News @ M-Media

Author: Ko Lay

  • စစ်ကောင်စီဘဏ်နှစ်ခုကို အမေရိကန် အရေးယူ

    စစ်ကောင်စီဘဏ်နှစ်ခုကို အမေရိကန် အရေးယူ

    ဇွန် ၂၂၊ ၂၀၂၃

    M-Media 


    -မြန်မာစစ်ကောင်စီရဲ့ နိုင်ငံခြားငွေတွေကို စီမံကိုင်တွယ်ပေးနေတဲ့ ဘဏ်နှစ်ခုကို အမေရိကန်က ဗုဒ္ဓဟူးနေ့မှာ ပိတ်ဆို့အရေးယူမှုတွေ လုပ်ဆောင်လိုက်ပါတယ်။ 

    မြန်မာ့ရင်းနှီးမြှုပ်နှံမှုနှင့် ကူးသန်းရောင်း၀ယ်ရေးဘဏ်နဲ့ မြန်မာ့ နိုင်ငံခြားကုန်သွယ်မှုဘဏ်တို့ ဖြစ်ပြီး စစ်ခေါင်းဆောင်တွေ အမြတ်အစွန်း အမြောက်အများရနေတဲ့ နိုင်ငံပိုင် စီးပွားရေး လုပ်ငန်းတွေရဲ့ နိုင်ငံခြားငွေ အထုတ်၊ အသွင်းကို အဓိက လုပ်ဆောင်ပေးနေတာ ဖြစ်ပါတယ်။  

    ၂၀၂၁ ခုနှစ် အာဏာသိမ်းမှု၊ အဲဒီနောက်ပိုင်း လူထုအပေါ် အကြမ်းဖက်မှုတွေကြောင့် အမေရိကန်နဲ့ အနောက်နိုင်ငံတွေဟာ မြန်မာစစ်ခေါင်းဆောင်တွေ ပိုင်ဆိုင်တဲ့ စီးပွားရေးလုပ်ငန်းတွေအပေါ် ဘဏ္ဍာရေးအရ ပိတ်ဆို့အရေးယူမှုတွေ အများအပြား လုပ်ဆောင်ခဲ့ပါတယ်။ 

    အခုလို ဘဏ်တွေကို အရေးယူမှုနဲ့ပတ်သက်ပြီး သူတို့ဖက်က ဘာမှ ဆုံးရှုံးမှု ရှိမှာမဟုတ်ဘူးလို့ စစ်ကောင်စီ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက ပြောပါတယ်။ ဒီလို ပိတ်ဆို့မှုတွေဟာ ပါတီစုံဒီမိုကရေစီစနစ်ကို လျှောက်လှမ်းမှုမှာ မလိုအပ်တဲ့ နှောင့်နှေးမှုတွေ ဖြစ်လာလိမ့်မယ်လို့လည်း သူက ခြိမ်းခြောက်ခဲ့ပါတယ်။ 

    နိုင်ငံခြားနဲ့ ဆက်သွယ်ဆောင်ရွက်တဲ့ မြန်မာဘဏ်တွေကို အမေရိကန်က အခုလို အရေးယူမှုဟာ အာဆီယံဒေသတွင်းက နိုင်ငံတွေကိုပါ ရိုက်ခတ်မှုရှိမှာ ဖြစ်ပါတယ်။ 

    Ref: Reuters 

  • ပါလက်စတိုင်းဒုက္ခသည်စခန်းကို အစ္စရေးက ၀င်စီး၍ လူ ၃ ဦး သေဆုံး

    ပါလက်စတိုင်းဒုက္ခသည်စခန်းကို အစ္စရေးက ၀င်စီး၍ လူ ၃ ဦး သေဆုံး

    ဇွန် ၁၉၊ ၂၀၂၃

    M-Media 


    -ပါလက်စတိုင်းနိုင်ငံ အနောက်ဖက်ကမ်း ဂျီနင်မြို့က ဒုက္ခသည်စခန်းကို အစ္စရေးစစ်တပ်က ဒီကနေ့မနက်မှာ ၀င်ရောက်စီးနင်းတာကြောင့် အနည်းဆုံး လူ ၃ ဦး သေဆုံးခဲ့ပါတယ်။ 

