News @ M-Media

Category: က်န္းမာေရးႏွင့္ေဆးပညာ

  • ကလေးများတွင် ကိုဗစ်ကြောင့် အလွန်အမင်း ဖျားနာသေဆုံးနိုင်ခြေ နည်းပါး

    ကလေးများတွင် ကိုဗစ်ကြောင့် အလွန်အမင်း ဖျားနာသေဆုံးနိုင်ခြေ နည်းပါး

    ဇူလိုင် ၁၀၊ ၂၀၂၁
    M-Media

    -ကလေးငယ်တွေမှာ ကိုဗစ်ကြောင့် ဆိုးဆိုးရွားရွား နေမကောင်းဖြစ်၊ သေဆုံးနိုင်တဲ့ပမာဏဟာ အလွန်အမင်းနည်းပါးတယ်လို့ ယူကေကပြုလုပ်တဲ့ သုတေသနတစ်ခုမှာ တွေ့ခဲ့ရပါယတ်။

    လန်ဒန်ကောလိပ်၊ ယော့ခ်တက္ကသိုလ်၊ ဘရစ္စတိုတက္ကသိုလ်၊ လီဗာပူးလ်တက္ကသိုလ်က သိပ္ပံပညာရှင်တွေ ပူးပေါင်းပြီး ဒီလေ့လာမှုကို လုပ်ခဲ့တာပါ။ ကိုဗစ်နဲ့ပတ်သက်ပြီး ကလေးငယ်တွေကို အဓိကထားလေ့လာမှုမှာ သူတို့ရဲ့ သုတေသနဟာ အခုအချိန်အထိ ကမ္ဘာပေါ်မှာ အပြည့်စုံဆုံးဖြစ်ပါတယ်။

    အင်္ဂလန်မှာ ကိုဗစ်ပြန့်နှံ့ပြီး ပထမ ၁၂ လ အချက်အလက်တွေအရ အသက် ၁၈ နှစ်အောက် သေဆုံးသူအရေအတွက်ဟာ ၂၅ ဦးသာ ရှိခဲ့ပါတယ်။ အများစုက နာတာရှည်ရောဂါ ရှိသူတွေ၊ အာရုံ​ကြောချို့တဲ့သူတွေဖြစ်ပြီး စုစုပေါင်း သေဆုံးမှုအန္တရာယ်က တော်တော်လေးကို နည်းတယ်လို့ ဆိုပါတယ်။

    ကိုဗစ်ကူးတဲ့ ကလေးငယ် တစ်သန်းမှာ သေဆုံးသူ ပျမ်းမျှ ၂ ဦးသာ ရှိမှာ ဖြစ်ပါတယ်။

    လက်ရှိ ကမ္ဘာ့နိုင်ငံတွေမှာ ၁၈ နှစ်အောက် ကလေးတွေကို ကိုဗစ်ကာကွယ်ဆေး ပုံမှန် မထိုးပေးသေးဘဲ ကျန်းမာရေးချို့တဲ့သူတစ်ချို့ကိုသာ ရွေးထိုးပေးနေပါတယ်။

    Ref: BBC

  • ကိုဗစ်ကာကွယ်ဆေးနှစ်မျိုး ပေါင်းထိုးခြင်းက ကိုယ်ခံစွမ်းအားကို ပိုကောင်းစေနိုင်

    ကိုဗစ်ကာကွယ်ဆေးနှစ်မျိုး ပေါင်းထိုးခြင်းက ကိုယ်ခံစွမ်းအားကို ပိုကောင်းစေနိုင်

    ဇူလိုင် ၅၊ ၂၀၂၁
    M-Media

    -ထွက်ရှိပြီးသား ကိုဗစ်ကာကွယ်ဆေးတွေကို တစ်ကြိမ်စီ ပေါင်းစပ်ထိုးနှံတာဟာ ကိုခံစွမ်းအားကို ပိုမိုကောင်းမွန်စေတယ်လို့ ယူကေက လေ့လာမှုတစ်ခုမှာ တွေ့ခဲ့ရပါတယ်။

