Category: ကမ္ဘာကျော် မွတ်စလင်များ

ဇန်န၀ါရီ ၂၇၊ ၂၀၁၇
M-Media

– လူ့အသက်တွေကို ကယ်တင်ဖို့ ရာစုနှစ်များစွာ နှစ်မြှုပ်လုပ်ကိုင်လာကြတဲ့ သူတွေကြောင့် ဒီနေ့ခေတ် ခွဲစိပ်ကုသမှုကဏ္ဍဟာ အဆန်းပြားဆုံးနဲ့ အထွပ်အထိပ်ကို ရောက်နေပါပြီ။ လူသားတွေကို ကယ်တင်ရမယ်ဆိုတဲ့ ဒီကျင့်ဝတ်ဟာ လွန်ခဲ့တဲ့နှစ်တစ်ထောင်အရင်က မွတ်စလင်အုပ်စိုးတဲ့ စပိန်နိုင်ငံ တောင်ပိုင်းမှာ ရှင်သန်ခဲ့ပြီး မွတ်စလင်တွေဟာ သွေးကြောခွဲစိပ်မှု၊ အထွေထွေခွဲစိပ်မှုနဲ့ အရိုးခွဲစိပ်ကုသမှု ဆိုတဲ့ ခွဲစိပ်ကုသမှု နည်းလမ်း ၃ ခုကို တိုးတက်စေခဲ့ပါတယ်။

အစ္စလာမ့်အင်ပါယာ အထွပ်အထိပ်ရောက်နေတဲ့ အဲဒီအချိန် ကော်ဒိုဘာမှာရှိခဲ့တဲ့ မွတ်စလင် ခွဲစိပ်ဆရာဝန်တွေထဲက အကျော်ကြားဆုံး ခွဲစိပ်ဆရာဝန်တစ်ဦးကတော့ အဘူလ်ကာစစ် (Abulcasis) လို့ အမည်တွင်တဲ့ အလ်-ဇဟ်ရာဝီ (Al-Zahrawi) ဖြစ်ပါတယ်။ အလ်-ဇဟ်ရာဝီဟာ ကျွမ်းကျင်မှု၊ ထိုးထွင်းဉာဏ်တို့နဲ့အတူ လူနာတစ်ယောက်ချင်းစီတိုင်းနဲ့ ပတ်သက်ပြီး စဉ်းစားတွေးခေါ်၊ ရှာဖွစူးစမ်းကာ ကုသမှုပေးခဲ့ပါတယ်။ ဒါ့ကြောင့်ပဲ သူ့ခေတ်သူ့အခါမှာ အောင်မြင်ကျော်ကြားတဲ့ ခွဲစိပ်ဆရာဝန်တစ်ဦး ဖြစ်ခဲ့ပြီး အလ်-အန်ဒါလုစ် ပြည့်ရှင် အလ်-မန်ဆူရ်ရဲ့ နန်းတွင်းသမားတော်ကြီးအဖြစ်လည်း ခန့်အပ်ခံခဲ့ရပါတယ်။

ခွဲစိပ်ကုသမှု နည်းလမ်းအသစ်တွေဖော်ထုတ်မှု၊ ခွဲစိပ်ကိရိယာပေါင်း ၂၀၀ ကျော်တီထွင်မှု၊ သွားဘက်ဆိုင်ရာ၊ ဆေးဝါးဆိုင်ရာနဲ့ ခွဲစိပ်ကုသမှုဆိုင်ရာ စည်းမျဉ်းစည်းကမ်းတွေ သတ်မှတ်မှုနဲ့အတူ အလ်-ဇဟ်ရာဝီဟာ ခွဲစိပ်ကုသမှုနည်းလမ်းကို တော်လှန်ပြောင်းလဲပစ်ခဲ့ပါတယ်။ သူရေးသားခဲ့တဲ့ အလ်-တက်စ်ရစ်ဖ် (Al-Tasrif) ဆေးပညာ စွယ်စုံကျမ်းကြီးဟာ တွေ့ကြုံရတဲ့ အခြေအနေတိုင်းမှာ လုပ်သင့်တာ၊ မလုပ်သင့်တာတွေကို ထောက်ပြဆွေးနွေးခြင်းအားဖြင့် ဆေးဘက်ဆိုင်ရာ လက်တွေ့အသုံးချ စည်းမျဉ်းတွေကို တင်ပြထားတဲ့ ကျမ်းကြီးတစ်စောင်လည်း ဖြစ်ပါတယ်။

အလ်-ဇဟ်ရာဝီ ဖော်ထုတ်ခဲ့တဲ့ ခွဲစိပ်ကုသမှု နည်းလမ်းအသစ်တွေထဲက တစ်ခုဟာ ခန္ဓာကိုယ်အတွင်းပိုင်း ချုပ်ရိုးအတွက် တိရစ္ဆာန်အူကနေထုတ်လုပ်တဲ့ကြိုး (Catgut) ကို အသုံးပြုခဲ့တာပါ။ ဒီနေ့အချိန်အထိ ဒီနည်းလမ်းကို ရိုးရိုးခွဲစိတ်မှုကနေ ရှုပ်ထွေးလွန်းတဲ့ ခွဲစိပ်မှုတွေအထိ တွင်တွင်ကျယ်ကျယ် အသုံးပြုနေဆဲ ဖြစ်ပါတယ်။ အဲဒီ Catgut ကြိုးတွေဟာ ခန္ဓာကိုယ်ထဲကို ပျော်ဝင်ပျောက်ကွယ်သွားစေနိုင်တဲ့ တစ်ခုတည်းသော သဘာဝပစ္စည်းလည်း ဖြစ်ပါတယ်။

ခွဲစိပ်ကုသမှုနည်းလမ်းမှာ Catgut ကြိုးကို အလ်-ဇဟ်ရာဝီက ပထမဆုံး အသုံးပြုခဲ့တာဖြစ်ပေမယ့် ဒဏ်ရာချုပ်ရာမှာ တိရစ္ဆာန် (သိုး) ရဲ့အူကို ပထမဆုံး အသုံးပြုခဲ့တာကတော့ မွတ်စလင်စွယ်စုံရ ပညာရှင်ကြီး အလ်-ရာဇီ (Al-Razi) ဖြစ်ပါတယ်။ အလ်-ဇဟ်ရာဝီဟာ တူရီယာပစ္စည်းတွေက ကျစ်ကြိုးကိုလည်း ခွဲစိပ်ကုသမှုမှာလည်း အသုံးချခဲ့ပါတယ်။

ရောဂါတစ်ခုချင်းစီတိုင်းကို ထိုးထွင်းစဉ်းစားလေ့ရှိတဲ့ အလ်-ဇဟ်ရာဝီဟာ ကျိုးသွားတဲ့သွားကို ပြန်စိုက်ပေးတာ၊ နဲ့နေတဲ့သွားတွေကို ရွှေ၊ ဒါမှမဟုတ် ငွေကြိုးကို အသုံးပြုပြီး ခိုင်တဲ့သွားနဲ့ တွဲပေးတာ၊ ရင်သားတွဲကျ (sagging breast) ခြင်းအတွက် ခွဲစိတ်ကုသပေးတာ၊ သွေးတိတ်ဖို့ ဂွမ်းအသုံးပြုတာ၊ လည်ချောင်းနားက လေပြွန်မှာ ပိုက်ထည့်ပြီး နှားခေါင်း၊ ဒါမှမဟုတ် ပါးစပ်နဲ့ အသက်ရှူစရာမလိုအောင် လုပ်ပေးတာ (tracheotomy)၊ ကျောက်ပတ်တီးစည်းတာ၊ ဆီးလမ်းကြောင်း ကျောက်တည်ခြင်းအတွက် ဆီးလမ်းကြောင်းထဲကနေ လွန်ထည့်ပြီး ကျောက်ချေမှုတွေလုပ်တာလို နည်းလမ်းအမျိုးမျိုးကို ဖော်ထုတ်ပြီး ဆေးကုသမှုနည်းလမ်းတွေကို တော်လှန်ပြောင်းလဲပေးခဲ့ပါတယ်။

အလ်-ဇဟ်ရာဝီ ဟာ သူဖန်တီးထားတဲ့ ကိရိယာကိုသုံးပြီး ဆီးအိမ်ထဲက ကျောက်ကို ချေကာ ဘယ်လို ထုတ်ပစ်ရမလဲဆိုတာကိုလည်း အသေးစိတ် ရေးသားခဲ့ပါတယ်။ နှာခေါင်းထဲမှာ ပေါက်တတ်တဲ့ အဖု၊ အကြိတ်တွေကို ဖယ်ရှားနည်း၊ သားအိမ်ထဲကနေ သန္ဓေသားအသေကို သူတီထွင်ထားတဲ့ ညှပ်နဲ့ ခွဲထုတ်နည်း၊ ဒဏ်ရာသက်သာစေဖို့ သံပူကပ်ကုသခြင်း၊ ပုခုံးအဆစ်လွဲတာကို ကုသခြင်း စတဲ့ နည်းလမ်းတွေကိုလည်း တင်ပြခဲ့ပါတယ်။

သူ့ရဲ့ ဒီ လေ့လာဖော်ထုတ်မှုတွေအားလုံးမှာ လူနာဖက်ကနေလည်း စဉ်းစားပေခဲ့ပါတယ်။ ပြည်တည်နာတွေကို ခွဲထုတ်ရာမှာ လူနာတွေ မကြောက်လန့်စေဖို့အတွက် အလ်-ဇဟ်ရာဝီဟာ အပြင်ကနေ မမြင်နိုင်တဲ့ ခွဲစိပ်ဓားကို တီထွင်ခဲ့သလို အာသီးရောင်ရောဂါကို ကုသရာမှာ လျှာကို depressor နဲ့ ထိန်းထားပြီး လည်ချောင်းဝမှာရှိတဲ့ အဖုအကြိတ်ကို ချိတ်တစ်ခုနဲ့ထိန်းကာ ကတ်ကြေးလို အရာမျိုးနဲ့ ဖြတ်ထုတ်နည်းကိုလည်း အသုံးပြုခဲ့ပါတယ်။ အဖုအကြိတ်ကို ဖြတ်တောက်ပြီးတဲ့အခါမှာ လည်ချောင်းနဲ့ထိကာ ချောင်းမဆိုးဖို့အတွက် ဒီကုသမှုမှာ ကန့်လန့်ဖြတ် ဓားသွားတွေ (transverse blade) ကို အသုံးပြုရပါတယ်။

