News @ M-Media

Category: က်န္းမာေရးႏွင့္ေဆးပညာ

  • 5G ကွန်ယက်နှင့် ကိုရိုနာဗိုင်းရပ်စ် ဆက်စပ်သည်ဆိုသည့် သတင်းမှား ဆိုရှယ်မီဒီယာတွင် ပြန့်နှံ့နေ

    5G ကွန်ယက်နှင့် ကိုရိုနာဗိုင်းရပ်စ် ဆက်စပ်သည်ဆိုသည့် သတင်းမှား ဆိုရှယ်မီဒီယာတွင် ပြန့်နှံ့နေ

    ဧပြီ ၆၊ ၂၀၂၀
    M-Media

    -ကိုရိုနာဗိုင်းရပ်စ် ပြန့်နှံ့မှုဟာ 5G ကွန်ယက်နဲ့ ဆက်နွယ်နေတယ်ဆိုတဲ့ ကောလဟာလတွေ ဆိုရှယ်မီဒီယာမှာ ပြန့်နှံ့ပြီးတဲ့နောက် ယူကေမှာ ဖုန်းတာဝါတိုင်တွေကို မီးရှို့ဖျက်ဆီးတာတွေ ဖြစ်လာခဲ့ပါတယ်။

    အခုတစ်ပတ်အစောပိုင်းက ဘာမင်ဂမ်၊ လီဗာပူးလ်နဲ့ မာဆေးဆိုက်က မီလင်းမြို့တွေမှာ ဖုန်းတာဝါတိုင်တွေ မီးရှို့ခံခဲ့ရပါတယ်။ တယ်လီဖုန်းကုမ္ပဏီ Vodafone က ပြီးခဲ့တဲ့ ၂၄ နာရီအတွင်း သူတို့ရဲ့ တာဝါတိုင်တွေ၊ O2 နဲ့ အတူ အသုံးပြုတဲ့ တာဝါတိုင်တွေကို ဖျက်ဆီးမှု အနည်းဆုံး ၄ ခု လောက် ဖြစ်ပွားခဲ့တယ်လို့ BBC သတင်းဌာနကို အတည်ပြု ပြောဆိုခဲ့ပါတယ်။

    ဒါ့အပြင် ကုမ္ပဏီက အင်ဂျင်နီယာအချို့ စော်ကားခံရပြီး ဒါတွေအားလုံးဟာ အွန်လိုင်းမှာ ပြန့်နှံ့နေတဲ့ သတင်းမှားကြောင့် ဖြစ်တယ်လို့ ဆိုပါတယ်။

    5G ကွန်ယက်ကနေတစ်ဆင့် ကိုရိုနာဗိုင်းရပ်စ် ပြန့်နှံ့တယ်၊ 5G ကွန်ယက်ဟာ လူ့ကိုယ်ခံအားကို အားနည်းစေပြီး ဗိုင်းရပ်စ် အလွယ်တကူ ကူးစက်စေနိုင်တယ်ဆိုတဲ့ ဝါဒဖြန့်မှုတွေဟာ ဇန်နဝါရီလ လောက်ကတည်းက ဆိုရှယ်မီဒီယာမှာ ပြန့်နှံ့နေတာဖြစ်ပြီး ပြီးခဲ့တဲ့တစ်ပတ်ကစလို့ မြေပြင်အထိ ရိုက်ခတ်မှု ရှိလာတာ ဖြစ်ပါတယ်။

    ဗြိတိန်သိပ္ပံပညာရှင်တွေက ဒီဝါဒဖြန့်မှုတွေကို ရှုတ်ချခဲ့ပြီး ဒါဟာ ဘယ်လိုမှ မဖြစ်နိုင်တဲ့ ရူးနှမ်းတဲ့ ပြောဆိုမှုသာ ဖြစ်တယ်လို့ ထုတ်ပြန်ထားပါတယ်။

