Tag: Asean

မေ ၂၊ ၂၀၂၄

M-Media 

-နာမည်ကြီး ကွန်ပျူတာကုမ္ပဏီ မိုက်ခရိုဆော့ဖ်အကြီးအကဲ ဆတ်ယာ နာဒဲလာရဲ့ အရှေ့တောင်အာရှ ၃ နိုင်ငံ ခရီးစဥ်မှာ ဒေါ်လာ ဘီလီယံပေါင်းများစွာ ရင်းနှီးမြှုပ်နှံမယ့် စီမံကိန်းတွေကို ထုတ်ပြန် ကြေငြာသွားခဲ့ပါတယ်။ 

ဉာဏ်ရည်တု နည်းပညာ (AI)၊ Cloud services နဲ့ ဒေတာစင်တာ နယ်ပယ်တွေမှာ ရင်းနှီးမြှုပ်နှံမှာဖြစ်ပြီး ထိုင်း၊ မလေးရှားနဲ့ အင်ဒိုနီးရှားတို့က ဒီစီမံကိန်းတွေကို ရရှိခဲ့ပါတယ်။ 

မလေးရှား

မလေးရှားနိုင်ငံမှာ လာမယ့်လေးနှစ်အတွင်း ကန်ဒေါ်လာ ၂ ဒဿမ ၂ ဘီလီယံဖိုး မိုက်ခရိုဆော့ဖ်က ရင်းနှီးမြှုပ်နှံမှာဖြစ်ပြီး နိုင်ငံရဲ့သမိုင်းမှာ ၃၂ နှစ်အတွင်း နိုင်ငံရပ်ခြားက အကြီးမားဆုံး ရင်းနှီးမှုလည်း ဖြစ်ပါတယ်။ 

AI နဲ့ Cloud services ဆိုင်ရာ အဆောက်အဦးတွေကို မလေးရှားမှာ တည်ဆောက်မှာဖြစ်ပြီး မလေးရှားနိုင်ငံသား ၂ သိန်းလောက်ကိုလည်း AI နည်းပညာဆိုင်ရာ လေ့ကျင့်သင်ကြားကာ မြေတောင်မြှောက်ပေးမယ်လို့ ဆိုပါတယ်။ 

အင်ဒိုနီးရှား

မိုက်ခရိုဆော့ဖ်ဟာ အင်ဒိုနီးရှားမှာ နောက် ၄ နှစ်အတွင်း ကန်ဒေါ်လာ ၁ ဒဿမ ၇ ဘီလီယံဖိုး ရင်းနှီးမြှုပ်နှံမှာပါ။ 

ဒီရင်းနှီးမြှုပ်နှံမှုကနေ နောက်ဆုံးပေါ် အကောင်းဆုံး AI နည်းပညာဆိုင်ရာ အခြေခံအဆောက်အဦးတွေ အင်ဒိုနီးရှားမှာ ပေါ်ထွန်းလာလိမ့်မယ်လို့ နာဒဲလာက သူ့ရဲ့မိန့်ခွန်းမှာ ထည့်သွင်းပြောဆိုခဲ့ပါတယ်။ 

AI ဆိုင်ရာ သုတေသနတွေ၊ စွမ်းဆောင်ရည်မြှင့်တင်ပေးမှု လုပ်ငန်းတွေကိုလည်း မိုက်ခရိုဆော့ဖ်က အင်ဒိုနီးရှားမှာ လုပ်ဆောင်ပေးသွားမှာ ဖြစ်ပါတယ်။ 

မကြာခင် ရာထူးသက်တမ်းကုန်တော့မယ့် အင်ဒိုနီးရှားသမ္မတ ဂျိုကို ၀ီဒိုဒိုက ဒေတာစင်တာတွေကို ဘာလီကျွန်း ဒါမှမဟုတ် အသစ်ဆောက်နေတဲ့ မြို့တော် နူဆန်တာရာမှာ အခြေစိုက်ဖို့ မိုက်ခရိုဆော့ဖ်ကို အကြံပေးခဲ့ပါတယ်။ 

ထိုင်း

ထိုင်းနိုင်ငံမှာတော့ မိုက်ခရိုဆော့ဖ်ဟာ သူတို့ရဲ့ အာရှဒေသအတွင်း ပထမဆုံး ဒေတာစင်တာကို ဆောက်လုပ်သွားမယ်လို့ နာဒဲလာက ပြောပါတယ်။ 

ထိုင်းနိုင်ငံသား လူငယ် တစ်သိန်းလောက်ကို AI နည်းပညာဆိုင်ရာ လေ့ကျင့်သင်ကြားပေးကာ၊ ဆော့ဖ်၀ဲပညာရှင်တွေကိုလည်း မိုက်ခရိုဆော့ဖ်က မြေတောင်မြှောက်ပေးသွားမှာ ဖြစ်ပါတယ်။ 