အလ်-ဇဟ်ရာဝီဟာ အန္တရာယ်အရှိဆုံးနဲ့ အနာကျင်ဆုံး ခွဲစိပ်ကုသမှုတွေကို ပြုလုပ်ရာမှာ လူနာတွေ အလွန်အမင်း ခံစားရမှာကို သိနေတဲ့အတွက် သင့်တင့်လျောက်ပတ်ပြီး၊ နာကျင်မှုအနည်းဆုံးဖြစ်မယ့် နည်းလမ်းတွေကို ရွေးချယ်ခဲ့ပါတယ်။ ဒါဟာ ခွဲစိပ်ဆရာဝန်တစ်ယောက်နဲ့ လူနာကြားထဲက ဆက်ဆံရေးမှာ အရေးပါတဲ့ အောင်မြင်မှုလည်း ဖြစ်ပါတယ်။

On Surgery လို့ခေါ်တဲ့ အလ်-ဇဟ်ရာဝီရဲ့ ခွဲစိတ်ကုသမှုဆိုင်ရာ ကျမ်းကြီးက အခန်း ၆၁ မှာ အမျိုးသမီးတွေရဲ့ ဆီးအိမ် ကျောက်တည်တည်တာကို ဖယ်ထုတ်တဲ့ နည်းလမ်းကို ဖော်ပြထားပြီး ဒါဟာ ဆေးပညာသမိုင်းမှာ ပထမဆုံး ဖော်ပြခြင်းလည်းဖြစ်ပါတယ်။ On Surgery ဟာ အလ်-ဇဟ်ရာဝီ ရေးသားခဲ့ပြီး အတွဲ ၃၀ ပါဝင်တဲ့ အလ်-တက်စ်ရစ် (Al-Tasrif) ဆေးဖက်ဆိုင်ရာ စွမ်စုံကျမ်းတွဲကြီးထဲက တစ်ခုဖြစ်ပြီး ဒီကျမ်းတွဲကြီးကို ကြည့်ခြင်းအားဖြင့် အလ်-ဇဟ်ရာဝီရဲ့ အားထုတ်မှုကို တွေ့မြင်နိုင်မှာပါ။

အမျိုးသားတွေမှာ ဆီးအိမ်ထဲကကျောက်တွေကို ဖယ်ထုတ်ရာမှာ သူ့ရဲ့ ကိုယ်ပိုင်နည်းလမ်းကိုလည်း အလ်-ဇဟ်ရာဝီက အသေးစိတ်ဖော်ပြခဲ့သလို၊ ဟိန္ဒူဆေးကျမ်းဖြစ်တဲ့ ‘ရှူရုတာ ဆမ်ဟစ်တာ’ (Sushruta Samhita) မှာ ဖော်ပြထားတဲ့ နည်းလမ်းကိုလည်း ပြန်လည် သုံးသပ်တင်ပြထားပါတယ်။

မွတ်စလင်ခွဲစိတ်ပညာရှင်ကြီးတွေဖြစ်တဲ့ အလ်-ရာဇီနဲ့ အလ်-ဇဟ်ရာဝီတို့ဟာ ဆီးတွေ ထွက်ကျလာတာကို တားဆီးဖို့အတွက် ခွဲစိပ်ခြင်းဟာ အပြင်ပိုင်းထက် အတွင်းပိုင်းကသာ ဖြစ်သင့်တယ်၊ ဆီးကျောက်တွေကို ဒီအတိုင်းဆွဲမထုတ်ရဘဲ၊ ညှပ်နဲ့ထုတ်ရတယ်၊ ကျောက်ကြီးနေမယ်ဆိုရင် ချေပြီး နည်းနည်းချင်းစီ ထုတ်ရတယ်ဆိုတာတွေကိုလည်း မီးမောင်းထိုးပြခဲ့ပါတယ်။ ဒါဟာ ခန္ဓာကိုယ်အတွင်းက တစ်ရှူး ပျက်ဆီးထားမျိုး၊ သွေးအရမ်းထွက်တာမျိုး၊ ဆီးအိမ်ထဲမှာ အဖုအကြိတ်ဖြစ်တာမျိုးကို ရှောင်ချင်တာပါ။ အလ်-ဇဟ်ရာဝီက ဆီးအိမ်ထဲမှာရှိတဲ့ ကျောက်အားလုံးကို ဖယ်ထုတ်ရမှာဖြစ်မှာဖြစ်ပြီး တစ်ခုတစ်လေ ကျန်ခဲ့မယ်ဆိုရင်တောင် ဒါက နောက်ပိုင်းမှာ တစ်ဖြည်းဖြည်း ကြီးထွားလာလိမ့်မယ်လို့ ဆိုပါတယ်။ ဒီအကြံပြုချက်ကို ခွဲစိတ်လောကမှာ ယနေ့အချိန်အထိ အလေးထားနေရဆဲဖြစ်ပါတယ်။

သားဖွားနဲ့ မီးယပ်နယ်ပယ်မှာလည်း အလ်-ဇဟ်ရာဝီနဲ့ အခြား မွတ်စလင် ခွဲစိတ်ဆရာဝန်ကြီးတွေရဲ့ ကြိုးစား အားထုတ်မှုတွေဟာ ရှေ့ဆောင်လမ်းပြ ဖြစ်ခဲ့ပါတယ်။ အလ်-ဇဟ်ရာဝီဟာ ပုံမှန်မဟုတ်တဲ့ မွေးဖွားမှုကို ဘယ်လိုလုပ်မလဲ၊ မွေးဖွားပြီးနောက်ပိုင်း ဘယ်လိုသန့်ရှင်ရေးလုပ်မလဲ စတာတွေနဲ့ ပတ်သက်ပြီး လက်သည်တွေကို သင်ကြားပြသပေးခဲ့ပါတယ်။ ပြီးတော့ vaginal specula ကိရိယာကိုလည်း တီထွင် မိတ်ဆက်ပေးခဲ့ပါတယ်။

ယနေ့ခေတ် ဥဇဘက်ကစ္စတန်နိုင်ငံမှာ ၁၁ ရာစုက ကျော်ကြားခဲ့တဲ့ အစ်ဗနေ့ ဆီနာ (Ibn Sina) အပါအ၀င် ဆေးပညာလောကမှာ လမ်းသစ်ဖောက်ခဲ့ကြတဲ့ ဆရာဝန်တွေဟာ မွတ်စလင်ကမ္ဘာမှာ တော်တော်များများ ရှိခဲ့ပါတယ်။ အစ်ဗနေ့ ဆီနာဟာ Canon လို့ခေါ်တဲ့ ကျမ်းတစ်အုပ်ကို ပြုစုခဲ့ပြီး ဆေးဝါးနဲ့ပတ်သက်လို့ အဲဒီကျမ်းမှာ ကျယ်ကျယ်ပြန့်ပြန့် ဖော်ပြထားပါတယ်။

အစ်ဗနေ့ ဆီနာက အာရဘီလို အလ်-ဆာရာတန် (al-saratan) လို့ခေါ်တဲ့ ကင်ဆာရောဂါဟာ အစပထမပိုင်းမှာ နာကျင်ကိုက်ခဲမှု၊ ယောင်ရမ်းမှုမရှိတဲ့ အဖုတ်အကြိတ်လုံးဖြစ်တယ်လို့ ဆိုပါတယ်။ အချို့သော ကင်ဆာအကျိတ်တွေက နောက်ဆုံးအဆင့်ကို ရောက်သွားရင် နာကျင်ပြီး၊ တစ်ခါတစ်ရံမှာ ကုသလို့ မရပါဘူး။ အစ်ဗနေ့ ဆီနာက ကင်ဆာအကျိတ်ဟာ ဂဏန်းခြေထောက်လိုမျိုး အလယ်အသားကနေ ပွားလာတတ်တယ်လို့ ဆိုပြီး အဲ့ဒါကြောင့်ပဲ ကင်ဆာ (cancer – ဂဏန်း) လို့ အမည်တွင်တာ ဖြစ်ပါတယ်။ အတွင်းကျိတ်ကင်ဆာကို လူနာတွေဟာ သိပ်သတိမမူမိဘဲ၊ နာကျင်ပေမယ့်လည်း နှစ်ပေါင်း တော်တော်ကြာ အသက်ရှင်နေထိုင်ပါတယ်။ ခွဲစိတ်ဆရာဝန်တွေ ကုသပေးရတဲ့ ကင်ဆာအမျိုးအစားကတော့ limited cancer လို့ခေါ်တဲ့ ကန့်သတ်ကင်ဆာ ဖြစ်ပါတယ်။ ခန္ဓာကိုယ်ထဲက အကျိတ်တွေကို ဖယ်ရှားဖို့အတွက် ခွဲစိပ်ဖြတ်ထုတ်မှုဟာ အပြစ်အနာအဆာကင်းဖို့ လိုပါတယ်။ ခွဲစိပ်မှုဟာ မတိကျဘူးဆိုရင်တော့ ကင်ဆာအကျိတ်ဟာ ပြန်ပွားလာမှာပါ။ ကင်ဆာကျိတ်တွေ လျင်လျင်မြန်မြန် ပြန့်ပွားလာနိုင်တဲ့အတွက် ရင်သားကင်ဆာဖြစ်ရင် အမျိုးသမီးတွေရဲ့ ရင်သားကို ဖြတ်ထုတ်တာကို အစ်ဗနေ့ဆီနာက ဆန့်ကျင်ပါတယ်။ ပြီးတော့ ကော့ပါးအောက်ဆိုက်၊ ဒါမှမဟုတ် ခဲအောက်ဆိုက်တို့ကို အသုံးပြုဖို့ အကြံပြုခဲ့ပြီး ဒီပစ္စည်းတွေဟာ ကင်ဆာကို မပျောက်စေနိုင်ပေမယ့် အကျိတ်ပြန့်နှံ့မှုကို ရပ်တန့်ရာမှာတော့ ထိရောက်မှုရှိပါတယ်။

