Category: က်န္းမာေရးႏွင့္ေဆးပညာ

နိုဝင်ဘာ ၇၊ ၂၀၂၁
M-Media

-ကိုဗစ်ကူးစက်သူတွေကို ကုသရာမှာ အသုံးပြုနိုင်မယ့် သောက်ဆေး Molnupiravir ကို အခုလကုန်ပိုင်းမှာ အများပြည်သူထံ ဖြန့်ဖြူးသွားမယ်လို့ ယူကေ ကျန်းမာရေးဝန်ကြီးဌာန အကြီးအကဲ ဆူဆန် ဟော့ပ်ကင်းက ဒီကနေ့မှာ ပြောကြားလိုက်ပါတယ်။

ယူကေဟာ Molnupiravir ဆေးကို ပြီးခဲ့တစ်ပတ်က အသိအမှတ်ပြုလိုင်စင် ထုတ်ပေးခဲ့ပြီး ကိုဗစ်ကု သောက်ဆေးကို ပထမဆုံး အသုံးပြုခွင့်ပေးတဲ့ နိုင်ငံလည်း ဖြစ်ပါတယ်။ ကိုဗစ်တိုက်ဖျက်ရေး အဓိကကျလာမယ့် ဒီဆေးကို အမေရိကန် ဆေးဝါးကုမ္ပဏီတွေဖြစ်တဲ့ Merck & Co Inc နဲ့ Ridgeback Biotherapeutics တို့ ပူးပေါင်း ထုတ်လုပ်တာပါ။

ယူကေက ကိုဗစ်ကု Molnupiravir သောက်ဆေး အခွက်ရေ ၄၈၀၀၀၀ စာ၊ Pfizer က ထုတ်တဲ့ ကိုဗစ်ကုသောက်ဆေး အခွက်ရေ ၂၅၀၀၀၀ စာ ဝယ်ယူထားတယ်လို့ ပြီးခဲ့တဲ့လမှာ ထုတ်ပြန်ခဲ့ပါတယ်။

ယူကေ ကျန်းမာရေးဝန်ကြီးဌာန အကြီးအကဲ ဟော့ပ်ကင်းက Molnupiravir ဆေးကို ခွင့်ပြုချက် ပေးလိုက်နိုင်တာဟာ သတင်းကောင်းတစ်ခုဖြစ်ပြီး စမ်းသပ်မှုအဆင့်တစ်ခုအနေနဲ့ နိုဝင်ဘာ လကုန်ပိုင်း ဒါမှမဟုတ် ဒီဇင်ဘာလဆန်းပိုင်းလောက်မှာ အများပြည်သူထံ ဖြန့်ချီသွားမယ်လို့ ပြောကြားခဲ့ပါတယ်။

Molnupiravir ပတ်သက်တဲ့ လက်ရှိ စမ်းသပ်မှု​တွေဟာ ကာကွယ်ဆေးမထိုးရသေးသူတွေမှာသာ လုပ်ဆောင်ထားတာဖြစ်ပြီး ကိုဗစ်ကာကွယ်ဆေးထိုးထားပြီးသူတွေမှာ ဘယ်လောက်အထိ အလုပ်ဖြစ်နိုင်မလဲဆိုတာ အခုစမ်းသပ်ဖြန့်ချီမှုကနေ သိရှိနိုင်မယ်လို့ သူမက ထည့်သွင်းပြောဆိုခဲ့ပါတယ်။

ကို​ဗစ်ရှိနေသူ ဒါမှမဟုတ် ရောဂါလက္ခဏာပြနေသူတွေဟာ Molnupiravir ဆေးကို သောက်သုံးမယ်ဆိုရင် သေဆုံးမှု၊ ရောဂါအပြင်းအထန်ခံစားရမှုကို ၅၀ ရာခိုင်နှုန်းအထိ လျှော့ချနိုင်တယ်ဆိုတာ စမ်းသပ်မှုအချက်အလက်တွေအရ သိရပါတယ်။ ဒီဆေးကို တစ်ရက် ၂ ကြိမ်နှုန်းနဲ့ ၅ ကြိမ် သောက်ရမှာ ဖြစ်ပါတယ်။

ကိုဗစ်တိုက်ဖျက်ရေးအတွက် လက်ရှိမှာ ကာကွယ်ဆေးကိုသာ အဓိက အားထားနေရတာဖြစ်ပြီး ကိုဗစ်ကု Molnupiravir သောက်ဆေးက အခြေအနေကို တစ်မျိုးတစ်ဖုံ ပြောင်းလဲသွားစေလိမ့်မယ်လို့ ပညာရှင်တွေက မျှော်လင့်ထားကြပါတယ်။