    ပါလက်စတိုင်းနယ်မြေတွေကို ဂျူးလက်နက်ကိုင်တွေက သိမ်းပိုက်ပြီး အစ္စရေးနိုင်ငံထူထောင်တဲ့ ၁၉၄၇ ခုနှစ်မှာ နေရပ်စွန့်ခွာ ထွက်ပြေးခဲ့ရတဲ့ ပါလက်စတိုင်းတွေ ဂျီနင်ဒုက္ခသည်စခန်းမှာ နေထိုင် ကြတာဖြစ်ပါတယ်။ 

    သံသယရှိသူ ၂ ဦးကို ၀င်ရောက်ဖမ်းဆီးရာမှာ ခုခံမှု ကြုံတွေ့တဲ့အတွက် တိုက်ခိုက်တာဖြစ်တယ်လို့ အစ္စရေးက ထုတ်ပြန်ပါတယ်။ 

    သေဆုံးသူတွေထဲမှာ ကလေးငယ် ၁ ဦး ပါ၀င်ပြီး ဒဏ်ရာရသူက အနည်းဆုံး ၃၇ ဦး ရှိပါတယ်။ 

    ပါလက်စတိုင်း တော်လှန်ရေးအဖွဲ့ PIJ ရဲ့ အဖွဲ့ခွဲ al-Quds တပ်ဖွဲ့က အစ္စရေးတပ်ဖွဲ့တွေကို ခုခံတိုက်ခိုက်မှု ပြုလုပ်နေတယ်လို့ သတင်းထုတ်ပြန်ပါတယ်။ 

    ဒုက္ခသည်စီးစခန်း စီးနင်းမှုအတွင်း ဂျာနယ်လစ်တွေကိုလည်း အစ္စရေးစစ်တပ်က ပစ်ခတ်မှုတွေ ပြုလုပ်ခဲ့ပါတယ်။ 

    Ref: Aljazeera

  • မြန်မာစစ်ခေါင်းဆောင်များကို အာဆီယံတွင် နေရာပြန်ပေးရန် ထိုင်းအစိုးရ ကြိုးစားလာ

    မြန်မာစစ်ခေါင်းဆောင်များကို အာဆီယံတွင် နေရာပြန်ပေးရန် ထိုင်းအစိုးရ ကြိုးစားလာ

    ဇွန် ၁၉၊ ၂၀၂၃

    M-Media 


    -အာဏာသိမ်း မြန်မာစစ်ခေါင်းဆောင်တွေကို အာဆီယံအဆင့်မှာ ပြန်လာပါ၀င်လာနိုင်ရေး ရည်ရွယ်တဲ့ အလွတ်သဘော ဆွေးနွေးပွဲတစ်ရပ် ဦးဆောင်ကျင်းပပေးမယ်လို့ ထိုင်း အိမ်စောင့်အစိုးရက ထုတ်ပြန်ပါတယ်။ 

    စစ်အာဏာသိမ်းမှုနဲ့ နောက်ဆက်တွဲ ပြည်သူတွေအပေါ် အကြမ်းဖက်မှုကြောင့် မြန်မာစစ်ခေါင်းဆောင်တွေကို အာဆီယံက ဖယ်ကျဥ်ထားတာပါ။ 

    စစ်တပ်ကျောထောက်နောက်ခံပြု ထိုင်းအိမ်စောင့်အစိုးရရဲ့ မနေ့ကထုတ်ပြန်တဲ့ ကြေငြာချက်မှာ မြန်မာနိုင်ငံက ပြဿနာကို ဖြေရှင်းရေး အာဆီယံရဲ့ ကြိုးပမ်းမှုကို အထောက်အကူဖြစ်စေဖို့အတွက် ဒီဆွေးနွေးပွဲကို စီစဥ်ရတာဖြစ်တယ်လို့ ဖော်ပြထားပါတယ်။ 

    ဆွေးနွေးပွဲကို လာအို၊ ကမ္ဘောဒီးယား၊ တရုတ်၊ ဘရူနိုင်း၊ ဗီယက်နမ်နဲ့ မြန်မာစစ်ကောင်စီ နိုင်ငံခြားရေး၀န်ကြီးတို့ တက်ရောက်လိမ့်မယ်လို့ ထိုင်းက ပြောပါတယ်။ 

