News @ M-Media

Category: က်န္းမာေရးႏွင့္ေဆးပညာ

  • ကိုဗစ်ကုသရေးအတွက် အလားအလာရှိသည့် နည်းလမ်းတစ်ခုကို ယူအေအီး ဖော်ထုတ်

    ကိုဗစ်ကုသရေးအတွက် အလားအလာရှိသည့် နည်းလမ်းတစ်ခုကို ယူအေအီး ဖော်ထုတ်

    မေ ၂၊ ၂၀၂၀
    M-Media

    -Covid-19 ကုသရေးမှာ အလားအလာရှိပြီး ထိရောက်နိုင်တဲ့ နည်းလမ်းတစ်ခုကို အာရပ်စော်ဘွားများပြည်ထောင်စု (ယူအေအီး) သိပ္ပံပညာရှင်တွေက ဖန်တီး ဖော်ထုတ်လိုက်ပါတယ်။

    Stem cell ထိုးသွင်းကုသတဲ့ နည်းလမ်းဖြစ်ပြီး Abu Dhabi Stem Cell စင်တာက သုတေသနပညာရှင်တွေနဲ့ ဆရာဝန်တွေပါတဲ့ အဖွဲ့က ဖော်ထုတ်ဖန်တီးခဲ့တာပါ။ လူနာရဲ့ သွေးထဲက stem cell တွေကို ထုတ်ပြီး အပြင်မှာ ဓာတ်ပြုလှုံဆော်ပေးကာ ခန္ဓာကိုယ်ထဲ ပြန်လည်ထိုးသွင်းရတာ ဖြစ်ပါတယ်။

    ယူအေအီးက ကိုဗစ်လူကာ ၇၃ ဦးရဲ့ အဆုတ်ထဲကို ထိုးသွင်းကုသပေးခဲ့ရမှာ အောင်မြင်ခဲ့ပါတယ်။ လက်ရှိမှာ ကုသနေတဲ့ အခြားနည်းလမ်းတွေလို လူနာအပေါ် ​ ကြီးကြီးမားမားသက်ရောက်မှုမျိုးလည်း မရှိပါဘူး။ ကနဦး ဆေးဘက်ဆိုင်ရာ စမ်းသပ်မှု အောင်မြင်ခဲ့ပြီးနောက် ၂ ပတ်တာကြာမြင့်မယ့် ကျယ်ပြန့်တဲ့ စမ်းသပ်မှုကို ဆက်လက်လုပ်ဆောင်ဖို့ ယူအေအီးက စီစဉ်နေပါတယ်။

    Abu Dhabi Stem Cell စင်တာဟာ ဆဲလ်အသုံးပြု ကုသရေးမှာ နောက်ဆုံးပေါ် နည်းလမ်းတွေကို အသုံးပြုပြီး ကုသမှုပေးနေတဲ့ နေရာတစ်ခုလည်း ဖြစ်ပါတယ်။

    Ref: Gulf News

  • နေရောင် တိုက်ရိုက်ထိတွေ့ပါက ကိုဗစ် မြန်မြန်သေသည်ဟု သိပ္ပံပညာရှင်များ ပြော

    နေရောင် တိုက်ရိုက်ထိတွေ့ပါက ကိုဗစ် မြန်မြန်သေသည်ဟု သိပ္ပံပညာရှင်များ ပြော

    ဧပြီ ၂၅၊ ၂၀၂၀
    M-Media

    -Covdi-19 ဖြစ်စေတဲ့ ဗိုင်းရပ်စ်ပိုးဟာ နေရောင်နဲ့ တိုက်ရိုက်ထိတွေ့တဲ့ အချိန်မျိုးမှာ မြန်မြန်သေတယ်ဆိုတာကို တွေ့ရကြောင်း အမေရိကန်သိပ္ပံပညာရှင်တွေက ပြောကြားလိုက်ပါတယ်။