    ယူကေ ဒစ်ဂျစ်တယ်၊ ယဉ်ကျေးမှု၊ မီဒီယာနဲ့ အားကစားဝန်ကြီးဌာန ဝန်ကြီး အိုလီဗာ ဒိုဒင်က ဒီဝါဒဖြန့်မှုတွေကို ဖယ်ရှားရေး ပိုမိုအားထုတ်လုပ်ဆောင်ဖို့အတွက် ဆိုရှယ်မီဒီယာကုမ္ပဏီတွေကို အမိန့်ပေးထားပြီး၊ ကုမ္ပဏီ တာဝန်ရှိသူတွေနဲ့ ဗီဒီယိုကတစ်ဆင့် အစည်းအဝေးလုပ်ဖို့လည်း ရှိနေပါတယ်။

    Ref: BBC

  • လူမှ တိရစ္ဆာန်သို့ ပထမဆုံး ကိုရိုနာဗိုင်းရပ်စ်ကူးစက်မှု အမေရိကန်တွင် တွေ့ရှိ

    လူမှ တိရစ္ဆာန်သို့ ပထမဆုံး ကိုရိုနာဗိုင်းရပ်စ်ကူးစက်မှု အမေရိကန်တွင် တွေ့ရှိ

    ဧပြီ ၆၊ ၂၀၂၀
    M-Media

    မာလာယန်ကျားတစ်ကောင်

    -အမေရိကန်ပြည်ထောင်စု နယူးယောက်မြို့ တိရစ္ဆာန်ရုံတစ်ရုံက အသက် ၄ နှစ်အရွယ် ကျားတစ်ကောင်မှာ ကိုရိုနာဗိုင်းရပ်စ် ကူးစက်နေကြောင်း တွေ့ခဲ့ရပြီး ဒါဟာ လူသားကနေ တိရစ္ဆာန်ကို ပထမဆုံး ကူးစက်မှု​ ဖြစ်နိုင်တယ်လိုံ တာဝန်ရှိသူတွေက ပြောကြားလိုက္ပါတယ္။

    Bronx Zoo က အဲဒီကျားဟာ နာဒီယာလို့ အမည်ရပြီး Malayan အမျိုးအစား ဖြစ်ပါတယ်။ နာဒီယာနဲ့အတူ အခြား ကျား ၃ ကောင်နဲ့ ​အာဖရိကခြင်္သေ့ ၃ ကောင္တို့မှာပါ COVID-19 ကူးစက်နေကြောင်း တွေ့ခဲ့ရပြီး အိုင်အိုဝါမြို့က ‘အမျိုးသား တိရစ္ဆာန် စောင့်ကြည့်ကာကွယ်ရေးဆိုင်ရာ ဓာတ်ခွဲခန်း’ က ကူးစက်မှုကို အတည်ပြုထားတယ်လို့ တိရစ္ဆန်ရုံက ထုတ်ပြန်ထားပါတယ်။

    ရောဂါလက္ခဏာမပြတဲ့ တိရစ္ဆာန်ရုံဝန်ထမ်းတစ်ဦးနဲ့ ထိတွေ့ပြီးနောက်ပိုင်း ​ကျား ၇ ကောင်စလုံးဟာ မတ်လနှောင်းပိုင်းကတည်းက ချောင်းခြောက်ဆိုးတာလို ရောဂါလက္ခဏာတွေ ပြသခဲ့တာပါ။

    “လူတစ်ယောက်က တိရစ္ဆာန်ကို ကူးစက်ပြီး နေမကောင်းဖြစ်လာတာဟာ ကျွန်တော်တို့ သိထားသလောက် ကမ္ဘာပေါ်မှာ ဒါက ပထမဆုံးပါ” လို့ Bronx Zoo က တိရစ္ဆာန်ဆရာဝန်ချုပ် ပေါလ်ကာလီက ပြောကြားခဲ့ပါတယ်။

    ဒီကိစ္စက တွေ့ရှိချက်တွေကို အခြား တိရစ္ဆာန်ရုံတွေ၊ COVID-19 ကူးစက်ပြန့်ပွားမှုနဲ့ပတ်သက်ပြီး လေ့လာနေတဲ့ အဖွဲ့အစည်းတွေထံ ပေးပို့သွားမယ်လို့လည်း သူက ထည့်သွင်းပြောဆိုခဲ့ပါတယ်။