အလ်-ဇဟ်ရာဝီလိုပဲ အစ်ဗနေ့ ဆီနာကလည်း ဆေးဘက်ဆိုင်ရာ အကြောင်းအရာ တော်တော်များများကို ရေးသားခဲ့ပါတယ်။ ဆီးအိမ်မှာ ကျောက်တည်တာကြောင့် ဆီးအိမ်ထဲ ဆီးတွေ ပြည့်နှက်နေမှုနဲ့  ပတ်သက်ပြီး သူက ဒီလို ရှင်းပြခဲ့ပါတယ်။

“လူနာဟာ ပက်လက်အိပ်လိုက်မယ်၊ ပြီးရင် တင်ပဆုံကို မြှောက်ထားပြီး လှုပ်ခါလိုက်မယ်ဆိုရင် ဆီးအိမ်ဝမှာ ပိတ်နေတဲ့ ကျောက်ဟာ ရွေ့သွားပြီး ဆီးတွေလည်း ထွက်လာမှာပါ။ ဒါမှမဟုတ်ရင် စအိုထဲကနေ လက်ချောင်းတစ်ချောင်းထည့်ပြီး ဆီးအိမ်ထဲက ကျောက်ကို သာသာလေး တွန်းဖယ်နိုင်ပါတယ်။ အဲဒါ အလုပ်မဖြစ်ဘူးဆိုရင်တော့ ဆီးလမ်းကြောင်းထဲ ပြွန်သေးတစ်ချောင်းထည့်ပြီး ကျောက်ကို အနောက်ကို တွန်းထုတ်ပါ။ ထည့်ဖို့ခက်မယ်ဆိုရင်တော့ အရမ်းတွန်းမထည့်ပါနဲ့”

အစ်ဗနေ့ဆီနာရဲ့ ဒီဖော်ပြချက်ဟာ ဒီနေ့ခေတ် ဆီးလမ်းကြောင်းမှာ ကျောက်တည်တာကို ကု သတဲ့နေရာမှာ ဆရာဝန်တွေ အသုံးပြုတဲ့ နည်းလမ်းနဲ့ တစ်ထေရာတည်း တူညီနေပါတယ်။ ဆေးပညာ တိုးတက်နေတဲ့ ဒီနေ့ခေတ်မှာတော့ ကျောက်ကို​ ပြွန်သေး ဒါမှမဟုတ် မှန်ပြောင်းကိုအသုံးပြုပြီး တွန်းဖယ်တာ ဖြစ်ပါတယ်။

၁၃ ရာစု ဆီးရီးယားသမားတော် အစ်ဗနေ့ အလ်-ကွတ်ဖ် (Ibn al-Quff) က ဆီးလမ်းကြောင်းက ကျောက်ဟာ ကြီးရင် ခွဲစိပ်ကုသရာမှာ အသေးတွေထက် ပိုပြီး လွယ်ကူတယ်လို့ ဆိုပါတယ်။ ဘာ့ကြောင့်လည်းဆိုတော့ အရွယ်အစားကြီးတဲ့ ကျောက်တွေဟာ ဆီးလမ်းကြောင်းနဲ့ ဆီးအိမ်ထဲမှာ ပိတ်နေတဲ့အခါ ပိုပြီး စမ်းသပ်ရ လွယ်တာကြောင့်ဖြစ်ပါတယ်။

 

ဒီအထောက်အထားတွေကို ကြည့်ရှုခြင်းအားဖြင့် လွန်ခဲ့တဲ့ နှစ်ပေါင်း ထောင်ချီအရင်ကတည်းက လူနာတွေကို ဆေးရုံတွေမှာ ကောင်းကောင်းမွန်မွန်ကုသနိုင်တယ်ဆိုတာကို တွေ့မြင်နိုင်ပါတယ်။ ဒီနေ့နဲ့ မတူတာကတော့ အဲဒီအချိန်တုန်းက အောင်မြင်မှုရာခိုင်နှုန်းအပါအ၀င် ကိန်းဂဏန်းတွေကို မှတ်တမ်း တင်ထားနိုင်ခြင်းမရှိတာပါပဲ။ ဒါပေမယ့် အကြီအကျယ်ဆုံး ခွဲစိတ်ကုဆရာဝန်ကြီးတွေရဲ့ ပညာအမွေဖြစ်တဲ့ စာအုပ်စာတမ်းတွေတော့ ကျန်ရစ်ခဲ့ပါတယ်။ လက်တွေ့ဆောင်ရွက်မှု၊ သုတေသနပြုမှုတွေကို ရေးသား မှတ်တမ်းတင်ထားတဲ့ ဒီစာအုပ်စာတမ်းတွေဟာ ခွဲစိပ်ကုသမှုကဏ္ဍကို ပြောင်းလဲတိုးတက်စေခဲ့သလို၊ ၂၁ ရာစုကလူတွေအပါအ၀င် ကမ္ဘာသူကမ္ဘာသားအားလုံးအတွက် ကောင်းကျိုးကို ဆောင်ကျဉ်းပေးခဲ့ပါတော့တယ်။

(ကိုးကား- National Geographic ၏ 1001 Inventions – The Enduring Legacy of Muslim Civilization)

(ကမ္ဘာ့လူ့အဖွဲ့အစည်းတွင် ယနေ့တိုင်ရှင်ကျန်နေသည့် မွတ်စလင်တို့၏ အမွေအနှစ်များ – တင်ဆက်ပြီးသမျှ အပိုင်းအားလုံးကို  ဤနေရာ တွင် ဖတ်ရှုနိုင်ပါသည်။

ဇန်န၀ါရီ ၆၊ ၂၀၁၇
M-Media

– လွန်ခဲ့တဲ့ နှစ်ပေါင်းတစ်ထောင်ကျော်က သုံးစွဲခဲ့တဲ့ ခွဲစိပ်ကိရိယာတွေကို ယူလာပြရင် ဒီနေ့ခတ် အသုံးပြုနေတဲ့ ကိရိယာတွေနဲ့ သိပ်မကွဲပြားဘူးဆိုတာ တွေ့ရမှာပါ။

၁၀ ရာစု စပိန်နိုင်ငံတောင်ပိုင်းကို ပြန်သွားကြည့်မယ်ဆိုရင်တော့ အဘူလ် ကာစင်မ် ခါလက်ဖ် အစ်ဗနေ့ အလ်-အဘတ်စ် အလ်-ဇဟ်ရာဝီ (Abul Qasim Khalaf ibn al-Abbas al-Zahrawi) လို့ခေါ်တဲ့ ခွဲစိတ်ကု ဆရာဝန်ကြီးရဲ့ ကျော်ကြားမှုကို တွေ့မြင်ရမှာ ဖြစ်ပါတယ်။ အနောက်တိုင်းမှာတော့ သူ့ကို အဘူလ်ကာစစ် (Abulcasis) လို့ သိကြပါတယ်။

အလ်-ဇဟ်ရာဝီဟာ အလ်-တက်စ်ရစ်ဖ် (Al-Tasrif) လို့ ခေါ်တဲ့ ဆေးပညာ စွယ်စုံကျမ်းတွဲကို ရေးသားပြုစုခဲ့သူဖြစ်ပြီး အဲဒီအထဲမှာ On Surgery အမည်နဲ့ ခွဲစိပ်ကုသမှုနဲ့ပတ်သက်တဲ့ ကျမ်းတစ်စောင်လည်း ပါဝင်ကာ ခွဲစိတ်ကိရိယာပေါင်း ၂၀၀ ကျော်လောက်ကို ပုံနဲ့တကွ ဖော်ပြထားပါတယ်။ ရှေးဟောင်း အီဂျစ်ဂူတွေက ရခဲ့တဲ့ ကိရိယာပုံကြမ်းတွေကို ဖယ်လိုက်ရင် အလ်-ဇဟ်ရာဝီရဲ့ On Surgery ကျမ်းဟာ ဆေးပညာသမိုင်းမှာ ခွဲစိပ်ကိရိယာတွေကို ဖော်ပြထားတဲ့ ပထမဆုံးကျမ်း ဖြစ်ပါတယ်။ ဒီကိရိယာတွေဟာ တော်တော်လေးကို အသုံးဝင်ပြီး ထောင်စုနှစ်တစ်ခု ကြာညောင်းခဲ့တဲ့တိုင်အောင် အပြောင်းအလဲသိပ်မရှိခဲ့ပါဘူး။ ဥရောပ ဆေးလောကရဲ့ ခွဲစိပ်ကုသမှုကဏ္ဍကို အလ်-ဇဟ်ရာဝီရဲ့ ဒီကျမ်းနဲ့ပဲ အုတ်မြစ်ချခဲ့တာဖြစ်ပါတယ်။

ခွဲစိပ်ကိရိယာ တစ်ခုစီတိုင်းကို အလ်-ဇဟ်ရာဝီက လက်ရေးနဲ့ ထင်ထင်ရှားရှား ရေးဆွဲကာ ဘယ်အချိန်မှာ ဘယ်လိုအသုံးပြုရမလဲဆိုတဲ့ အသေးစိတ်ကိုပါ ရေးသားခဲ့ပါတယ်။ ဥပမာအားဖြင့် ဒဏ်ရာမရင်းအောင် သံပူကပ် ကုသနည်နဲ့ပတ်သက်ပြီး အောက်ပါအတိုင်း ဖော်ပြခဲ့ပါတယ်။

“စောစောပိုင်း (သမားတော်တွေရဲ့) အဆိုအရ သံပူကပ်ကုသမှုမှာ သံကိုသုံးတာထက် ရွှေကိုသုံးတာက ပိုပြီး ကောင်းတယ်လို့ ဆိုပါတယ်။ ဒါပေမယ့် သံကိုအသုံးပြုတာက အနာကို မြန်မြန်ကျက်ပြီး ပိုမှန်တယ်လို့ ကျွန်တော်တို့ တွေ့ပါတယ်”