    နေရောင်ခြည်မှာ ပါဝင်တဲ့ ခရမ်းလွန်ရောင်ခြည်ဟာ ဗိုင်းရပ်စ်ပိုး​ကို သေစေနိုင်တဲ့ စွမ်းအားရှိတယ်ဆိုတဲ့အချက်ကို သိပ္ပံပညာရှင်တွေက အရင်ကတည်းက သိရှိထားတာပါ။

    အမေရိကန် ပြည်တွင်းလုံခြုံရေးဌာနက သိပ္ပံနဲ့ နည်းပညာဆိုင်ရာ အကြံပေး ဝီလီယံ ဘရိုင်ယန်က Covid-19 ကို ဖြစ်စေတဲ့ ဗိုင်းရပ်စ်ပိုးဟာ နေရောင်ခြည်နဲ့ထိတွေ့ရင် မြန်မြန် သေဆုံးတယ်လို့ သုတေသနမှာ တွေ့ရတာကြောင့် နွေရာသီရောက်ရင် ဗိုင်းရပ်စ်ပြန့်နှံ့မှု ပိုပြီး နှေးကွေးနိုင်တယ်လို့ မျှော်လင့်ရကြောင်း မနေ့က အိမ်ဖြူတော် သတင်းစာရှင်းလင်းပွဲမှာ ပြောကြားခဲ့ပါတယ်။

    “နေရောင်ခြည်ဟာ ဗိုင်းရပ်စ်ပိုးကို လေထဲမှာရော မျက်နှာပြင်ပေါ်မှာပါ သေစေနိုင်တဲ့စွမ်းအား ရှိတယ်ဆိုတဲ့ အချက်က ကျွန်တော်တို့ ဒီနေ့အထိ လုပ်ခဲ့သမျှထဲမှာ အထင်ရှားဆုံး​ တွေ့ရှိချက်တစ်ခုပါ။ အပူချိန်နဲ့ စိုစွတ်မှုတွေမှာ ဒီလို တူညီတဲ့ ဂုဏ်သတ္တိမျိုး ရှိတယ်ဆုိတာကိုလည်း ကျွန်တော်တို့ တွေ့ခဲ့ရပါတယ်။ အပူချိန်မြင့်တဲ့နေရာ၊ စွတ်စိုမှု မြင့်တဲ့နေရာ အဲဒီလို နှစ်ခုစလုံး ဖြစ်နေတဲ့နေရာတွေမှာ ဗိုင်းရပ်စ်ရှင်သန်ဖို့ မလွယ်ပါဘူး”

    ဒါပေမယ့် စင်ကာပူ၊ မလေးရှားနဲ့ ထိုင်းနိုင်ငံလို ပူပြင်းတဲ့ရာသီဥတုရှိရာ ဒေသတွေမှာ ကိုရိုနာဗိုင်းရပ်စ်ကြောင့် သေဆုံးမှု အများအပြား ရှိနေပြီး ရာသီဥတုအခြေအနေဟာ ဗိုင်းရပ်စ်တားဆီးရေးမှာ သိပ်ပြီး အသုံးမဝင်ဘူးဆိုတဲ့ အယူအဆလည်း ရှိနေပါတယ်။

    ကမ္ဘာ့ကျန်းမာရေးအဖွဲ့ WHO က ဒေါက်တာ မာဂရက် ဟာရစ်က အပူချိန်ကြောင့် ကိုရိုနာဗိုင်းရပ်စ် မြန်မြန်သေတယ်ဆိုတဲ့ အထောက်အထားဟာ လက်တွေ့အခြေအနေတွေနဲ့ မကိုက်ညီဘူးလို့ တုန့်ပြန် ပြောကြားခဲ့ပါတယ်။

    ဝီလီယံ ဘရိုင်ယန် ကိုးကားပြောဆိုတဲ့ သု​တေသနဟာ တရားဝင် ထွက်မလာသေးတဲ့အတွက် သုံးသပ်ဖို့ ခက်ခဲနေတယ်လို့ ကျွမ်းကျင်သူတွေက ဆိုပါတယ်။

