပါအဝင် အခြား ဝီဂါအရေးတက်ကြွလှုပ်ရှားသူတွေရဲ့ မိသားစုဝင်တွေအပေါ် တရုတ်အစိုးရက အရှက်တကွဲအကျိုးနည်းအောင် လုပ်မှုတွေကိုလည်း ထုတ်ပြန်ချက်မှာ ထည့်သွင်းဖော်ပြထားပါတယ်။
ဒါဝုဒ်ရဲ့ ဖခင်ဖြစ်သူဟာ ပြီးခဲ့တဲ့နှစ်တွေအတွင်း တရုတ်အစိုးရရဲ့ အကြိကြိမ် ခေါ်ယူစစ်ဆေးမှုကို ခံခဲ့ရပြီး မကြာသေးခင်ကပဲ ကွယ်လွန်သွားခဲ့ပါတယ်။
ရှင်ကျန်းပြည်နယ်က ဝီဂါလူမျိုးတွေပေါ် တရုတ်အစိုးရက ခွဲခြားဆက်ဆံမှုတွေ၊ ညှင်းပမ်းမှုတွေကြောင့် တရုတ်အစိုးရ၊ ထောက်လှမ်းရေးအဖွဲ့နဲ့ ကွန်မြူနစ်ပါတီတို့က ထိပ်တန်းအကြီးအကဲတွေကို အမေရိကန်က ပြီးခဲ့တဲ့လမှာ ပိတ်ဆို့ကန့်သတ်မှုတွေ ထပ်မံပြုလုပ်ခဲ့ပါတယ်။
“တရုတ်နိုင်ငံပြင်ပမှာ နေထိုင်နေတဲ့ ဝီဂါတွေအပေါ် အရှက်တကွဲအကျိုးနည်းအောင် ပြုလုပ်မှုတွေအားလုံးကို ရပ်ဆိုင်းဖို့နဲ့ မိသားစုတွေကို ကန့်သတ်မှုမရှိဘဲ လွတ်လွတ်လပ်လပ် ဆက်သွယ်ပြောဆိုခွင့်ပေးဖို့ ကျွန်တော်တို့ ထပ်မံတောင်းဆိုပါတယ်” လို့ နိုင်ငံခြားရေးဝန်ကြီး ပွမ်ပီယိုက ထည့်သွင်းပြောဆိုခဲ့ပါတယ်။
Ref: Reuters