    ဗိုင်းရပ်စ်ဟာ ကျားနဲ့ ခြင်္သေ့တွေမှာ ဘယ်လို ပြန့်ပွားမလဲဆိုတာ မသိရသေးဘဲ လက်ရှိမှာ ၇ ကောင်စလုံးကို သီးခြားခွဲထားကြောင်း၊ ပါးစပ်ပျက်တာကလွဲလို့ ၇ ကောင်စလုံးဟာ အားလုံးကောင်းမွန်နေပြီး မြန်မြန်ဆန်ဆန် ပြန်ကောင်းလာမယ်လို့ မျှော်လင့်ကြောင်း တိရစ္ဆာန်ရုံက ထုတ်ပြန်ထားပါတယ်။

    Ref: BBC

  • ကိုရိုနာဗိုင်းရပ်စ်ကူးစက်မှု မသက်သာသောကြောင့် ဗြိတိန်ဝန်ကြီးချုပ်ကို ဆေးရုံတင်

    ကိုရိုနာဗိုင်းရပ်စ်ကူးစက်မှု မသက်သာသောကြောင့် ဗြိတိန်ဝန်ကြီးချုပ်ကို ဆေးရုံတင်

    ဧပြီ ၆၊ ၂၀၂၀
    M-Media

    -CODID-19 ကူးစက်နေတဲ့ ဗြိတိန်ဝန်ကြီးချုပ် ဘောရစ်ဂျွန်ဆင်မှာ ၁၀ ရက်ကြာပြီးနောက်ပိုင်း ရောဂါလက္ခဏာတွေ ဆက်ရှိနေတဲ့အတွက် မနေ့မှာ ဆေးရုံတင်လိုက်ရတယ်လို့ သိရပါတယ်။

    ဝန်ကြီးချုပ်ရုံးက ထုတ်ပြန်ချက်မှာ ဒီလိုဆေးရုံတင်တာဟာ ကြိုတင်ကာကွယ်မှုအတွက် တင်တာဖြစ်ပြီး အရေးပေါ်တင်တာမျိုးမဟုတ်ဘူးလို့ ဖော်ပြထားပါတယ်။

    ဘောရစ်ဂျွန်ဆင်မှာ ဗိုင်းရပ်စ်ကူးစက်နေကြောင်း မတ်လ ၂၇ ရက်နေ့က သတင်းထုတ်ပြန်ခဲ့တာဖြစ်ပြီး ထင်ရှားတဲ့ နိုင်ငံ့ခေါင်းဆောင်တွေထဲမှာ ပထမဆုံးကူးစက်သူ ဖြစ်လာတာပါ။

    အဲဒီနောက် သီးသန့်ခွဲခြား နေထိုင်နေပေမယ့် ကိုရိုနာဗိုင်းရပ်စ်တိုက်ဖျက်ရေး နေ့စဉ်အစည်းအဝေးတွေကို ဥက္ကဌအဖြစ် ဗီယိုကနေတစ်ဆင့် တက်ရောက်ခဲ့ပြီး၊ ပြည်သူလူထုကို အားပေးနှစ်သိမ့်တဲ့ ဗီဒီယိုတွေကိုလည်း လွှင့်တင်ခဲ့ပါတယ်။

    သောကြာနေ့က လွှင့်တင်တဲ့ဗီဒီယိုမှာ သက်သာလာပြီဖြစ်ပေမယ့် အဖျားရှိနေသေးတယ်လို့ ဘောရစ်ဂျွန်ဆင်က ပြောကြားခဲ့ပါတယ်။ ဂျွန်ဆင်ဟာ အစိုးရကို ဆက်လက်တာဝန်ယူသွားမယ်လို့ ဝန်ကြီးချုပ်ရုံးရဲ့ ထုတ်ပြန်ချက်မှာ ထည့်သွင်းဖော်ပြထားပါတယ်။