    Ref: Aljazeera

  • Covid-19 ကာကွယ်ဆေး လူသားတွင်စမ်းသပ်မှုကို ယူကေတွင် ပထမဆုံး ပြုလုပ်

    Covid-19 ကာကွယ်ဆေး လူသားတွင်စမ်းသပ်မှုကို ယူကေတွင် ပထမဆုံး ပြုလုပ်

    ဧပြီ ၂၄၊ ၂၀၂၀
    M-Media

    ကာကွယ်ဆေးထိုးမှု မြင်ကွင်း

    -ကိုရိုနာဗိုင်းရ်စ် ကာကွယ်ဆေး လူသားမှာ ပထမဆုံး စမ်းသပ်မှုကို အင်္ဂလန်နိုင်ငံ အောက်စဖို့ဒ်တက္ကသိုလ်မှာ မနေ့က စတင်ပြုလုပ်ခဲ့ပါတယ်။

    လူဦးရေ ၈၀၀ ကျော်ပါဝင်မယ့် အဲဒီစမ်းသပ်မှုက ပထမဆုံး ၂ ဦးကို မနေ့မှာ ကာကွယ်ဆေး ထိုးပေးခဲ့တာပါ။ စမ်းသပ်မယ့် သူတွေထဲက တစ်ဝက်ကို Covid-19 ကာကွယ်ဆေးထိုးပေးမှာဖြစ်ပြီး ကျန်တဲ့တစ်ဝက်ကို ဦးနှောက်အမြှေးယောင် ကာကွယ်ဆေး ထိုးပေးမှာဖြစ်ပါတယ်။

    အထိုးခံရသူတွေဟာ သူတို့ကို ဘာဆေးထိုးပေးထားလဲဆိုတာ သိမှာ မဟုတ်ဘဲ ဆရာဝန်တွေက ဆေးရဲ့ တုန်ပြန်မှုကို စောင့်ကြည့်မှာ ဖြစ်ပါတယ်။

    “ကျွန်မက သိပ္ပံပညာရှင်တစ်ယောက်ပါ။ သိပ္ပံစမ်းသပ်မှုတွေကို တတ်နိုင်သမျှ ပံ့ပိုးကူညီပေးသွားချင်ပါတယ်” လို့ ပထမဆုံး ဆေးထိုးခံခဲ့ရသူ အီလီဆာ ဂရာနာတိုက ပြောကြားခဲ့ပါတယ်။

    ကာကွယ်ဆေးကို အောက်စဖို့ဒ်တက္ကသိုလ်က ၃ လအတွင်း ဖန်တီးခဲ့တာပါ။​​ ဆေးဘက်အကြို သုတေသန​ကို ဦးဆောင်ပြုလုပ်တဲ့ Jenner Institute အဖွဲ့ရဲ့ ကာကွယ်ဆေးဆိုင်ရာ ပရော်ဖက်ဆာ ဆာရာ ဂီလ်ဘာ့တ်က ဒီကာကွယ်ဆေးအပေါ်မှာ ယုံကြည်မှု အတိုင်းအတာတစ်ခုအထိ ရှိတယ်လို့ ပြောကြားခဲ့ပါတယ်။

    “ပုဂ္ဂိုလ်ရေးအမြင်အရဆိုရင် ဒီကာကွယ်ဆေးအပေါ်မှာ ကျွန်မ ယုံကြည်မှု တစ်စုံတစ်ရာ ရှိပါတယ်။ လူသားတွေကို ကျွန်မတို့ စမ်းသပ်ပြီး အချက်အလက်တွေကို မှတ်တမ်းတင်ရမယ်။ ကာကွယ်ဆေးကို ကျယ်ကျယ်ပြန့်ပြန့် အသုံးမပြုနိုင်ခင်မှာ လူတွေ အများအပြား မကူးစက်အောင် တားဆီးရပါမယ်”