    Com-Cov လို့ အမည်ပေးထားတဲ့ အဲ့ဒီလေ့လာမှုဟာ Pfizer နဲ့ AstraZeneca တို့ နှစ်ကြိမ်စီထိုးတာ၊ တစ်ကြိမ်ကို တစ်မျိုးစီထိုးတာတွေရဲ့ သက်ရောက်မှုကို စမ်းသပ်ခဲ့တာပါ။

    ပေါင်းစပ်ထိုးနှံမှုအားလုံးဟာ ကိုယ်ခံစွမ်းအား ကောင်းမွန်တာတွေ့ရပြီး၊ ကိုဗစ်ကာကွယ်ဆေး ထိုးနှံမှုကိုလည်း ပိုမိုလွယ်ကူ အဆင်ပြေစေလိမ့်မယ်လို့ ပညာရှင်တွေက သုံးသပ်ပါတယ်။

    AstraZeneca နှစ်ကြိမ်ထိုးထား​ပြီးတဲ့သူတွေဟာ တစ်ခြားကိုဗစ်ကာကွယ်ဆေး ထပ်ထိုးမယ်ဆိုရင် ကိုဗစ်ကာကွယ်နိုင်တဲ့ ကိုယ်ခံစွမ်းအား ပိုမိုကောင်းမွန်နိုင်လိမ့်မယ်ဆိုတဲ့ သဲလွန်စတစ်ခုကိုလည်း ဒီလေ့လာမှုမှာ တွေ့ခဲ့ရပါတယ်။

    ယူကေ ကျန်းမာရေးဌာန တာဝန်ရှိသူ ပရော်ဖက်ဆာ ဂျိုနသန် ဗန် တမ်က လက်ရှိ ယူ​ကေမှာ ကာကွယ်ဆေးတစ်မျိုးတည်း နှစ်ကြိမ် ထိုးပေးနေမှုကို ပြောင်းလဲမှာ မဟုတ်ပေမယ့် အနာဂတ်မှာတော့ ပေါင်းစပ်ထိုးပေးတာမျိုး လုပ်သွားနိုင်တယ်လို့ ပြောကြားခဲ့ပါတယ်။

    တစ်ချို့နိုင်ငံတွေမှာ ကိုဗစ်ကာကွယ်ဆေးနှစ်မျိုး ပေါင်းစပ်ထိုးပေးတာမျိုးကို လုပ်ဆောင်နေပါတယ်။ စပိန်နဲ့ ဂျာမနီတို့မှာဆိုရင် ပထမတစ်ကြိမ် AstraZeneca ထိုးပေးထားတဲ့ သူတွေကို ဒုတိယတစ်ကြိမ်မှာ Pfizer ဒါမှမဟုတ် Moderna mRNA ထိုးပေးတာမျိုး လုပ်ဆောင်နေပါတယ်။

    ကိုဗစ်ဝင်ရောက်မှုကို တားဆီးနိုင်မယ့် ကိုယ်ခံစွမ်းအား အပြည့်အ၀ရဖို့အတွက် ကာကွယ်ဆေး နှစ်ကြိမ်ထိုးရတာ ဖြစ်ပါတယ်။

    Ref : BBC

  • အင်ဒိုနီးရှားကို အမေရိကန်က ကိုဗစ်ကာကွယ်ဆေး ၄ သန်း လှူမည်

    အင်ဒိုနီးရှားကို အမေရိကန်က ကိုဗစ်ကာကွယ်ဆေး ၄ သန်း လှူမည်

    ဇူလိုင် ၃၊ ၂၀၂၁
    M-Media

    -ကိုဗစ်ကပ်ရောဂါကို တစ်ကျော့ပြန် ရင်ဆိုင်လာရတဲ့ အင်ဒိုနီးရှားကို အမေရိကန်က Moderna ကာကွယ်ဆေး ၄ သန်း ချက်ခြင်းပေးပို့သွားမယ်လို့ သိရပါတယ်။

    အမေရိကန် နိုင်ငံတော်လုံခြုံရေးအကြံပေး ဂျိတ်ဆူလီဗန်နဲ့ အင်ဒိုနီးရှားနိုင်ငံခြားရေးဝန်ကြီး ရတ္တနို မာဆူဒီတို့ ဖုန်းနဲ့ ဆွေးနွေးမှုအတွင်း အမေရိကန်က ဒီလို သတင်းစကား ပါးခဲ့တာ ဖြစ်ပါတယ်။