    Ref: Aljazeera

  • အိန္ဒိယတွင် အမြွှာကလေးနှစ်ဦးကို ‘ကိုရိုနာ’ နှင့် ‘ကိုဗစ်’ ဟု အမည်ပေး

    အိန္ဒိယတွင် အမြွှာကလေးနှစ်ဦးကို ‘ကိုရိုနာ’ နှင့် ‘ကိုဗစ်’ ဟု အမည်ပေး

    ဧပြီ ၅၊ ၂၀၂၀
    M-Media

    အမြွှာကလေးနှင့်အတူ တွေ့ရသည့် ပရီတီး

    -အိန္ဒိယနိုင်ငံ အလယ်ပိုင်း ချက်တစ်ဂါပြည်နယ်က ဇနီးမောင်နှံဟာ မကြာသေးခင်က မွေးဖွားခဲ့တဲ့ အမြွှာရင်သွေးကို ‘Corona’ နဲ့ ‘Covid’ လို့ အမည်ပေးခဲ့ပြီး ဖြတ်သန်းခဲ့ရတဲ့ အခက်အခဲတွေကို အမှတ်ရေစချင်တဲ့အတွက် ဖြစ်တယ်လို့ ပြောကြားခဲ့ပါတယ်။

    အဲဒီဇနီးမောင်နှံဟာ ယောင်္ကျားလေးနဲ့ မိန့်ကလေးအမြွှာကို တစ်နိုင်ငံလုံး တံခါးပိတ်ပြီး ၂ ရက်အကြာ မတ်လ ၂၇ ရက်နေ့က ပြည်နယ်မြို့မှာတေ ရိုင်ပူးရ်မှာရှိတဲ့ အစိုးရဆေးရုံမှာ မွေးဖွားခဲ့တာပါ။

    “အခက်အခဲတော်တော်များများကို ကျော်ဖြတ်ပြီးမှ မွေးဖွားခဲ့ရတာပါ။ ဒါ့ကြောင့် မွေးတဲ့နေ့ကို အမှတ်တရဖြစ်စေချင်တဲ့ ဆန္ဒ ကျွန်မတို့ ဇနီးမောင်နှံမှာ ရှိပါတယ်” လို့ အသက် ၂၇ နှစ်အရွယ် ဇနီးဖြစ်သူ ပရီတီ ဗာရ်မာက ပြောကြားခဲ့ပါတယ်။

    ဒီလိုနာမည်ပေးတာဟာ တစ်နိုင်ငံလုံး တံခါးပိတ်ပြီး လှုပ်ရှားသွားလာမှု ကန့်သတ်ထားတာကြောင့် ဆေးရုံကို အချိန်မီ မသွားနိုင်တာ၊ မိသားစုဝင်တွေ လာရောက်မကူညီပေးနိုင်တာလို့ အခက်အခဲတွေကို အမှတ်ရစေချင်လို့ ဖြစ်တယ်လို့ ပရီတီက ဆိုပါတယ်။

    “ဒီလို အခက်အခဲတွေကို ကျော်ဖြတ်ပြီးတော့မှ မွေးဖွားခဲ့ရတာပါ။ ဒါ့ကြောင့် နာမည်ကို ထူးထူးခြားခြားနဲ့ အမှတ်တရ ဖြစ်စေချင်ပါတယ်”

    ဖခင်ဖြစ်သူ ဗီနေး ဗာရ်မာကလည်း “နာမည်ရဲ့ အဓိပ္ပါယ်လေးတွေက လှပါတယ်။ ကိုရိုနာက လက်တင်လို သရဖူကို ခေါ်တာပါ။ ပြီးတော့ ဒီနာမည်တွေကို လူတွေက ကြောက်နေတာကို အဆုံးသတ်ချင်တယ်။ တစ်ကိုရည်သန့်ရှင်းရေးကိုလည်း ဂရုစိုက်စေချင်ပါတယ်” လို့ ပြောကြားခဲ့ပါတယ်။

