Author: Ko Lay

စက်တင်ဘာ ၃၊ ၂၀၂၄
M-Media

ပေါင်မု့န်တန်းစီနေသူတွေ အသတ်ခံရ
——————
ဂါဇာကမ်းမြှောင် ဂျာဘာလီယာ ဒုက္ခသည်စခန်း စစ်ရှောင်တွေ ခိုလှုံနေတဲ့ ကုလစာသင်ကျောင်းရှေ့က ပေါင်မုန့်ဆိုင်တစ်ခုကို အစ္စရေးက တိုက်ခိုက်ခဲ့တာကြောင့် အနည်းဆုံး လူ ၈ ဦး သေဆုံးခဲ့ပါတယ်။

ပါလက်စတိုင်း ကလေးတစ်ဦး စနိုက်ပါဖြင့် ပစ်ခံရ
——————
အနောက်ဖက်ကမ်း တူလ်ကရင်မြို့မှာ အစ္စရေးစနိုက်ပါသမား လက်ချက်ကြောင့် ဒုက္ခသည်စခန်းက မိုဟာမက် ကာနန်ဆိုတဲ့ ကလေးငယ်တစ်ဦး သေဆုံးခဲ့ပြီး ဖခင်ဖြစ်သူက ဒဏ်ရာရရှိခဲ့ပါတယ်။ ပြီးခဲ့တဲ့တစ်ပတ်က စတင်တဲ့ အနောက်ဖက်ကမ်းက အစ္စရေးရဲ့ စီးနင်းတိုက်ခိုက်မှုကြောင့် သေဆုံးသူအရေအတွက်ဟာ ၃၀ ထက် မနည်း ရှိလာပြီ ဖြစ်ပါတယ်။

အစ္စရေးပြည်သူများ ဆန္ဒပြမှု ပိုမိုအားကောင်းလာ
—————
ဂါဇာမှာအပစ်ရပ်ပြီး ဟားမက်စ်က ဖမ်းသွားတဲ့ သူတွေကို ကယ်တင်ဖို့ အစ္စရေးပြည်သူတွေရဲ့ ဆန္ဒပြမှုဟာ ပိုမိုအားကောင်းလာခဲ့ပြီး အစ္စရေးအစိုးရကလည်း ဆန္ဒပြသူတွေကို ပိုမိုဖမ်းဆီးမှုတွေ လုပ်ဆောင်လာပါတယ်။

ဂျော်ဒန်ဘုရင်က အစ္စရေးကို ရှုတ်ချ
—————
အနောက်ဖက်ကမ်းမှာ အစ္စရေးက စီးနင်းတိုက်ခိုက်မှုတွေ တိုးမြှင့်ပြုလုပ်လာတာကို ဂျော်ဒန်ဘုရင် အဘ်ဒူလာက ထပ်မံရှုတ်ချလိုက်ပါတယ်။ ဒီလုပ်ရပ်တွေဟာ အရှေ့အလယ်ပိုင်း ငြိမ်းချမ်းရေးနဲ့ တည်ငြိမ်အေးချမ်းရေးကို ထိခိုက်စေနိုင်တယ်လို့လည်း ထည့်သွင်းပြောဆိုခဲ့ပါတယ်။

Ref: Aljazeera

စက်တင်ဘာ ၁၊ ၂၀၂၄
M-Media

-ပါလက်စတိုင်းနိုင်ငံ အနောက်ဖက်ကမ်းဒေသ ဂျီနင်မြို့က အစ္စရေးရဲ့ ပိတ်ဆို့လူသတ်ပွဲဟာ ၅ ရက်တာ ကြာမြင့်လာပြီဖြစ်ပြီး အသတ်ခံရသူ ၁၄ ဦးအထိ ရှိလာပြီဖြစ်ပါတယ်။

ဂျီနင်မြို့နဲ့ မြို့ထဲက ပါလက်စတိုင်း ဒုက္ခသည်စခန်းကို အစ္စရေးက စစ်တပ်အလုံးအရင်းနဲ့ ပိတ်ဆို့ အကြမ်းဖက် သတ်ဖြတ်နေတာ ဖြစ်ပါတယ်။ နေအိမ်တွေ၊ အခြေခံအဆောက်အဦးတွေလည်း ဖျက်ဆီးခံထားရပြီး၊ တစ်မြို့လုံးရဲ့ ရေလိုင်းနဲ့ ဓာတ်အားလိုင်းတွေကိုလည်း အစ္စရေးက ဖြတ်တောက်ထားပါတယ်။