    လူ့အခွင့်အရေးစောင့်ကြည့်ရေးအဖွဲ့ Human Rights Watch က စစ်ကောင်စီကို အာဆီယံအဆင့်မှာ နေရာပြန်ပေးရေး ဒီတွေ့ဆုံပွဲမှာ ဆွေးနွေးဖို့ရှိတယ်လို့ ပြောပါတယ်။ 

    လက်ရှိ အာဆီယံဥက္ကဌဖြစ်တဲ့ အင်ဒိုနီးရှားက ဒီဆွေးနွေးပွဲကို တက်မှာ မဟုတ်ပါဘူး။ မလေးရှားက အစိုးရက ထုတ်ပြန်တဲ့ ကြေငြာချက်မှာ ဒီဆွေးနွေးပွဲဟာ အာဆီယံအဖွဲ့ရဲ့ ညီညွတ်မှုကို ထိခိုက်စေနိုင်တဲ့အတွက် တက်ရောက်မှာမဟုတ်ဘူးလို့ ဖော်ပြထားပါတယ်။ 

    Ref: AFP

  • အမေရိကန်တရားရေးတွင် မှတ်တမ်းသစ် ရေးထိုးလိုက်သည့် ဘင်္ဂါလီအမျိုးသမီး

    အမေရိကန်တရားရေးတွင် မှတ်တမ်းသစ် ရေးထိုးလိုက်သည့် ဘင်္ဂါလီအမျိုးသမီး

    ဇွန် ၁၈၊ ၂၀၂၃

    M-Media 


    -ဘင်္ဂလားဒေ့ရှ်နွယ်ဖွား ရှေ့နေ နူဆရတ် ဂျာဟန် ချောင်ဒရီကို ပြည်ထောင်စုအဆင့် တရားသူကြီးအဖြစ် အမေရိကန်အထက်လွှတ်တော်က ကြာသာပေးနေ့မှာ အတည်ပြု ခန့်အပ်လိုက်ပါတယ်။ 

    ဒီခန့်အပ်မှုကြောင့် အမေရိကန်မွတ်စလင်သမိုင်းမှာ ပထဆုံး ပြည်ထောင်စုအဆင့် မွတ်စလင်အမျိုးသမီး တရားသူကြီးအဖြစ် မှတ်တမ်း၀င်လာပါတယ်။ 

    နူဆရတ်ဟာ နယူးယောက်ပြည်နယ် အရှေ့ပိုင်းခရိုင် ပြည်ထောင်စု တရားသူကြီးအဖြစ် တာ၀န်ယူရမှာပါ။ 

    “နူဆရတ် ချောင်ဒရီကို ဖက်ဒရယ်တရားသူကြီးအဖြစ် အတည်ပြု ခန့်အပ်ရာမှာ သမိုင်းတွင်မယ့် အကြောင်းအရင်း များစွာ ရှိပါတယ်။ သူမဟာ ကျွန်တော်တို့ရဲ့ တရားရေးစနစ်အောက်မှာ ပြည်သူတွေ မျှမျှတတ ဆက်ဆံခံရဖို့ သက်တမ်းတစ်လျှောက်လုံး စိတ်နှစ်မြှုပ် ဆောင်ရွက်ခဲ့သူပါ” လို့ အမေရိကန်အခြေစိုက် လူ့အခွင့်အရေးအဖွဲ့ Muslim Advocacy အကြီးအကဲ အိုမာရ် ဖာရာက ပြောပါတယ်။ 

    သမ္မတဘိုင်ဒန်အစိုးရရဲ့ ၂၀၂၂ ခုနှစ် ဇန်န၀ါရီ ဖက်ဒရယ် တရားသူကြီးများ အမည်စာရင်းတင်သွင်းမှုမှာ နူဆရတ် ချောင်ဒရီ ပါ၀င်လာတာ ဖြစ်ပါတယ်။ 

    နူဆရတ်ဟာ အမေရိကန် နိုင်ငံသားအခွင့်အရေးဆိုင်ရာ သမဂ္ဂ ACLU ရဲ့ အီလီနွိုက်စ်ပြည်နယ်အဖွဲ့ခွဲမှာ ဥပဒေရေးရာ ဒါရိုက်တာအဖြစ် တာ၀န်ထမ်းဆောင်ခဲ့ပြီး ရာဇ၀တ်မှု၊ ရဲလုပ်ငန်းစဥ် စတဲ့ ကိစ္စရပ်တွေကို ကိုင်တွယ်ခဲ့ပါတယ်။ 