Ref: Reuters

စက်တင်ဘာ ၄၊ ၂၀၂၁
M-Media

-ကိုဗစ်ကာကွယ်ဆေး နှစ်ကြိမ်ထိုးထားသူတွေဟာ ကူးစက်မှုအန္တရာယ်၊ ပြင်းထန်တဲ့ ရောဂါလက္ခဏာတွေကို လျှော့ချနိုင်ရုံသာမက၊ ကူးစက်ခဲ့ရင်လည်း နာတာရှည်ခံစားရတာမျိုး မဖြစ်နိုင်တော့တာကို ဗြိတိန်ကောလိပ် King’s College London ရဲ့ လေ့လာမှုမှာ တွေ့ခဲ့ရပါတယ်။

ကာကွယ်ဆေးနှစ်ကြိမ် ထိုးထားသူတွေမှာ ကိုဗစ်ဝေဒနာကို ၄ ပတ်ကျော်အထိ ခံစားရတဲ့ အန္တရာယ်မျိုး ၅၀ ရာခိုင်နှုန်းလောက် လျော့ကျသွားမှာ ဖြစ်ပါတယ်။ ကိုဗစ်ကူးစက်သူတွေဟာ ပုံမှန်အားဖြင့် ၄ ပတ်အတွင်းမှာ သက်သာလေ့ရှိပေမယ့် တစ်ချို့တွေကတော့ ၄ ပတ်ကျော်တဲ့အထိ ရောဂါလက္ခဏာတွေ ပြသလေ့ ရှိပါတယ်။

ကူးစက်မှုကာလကြာရှည်တာကြောင့် အသက်အန္တရာယ်နဲ့ နောက်ဆက်တွဲ ကျန်းမာရေးပြဿနာတွေ ဖြစ်ပေါ်လာနိုင်ပါတယ်။

King’s College London က အခုလေ့လာမှုဟာ ကိုဗစ်ရောဂါကို ခြေရာခံစောင့်ကြည့်တဲ့ ယူကေ အက်ပလီကေးရှင်း Zoe Covid Study က အချက်အလက်တွေကို အခြေခံပြီး ပြုလုပ်ခဲ့တာပါ။

ကာကွယ်ဆေးနှစ်ကြိမ် ထိုးထားသူတွေမှာ ကိုဗစ်ကူးစက်မှု ၀.၂ ရာခိုင်နှုန်း၊ နာတာရှည်ကိုဗစ်ရောဂါ ခံစားရသူ ၅ ရာခိုင်နှုန်းသာ ရှိတယ်လို့ လေ့လာမှုက ဆိုပါတယ်။

ကာကွယ်ဆေးထိုးထားပေမယ့်လည်း ကိုယ်ခံအားနည်းသူတွေ၊ သက်ကြီးရွယ်အိုတွေ၊ ရောဂါဘယထူပြောပြီး ကျန်းမာရေးစောင့်ရှောက်မှု လက်လှမ်းမမီတဲ့နေရာတွေမှာ နေထိုင်သူတွေဟာ ကိုဗစ်ကူးစက်ဖို့ အန္တရာယ်ပိုမြင့်တာကိုလည်း အခုလေ့လာမှုမှာ တွေ့ခဲ့ရပါတယ်။

လေ့လာမှုကို ဦးဆောင်သူ ဒေါက်တာ ကလယ်ရာ စတိဗ်က ကူးစက်မှုအန္တရာယ် ပိုမြင့်တဲ့သူတွေကို တတိယအကြိမ်ကာကွယ်ဆေး Booster ဦးစားပေးထိုးဖို့ လိုအပ်တယ်လို့ ပြောကြားခဲ့ပါတယ်။

“ကာကွယ်ဆေးနှစ်ကြိမ် ထိုးထားရင် ကိုဗစ်ကူးစက်နိုင်မှု၊ နာတာရှည်ရောဂါခံစားရမှုတွေကို သိသိသာသာ လျှော့ချနိုင်တယ်ဆိုတဲ့ ဒီတွေ့ရှိချက်ဟာ နာတာရှည် ကိုဗစ်ဝေဒနာ ခံစားရတာမျိုး ဖြစ်နေတဲ့ အခုလိုအချိန်မျိုးမှာ ကျွန်မတို့အတွက် သတင်းကောင်းပါပဲ”

Ref: BBC