ဒီဇင်ဘာ ၂၃၊ ၂၀၁၄
M-Media
– မတ်လ ၈ ရက်နေ့က ပျောက်ဆုံးသွားခဲ့သည့် မလေးရှားလေကြောင်းလိုင်းမှ MH 370 လေယာဉ်မှာ အမေရိကန်၏ ပစ်ချခြင်းကို ခံခဲ့ရခြင်းဖြစ်သည်ဟု ပြင်သစ်လေကြောင်းလိုင်း ပိုင်ရှင်ဟောင်းနှင့် နာမည်ကျော် စာရေးဆရာတစ်ဦးဖြစ်သူ မာ့ခ်ဒူဂိန်းက ပြောကြားလိုက်သည်။
ကွာလာလမ်ပူမှ ဘေဂျင်းမြို့သို့အသွား အဆက်အသွယ် ပြတ်တောက်သွားပြီးနောက် ၉/၁၁ ကဲ့သို့ တိုက်ခိုက်မှုများ ပြုလုပ်မည်ကို စိုးရိမ်သောကြောင့် အိန္ဒိယသမုဒ္ဒရာအတွင်းတည်ရှိသည့် ဒီယေဂို ဂါစီယာကျွန်းရှိ အမေရိကန် စစ်အခြေစိုက်စခန်းမှ ပစ်ချခဲ့ခြင်းဖြစ်သည် ဒူဂိန်းက Paris
Match အပတ်စဉ်သတင်းစာနှင့် အင်တာဗျူးတွင် ဖြေကြားခဲ့သည်။
ဂါစီယာကျွန်းအနီးရှိ မော်လ်ဒိုက်ကျွန်းသားများကလည်း ပျောက်ဆုံးသွားသည့် အဆိုပါလေယာဉ် အနိမ့်ပျံသန်းလာသည်ကို တွေ့ရှိခဲ့ရပြီး၊ ဘာရာဟ်ကျွန်းအနီးရှိ ရေပြင်တွင် လေယာဉ်ပေါ်မှ မီးသတ်ဆေးဘူးအလွတ်တစ်ခုကို တွေ့ရှိခဲ့သည့် သက်သေများလည်း ရှိကြောင်း ၎င်းက ထောက်ပြခဲ့သည်။
MH 370 လေယာဉ်တွင် ခရီးသည်နှင့် လေယာဉ်အမှုထမ်းစုစုပေါင်း ၂၃၉ ဦး လိုက်ပါသွားခဲ့ပြီး ခရီးသည့် ၃ ပုံ ၂ ပုံမှာ တရုတ်နိုင်ငံသားများ ဖြစ်ကြသည်။
ပြင်သစ်နိုင်ငံသားတစ်ဦးဖြစ်ပြီး နာမည်ကျော် စာရေးဆရာတစ်ဦးဖြစ်သည့် ဒူဂိန်းကမူ MH 370 အကြောင်း မစုံစမ်းရန် သူလျှိများက ၎င်းအား သတိပေးခဲ့သည်ဟုလည်း ထည့်သွင်းပြောကြားခဲ့သည်။
ထိုလေယာဉ်ပျောက်ဆုံးမှုအတွက် အဖြစ်နိုင်ဆုံး ယူဆချက် ၂ ခု ထွက်ပေါ်ခဲ့ပြီး တစ်ခုက လေယာဉ်မှာ အပိုင်စီးခံရပြီးနောက် အိန္ဒိယသမုဒ္ဒရာရှိ ဒီယေဂိုဂါစီယာကျွန်းသို့ ပျံသန်းသွားခဲ့ခြင်းဖြစ်သည်ဟု ဆိုသည်။ သို့သော်လည်း အိန္ဒိယသမုဒ္ဒရာသို့ ဦးတည်ပျံသန်းသည်ဟူသော ထိုယူဆချက်ကို ကွာလာလမ်ပူရှိ အမေရိကန်သံရုံးမှ ငြင်းဆိုခဲ့သည်။
အခြားယူဆချက်တစ်ခုမှာမူ အဆိုပါလေယာဉ်ပေါ်တွင် မီးလောင်မှုဖြစ်ပွားခဲ့ပြီး
လေယာဉ်တစ်ခုလုံးကို မကူးစေရန် လေယာဉ်မှူးများက လေယာဉ်အတွင်းရှိ
အီလက်ထရောနစ်စနစ်များအားလုံးကို ပိတ်ပစ်ခဲ့သောကြောင့် အဆက်အသွယ်
ပြတ်တောက်သွားခြင်းဖြစ်ကြောင်း၊ ထို့နောက် လေယာဉ်ပေါ်တွင် လိုက်ပါသူအားလုံးမှာ မီးခိုမွှန်သောကြောင့် သတိလစ်သွားခဲ့ပြီး အော်တိုပိုက်လော့ဖြင့် မောင်းနေသည့်လေယာဉ်မှာ ဆီကုန်ကာ သမုဒ္ဒရာထဲသို့ ပျက်ကျသွားခြင်း ဖြစ်နိုင်သည်ဟု ဆိုသည်။
Ref : Dailymail and RT