    ဖက်ဒရယ်တရားသူကြီး အမည်စာရင်းမှာ နူဆရတ်ပါ၀င်လာမှုကို အမေရိကန် နိုင်ငံသားအခွင့်အရေးနဲ့ လူ့အခွင့်အရေးအဖွဲ့ တော်တော်များများက ကြိုဆိုခဲ့ကြပါတယ်။ 

    “သူမဟာ နိုင်ငံတစ်၀ှမ်းလုံးမှာ မျှတတဲ့ တရားရေးစနစ် ထွန်းကားရေးအတွက် အကြံသစ်ဉာဏ်သစ်တွေနဲ့  အားထုတ်လုပ်ဆောင်တဲ့ ထူးခြားတဲ့ မှတ်တမ်းကောင်းတွေ ရှိခဲ့ပါတယ်” လို့ ACLU ရဲ့ အမှုဆောင်ဒါရိုက်တာ အန်တိုနီ ဒီ ရိုမဲရိုးက ပြောပါတယ်။ 

    အီလီနွိုက်စ်ပြည်နယ်အတွင်းက ငွေကြေးမပြည့်စုံသူတွေ ဥပဒေရဲ့ ကာကွယ်မှု အပြည့်အ၀ရရှိရေးအတွက် နူဆရတ်က စွမ်းစွမ်းတမံ ဆောင်ရွက်ခဲ့တယ်လို့လည်း ရိုမဲရိုးက ထည့်သွင်းပြောဆိုခဲ့ပါတယ်။ 

    အထက်လွှတ်တော်က ဒီမိုကရက်တစ်ပါတီ လွှတ်တော်အမတ်များအဖွဲ့ ခေါင်းဆောင် ချက် ရှူးမားက နူဆရတ်ရဲ့အောင်မြင်မှုကို Twitter စာမျက်နှာကနေ ချီးကျူးခဲ့ပါတယ်။

    “ဖက်ဒရယ်အဆင့်မှာ အာရှ-အမေရိကန်နွယ်ဖွား ၂၁ ဦးကို ခန့်အပ်လိုက်ကြောင်း အထက်လွှတ်တော် ဒီမိုကရက်တစ်အဖွဲ့က အတည်ပြုပါတယ်။ ဒါဟာ သမ္မတ အိုဘားမားလက်ထက်က အာရှနွယ်ဖွားတွေ အများဆုံး ခန့်အပ်ခဲ့တဲ့ အရေအတွက်နဲ့ တန်းတူ ဖြစ်ပါတယ်။ ကျွန်တော်တို့ ရှေ့ဆက် သွားကြပါမယ်”

    Ref: Aljazeera 

  • မြန်မာပြဿနာဖြေရှင်းရေး သက်ဆိုင်သူအားလုံး ပါ၀င်ရမည်ဟု စင်ကာပူပြော

    မြန်မာပြဿနာဖြေရှင်းရေး သက်ဆိုင်သူအားလုံး ပါ၀င်ရမည်ဟု စင်ကာပူပြော

    ဇွန် ၁၈၊ ၂၀၂၃

    M-Media 


    WASHINGTON, DC – JUNE 16: (L-R) Singapore Foreign Minister Vivian Balakrishnan and U.S. Secretary of State Antony Blinken hold a joint news conference at the U.S. Department of State on June 16, 2023 in Washington, DC. Blinken is scheduled to travel to Beijing this weekend in his first trip to China in the Biden administration. Drew Angerer/Getty Images/AFP (Photo by Drew Angerer / GETTY IMAGES NORTH AMERICA / Getty Images via AFP)

    -မြန်မာ့နိုင်ငံရေးပြဿနာနဲ့ပတ်သက်ပြီး အာဏာသိမ်းစစ်ခေါင်းဆောင်တွေနဲ့ ထိပ်သီးအဆင့် ဆွေးနွေးမှုလုပ်ဖို့ အချိန်အခါ မဟုတ်သေးဘူးလို့ စင်ကာပူနိုင်ငံခြားရေး၀န်ကြီး ဗီဗီယံ ဘာလာကရစ်ရှ်နန်က ပြောပါတယ်။ 