    ကာကွယ်ဆေးကို ချင်ပန်ဇီမျောက်တွေမှာ တွေ့ရတဲ့ အဖျားဗိုင်းရပ်စ်ပိုးအပျော့စားနဲ့ ဖန်တီးထားတာဖြစ်ပြီး လူသားတွေမှာ အသုံးပြုလို့ရအောင် သိပ္ပံပညာရှင်တွေက ပြန်လည် ပြုပြင်ထားပါတယ်။

    Ref: BBC

  • ကိုရိုနာနောက်ဆက်တွဲ ကမ္ဘာကြီးက ဆင်းရဲမွဲတွေမှုဒဏ်ကို ကြီးကြီးမားမား ခံစားရနိုင်

    ကိုရိုနာနောက်ဆက်တွဲ ကမ္ဘာကြီးက ဆင်းရဲမွဲတွေမှုဒဏ်ကို ကြီးကြီးမားမား ခံစားရနိုင်

    ဧပြီ ၂၂၊ ၂၀၂၀
    M-Media

    -Covid-19 ပြန့်နှံ့မှုကြောင့် ကမ္ဘာကြီးဟာ ငတ်မွတ်ခေါင်းပါးမှုဒဏ်ကို ကျယ်ကျယ်ပြန့်ပြန့် ခံစားရနိုင်တယ်လို့ ကုလသမဂ္ဂက သတိပေးလိုက်ပါတယ်။

    ကုလရဲ့ စားနပ်ရိက္ခာအဖွဲ့ WFP ရဲ့ အခုနှစ်အတွက် ‘ကမ္ဘာ့ စားနပ်ရိက္ခာ ပြဿနာ အစီရင်ခံစာ’ မှာ ကပ်ရောဂါရဲ့ ရိုက်ခတ်မှုကြောင့် ကမ္ဘာတစ်ဝှမ်း ငတ်မွတ်ခေါင်းပါးသူ အရေအတွက်ဟာ ၁၃၅ သန်းကနေ သန်း ၂၅၀ လောက်အထိ မြင့်တက်လာနိုင်တယ်လို့ ခန့်မှန်းတွက်ချက်ထားပါတယ်။

    WFP အကြီးအကဲ ဒေးဗစ် ဘီစလေက ဒီအခြေအနေကို ရှောင်လွှဲဖို့အတွက် ကမ္ဘာကြီးက ပါးပါးနပ်နပ်နဲ့ မြန်မြန်ဆန်ဆန် ဆောင်ရွက်ဖို့ လိုအပ်တယ်လို့ ဗီဒီယိုမိန့်ခွန်းကနေတစ်ဆင့် လုံခြုံရေးကောင်စီမှာ ပြောကြားခဲ့ပါတယ်။

    “လအနည်းငယ်အတွင်းမှာ ငတ်မွတ်ခေါင်းပါးမှုကို ပမာဏ ကြီးကြီးမားမား ကြုံတွေ့ရနိုင်ပါတယ်။ ကျွန်တော်တို့အတွက် အချိန်မရှိဘူးဆိုတာ အမှန်တရားပါ”

    WFP ရဲ့ အစီရင်ခံက အန္တရာယ်အရှိဆုံး ၁၀ နိုင်ငံစာရင်းမှာ ယီမင်၊ ကွန်ဂို၊ အာဖဂန်နစ္စတန်၊ ဗင်နီဇွဲလား၊ အီသီယိုးပီးယား၊ တောင်ဆူဒန်၊ ဆူဒန်၊ ဆီးရီးယား၊ နိုက်ဂျီးရီးယားနဲ့ ဟေတီနိုင်ငံတွေ ပါဝင်ပါတယ်။

    ကိုရိုနာ ကပ်ရောဂါ မတိုင်ခင်ကတည်းက မိုးခေါင်ရေရှားမှုနဲ့ ကျိုင်းကောင်ဖျက်ဆီးမှုတွေကြောင့် အရှေ့အာဖရိကနဲ့ တောင်အာရှတို့မှာ စားနပ်ရိက္ခာ ပြတ်လပ်မှုကို ကြုံတွေ့နေရတာ ဖြစ်ပါတယ်။