မဂ်ျရဒ် (majrad) လို့ခေါ်တဲ့ တံစည်းအသေးနဲ့ အဲဒီကိရိယာကို နှာခေါင်းထဲက အသားပိုကို ကုသတဲ့အခါမှာ အသုံးပြုပုံနဲ့ ပတ်သက်ပြီး “ဆရာဝန်တွေက အသားပို (fistula) လို့ခေါ်ပြီး အရပ်သားတွေကတော့ ငန်းတောင် (quill) လို့ ခေါ်ပါတယ်။ ဒီရောဂါကို အရင်ကရှိခဲ့တဲ့နည်းအတိုင်း အပူပေးတဲ့ နည်းတွေနဲ့ ကုသမယ်ဆိုရင် ဒီအနာက ကျက်မှာမဟုတ်ပါဘူး။ အဖုရင့်မှည့်သွားတဲ့အခါ ဖြတ်ထုတ်ပြီး၊ အရိုးမြင်ရတဲ့အထိတိုင်အောင် အထဲက မန်းရည်၊ ပြည်ရေတွေအားလုံးကို ထုတ်တဲ့နည်းကလွဲလို့ အခြားကုသနည်း မရှိပါဘူး။ အရုိုးအထိရောက်ရင်တော့ ဆဲလ်တွေသေမှု (အရောင်မည်းမည်းတွေ) ကို မြင်ရမှာဖြစ်ပါတယ်။ အဲဒါကို အခု ဒီပုံမှာပြထားတဲ့ ကိရိယာနဲ့ ခြစ်ထုတ်ပါ။ ဒါကိရိယာကို တံစည်း လို့ခေါ်ပြီး အိန္ဒိယကသံနဲ့ ပြုလုပ်ထားတာပါ။ ခေါင်းက ကြယ်သီးလိုပဲ လုံးဝန်းတယ်။ ဒါပေမယ့် ကျားလျှာလိုမျိုး အမြှောင်းလေးတွေထွင်းထားပါတယ်။ ဒါကို လှိုက်စားနေတဲ့ အရိုးပေါ်မှာတင်ပြီး မည်းနေတဲ့အရာတွေ ကုန်စင်တဲ့အထိ လက်နဲ့လှည့်ကာ တိုက်စားပေးပါ။ တိုက်စားမှုကို အကြိမ်များစွာပြုလုပ်ပါ။ ပြီးရင် အဲဒီနေရာကို သွေးတိတ်အောင်လုပ်ပါ။ ဒဏ်ရာကျက်သွားပြီး အသားတက်လာမယ်၊ မန်းရေတွေထွက်နေတာလည်း ရပ်သွားမယ်၊ ရက် ၄၀ ကြာပြီးနောက်ပိုင်းမှာ ပြန်မဖြစ်တော့ဘူး၊ အနာပေါက်ကျယ်တာမရှိဘူး၊ ဘာမှ ထပ်ထွက်မလာတော့ဘူးဆိုရင်  ဒီအနာ လုံးဝကျက်သွားပြီလို့ မှတ်ယူနိုင်ပါတယ်”

ဆီးလမ်းကြောင်း ကျောက်တည်တဲ့ ရောဂါနဲ့ပတ်သက်ပြီး အလ်-ဇဟ်ရာဝီရဲ့ ဒီ On Surgery ကျမ်းမှာ ကျယ်ကျယ်ပြန့်ပြန့် ဖော်ပြထားပါတယ်။ ဒီရောဂါအတွက် အလ်-မစ္စဟဘ် (al-mishab) လို့ခေါ်တဲ့ ကျောက်ချေ ကိရိယာကို အလ်-ဇဟ်ရာဝီက တီထွင်ခဲ့ပါတယ်။

“ထိပ်ချွန်တဲ့ သံချောင်းအသေးတစ်ချောင်းကိုယူပါ။ အဲဒီ သံချောင်းကို ပြန်ထုတ်ဖို့အတွက် ဆီးလမ်းကြောင်းက ကျောက်အထိရောက်တဲ့ သံကြိုးနဲ့ဆက်ပါ။ ပြီးရင် ဒီကိရိယာကို ကျောက်ကို ထိတဲ့အတွက် သွင်းပြီး ဟိုဘက်ဒီဘက်လှည့်ကာ ကျောက်ကို အပေါက်ဖောက်ပါ။ အဲဒီအချိန်မှာ ဆီးတွေ ထွက်ကျလာမှာဖြစ်ပြီး ကိရိယာကို အထဲကကျောက်ပေါ်မှာဖိထားပြီး ထိုးချေပါ။ ကျောက်က ကျေသွားပြီး ဆီးနဲ့အတူ ထွက်လာမှာ ဖြစ်ပါတယ်။ ဒီလိုလုပ်တာ အဆင်မပြေဘူးဆိုရင်တော့ ခွဲပြီးထုတ်ပါ”

ဒါဟာ သူတီထွင်ခဲ့တဲ့ ကျောက်ချေကိရိယာနဲ့ပတ်သက်ပြီး အသေးစိတ် ရှင်းပြထားတာ ဖြစ်ပါတယ်။ အလ်-ဇဟ်ရာဝီရဲ့ စာအုပ်တွေကို သိပ်မကြာခင်ကမှ ဘာသာပြန်ဆိုခဲ့ကြတဲ့ ဂျီယိုဖရေး လူးဝစ် (Geoffrey Lewis) နဲ့ မာတင် စပင့် (Martin Spink) တို့ဟာ ဒီတီထွင်မှုကို ချီးကျူးခဲ့ပြီး ခေတ်သစ် ဆီးကျောက်ချေ ကိရိယာအတွက် ရှေ့ပြေးဖော်ထုတ်မှုလည်းဖြစ်တယ်လို့ အောက်ပါအတိုင်း ရေးသားခဲ့ပါတယ်။

“အဘူလ်ကာစစ်ရဲ့ ဒီကိရိယာဟာ ရာစုနှစ်ပေါင်းမျာစွာအရင်က လီသိုထရစ်ပတာ (lithotripter) ပါပဲ။ ဒါကို အလယ်ခေတ် ခွဲစိတ်ဆရာဝန်ကြီးတွေဖြစ်တဲ့ ဖရန်ကို (Franco)၊ ပါရေး (Pareဲ) နဲ့ ဆီးလမ်းကြောင်း ရောဂါဆိုင်ရာ ဂုရုကြီး ဖရေရီ ကိုမေသီ (Freဲre Comethe) တို့က လုံးဝလစ်လျူရှုထားပြီး ဖော်တောင် မဖော်ပြခဲ့ပါဘူး”

(lithotripter မှာ ယနေ့ခေတ် ဆီးကျောက်ခြေရာတွင် တွင်တွင်ကျယ်ကျယ် အသုံးပြုနေသည့် ကိရိယာဖြစ်သည်)

၁၂ ရာစု ဆီးဗီးလ် (Seville) က သမားတော် အစ်ဗနေ့ ဇူဟာရ် (Ibn Zuhr) က ဇဟ်ရာဝီရဲ့ ဒီ ဆီးကျောက်ခြေကိရိယာရဲ့ ထိပ်ဆုံးမှာ စိန်ပွင့်ကိုထည့်ပြီး မွမ်းမံခဲ့ပါတယ်။ အလ်-ဇဟ်ရာဝီဟာ ခွဲစိတ်မှုသုံး လွန်တွေအပြင်၊ ဆီးအိမ်၊ ဆီးလမ်းကြောင်းနဲ့ ကျောက်ကပ်တွေမှာ တည်တတ်တဲ့ ကျောက်တွေကို ခွဲထုတ်ရမှာ အသုံးပြုတဲ့ ဓားတွေကိုလည်း တီထွင်ခဲ့ပါသေးတယ်။

On Surgery ကျမ်းက အလ်-ဇဟ်ရာဝီ နောက်ထပ်ဖော်ပြထားတဲ့ ခွဲစိပ်ကိရိယာတွေထဲမှာ တစ်ရှူးတွေကို မီးရှို့ဖြတ်ထုတ်တဲ့ပစ္စည်း (cauterization tool) အမျိုးမျိုး၊ ခွဲစိပ်ခန်းသုံးဓားငယ် အမျိုးမျိုး၊ သွေးကြောထဲကနေ သွေးခဲတွေကို ဆွဲထုတ်ရာမှာ အသုံးပြုတဲ့ အသွားတုံး ချိတ်အမျိုးမျိုး၊ အသွားချွန် ချိတ်တွေ၊ ဇာဂနာအမျိုးမျိုး၊ ညှပ်အမျိုးမျိုး၊ မိခင်ရဲ့ သားအိမ်ထဲကနေ သန္ဓေသားကို ဆွဲထုတ်ဖို့အတွက် ယနေ့အထိ အသုံးပြုနေတဲ့ ညှပ်အရှင်တွေလည်း ပါဝင်ပါတယ်။

ဒီနေ့သုံးနေတဲ့ ခွဲစိပ်ခန်းသုံးကိရိယာတွေကို ကြည့်မယ်ဆိုရင် အလယ်ခေတ် မွတ်စလင်သမားတော်ကြီးတွေ တီထွင်ဖန်တီးခဲ့တဲ့ ကိရိယာတွေကို သိပ်မကွာတာကို တွေ့မြင်ရမှာဖြစ်ပြီး ကမ္ဘာ့လူ့အဖွဲ့အစည်းအပေါ် မွတ်စလင်တွေရဲ့ အကျိုးပြုမှုကို ဖော်ပြနေတဲ့ အကောင်းဆုံး သက်သေတွေပဲ ဖြစ်ပါတယ်။

“အလ်-ဇဟ်ရာဝီဟာ ခန္ဓာဗေဒအသိပညာကို အခြေခံပြီး ခွဲစိပ်ကုသမှုနယ်ပယ်ကို သီးခြားပညာရပ်တစ်ခုအဖြစ် ခွဲထုတ်ပေးလိုက်တဲ့ ထိပ်တန်း ပုဂ္ဂိုလ်ကျော်ကြီးတစ်ဦး ဖြစ်ပါတယ်။ အလ်-ဇဟ်ရာဝီရဲ့ ခွဲစိပ်ကိရိယာ ပုံတွေ၊ ဖော်ပြချက်တွေဟာ ဒီနယ်ပယ်မှာ သူ့ရဲ့ကြိုးပမ်းအားထုတ်မှုကို ရှင်သန်နေစေတဲ့၊ သူ့နောက်ပိုင်း ပေါ်ထွက်လာခဲ့တဲ့ ပညာရှင်တွေအပေါ် သူ့ရဲ့ သြဇာလွှမ်းမိုးမှုကို မီးမောင်းထိုးပြနေတဲ့ စွန့်ဦးတီထွင်မှုလည်း ဖြစ်ပါတယ်”

အလ် လီကလာ့က် (L. Leclerc – ၁၉ ရာစု ဆေးပညာဆိုင်ရာ သမိုင်းပညာရှင်)

