သြဂုတ် ၂၃၊ ၂၀၁၉
M-Media
-ပြည်တွင်းဖြစ် အဆင့်မြင့် ဒုံးခွင်းစနစ်တစ်ခုကို အီရန်နိုင်ငံက မနေ့မှာ ထုတ်ပြလိုက်ပြီး ရုရှားရဲ့
S-300 ဒုံးခွင်းစနစ်ကို ယှဉ်နိုင်တယ်လို့ ဆိုပါတယ်။
Bavar လို့ အမည်ပေးထားပြီး ‘ယုံကြည်မှု’ လို့ အဓိပ္ပါယ်ရတဲ့ အဲဒီဒုံးခွင်းစနစ်ဟာ နိုင်ငံရဲ့ ပထမဆုံး ပြည်တွင်းဖြစ် တာဝေး ဒုံးခွင်းစနစ်လို့ အီရန်အာဏာပိုင်တွေက ပြောကြားထားတာပါ။
ရုရှားနိုင်ငံက S-300 ဒုံးခွင်းစနစ် ၀ယ်ယူမှု တားဆီးခံရပြီးတဲ့နောက် ၂၀၁၀ ခုနှစ်မှာ အီရန်ဟာ ဒီဒုံးခွင်းစနစ်ကို စတင် ဖန်တီးတည်ဆောက်ခဲ့တ ဖြစ်ပါတယ်။ နှောင့်နှေးမှုများစွာကြုံတွေ့ခဲ့ပြီး နျူသဘောတူညီချက်လည်း ရရှိခဲ့ပြီးတဲ့နောက် ၂၀၁၆ ခုနှစ်ခုနှစ်မှာတော့ အီရန်ဟာ S-300 ဒုံးခွင်းစနစ်ကိုပါ ရရှိခဲ့ပါတယ်။
သမ္မတ ဟာဆန်ရူဟာနီက သူတို့ရဲ့ Bavar ဒုံးခွင်းစနစ်ဟာ ရုရှားရဲ့ S-300 ထက် ပိုကောင်းပြီး
S-400 နီးနီးလောက် ရှိတယ်လို့ မိတ်ဆက်ပွဲအခမ်းအနားမှာ ပြောကြားခဲ့ပါတယ်။
အလွယ်တကူ ရွေ့လျား အသုံးပြုနိုင်တဲ့ Bavar ဒုံးခွင်းစနစ်ဟာ ကီလိုမီတာ ၃၀၀ အကွာအဝေးအထိ ရောက်ရှိနိုင်ပါတယ်။ ပစ်မှတ် ၃၀၀ ကို တစ်ချိန်တည်း သိရှိနိုင်ပြီး၊ ၆၀ ကို တစ်ချိန်တည်း နောက်ယောင် ခံနိုင်ကာ ပစ်မှတ် ၆ ခုကို တစ်ပြိုင်တည်း ပစ်ခတ်နိုင်ပါတယ်။
ဒုံးခွင်းစနစ်မှာ အီရန်ပြည်တွင်းထုတ် Sayyad အမျိုးအစား ဒုံးကျည်တွေကို အသုံးပြုနိုင်မှာဖြစ်ပြီး ဒေါင်လိုက် လောင်ချာအမျိုးအစားကို တပ်ဆင်ထားပါတယ်။ ရှာဖွေရေးနဲ့ ကြားဖြတ်ပစ်ချရေးအတွက် ရေဒါ ၂ ခုကို အသုံးပြုထားပြီး အီလက်ထရောနစ် စစ်ပွဲတွေ၊ လျှပ်စစ်သံလိုက် ဗုံးတွေကို ခုခံကာကွယ်နိုင်ပါတယ်။
Bavar ဒုံးခွင်းနစ်စက ရေဒါတွေဟာ လေကြောင်းရန် ကာကွယ်ရေးစနစ်တွေကို ကျော်လွှားရာမှာ အသုံးပြုတဲ့ ARM ဒုံးကျည်တွေကိုလည်း သိရှိနိုင်တယ်လို့ ဆိုပါတယ်။
အားကို အားဖြင့် တုန့်နှင်းမည်
အီရန်သမ္မတ ရူဟာနီက နျူအရေးနဲ့ပတ်သက်ပြီး အမေရိကန်နဲ့ တွေ့ဆုံဆွေးနွေးမှုတွေဟာ အသုံးမ၀င်ဘူးလို့ မနေ့က ဒုံးခွင်းစနစ် မိတ်ဆက်ပွဲ အခမ်းအနားမှာ ပြောကြားခဲ့ပါတယ်။
“အခုဆိုရင် ကျွန်တော်တို့ရဲ့ ရန်သူတွေက ဆွေးနွေးတာကို လက်မခံနိုင်တော့ဘူး။ ဒါ့ကြောင့်
ကျွန်တော်တို့ကလည်း ဆွေးနွေးတာမျိုးနဲ့ မတုန့်ပြန်တော့ပါဘူး။ ရန်သူတွေက ကျွန်တော်တို့ကို
ဒုံးကျည်နဲ့ဆော်ရင် ကျွန်တော်တို့က ရွှေပြည်အေးတရားတွေ ဟောနေလို့မရပါဘူး”
အီရန်ဟာ ဇူလိုင်လအတွင်းက အမေရိကန် ထောက်လှမ်းရေးဒရုန်းတစ်စီးကို ပစ်ချခဲ့ပြီး သူတို့ပိုင်နက်ထဲကို ၀င်လာတဲ့အတွက်ဖြစ်တယ်လို့ ထုတ်ပြန်ခဲ့ပါတယ်။ အမေရိကန်ကတော့ ဒရုန်းဟာ နိုင်ငံတကာ လေပိုင်နက်မှာ ရှိနေစဉ် ပစ်ချခံလိုက်ရတာလို့ ဆိုပါတယ်။
Ref: Aljazeera, Press TV