    အိန္ဒိယနိုင်ငံမှာ ဧပြီ ၄ ရက်နေ့ကအထိ ကူးစက်သူ ၃၀၀၀ နဲ့ သေဆုံးသူ ၆၈ ဦးရှိပြီး တိုင်းပြည်ကို ဧပြီလ ၁၄ ရက်နေ့အထိ ၃ ပတ်ကြာ တံခါးပိတ်ထားပါတယ်။

    Ref: Aljazeera

  • COVID-19 နောက်ဆက်တွဲအဖြစ် အာရှသားများအား ဆန့်ကျင်ရေး လှုပ်ရှားမှု ပေါ်ပေါက်လာ

    COVID-19 နောက်ဆက်တွဲအဖြစ် အာရှသားများအား ဆန့်ကျင်ရေး လှုပ်ရှားမှု ပေါ်ပေါက်လာ

    ဧပြီ ၅၊ ၂၀၂၀
    M-Media

    -တစ်ကမ္ဘာလုံးမှာ လူပေါင်း ၁ သန်းကျော် ပြန့်နှံ့ကူးစက်နေပြီဖြစ်တဲ့ COVID-19 စတင်တဲ့ ၂၀၁၉ ခုနှစ် ဒီဇင်ဘာလကစလို့ အနောက်နိုင်ငံတွေမှာ အာရှသားတွေအပေါ် ခွဲခြားဆန့်ကျင်တဲ့လှုပ်ရှားမှုတွေ သိသိသာသာ များပြားလာတယ်လို့ အလ်-ဂျာဇီးရားသတင်းဌာနရဲ့ သတင်းဆောင်းပါးတစ်ပုဒ်မှာ ဖော်ပြထားပါတယ်။

    အမေရိကန်နဲ့ ဩစတေးလျလို နိုင်ငံမျိုးက လမ်းမတွေပေါ်မှာ အာရှသားတွေအပေါ် စော်ကားပြောဆိုတာတွေ ပိုမိုမြင့်တက်လာပြီး တစ်ချို့နေရာတွေမှာ တိုက်ခိုက်တာတွေအထိ ရှိတယ်လို့ ဆိုပါတယ်။ အမေရိကန်အခြေစိုက် အမုန်းစကားစောင့်ကြည့်ရေးအဖွဲ့ Stop AAPI Hate က သူတို့ စတင်စောင့်ကြည့်ခဲ့တဲ့ မတ်လနှောင်းပိုင်းကစလို့ နိုင်ငံအတွင်း အာရှသားတွေအပေါ် အရှက်ရအောင်လုပ်ဆောင်မှု ၁၁၀၀ ကျော် မှတ်တမ်းတင်နိုင်ခဲ့တယ်လို့ ထုတ်ပြန်ခဲ့ပါတယ်။

    ဆိုရှယ်မီဒီယာမှာ ပိုသိသာ

    အာရှသားတွေအပေါ် ခွဲခြားမှု၊ စော်ကားပြောဆိုမှုဟာ ဆိုရှယ်မီဒီယာတွေမှာ ပိုမို သိသိသာသာ မြင်ရကြောင်း အလ်-ဂျာဇီးရားသတင်းဌာနရဲ့ ဆောင်းပါးမှာ ဖော်ပြထားပါတယ်။

    အလ်-ဂျာဇီးရားသတင်းဌာနက ပြုလုပ်တဲ့ ဆိုရှယ်မီဒီယာ လေ့လာဆန်းစစ်မှုတစ်ခုမှာ COVID-19 ဗိုင်းရပ်စ်ကို တရုတ်ကွန်ဖူးနဲ့ ချိတ်ဆက်အမည်ပေးထားတဲ့ “kung-flu” စကားလုံးကို မတ်လတစ်လတည်းမှာပဲ Twitter စာမျက်နှာက ပို့စ်ပေါင်း တစ်သောင်းကျော်မှာတွေ့ခဲ့ရပြီး ဒီလိုစကားလုံးကွဲတွေကို သုံးစွဲမှု ရှိတာကြောင့် ပြန့်နှံ့မှုအရေအတွက်ဟာ ဒီထက်ပိုများမယ်လို့လည်း သုံးသပ်ထားပါတယ်။