အလ်-ဇဟ်ရာဝီ

ဓားငယ်တွေ၊ လွှငယ်လေးတွေ၊ လွန်တွေ၊ ဇာဂနာတွေကြောင့် ခွဲစိပ်ကုသူမှုကဏ္ဍဟာ လွန်ခဲ့တဲ့ နှစ်ထောင်ချီအရင်ကတည်းက လုံးဝ ပြောင်းလဲခဲ့ပါတယ်။ စပိန်နိုင်ငံမှာ မွတ်စလင်တွေရဲ့ အုပ်စိုးမှု နေလိုလလို ထွန်းတောက်ခဲ့တဲ့အချိန် ကျောကြားခဲ့တဲ့ ခွဲစိပ်သမားတော်ကြီး အလ်-ဇဟ်ရာဝီရဲ့ မှတ်တမ်းတွေကို ကြည့်ခြင်းအားဖြင့် သူဟာ ဆေးဘက်ဆိုင်ရာ ကိရိယာပေါင်း ၂၀၀ ကျော်လောက်ကို တီထွင်ဖန်တီး အသုံးပြုခဲ့တယ်ဆိုတာ သိရှိရပါတယ်။ အဲဒီ ကိရိယာတွေထဲက အများစုကို ဒီနေ့ခေတ်အထိ ပစ်ပယ်လို့ မရသးပါဘူး။

သက္ကရာဇ် ၉၃၆ ခုနှစ်မှာ ကော်ဒိုဘာမှာမွေးခဲ့တဲ့ အလ်-ဇဟ်ရာဝီကို အနောက်တိုင်းကတော့ အဘူလ်ကာစစ်လို့ သိကြပါတယ်။ သမားတော်တစ်ယောက်ဖြစ်တဲ့သူဟာ ဘ၀သက်တမ်းတစ်လျှောက်လုံးမှာ ခွဲစိပ်ကုသမှုပေါင်း ရာနဲ့ချီ ပြုလုပ်ခဲ့သူပါ။ ခွဲစိတ်နည်းတွေနဲ့ ကုသမှုနည်းလမ်းတွေကိုလည်း အလ်-ဇဟ်ရာဝီက ဖွံ့ဖြိုးအောင် လုပ်ဆောင်ခဲ့တာကြောင့် သူ့ရဲ့ လူနာတွေဟာ အကျိုးကျေးဇူးမြောက်များစွာ ခံစားခဲ့ရပါတယ်။

သူနဲ့ သူ့ရဲ့ လုပ်ဖော်ကိုင်ဖက်တွေ ဆောင်ရွက်ခဲ့ကြတဲ့ ဆေးဘက်ဆိုင်ရာ လုပ်ငန်းတွေကို အလ်-တက်စ်ရစ်ဖ် (Al-Tasrif) ဆိုတဲ့ ကျမ်းကြီးမှာ မှတ်တမ်းတင်ခဲ့ပြီး အဲဒီကျမ်းကြီးကတော့ အတွဲပေါင်း ၃၀ ရှိပါတယ်။ ဒီကျမ်းကြီးထဲမှာ တွင်းထွက်ပစ္စည်းတွေ၊ ဆေးဖက်ဝင်အပင်တွေ၊ တိရစ္ဆာန်ထွက် ပစ္စည်းတွေကနေ ဆေးဝါးဖော်စပ်မှုတွေအကြောင်းလည်း ပါဝင်ပါတယ်။

ပြီးတော့ ခွဲစိပ်ကိရိယာတွေကိုလည်း ပုံတွေ၊ ရှင်းလင်းချက်တွေနဲ့ အသေးစိတ်ဖော်ပြထားပြီး ဆေးဘက်ဆိုင်ရာသမိုင်းမှာ ခွဲစိပ်ပညာရပ်နဲ့ပတ်သက်ပြီး ပထမဆုံးဖော်ပြမှုလည်း ဖြစ်ပါတယ်။ အဲဒီအချိန်တုန်းက ခွဲစိပ်ကုသမှုဟာ အလွန်အန္တရာယ်ရှိပြီး၊ နာကျင်မှုဝေဒနာကို ဆိုးဆိုးဝါးဝါး ခံစားရလေ့ရှိပေမယ့် အလ်-ဇဟ်ရာဝီရဲ့ ဒီကိရိယာတွေကြောင့် အရိုးရောဂါ၊ အဖုအကျိတ်၊ ဆီးအိမ်မှာ ကျောက်တည်တာ၊ ဒဏ်ရာအနတရဖြစ်တာတွေကို ကုသတဲ့နေရာမှာ တော်တော်လေးကို အထောက်အကူ ဖြစ်စေခဲ့ကာ ကလေးမွေးဖွားမှုကိုလည်း လွယ်ကူစေခဲ့ပါတယ်။

အလ်-ဇဟ်ရာဝီရဲ့ ဒီကျမ်းကြီးထဲမှာ ခွဲစိပ်ခန်းသုံး ဓားငယ်တွေ၊ ချိတ်တွေ၊ ညှပ်တွေ၊ လွှငယ်လေးတွေကို ပုံတွေနဲ့တကွ ဖော်ပြထားပါတယ်။ အများစုကိုတော့ ဒီနေ့အချိန်အထိ သုံးစွဲနေကြရတုန်းဖြစ်ပြီး၊ အလ်-ဇဟ်ရာဝီရဲ့ ဒီကိရိယာတွကို အခြေခံကာ ပိုမိုအသုံးဝင်အောင် ပြုပြင်ဖန်တီးမှုတွေလည်း ရှိခဲ့ပါတယ်။ ၁၂ ရာစုမှာ ဆီးဗီးလ်မြို့က သမားတော်တစ်ဦးဖြစ်တဲ့ ဇူဟာရ်ဟာ အလ်-ဇဟ်ရာဝီရဲ့ ကိရိယာတစ်ခုကို စိန်ပွင့်တပ်ပြီး ပြုပြင် မွမ်းမံခဲ့ပါတယ်။

အလ်-တက်စ်ရစ်ဖ် ကျမ်းကြီးထဲမှာ အလ်-ဇဟ်ရာဝီဟာ ပုခုံးအဆစ်လွဲမှု ကုသနည်း၊ ကျောက်ပတ်တီးစီးကာ အရိုးပြန်ဆက်နည်း၊ သွားတုစိုက်နည်းတွေနဲ့ ကင်ဆာကုသဖို့ ကြိုးပမ်းဆောင်ရွက်ခဲ့မှုတွေကိုပါ ဖော်ပြထားပါတယ်။ သူ့ရဲ့အသိပညာကြွယ်ဝမှုကလည်း လူနာပေါင်းစုံရဲ့ ယုံကြည်ကိုးစားမှုကို ရရှိစေခဲ့ပါတယ်။

လူနာတွေ ကြောက်ရွံ့မှု မရှိအောင်လို့ ဓာသွားမမြင်ရတဲ့ ဓားကိုလည်း အလ်-ဇဟ်ရာဝီက တီထွင်ခဲ့ပြီး ဒီလို ထောင့်စေ့အောင် တွေးခေါ်မြော်မြင်တတ်မှုကို နည်းသစ်လမ်းသစ်ဖော်ထုတ်မှုတွေနဲ့ ပေါင်းစပ်လိုက်တဲ့အခါမှာတော့ အလ်-ဇဟ်ရာဝီဟာ စပိန်ကိုအုပ်စိုးတဲ့ ဘုရင့်နန်းတွင်းက လက်စွဲ သမားတော်ကြီး ဖြစ်လာခဲ့ပါတယ်။

အလ်-ဇဟ်ရာဝီရဲ့ လက်ဗျားခါလောက်တဲ့ တီထွင်မှုတွေထဲက တစ်ခုကတော့ ခွဲစိပ်ကုသမှုအပြီး အတွင်းသားကို ချုပ်တဲ့အခါမှာ တိရစ္ဆာန်အူကနေလုပ်တဲ့ကြိုး (catgut) ကို အသုံးပြုခဲ့တာ ဖြစ်ပါတယ်။ ဒီနည်းစနစ်ကို ဒီနေ့အချိန်အထိ အသုံးပြုနေကြဆဲပါ။

တကယ်တော့ ဒီနေ့ခေတ် ကျန်းမာရေးကဏ္ဍနဲ့ ကုသမှုတွေဟာ အတိတ်ကာလနဲ့ တစ်နည်းမဟုတ်တစ်နည်း စက်ဆက်နေပါတယ်။ အစောပိုင်း မွတ်စလင်လူ့အဖွဲ့အစည်းမှာ ဖွံ့ဖြိုးတိုးတက်ခဲ့တဲ့ ကျန်းမာရေးစောင့်ရှောက်မှုစနစ်ဟာ ခွဲစိပ်ကုသမှု၊ ဆေးရုံက ကျန်းမာရေး ၀န်ဆောင်မှု ကဏ္ဍတွေကို အရှေ့ရောက်စေခဲ့ပြီး၊ နည်းလမ်းဟောင်းတွေ၊ နည်းလမ်းအသစ်တွေကနေ ဆေးသစ်ဝါးသစ် ထုတ်လုပ်မှုလည်း မြင့်တက်ခဲ့ပါတယ်။

အလ်-တက်စ်ရစ်ဖ်ကျမ်းကြီးကို ခရီမိုနာမြို့က ဂျရတ် (Gerard of Cremona) ဆိုသူက လက်တင်ဘာသာကို ပြန်ဆိုပြီး နောက်ပိုင်းမှာတော့ အလ်-ဇဟ်ရာဝီရဲ့ တီထွင်ဆန်းသစ်မှုတွေ၊ လေ့လာဖော်ထုတ်မှုတွေဟာ ဥရောပတစ်ဝှမ်း ပြန့်နှံ့သွားခဲ့သလို ဉာဏ်သစ်လောင်းကာလ (Renaissnace) အထိ ဥရောပရဲ့ဆေးပညာကဏ္ဍမှာ လွှမ်းမိုးခဲ့ပါတယ်။ အစောပိုင်း မွတ်စလင်ကမ္ဘာက ဆေးကျမ်းတွေနဲ့အတူ အလ်-တက်စ်ရစ်ဖ်ကျမ်းဟာ ဆေးကျောင်းတွေမှာ ရာစုနှစ်ပေါင်းများစွာကြာထဲ့အထိ ပြဌာန်းစာအုပ် ဖြစ်ခဲ့ပါတော့တယ်။