    ၀ါရှင်တန်မှာ ကန်နိုင်ငံခြားရေး၀န်ကြီး အန်တိုနီဘလင်ကန်နဲ့ ပူးတွဲသတင်းစာရှင်းလင်းပွဲမှာ မြန်မာ့နိုင်ငံရေးအခြေအနေနဲ့ပတ်သက်ပြီး အာဆီယံအဖွဲ့ရဲ့ သဘောထားတွေကို သူက ထည့်သွင်းပြောကြားခဲ့ပါတယ်။ 

    အာဆီယံဟာ မြန်မာအာဏာသိမ်းစစ်ခေါင်းဆောင်တွေနဲ့ တိုက်ရိုက်ဆက်ဆံမှုမပြုတဲ့ မူ၀ါဒကို ဆက်လက်ဆုပ်ကိုင်ထားတယ်လို့ ဘာလာကရစ်ရှ်နန်က ဆိုပါတယ်။ 

    “အာဏာသိမ်းအဖွဲ့နဲ့ ထိပ်သီးအဆင့်မပြောနဲ့ နိုင်ငံခြားရေး၀န်ကြီးအဆင့်တောင်မှ ဆွေးနွေးဖို့ အချိန်အခါ မဟုတ်သေးပါဘူး” 

    “စစ်အာဏာသိမ်းမှု၊ အရပ်သားတွေအပေါ် ဆက်လက်အကြမ်းဖက်နေမှု၊  နိုင်ငံအတွင်း မတည်မငြိမ်ဖြစ်မှု၊ စီးပွားရေးအပေါ် ကြီးကြီးမားမားရိုက်ခတ်မှု အားလုံးကို ကျွန်တော်တို့ ရှုတ်ချပါတယ်” 

    “အာဏာသိမ်းမှုက ၂ နှစ်တောင်ကျော်သွားပြီး။ ဘာတိုးတက်မှုမှ မမြင်ရသေးပါဘူး” 

    အာဆီယံနဲ့ စစ်ကောင်စီ တာ၀န်ရှိသူတွေအကြား တရား၀င်မဟုတ်တဲ့ ဆွေးနွေးမှု အခုရက်ပိုင်းအတွင်းလုပ်ဖို့ ထိုင်းနိုင်ငံရဲ့ လက်ရှိ အိမ်စောင့်အစိုးရက စီစဥ်ထားတယ်လို့ သတင်းတွေ ထွက်နေတာပါ။ 

    စင်ကာပူနိုင်ငံခြားရေး၀န်ကြီးက စစ်ကောင်စီနဲ့ ဆက်သွယ်ဆောင်ရွက်မှု လုံး၀မရှိဘူးလို့ မငြင်းပေမယ့် နိုင်ငံရေးပြဿနာ ဖြေရှင်းဖို့ဆိုရင် သက်ဆိုင်သူအားလုံး ပါ၀င်ဖို့ လိုတယ်လို့ မှတ်ချက်ပေးပါတယ်။ 

    “အဓိကအချက်က သက်ဆိုင်သူတိုင်း စားပွဲ၀ိုင်းမှာထိုင်ပြီး ဆွေးနွေးဖို့ပါ။ ဒါမျိုးဖြစ်ဖို့ ဘယ်လောက်ကြာမလဲ မသိပါဘူး။ အရင်တစ်ခေါက်က မြန်မာနိုင်ငံမှာ ဒီမိုကရက်တစ် ပြုပြင်ပြောင်းလဲမှုဖြစ်ဖို့ ၂၅ နှစ်လောက် ကြာခဲ့တယ်။ အခုတစ်ကြိမ်တော့ ဒီလောက်မကြာဖို့ မျှော်လင့်ပါတယ်” 

    အတိုက်အခံတွေနဲ့ တွေ့ဆုံညှိနှိုင်းရေး စစ်ကောင်စီကို ဆက်လက်ဖိအားပေးဖို့ အရေးကြီးတယ်လို့လည်း သူက ဆိုပါတယ်။ 

    Ref: AFP