    Ref: BBC

  • Covid-19 ကာကွယ်ဆေးကို ဗြိတိန်က လူသားများတွင် စတင်စမ်းသပ်တော့မည်

    Covid-19 ကာကွယ်ဆေးကို ဗြိတိန်က လူသားများတွင် စတင်စမ်းသပ်တော့မည်

    ဧပြီ ၂၂၊ ၂၀၂၀
    M-Media

    -ကိုရိုနာဗိုင်းရပ်စ် ကာကွယ်ဆေးကို ကြာသာပတေးနေ့ကစတင်ပြီး လူသားတွေမှာ စတင်စမ်းသပ်တော့မယ်လို့ ဗြိတိန်ကျန်းမာရေးဝန်ကြီး မတ်ဟန်းကော့က ပြောကြားလိုက်ပါတယ်။

    ယူကေမှာ Covid-19 ကူးစက်သူ အရေအတွက်ဟာ ၁၃၀၀၀၀ နီးပါး ရှိနေကာ၊ သေဆုံးသူ အရေအတွက်ကလည်း ၁၇၃၃၇ ဦး ရှိနေပါတယ်။ ဆေးဘက်ဆိုင်ရာပစ္စည်းတွေ လုံလုံလောက် မစီစဉ်ပေးနိုင်မှုအတွက်လည်း ယူကေအစိုးရဟာ ဝေဖန်ခံနေရပါတယ်။

    မနေ့က သတင်းစာရှင်းလင်းပွဲမှာ ကျန်းမာရေးဝန်ကြီး ဟန်းကော့က အစိုးရဟာ ကာကွယ်ဆေးရဖို့အတွက် အခြားနိုင်ငံတွေထက် ငွေကြေးပိုမိုသုံးစွဲကာ အစွမ်းကုန် လုပ်ဆောင်နေတယ်လို့ ပြောကြားခဲ့ပါတယ်။

    ဒါ့အပြင် ကာကွယ်ဆေးကို ကြာသာပတေးနေ့ကစတင်ပြီး လူသားတွေမှာ စမ်းသပ်တော့မယ်လို့လည်း သူက ဆိုပါတယ်။

    ယူကေက ထိပ်တန်း ကာကွယ်ဆေးထုတ်လုပ်တဲ့ အဖွဲ့အစည်း ၂ ခုဖြစ်တဲ့ လန်ဒန် Imperial ကောလိပ်နဲ့ အောက်စဖို့ဒ်တက္ကသိုလ်တို့ကို ကာကွယ်ဆေးစမ်းသပ်ဖို့အတွက် အစိုးရက ပေါင် ၄၂.၅ သန်း ထောက်ပံ့သွားမှာပါ။

    “ဒီတက္ကသိုလ် ၂ ခုစလုံးက စီမံကိန်းတွေဟာ မြန်မြန်ဆန်ဆန် တိုးတက်မှုတွေ ရရှိနေပြီး၊ ဒီအတွက် အင်အားကို အပြည့်အ၀ အသုံးချသွားမယ်လို့လည်း သိပ္ပံပညာရှင်တွေကို ကျွန်တော်တို့ ပြောထားပါတယ်။ ကာကွယ်ဆေးဖော်နိုင်တဲ့ ပထမဆုံးတိုင်းပြည်ဖြစ်လာဖို့ပါ” လို့ ဝန်ကြီးဟန်းကော့က ပြောကြားခဲ့ပါတယ်။

    ကိုရိုနာဗိုင်းရပ်စ် တိုက်ဖျက်ရေး ရှေ့တန်းကနေ လုပ်ဆောင်နေရတဲ့ ကျန်းမာရေးဝန်ထမ်းတွေမှာ ကာကွယ်ရေးဝတ်စုံ PPE မလုံလောက်မှုကိုလည်း အစိုးရက ဖြေရှင်းပေးနေတယ်လို့ သူက ထည့်သွင်းပြောဆိုခဲ့ပါတယ်။

    Ref: BBC