Author: Ko Lay

ဇူလိုင် ၁၈၊ ၂၀၂၃

M-Media 

-မေလ ထိုင်းရွေးကောက်ပွဲမှာ မဲအများဆုံးနဲ့ အနိုင်ရခဲ့တဲ့ Move Forward ပါတီခေါင်းဆောင် ပီတ လင်မ်ဂျာရိုနရတ်ဟာ ၀န်ကြီးချုပ်ဖြစ်ရေး ဒုတိယအကြိမ် ကြိုးစားလာပါတယ်။ 

၀န်ကြီးချုပ်တစ်ဖြစ်လဲ စစ်ခေါင်းဆောင် ပရာယွတ်ချန်အိုချာ ဦးဆောင် ရေးဆွဲထားတဲ့ ထိုင်းအခြေခံဥပဒေအရ အနိုင်ရပါတီဟာ ၀န်ကြီးချုပ်ကို တိုက်ရိုက်တင်မြှောက်ခွင့် မရှိပါဘူး။ 

အထက်လွှတ်တော်၊ အောက်လွှတ်တော် နှစ်ရပ်ပေါင်း မဲခွဲဆုံးဖြတ်ပြီးမှ ၀န်ကြီးချုပ်ကို အတည်ပြုရတာပါ။ အဲဒီလို မဲခွဲရာမှာ ထိုင်းစစ်တပ်က ခန့်အပ်ထားတဲ့ အမတ်တွေရှိတဲ့ အထက်လွှတ်တော်က အခရာကျပါတယ်။ 

ပြီးခဲ့တဲ့တစ်ပတ်မှာ ၀န်ကြီးချုပ်ရွေးချယ်ပွဲမှာ ပီတတစ်ယောက် ရှုံးနိမ့်ခဲ့ပါတယ်။ အခုတစ်ပတ် ဗုဒ္ဓဟူးနေ့မှာ နောက်ထပ် မဲခွဲပွဲရှိနေပြီး ဒီတစ်ကြိမ်မှာလည်း ပီတ လင်မ်ဂျာရိုနရတ် ၀င်ရောက်ယှဥ်ပြိုင်မှာ ဖြစ်ပါတယ်။ 

ပြန်စဥ်းစားမယ်

ပီတဟာ အာဏာရရင် ပြုပြောင်းလဲမှု ကြီးကြီးမားမား လုပ်ဆောင်မယ်လို့ ရွေးကောက်ပွဲမှာ ကြွေးကျော်ခဲ့တာပါ။ 

ဘုရင်နဲ့ တော်၀င်မိသားစုတွေကို စော်ကားပြောဆိုရင် ပြင်းပြင်းထန်ထန် အပြစ်ပေးအရေးယူတဲ့ ဥပဒေကို ပြုပြင်ဖို့၊ စီးပွားရေးမှာ တစ်ဦးတစ်ယောက်တည်းက လက်၀ါးကြီးအုပ်ထားမှု၊ နိုင်ငံရေးမှာ စစ်ခေါင်းဆောင်တွေ ပါ၀င်မှု စတာတွေကို တားဆီးရေး လုပ်ဆောင်မယ်လို့ ပြောကြားထားတာ ဖြစ်ပါတယ်။ 

ဇူလိုင် ၁၈ ရက်နေ့ ရိုက်တာသတင်းဌာနနဲ့ အင်တာဗျူးမှာ သူ့ရဲ့ ပြုပြင်ပြောင်းလဲရေးအစီအစဥ်ကို ပြင်ဆင်ဖို့ အဆင်သင့်ရှိတယ်လို့ ပြောကြားခဲ့ပါတယ်။ ဒါပေမယ့် တော်၀င်မိသားစုကို ကာကွယ်တဲ့ ဥပဒေ ပြောင်းလဲရေးကိုတော့ မဖြစ်မနေ လုပ်ဆောင်မယ်လို့ ဆိုပါတယ်။ 

ဗုဒ္ဓဟူးနေ့ ထိုင်းလွှတ်တော်မှာ ၀န်ကြီးချုပ် မဲပေးရွေးချယ်ဖို့ရှိသလို၊ စစ်တပ်ဖက်ကလည်း ပီတဟာ မီဒီယာ ကုမ္ပဏီတစ်ခုကို ပိုင်ဆိုင်တဲ့အတွက် အခြေခံဥပဒေအရ အမတ်အဖြစ် ရွေးကောက်ခံပိုင်ခွင့် မရှိကြောင်း အခြေခံဥပဒေခုံရုံးမှာ တိုင်ကြားဖို့ ရှိပါတယ်။ 

ဒါ့အပြင် အထက်လွှတ်တော်က အမတ်တစ်ချို့က ၀န်ကြီးချုပ်အဖြစ် အရွေးခံပြီး ရှုံးနိမ့်ခဲ့သူတစ်ဦးဟာ နောက်တစ်ကြိမ် အရွေးခံခွင့်မရှိဘူးလို့ဆိုကာ လွှတ်တော်မှာ ကန့်ကွက်ဖို့လည်း ရှိနေပါတယ်။ 

ပီတကတော့ ဒီအခက်အခဲတွေကို နားလည်ထားကြောင်း၊ ထိုင်းပြည်သူတွေက အပြောင်းအလဲကို အလွန်အမင်းတောင့်တနေတဲ ခေတ်သစ်တစ်ခုကို ရောက်လာတာကြောင့် အမတ်တွေက ဒါကို မျက်ကွယ်ပြုမယ်လို့ မထင်ကြောင်း အင်တာဗျူးမှာ ထည့်သွင်းပြောဆိုခဲ့ပါတယ်။ 

Ref: CNA