    “chop fluey” နဲ့ “rice rabies” လို စော်ကားပြောဆိုတဲ့ စကားလုံးတွေကိုလည်း အွန်လိုင်းစာမျက်နှာတွေမှာ ကျယ်ကျယ်ပြန့်ပြန့် တွေ့ရကြောင်း၊ တရုတ်အခြေစိုက် TikTok #chinese_coronavirus အမည်နဲ့ ပို့စ်တွေကို ကြည့်ရှုသူ သန်း ၁၁၀ ကျော်ရှိကြောင်း အလ်-ဂျာဇီးရားရဲ့ စစ်တမ်းမှာ တွေ့ခဲ့ရပါတယ်။ ကိုရိုနာဗိုင်းရပ်စ်နဲ့ တရုတ်လူမျိုးကို ဆက်စပ်ပြီး စော်ကားပြောဆိုတဲ့ ဗီဒီယိုတွေလည်း TikTok မှာ ပြန့်နှံ့နေပါတယ်။

    Facebook ကုမ္ပဏီရဲ့ ပြောရေးဆိုခွင့်ရှိသူတစ်ဦးက Facebook နဲ့ Instagram လို သူတို့ရဲ့ ပလက်ဖောင်းပေါ်မှာ လူမျိုးရေးခွဲခြားတာ၊ စော်ကားပြောဆိုတာတွေ လုံး၀ သည်းခံမှာမဟုတ်ဘဲ သိတာနဲ့ ဖျက်ချသွားမယ်လို့ အလ်-ဂျာဇီးရားသတင်းဌာနကို ဖြေကြားခဲ့ပါတယ်။ သူတို့ရဲ့ စည်းကမ်းတွေကို မလိုက်နာဘဲ အကြိမ်ကြိမ်ချိုးဖောက်သူတွေရဲ့ အကောင့်တွေကို ပိတ်သွားမှာဖြစ်ကြောင်း သူက ပြောဆိုခဲ့သလို သုံးစွဲသူတွေအနေနဲ့ ဒါတွေကိုတွေ့ရင် report လုပ်ရကြဖို့လည်း တိုက်တွန်းခဲ့ပါတယ်။

    Twitter ကလည်း မိမိတို့ရဲ့ စည်းမျဉ်းစည်းကမ်းတွေ မလိုက်နာတဲ့ ပို့စ်တွေကို ရှာဖွေဖယ်ရှားနေပြီး တစ်ဝက်လောက်ကို အသုံးပြုသူတွေက report မလုပ်ခင် အချိန်မီ ဖယ်ရှားနိုင်ခဲ့တယ်လို့ အလ်-ဂျာဇီးရားသတင်းဌာနကို ဖြေကြားခဲ့ပါတယ်။

    ကိုရိုနာဗိုင်းရပ်စ် ကပ်ရောဂါ စတင်ပေါ်ပေါက်လာပြီးကတည်းက အာရှသားတွေအပေါ် လူမျိုးရေးခွဲခြားတဲ့ ပို့စ်တွေ ဘယ်လောက်များများ ဖျက်ချပြီးပြီလဲဆိုတာကိုတော့ Facebook ရော Twitter ကပါ ဖြေကြားခဲ့ခြင်းမရှိဘူးလို့ အလ်-ဂျာဇီးရားသတင်းဌာနက သူတို့ရဲ့ ဆောင်းပါးမှာ ဖော်ပြထားပါတယ်။

    နိုင်ငံရေးသမားတွေနဲ့ တက်ကြွလှုပ်ရှားသူတွေက ဆိုရှယ်မီဒီယာတွေဟာ အွန်လိုင်းက လူမျိုးရေးခွဲခြားမှုကို တိုက်ဖျက်ရေး အခုထပ်ပိုပြီး လုပ်ဆောင်ရမယ်လို့ အလ်-ဂျာဇီးရားသတင်းဌာနကို ပြောကြားခဲ့ပါတယ်။

    Ref: Aljazeera