(ကိုးကား- National Geographic ၏ 1001 Inventions – The Enduring Legacy of Muslim Civilization)

(ကမ္ဘာ့လူ့အဖွဲ့အစည်းတွင် ယနေ့တိုင်ရှင်ကျန်နေသည့် မွတ်စလင်တို့၏ အမွေအနှစ်များ – တင်ဆက်ပြီးသမျှ အပိုင်းအားလုံးကို  ဤနေရာ တွင် ဖတ်ရှုနိုင်ပါသည်။

ဒီဇင်ဘာ ၂၃၊ ၂၀၁၆
M-Media

– လွန်ခဲ့တဲ့ နှစ်တစ်ထောင်အရင်က မွတ်စလင်ဆေးရုံတွေဟာ ဆေးကုသမှုတင်မကဘဲ  ပြန်လည်ထူထောင်ရေး၊ ခိုလှုံခွင့်ပေးရေးနဲ့ သက်ကြီးရွယ်အို စောင့်ရှောက်ရေးဆိုတဲ့  ရည်ရွယ်ချက်ကောင်းတွေနဲ့ ဖြစ်တည်လာတာ ဖြစ်ပါတယ်။ နေထိုင်မကောင်းသူတွေကို ပြုစုကုသပေးတာဟာ ကိုယ်ကျင့်တရားကောင်းမွန်တဲ့ လက္ခဏာဖြစ်တယ်လို့ မွတ်စလင်တွေက ယူဆတာကြောင့် အဲဒီဆေးရုံတွေဟာ ဆင်းရဲချမ်းသာမရွေး၊ အယုတ် အလတ် အမြတ်မရွေးရဲ့ မှီခိုအားထားရာ နေရာတွေ ဖြစ်ခဲ့ပါတယ်။

စောစောပိုင်းမှာ မွတ်စလင်တွေဟာ ဒီ ဆေးရုံတွေကို ‘၀ကားဖ်’ (waqaf) လို့ခေါ်တဲ့ အကျိုးကုသိုလ်မျှော်ကိုးတဲ့ ဘာသာရေးဆိုင်ရာ လှူဒါန်းမှုတွေကနေတစ်ဆင့် တည်ထောင်ကြပြီး ထိန်းသိမ်းစောင့်ရှောက်မှုကိုတော့ ပြည်သူ့ဘဏ္ဍာတိုက်ထဲက ကျခံသုံးစွဲတာ ဖြစ်ပါတယ်။ အစိုးရရဲ့ ဒီလို ထောက်ပံ့မှုကြောင့် အဲဒီဆေးရုံတွေဟာ ရာစုနှစ် ၂ ခုအတွင်း ဆေးသိပ္ပံဆိုင်ရာ အဓိကနေရာတွေ ဖြစ်လာခဲ့ပြီး လူထုအတွက် မရှိမဖြစ် ဖြစ်လာခဲ့ပါတော့တယ်။

မွတ်စလင်တွေမတိုင်ခင်က ဂရိတွေမှာ Healing temples လို့ခေါ်တဲ့ ဆေးကုသရာ နေရာတွေ ရှိခဲ့ပါတယ်။ ဒါပေမယ့် ကျန်းမာရေးစောင့်ရှောက်မှုတွေဟာ သိပ္ပံနည်းကျလေ့လာမှု၊ လက်တွေ့ကုသမှုတွေထက် ဂမ္ဘီရဆန်ဆန်သာ ဖြစ်ပါတယ်။ ဂရိက ဘိုင်ဇန်တိုင်း ပရဟိတအဖွဲ့ဖြစ်ပြီး ‘ခရီးသွားသူများ၏ နားခိုရာ’ လို့ အဓိပ္ပါယ်ရတဲ့ ‘ဇီနိုဒိုချီယွန်’ (Xenodocheion) ကတော့ နူနာစွဲတဲ့သူတွေ၊ နာတာရှည်ရောဂါသည်တွေနဲ့ ဆင်းရဲချို့တဲ့သူတွေကို ပြုစုကုသမှုတွေ ပြုလုပ်ခဲ့ပြီး ဆေးရုံတစ်ခုရဲ့ အင်္ဂါရပ်နဲ့ နီးစပ်သလောက် ရှိခဲ့ပါတယ်။

မွတ်စလင်တွေရဲ့ ဆေးရုံတွေဟာ ၈ ရာစု ဘဂ္ဂဒတ်မှာ စတင် ပေါ်ပေါက်ခဲ့တာပါ။ အဲဒီဆေးရုံတွေဟာ ဘိုင်ဇန်တိုင်းတွေရဲ့ ဇီနိုဒိုချီယွန်နဲ့ဆင်ပြီး ဆင်းရဲချို့တဲ့သူတွေ၊ နာတာရှည်ရောဂါသည်တွေနဲ့ နူနာစွဲသူတွေကို ကုသပေးခဲ့ပါတယ်။ ဒါပေမယ့် ပထမဆုံး စနစ်ကျတဲ့ ဆေးရုံတွေက သက္ကရာဇ် ၈၇၂ နဲ့ ၈၇၄ ကြား ကိုင်ရိုမှာ ပေါ်ထွက်လာခဲ့ပါတယ်။ အဟ်မဒ် အစ်ဗနေ့ တူလန် ဆေးရုံ (Ahmad ibn Tulun Hospital) ကတော့ လူနာအားလုံးကို ဆေးကုသမှုနဲ့ ဆေးဝါးထောက်ပံ့မှုကို အခမဲ့ ပြုလုပ်ပေးပါတယ်။ ဒါတင်မကသေးဘဲ အမျိုးသမီးနဲ့ အမျိုးသားတွေအတွက် သီးသန့်ရေချိုးခန်း၊ စာအုပ်စုံတဲ့ စာကြည့်တိုက်တစ်ခုလည်း ပါဝင်ပြီး အဲဒီအချိန်တုန်းက ခေတ်ရှေ့ပြေးလို့ ပြောလို့ရတဲ့ စိတ်ရောဂါဆိုင်ရာ ဌာနတစ်ခုကိုလည်း ထည့်သွင်းထားပါတယ်။ ဆေးရုံတက်ပြီဆိုတာနဲ့ လူနာတွေဟာ သူတို့ရဲ့ မူလအ၀တ်အစားတွေ၊ တန်ဖိုးရှိပစ္စည်းတွေကို ဆေးရုံတာဝန်ရှိသူတွေထံ အပ်နှံရပြီး၊ ဆေးရုံကထုတ်ပေးတဲ့ တူညီဝတ်စုံကို ၀တ်ဆင်ရသလို၊ ကုတင်ကိုလည်း ဆေးရုံက သတ်မှတ်ပေးပါတယ်။

“ဆေးရုံရဲ့တာဝန်က နေထိုင်မကောင်းသူတွေ၊ ချို့တဲ့သူတွေ၊ အမျိုးသား၊ အမျိုးသမီးမခြား ပြုစုစောင့်ရှောက်မှု ပေးဖို့ပါပဲ။ အာဏာရှိသူ၊ အာဏာမဲ့သူမရွေး၊ ဆင်းရဲ ချမ်းသာမရွေး၊ အရှင်သခင် လက်အောက်ငယ်သားမရွေး၊ နိုင်ငံသား နိုင်ငံခြားသားမရွေး အခကြေးငွေမယူဘဲ ကုသပေးမယ့် ဘုရားသခင်ရဲ့ ကျေနပ်မှုကို မျှော်ကိုးတဲ့ ဆေးရုံဖြစ်ပါတယ်” (ကိုင်ရိုရှိ အလ်-မန်ဆူရီဆေးရုံ၏ ခံယူချက်)

စောစောပိုင်း မွတ်စလင်ကမ္ဘာက အရေးပါတဲ့ ဆေးရုံတွေထဲမှာ သက္ကရာဇ် ၉၈၂ ခုနှစ်က ဆောက်လုပ်ခဲ့တဲ့ ဘဂ္ဂဒါဒီဆေးရုံ (Baghdadi Hospital) လည်း ပါဝင်ပြီး သမားတော် ၂၄ ဦးနဲ့ လည်ပတ်တာ ဖြစ်ပါတယ်။ ၁၂ ရာစု ဒမတ်စကတ်မှာ နူရီဆေးရုံ (Nuri Hospital) လို့ခေါ်တဲ့ ပိုပြီး ကြီးမားတဲ့ ဆေးရုံတစ်ခု ပေါ်ပေါက်ခဲ့ပါတယ်။ အဲဒီဆေးရုံမှာ ဆေးဝါးဆိုင်ရာ ညွှန်ကြားမှုတွေပေးသလို ဆေးဝါးပညာရှင်တွေ၊ ဆံသသမားတွေ၊ အရိုးအကြောပညာရှင်တွေ၊ မျက်စိအထူးကုနဲ့ သမားတော်တွေလည်း ရှိခဲ့တယ်လို့ ၁၃ ရာစုက ရေးသားခဲ့တဲ့ မှတ်တမ်းတွေမှာ တွေ့ရပါတယ်။

ကိုင်ရိုမှာ အင်မတန်ကောင်းမွန်တဲ့ ဆေးရုံကြီး ၃ ခု ရှိခဲ့ပြီး အဲဒီအထဲက အကျော်ကြားဆုံးကတော့ အလ်-မန်ဆူရီဆေးရုံ (Al-Mansuri) ဖြစ်ပါတယ်။ ၁၃ ရာစု အီဂျစ်ရဲ့ မမ်လွက်ဘုရင် (Mamluk) လက်ထက်မှာ အလ်-မန်ဆူရ် ကွာလာဝမ် (Al-Mansur Qalawun) ဟာ အိမ်ရှေ့မင်းသားအရာမှာပဲ ရှိပါသေးတယ်။ ဆီးရီးယားကို စစ်ချီတဲ့အခါမှာ ကျောက်ကပ်ရောဂါကို ခံစားခဲ့ရတဲ့ အလ်-မန်ဆူရ်ဟာ ဒမတ်စကတ်က နူရီဆေးရုံမှာ ကုသမှုခံယူခဲ့ပြီး   ဒီဆေးရုံကို အားကျခဲ့ပါတယ်။ ထီးနန်းအရိုက်အရာကို ဆက်ခံပြီးပြီးချင်း ဒီလို ဆေးရုံမျိုး တည်ဆောက်ဖို့ ဆုံးဖြတ်ချက် ချခဲ့ပြီး အဲဒီ သန္ဓိဌာန် အတိုင် အလ်-မန်ဆူရ်ဟာ ကိုင်ရိုမှာ အလ်-မန်ဆူရီ ဆေးရုံကို တည်ဆောက်ခဲ့ကာ အောက်ပါအတိုင်း ရည်စူးခဲ့ပါတယ်။