၁၁ လကြာပြီဖြစ်တဲ့ ဂါဇာက အစ္စရေးရဲ့ တစ်ကျော့ပြန် လူသတ်ပွဲမှာ ပါလက်စတိုင်း ၅ သောင်းနီးပါး အသတ်ခံထားရပြီး အများစုက အမျိုးသမီးတွေနဲ့ ကလေးငယ်တွေ ဖြစ်ပါတယ်။ ဂါဇာက လူသတ်ပွဲစတဲ့ ပြီးခဲ့တဲ့နှစ် အောက်တိုဘာလကစတင်ပြီး အနောက်ဖက်ကမ်းမှာလည်း အစ္စရေးရဲ့ အကြမ်းဖက်သတ်ဖြတ်မှုတွေ မြင့်တက်လာတာပါ။

လက်ရှိအချိန်မှာတော့ တပ်ဖွဲ့တွေနဲ့ ပိတ်ဆို့ပြီး ဂါဇာကလို လူအဖွဲ့အစည်းတစ်ခုလုံး ရှင်းလင်းသတ်ဖြတ်မှုမျိုး လုပ်ဆောင်လာခဲ့တာ ဖြစ်ပါတယ်။

(ဓာတ်ပုံ- ဂျီနင်မြို့က သစ်သီးစျေးတစ်ခုကို အစ္စရေးက မီးရှို့ဖျက်ဆီးထားမှု)

သြဂုတ် ၃၁၊ ၂၀၂၄
M-Media

-ဂါဇာကမ်းမြှောင်က Emirati ဆေးရုံဆီ ဆေး၀ါးနဲ့ ကိရိယာ သွားရောက်ပို့ဆောင်တဲ့ ယာဥ်တန်းကို သြဂုတ်လ ၂၉ ရက်နေ့မှာ အစ္စရေးက ဒုံးကျည်နဲ့ ပစ်ခတ် တိုက်ခိုက်တာကြောင့် အနည်းဆုံး လူ ၄ ဦး သေဆုံးခဲ့ပါတယ်။

ပြီးခဲ့တဲ့ နှစ်အောက်တိုဘာလက စတင်တဲ့ ဂါဇာက အစ္စရေးရဲ့ တစ်ကျော့ပြန် လူသတ်ပွဲမှာ အကူအညီပေးရေး၀န်ထမ်း ၂၈၀ ကျော် သတ်ဖြတ်ခံထားရပါတယ်။

Emirati ဆေးရုံယာဥ်တန်း တိုက်ခိုက်ခံရမှုကို အမေရိကန် အကူအညီပေးရေးအဖွဲ့ American Near East Refugee Aid (Anera) ကလည်း အတည်ပြု ပြောဆိုပါတယ်။ ဒီယာဥ်တန်းဟာ အစ္စရေးတပ်ဖွဲ့တွေရဲ့ စစ်ဆေးမှုကို ခံယူပြီးမှ ထွက်ခွာခွင့် ရခဲ့တာဖြစ်ပါတယ်။

အစ္စရေးစစ်တပ်ရဲ့ ထုတ်ပြန်ချက်မှာတော့ စစ်သွေးကြွတွေက ယာဥ်တန်းကို စီးနင်းသိမ်းပိုက်တဲ့အတွက် တိုက်ခိုက်ရတာလို့ ဖော်ပြပါတယ်။ ခိုင်မာတဲ့ သက်သေအထောက်အထား ပြတာမျိုး မရှိပါဘူး။

သြဂုတ်လ ၂၈ ရက်နေ့ကလည်း World Food Programme ယာဥ်တန်းကို အစ္စရေးက ပစ်ခတ်ခဲ့ပါတယ်။ ဂါဇာမှာ လခြမ်းနီအဖွဲ့ အပါအ၀င် အကူအညီပေးရေး အဖွဲ့တွေကို အစ္စရေးက အကြမ်းဖက်တိုက်ခိုက်မှုများစွာ ပြုလုပ်ခဲ့ရာမှာ ဧပြီလအတွင်းက World Central Kitchen ယာဥ်တန်း တိုက်ခိုက်ခံရမှုကို ကမ္ဘာတစ်၀ှမ်းက ၀ေဖန် ရှုတ်ချခဲ့ကြပါတယ်။

Ref: Aljazeera