    ကမ္ဘာ့ ကိုဗစ်ကာကွယ်ဆေး အစီအစဉ်တစ်ခုဖြစ်တဲ့ COVAX ကနေတစ်ဆင့် ချက်ခြင်း ပေးပို့မယ်လို့ အိမ်ဖြူတော်က ထုတ်ပြန်တဲ့ ကြေငြာချက်မှာ ဖော်ပြထားပါတယ်။

    ကမ္ဘာ့ စတုတ္ထမြောက် လူဦးရေးအများဆုံးဖြစ်တဲ့ အင်ဒိုနီးရှားနိုင်ငံဟာ အာရှမှာ ကိုဗစ်ဒဏ်ကို အဆိုးရွားဆုံးခံရတဲ့ တိုင်းပြည်တစ်ခုဖြစ်ပါတယ်။ လက်ရှိမှာလည်း ကိုဗစ်လှိုင်းကို တစ်ကျော့ပြန် ခံစားနေရပြီး ပြီးခဲ့တဲ့ ၁၂ ရက်အတွင်း ၈ ရက်မှာ ကူးစက်မှု စံချိန်တင်ခဲ့ပါတယ်။

    အခုလို ကာကွယ်ဆေး လှူဒါန်းတာဟာ ကိုဗစ်ကပ်ရောဂါကို တွန်းလှန်နေတဲ့ အင်ဒိုနီးရှားပြည်သူတွေအပေါ် အမေရိကန်က ကူညီထောက်ပံ့မှုကို မီးမောင်းထိုးပြလိုက်တာ ဖြစ်တယ်လို့ ဆူလီဗန်က ပြောကြားခဲ့ပါတယ်။

    ကိုဗစ်နဲ့ပတ်သက်ပြီး အင်ဒိုနီးရှားကို ပိုမိုကူညီပံ့ပိုးပေးနိုင်ရေး အစီအစဉ်တွေကိုလည်း ဆူလီဗန်နဲ့ မာဆူဒီတို့ ဆွေးနွေးခဲ့ကြပါတယ်။

    အင်ဒိုနီးရှားဟာ တရုတ်ထုတ် ကိုဗစ်ကာကွယ်ဆေး Sinovac ကို အဓိက မှီခိုနေရပေမယ့် အခြားကာကွယ်ဆေးတွေ ရရှိအောင်လည်း ကြိုးပမ်းနေပါတယ်။

    Ref: Reuters

  • အင်ဒိုနီးရှားတွင် တရုတ်ထုတ် ကိုဗစ်ကာကွယ်ဆေးထိုးထားသည့် ဆရာဝန် ၂၀ သေဆုံး

    အင်ဒိုနီးရှားတွင် တရုတ်ထုတ် ကိုဗစ်ကာကွယ်ဆေးထိုးထားသည့် ဆရာဝန် ၂၀ သေဆုံး

    ဇွန် ၂၈၊ ၂၀၂၁
    M-Media

    -တရုတ်ထုတ် ကိုဗစ်ကာကွယ်ဆေး SinoVac ထိုးထားပြီးသူ ဆရာဝန် ၂၀ လောက် ကိုဗစ်ရောဂါနဲ့ သေဆုံးခဲ့တယ်လို့ အင်ဒိုနီးရှား ကျန်းမာရေးဌာနက ထုတ်ပြန်ပါတယ်။

    ကိုဗစ်ကပ်ရောဂါ စတင်ဖြစ်ပွားကတည်းက အင်ဒိုနီးရှားမှာ ဆရာဝန် ၄၀၁ ဦး ကိုဗစ်နဲ့ သေဆုံးခဲ့ပါတယ်။ အဲဒီအထဲက အယောက် ၂၀ ဟာ SinoVac ကာကွယ်ဆေး ၂ ကြိမ်အပြည့် ထိုးထားသူတွေဖြစ်ပြီး ၁၀ ဦးက ဇွန်လအတွင်း သေဆုံးခဲ့တာ ဖြစ်ပါတယ်။