“အဆင့်တန်းတူသူ သာလွန်သူမရွေး၊ စစ်သား၊ မင်းဆွေမင်းမျိုးမရွေး၊ ဆင်းရဲချမ်းသာမရွေး၊ လွတ်လပ်သူ၊ ကျွန်ဖြစ်သူမရွေး၊ အမျိုးသား၊ အမျိုးသမီးမရွေး လူတိုင်းရဲ့ အကျိုးအတွက် ၀ကားဖ်လှူဒါန်းခြင်းဖြစ်ကြောင်း နီယသ်အဓိဌာန်ပြုပါသည်”

သက္ကရာဇ် ၁၂၈၄ ခုနှစ်မှ အလ်-မန်ဆူရီဆေးရုံကြီးကို ၀င်ပေါက် ၄ ခုနဲ့ တည်ဆောက်ခဲ့ပြီး ၀င်ပေါက် တစ်ခုချင်းဆီရဲ့အလယ်မှာ ရေပန်းတစ်ခုစီ ထားရှိပါတယ်။ ဆေးရုံမှာ သမားတော်တွေအစုံနဲ့ လူနာတွေအတွက် ဆေးပစ္စည်းအစုံရှိအောင်လည်း ဘုရင် အလ်-မန်ဆူရ်က စီစဉ်ပေးထားပါတယ်။ အမျိုးသားလူနာတွေကို ကုသပေးဖို့အတွက် အမျိုးသားဝန်ထမ်း၊ အမျိုးသမီးလူနာအတွက် အမျိုးသမီး ၀န်ထမ်းတွေကိုလည်း သီးသန့်ထားပေးထားပြီး အမျိုးသားဆောင်၊ အမျိုသမီးဆောင်ဆိုပြီး ခွဲခြားပေးထားပါတယ်။ အိပ်ယာတွေမှာလည်း မွေ့ယာတွေ ထားပေးထားပြီး သီးသန့်ဧရိယာတွေကိုလည်း လုပ်ထားပေးပါတယ်။ ဆေးရုံရဲ့နေရာတိုင်းမှာ ရေကို လိုသလိုဖွင့်သုံးလို့ရအောင် ဖန်တီးပေးထားကာ ဆေးရုံအုပ်ကြီးစာပြဖို့ သီးသန့်အခန်းတစ်ခုကိုလည်း ထားရှိပါတယ်။  ဆေးရုံတက်ဖို့အတွက် ဘယ်လိုကန့်သတ်ချက်မျိုးမှ မရှိဘဲ၊ ဆေးရုံထဲမှာရှိတဲ့ ဆေးဌာနကတော့ အိမ်မှာ ဆေးသောက်ရမယ့် လူနာတွေအတွက် ဆေးတွေကို တာဝန်ယူ ဖြန့်ဝေပေးပါတယ်။

အဲဒီလို အစောပိုင်းဆေးရုံကြီးတွေကို အတုယူပြီးတဲ့နောက် မွတ်စလင်ကမ္ဘာမှာ စနစ်ကျတဲ့ ဆေးရုံတွေ အလျှိုအလျှို ပေါ်ထွက်လာခဲ့ပြီး စပိန်က အန်ဒါလူစီယာ၊ စစ္စလီနဲ့ မြောက်အာဖရိကတို့အထိ ရောက်ရှိခဲ့ပါတော့တယ်။ မွတ်စလင်ကမ္ဘာက ဒီဆေးရုံတွေကို ဥရောပသားတွေက အားကျခဲ့ပြီး ‘သူရဲကောင်းများ၏ ဆေးရုံ’ လို့ အဓိပ္ပါယ်ရတဲ့ ဟော်စပီတာလီယာ (Hospitaliers) လို ပုံတူဆေးရုံတွေကို တည်ဆောက်ခဲ့ကြပါတယ်။ အဲဒီ ဟော်စပီတာလီယာဟာ ပြင်သစ်ကဆေးရုံပါ။ အီတလီတောင်ပိုင်းက နာမည်ကျော် ဆာလာနိုဆေးရုံ (Salerno) တို့လို   ဥရောပတောင်ပိုင်းက ဆေးရုံတော်တော်များများကို တည်ထောင်ရာမှာ မွတ်စလင်သမားတော်တွေ ပါဝင်ခဲ့ပါတယ်။

မွတ်စလင်ကမ္ဘာက ဆေးရုံတွေဟာ တော်တော်လေး ကောင်းကောင်းမွန်မွန်နဲ့ လည်ပတ်ခဲ့တာပါ။ ဥပမာပြောရရင် ၁၂ ရာစုက ခရီးသွားတစ်ယောက်ဖြစ်တဲ့ အစ်ဗနေ့ ဂျူဘိုင်းရ် (Ibn Jubayr) က (အဲဒီအချိန်တုန်းက ဆေးရုံးနဲ့တူတဲ့ ပထမဆုံး ဆေးရုံဖြစ်နိုင်တဲ့) အလ်-နူရီဆေးရုံက လူနာတွေအပေါ် ကုသမှုနဲ့ ပြုစုစောင့်ရှောက်မှုကို အခုလို ချီးကျူးခဲ့ပါတယ်။

“ဆေးရုံသစ် (အလ်-နူရီ) ဟာ (ဒမတ်စကတ်က ဆေးရုံ) နှစ်ခုထဲမှာ လူနာအများဆုံးနဲ့ အကြီးဆုံးပါ။ ဒီဆေးရုံရဲ့ တစ်နေ့တာ ကုန်ကျငွေဟာ ဒီနာရ်ရွှေဒင်္ဂါး ၁၅ ပြားဖြစ်ပါတယ်။ ဆေးရုံကို ကြီးကြပ်သူတစ်ဦး ရှိနေပြီး သူက လူနာရဲ့အမည်၊ ဆေးဝါး၊ အစားအသောက်နဲ့ အခြားပစ္စည်းပစ္စယာတွေအတွက် ကုန်ကျမှုတွေကို ရေးမှတ်ထားတဲ့ စာရင်းတွေကို ကိုင်ရပါတယ်။ သမားတော်တွေက မနက်တိုင်းလာပြီး လူနာတွေကို စစ်ဆေးတယ်၊ လိုအပ်တဲ့ဆေးတွေ၊ လူနာတစ်ဦးချင်းစီနဲ့ သင့်တော်မယ့် အဟာရတွေကို စီစဉ်ပေးပါတယ်”

အရှေ့အလယ်ပိုင်းတစ်ခွင်ကို ခရီးသွားခဲ့စဉ် သူဖြတ်သွားတဲ့ ဒေသအများစုက မြို့ကြီးတိုင်းမှာ ဆေးရုံတစ်ခုမက တွေ့ရတယ်လို့ အစ်ဗနေ့ ဂျူဘိုင်းရ်ဟာ မှတ်တမ်းတင်ခဲ့ပြီး၊ ဒီဆေးရုံတွေဟာ ‘အစ္စလာမ့် ဂုဏ်သိက္ခာရဲ့ အကြီးကျယ်ဆုံး သက်သေများထဲမှတစ်ခု’ လို့တောင် ကင်ပွန်းတပ်ခဲ့ပါတယ်။

မွတ်စလင်ကမ္ဘာက ဒီဆေးရုံတွေရဲ့ အတွေးအခေါ်တွေကလည်း အရှေ့ရောက်ပြီး ကိုယ်ခန္ဓာမှာ ခံစားရတဲ့ ဝေဒနာတွကိုသာ ကုသတာတင် မဟုတ်ပါဘူး။ ၉ ရာစု ဘဂ္ဂဒတ်ကဆေးရုံမှာ အလ်-ရာဇီဆိုတဲ့ မွတ်စလင် စွယ်စုံရပညာရှင်ကြီးဟာ စိတ်ကျန်းမာရေး ချို့တဲ့သူတွေကို ကုပေးဖို့အတွက် သီးသန့် အဆောင်တစ်ခုကို ထားရှိခဲ့ပါတယ်။

“စာအုပ်တွေမရှိဘဲနဲ့ ဆေးပညာလေ့လာသူတစ်ဦးဟာ အပြောကျယ်တဲ့ သမုဒ္ဒရာထဲမှာ လမ်းပျောက်နေသူတစ်ဦးနဲ့တူပြီး၊ လူနာမရှိဘဲ ဆေးပညာလေ့လာသူကတော့ သမုဒ္ဒရာပျောက်နေတဲ့သူနဲ့ တူပါတယ်” (ကနေဒါ သမားတော် ဆာ ၀ီလီယံ အော့စလာ (၁၈၄၉-၁၉၁၉))

ဆေးတက္ကသိုလ်

တက္ကသိုလ်ပါတွဲထားတဲ့ အဲဒီဆေးရုံတွေဟာ ဒီနေ့ခေတ်လိုမျိုးပဲ ဆေးကျောင်းသားအသစ်တွေ အခြေခံ ခိုင်မာစေဖို့ လေ့ကျင့်ပေးရာနေရာလည်း ဖြစ်ပါတယ်။ ဒါတင်မကသေးဘဲ လွန်ခဲ့တဲ့ နှစ်ပေါင်း ၈၀၀ လောက်က ဒီဆေးရုံတွေဟာ ဆေးကျောင်းသားတွေအတွက် စာတွေ့၊ လက်တွေ့ သင်ခန်းစာတွေကို ပထမဆုံး သင်ကြားပေးရာနေရာလည်း ဖြစ်ခဲ့ပါတယ်။

တစ်တစ်ယောက်ချင်းစီ သင်ကြားတဲ့စနစ်၊ အသင်းအဖွဲ့လိုက် သင်ကြားတဲ့စနစ်တွေ ရှိခဲ့ပါတယ်။ သင်ကြားပို့ချမှုကို ဆေးရုံက ဟောခန်းကြီးတစ်ခုမှာ ပြုလုပ်တာဖြစ်ပြီး၊ ပို့ချမယ့်အကြောင်းအရာကို သမားတော်ကြီးတစ်ဦးက ဆေးဘက်ဆိုင်ရာ စာအုပ်ထဲကနေ ဖတ်ပြကာ၊ ဆေးရုံအုပ်၊ ဒါမှမဟုတ် သမားတော်ချုပ်က ကျောင်းသားတွေနဲ့ အပြန်အလှန် ဆွေးနွေးကြတာ ဖြစ်ပါတယ်။

ဆေးကျောင်းသားအများစုဟာ ဆေးဘက်ဆိုင်ရာ အကြောင်းအရာတွေကို နာမည်ကျော် သမားတော်တွေနဲ့ ဆွေးနွေးလေ့ရှိနေပြီး အဲဒီအချိန် မွတ်စလင်ကမ္ဘာမှာ စက္ကူကို လိုသလောက် ထုတ်လုပ်နိုင်ပြီဖြစ်တာကြောင့် ဆေးကျောင်းသားတွေဟာ သူတို့တစ်ယောက်ချင်းစီ မှတ်သားထားတဲ့ မှတ်စုတွေကိုလည်း ကိုယ်တိုင် ထိန်းသိမ်းထားနိုင်ပါတယ်။ ဥရောပမှာတော့ ဒီလိုမှတ်စုတွေကို ကျောင်းသားတွေက ပိုင်ဆိုင်တယ်ဆိုတာ ရှားပါးပါတယ်။

သမားတော်ချုပ် ဒါမှမဟုတ် ဆေးရုံအုပ်ဆီက သင်ကြားမှုပြီးတဲ့အခါ တစ်ဆက်တည်းပြုလုပ်တဲ့ အုပ်စုလိုက် သင်ကြားမှုက ပိုပြီးအရေးပါပါတယ်။ ကျောင်းသားတွေဟာ သမားတော်တွေနဲ့ ပြင်ပလူနာဌာနကို လိုက်သွားရကာ ဆေးမှတ်တမ်းကြည့်ရှုပြီး လူနာတွေကို စမ်းသပ်စစ်ဆေးတာ၊ ညွှန်ကြားချက်ပေးတာတွေကို လေ့လာမှတ်သားရပါတယ်။

အဲဒီလို ဆေးရုံနဲ့တွဲထားတဲ့ ဆေးကျောင်းတွေထဲကတစ်ခုတော့ ဒမတ်စကတ်က အလ်-နူရီဆေးရုံ ဖြစ်ပါတယ်။ သမားတော် အဘူ အလ်-မဂျစ် အလ်-ဘာဟီလီ (Abu al-Majid al-Bahili) နဲ့ ၁၂ ရာစုက အုပ်ချုပ်သူ နူရ် အလ်-ဒင် အစ်ဗနေ့ ဇန်ဂီ (Nur al-Din ibn Zangi)  တို့ရဲ့ တိုက်ရိုက်ကြီးကြပ်မှုနဲ့အတူ ပေါ်ပေါက်လာတဲ့ ဒီဆေးရုံကို အုပ်ချုပ်သူရဲ့နာမည်တင်စားပြီး မှည့်ခေါ်ခဲ့တာ ဖြစ်ပါတယ်။ အစ်ဗနေ့ ဇန်ဂီဟာ ဆေးရုံးအတွက် လိုအပ်တဲ့ ဆေးဝါးကိရိယာတွေ၊ စားနပ်ရိက္ခာတွေ ထောက်ပံ့ပေးသလို ဆေးဘက်ဆိုင်ရာ စာအုပ်စာတမ်း တော်တော်များများကိုလည်း လှူဒါန်းခဲ့ပါတယ်။ အဲဒီစာအုပ်တွေကိုတော့ ဆေးရုံမှာ အထူးအဆောင်တစ်ခုလုပ်ကာ ထိန်းသိမ်းထားရှိပါတယ်။

အလ်-နူရီဆေးရုံဟာ ကျန်းမာရေးစောင့်ရှောက်မှုကဏ္ဍကို တစ်ခေတ်ဆန်းစေခဲ့ပါတယ်။ ၁၃ ရာစု အစောပိုင်းတုန်းက အလ်-ဒါခွါ (Al-Dakhwar) ဆိုတဲ့ သမားတော်တစ်ယောက်ဟာ အလ်-နူရီဆေးရုံမှာ လခနည်းနည်းနဲ့ အလုပ်ဝင်လုပ်ခဲ့ပေမယ့် ဆေးကုသရာမှာ နာမည်ကျော်ကြားလှတာကြောင့် အပြင်ပန်းဝင်ငွေ တော်တော်များများရရှိကာ ကြွယ်ဝခဲ့ပါတယ်။ အဲဒီငွေတွေနဲ့ အလ်-ဒါခွါဟာ ဒမတ်စကတ်မြို့ထဲမှာ ဆေးကျောင်းတစ်ခု ထူထောင်ခဲ့ပြီး ဒီနေ့ခေတ် ပုဂ္ဂလိကဆေးရုံနဲ့ ဆေးကျောင်းတို့ရဲ့ ရှေ့ပြေးလည်း ဖြစ်ပါတယ်။

အလ်နူရီဆေးရုံက ဆေးကျောင်းမှာ နာမည်ကြီးသမားတော်တွေ တော်တော်များများ သင်ကြားပို့ချကြပါတယ်။ တစ်ခါတစ်ရံမှာ သမားတော်တွေ၊ ဆေးဘက်ဆိုင်ရာ ကျွမ်းကျင်သူတွေဟာ ဘုရင် နူရ် အလ်-ဒင်ရဲ့ရှေ့မှောက် စုရုံးကာ ဆေးပညာရပ်အကြောင်း ဆွေးနွေးတာမျိုးတွေလည်း ရှိပါတယ်။ အလ်-နူရီဆေးရုံရဲ့ ဒါရိုက်တာ အဘူ အလ်-မဂျစ်ဟာ ဆေးကျောင်းသားတွေကို တစ်ခါသင်ကြားရင် ၃ နာရီလောက် ကြာမြင့်တတ်ပြီး ဆေးရုံက သမားတော်တွေလည်း လာရောက်နားထောင်လေ့ ရှိပါတယ်။ ၁၃ ရာစုက ဆေးဘက်ဆိုင်ရာ သမိုင်းပညာရှင် အစ်ဗနေ့ အဘီ အူဆေဘီယာ (Ibn Abi Usaybiah)၊   နှလုံးနဲ့ အဆုတ်အကြား သွေးလှည့်ပတ်မှုစနစ် (leser circulation) ကို ရှာဖွေတွေ့ရှိခဲ့တဲ့ အစ်ဗနေ့ အလ်-နာဖစ် (Ibn al-Hafis) တို့ဟာ အလ်-နူရီဆေးကျောင်းက ဘွဲ့ရရှိခဲ့တဲ့ နာမည်ကြီး မွတ်စလင်သမားတော်တွေထဲမှာ ပါဝင်ပါတယ်။ အလ်-နာဖစ်ရဲ့ ဒီ သွေးလှည့်ပတ်မှုစနစ်ကို တွေ့ရှိခြင်းဟာ လူသားရဲ့ ဇီဝကမ္မဗေဒကို ပိုမိုနားလည်ဖို့ ခြေလှမ်းတစ်ခုလည်း ဖြစ်ခဲ့ပါတယ်။

အလ်-ကွေရာဝမ်ဆေးရုံ

တူနီးရှားမှာ ၉ ရာစုက ပေါ်ထွန်းခဲ့တဲ့ ဒီဆေးရုံကြီးဟာ အဲဒီခေတ်အခါမှာတော့ အဆင့်အမြင့်ဆုံး ဆေးရုံကြီး ဖြစ်ပါတယ်။ ဧည့်သည်တွေအတွက် နားနေခန်း၊ ဆူဒန်က အမျိုးသမီးသူနာပြု၊ လူနာတွေ ၀တ်ပြုဖို့နဲ့ စာပေလေ့လာဖို့ ဗလီ၊ ပုံမှန်ဂျူတီဝင်တဲ့ သမားတော်တွေအပါအ၀င် အားလုံးကို စနစ်တကျ သတ်မှတ်ပေးထားသလို အရိုးအကျောပြင်ခြင်း၊ သွေးပုပ်ထုတ်ခြင်းနဲ့ ဖြတ်ထုတ်ကုသခြင်းတွေလို ကုသမှုတွေပေးတဲ့ ဖူကာဟာ အလ်-ဘာဒန် (Fuqaha al-Badan)  အဖွဲ့ကိုလည်း ထားရှိပါတယ်။ နောက်ပြီး နူနာစွဲတဲ့သူတွေကို ကုသပေးတဲ့ အထူးဆောင်တစ်ခုကို အလ်-ကွေရာဝမ်ဆေးရုံဘေးမှာ တည်ဆောက်ထားပြီး အဲဒီအဆောင်ကို ဒါရ် အလ်-ဂျုဒ်ဟာမာ (Dar al-judhama) လို့ ခေါ်ပါတယ်။ အဲဒီအချိန်တုန်းက နူနာစွဲသူတွေကို ကုသမပေးဘဲ မကောင်းဆိုးဝါးတွေလို ပစ်ပယ်ထားတဲ့ ကာလမျိုးပါ။ ဒီ အလ်-ကွေရာဝမ်ဆေးရုံကို နိုင်ငံတော်ဘဏ္ဍာကနေ ထောက်ပံ့ပေးတာဖြစ်ပြီး၊ စေတနာရှင်တွေရဲ့ လှူဒါန်းမှုတွေကိုလည်း လက်ခံတာကြောင့် ဘဏ္ဍာရေးတောင့်တင်းကာ အကောင်းဆုံး ကျန်မာရေးစောင့်ရှောက်မှုကို ပေးနိုင်ခဲ့ပါတယ်။

(ကိုးကား- National Geographic ၏ 1001 Inventions – The Enduring Legacy of Muslim Civilization)

(ကမ္ဘာ့လူ့အဖွဲ့အစည်းတွင် ယနေ့တိုင်ရှင်ကျန်နေသည့် မွတ်စလင်တို့၏ အမွေအနှစ်များ – တင်ဆက်ပြီးသမျှ အပိုင်းအားလုံးကို  ဤနေရာ တွင် ဖတ်ရှုနိုင်ပါသည်။