    SinoVac ကိုဗစ်ကာကွယ်ဆေးကို ကမ္ဘာ့နိုင်ငံ တော်တော်များများမှာ အသုံးပြုနေပြီး အခုအဖြစ်အပျက်က ဒီဆေးရဲ့ အန္တရာယ်ကင်းမှုအပေါ် မေးခွန်းတွေ ပေါ်ပေါက်လာစေပါတယ်။

    အင်ဒိုနီးရှား ကျန်းမာရေးဌာနက နိုင်ငံအတွင်းရှိနေတဲ့ ဆရာဝန်တွေရဲ့ ၉၀ ရာခိုင်နှုန်းကို SinoVac ကာကွယ်ဆေး ထိုးပေးထားပြီး အခုသေဆုံးမှုအတွက် စုံစမ်းစစ်ဆေးမှုတွေ လုပ်ဆောင်နေတယ်လို့ ထုတ်ပြန်ခဲ့ပါတယ်။

    SinoVac ကာကွယ်ဆေးဟာ ဆေးရုံတက်ရလောက်အောင် ပြင်းထန်တဲ့ ကိုဗစ်လက္ခဏာ ခံစားရမှု၊ ကိုဗစ်ကြောင့် သေဆုံးမှုတွေကို ထိထိရောက်ရောက် ကာကွယ်​ပေးနိုင်တယ်လို့ ဒီဆေးကိုအသုံးပြုနေတဲ့ ဘရာဇီးလ်နဲ့ ချီလီတို့က ထုတ်ပြန်ခဲ့ပါတယ်။

    Ref: AFP

  • အိန္ဒိယတွင် ကိုဗစ်ဗားရှင်းအသစ်တစ်ခု ထပ်ပေါ်လာ

    အိန္ဒိယတွင် ကိုဗစ်ဗားရှင်းအသစ်တစ်ခု ထပ်ပေါ်လာ

    ဇွန် ၂၃၊ ၂၀၂၁
    M-Media

    -ပြည်နယ် ၃ ခုမှာ တွေ့လာရတဲ့ ပုံပြောင်း ကိုဗစ်ဗိုင်းရပ်စ်အသစ် Delta plus ဟာ စိုးရိမ်စရာဖြစ်ပြီး သတိထားစောင့်ကြည့်ဖို့ လိုအပ်တယ်လို့ အိန္ဒိယနိုင်ငံက ထုတ်ပြန်ပါတယ်။

    အိန္ဒိယမှာ လက်ရှိ ဒီပုံပြောင်းကိုဗစ် ကူးစက်ထားသူ အနည်းဆုံး ၂ ဒါဇင်လောက် ရှိနေတာ ဖြစ်ပါတယ်။​

    ပြည်ထောင်စုအစိုးရ ကျန်းမာရေးဝန်ကြီး ရာဂျစ် ဘူရှန်က Delta plus ဟာ ကူးစက်မှုနှုန်း ပိုမြင့်ပြီး စစ်ဆေးမှုတွေ တိုးမြှင့်လုပ်ဆောင်ဖို့ ပြည်နယ်တွေကို အကြံပြုခဲ့ပါတယ်။

    ပုံပြောင်းကိုဗစ်ကြောင့် အိန္ဒိယဟာ ဧပြီလနဲ့ မေလမှာ ဒုတိယလှိုင်းကို အကြီးအကျယ်ခံစားခဲ့ရပြီး လူ သိန်းချီသေဆုံးကာ ကျန်းမာရေးစောင့်ရှောက်မှုစနစ်လည်း ပြိုလဲလုနီးနီး ဖြစ်ခဲ့ပါတယ်။

    လက်ရှိမှာ နိုင်ငံတစ်ဝှမ်း ကာကွယ်ဆေးထိုးမှု အရှိန်မြှင့်ဆောင်ရွက်နေပြီး တနင်္လာနေ့က တစ်ရက်အတွင်း စုစုပေါင်း လူ ဦးရေ ၈.၆ သန်းကို ကာကွယ်ဆေးထိုးပေးနိုင်ခဲ့ပါတယ်။

    အိန္ဒိယမှာ ကိုဗစ်ကူးစက်သူ စုစုပေါင်း ၃၀.၀၃ သန်းရှိပြီး သေဆုံးသူကတော့ ၄ သိန်းနီးပါး ရှိလာပြီဖြစ်ပါတယ်။

    Ref: Reuters