ထိုင်း၀န်ကြီးချုပ် ဆရက်သာ ထိုင်ဗီဆင်က မိုက်ခရိုဆော့ဖ်ရဲ့ ရင်းနှီးမြှုပ်နှံမှုဟာ ထိုင်းနိုင်ငံရဲ့ ဒစ်ဂျစ်တယ်စီးပွားရေး ယှဥ်ပြိုင်နိုင်စွမ်းကို ပိုမိုအားကောင်းစေလိမ့်မယ်လို့ ဆိုရှယ်မီဒီယာမှာ ရေးသားခဲ့ပါတယ်။ 

၂၀၂၅ ခုနှစ်ရောက်ရင် အာဆီယံဒေသက လူပေါင်း ၂ ဒဿမ ၅ သန်းလောက် သူတို့ရဲ့ AI နည်းပညာကို အသုံးပြုနိုင်ဖို့ မိုက်ခရိုဆော့ဖ်က ရည်မှန်းထားပါတယ်။

Ref: Reuters 

သြဂုတ် ၁၆၊ ၂၀၂၃

M-Media 

-၂၀၂၆ ခုနှစ် အာဆီယံ ဥက္ကဌနေရာကို မြန်မာနိုင်ငံက တာ၀န်ယူမှာမဟုတ်ကြောင်း အရှေ့တောင်အာရှ သံတမန်အသိုင်းအ၀ိုင်းကနေ သတင်းထွက်လာပါတယ်။ 

လက်ရှိ အာဆီယံဥက္ကဌဟာ အင်ဒိုနီးရှားဖြစ်ပြီး ၂၀၂၄ ခုနှစ်မှာ လာအို၊ ၂၀၂၅ ခုနှစ်မှာ မလေးရှားတို့က အသီးသီး တာ၀န်ယူကြမှာပါ။ ၂၀၂၆ ခုနှစ်မှာ မြန်မာနိုင်ငံအလှည့် ကျရောက်မှာဖြစ်ပြီး ပြည်တွင်းရေး အခြေအနေကြောင့် ဥက္ကဌတာ၀န်ထမ်းဆောင်ဖို့ အဆင်သင့်မဖြစ်သေးဘူးလို့ အာဏာသိမ်း စစ်ကောင်စီက ပြောပါတယ်။ 

ဒါဟာ ဖြစ်ပေါ်နေတဲ့ နိုင်ငံရေးအကြပ်အတည်းကို ၂၀၂၆ ခုနှစ်အထိ စစ်ကောင်စီက ဖြေရှင်းပေးမှာမဟုတ်ဘူးဆိုတဲ့ သဘောထားလည်း ဖြစ်ပါတယ်။ 

၂၀၂၆ ခုနှစ် အာဆီယံဥက္ကဌနေရာကို ဖိလစ်ပိုင်က တာ၀န်ယူမှာဖြစ်ပြီး ၂၀၂၇ ခုနှစ်ရောက်မှ မြန်မာက တာ၀န်ယူဖို့ ရှိနေပါတယ်။

၂၀၂၁ ခုနှစ် ဖေဖော်၀ါရီ ၁ ရက်နေ့ မြန်မာစစ်တပ်က အာဏာသိမ်းပြီးနောက်ပိုင်း ဖြစ်ပေါ်လာတဲ့ အခြေအနေကို ဖြေရှင်းဖို့အတွက် အာဆီယံက ကြိုးပမ်းခဲ့ပေမယ့် စစ်ကောင်စီက ပူးပေါင်းဆောင်ရွက်ခြင်း မရှိပါဘူး။ 

ဒါကို တုန့်ပြန်တဲ့အနေနဲ့ အာဆီယံက မြန်မာစစ်ခေါင်းဆောင်တွေကို အရေးပါတဲ့ အစည်းအ၀ေးတွေမှာ ကိုယ်စားပြုခွင့် မပေးခဲ့ပါဘူး။ 

စစ်အာဏာရှင်ဟောင်းလက်ထက် ၂၀၀၆ ခုနှစ်ကလည်း မြန်မာနိုင်ငံဟာ အာဆီယံဥက္ကဌရာထူးကို လက်လွှတ်ခဲ့ဖူးပြီး လာအိုနိုင်ငံက အစားထိုး တာ၀န်ယူခဲ့ပါတယ်။ 

Ref:Thai PBS

သြဂုတ် ၇၊ ၂၀၂၃
M-Media 

-မြန်မာနိုင်ငံက ပြဿနာကို အာဆီယံအဖွဲ့က ဖြေရှင်းမပေးနိုင်ဘူးဆိုရင် အဖွဲ့၀င်ဖြစ်ရေး လျှောက်ထားမှုကို ပြန်လည်စဥ်းစားသုံးသပ်သွားမယ်လို့ တီမောလက်စ်တေက ထုတ်ပြန်ပါတယ်။ 

၀န်ကြီးချုပ် ဆာနာနာ ဂက်စ်မာအိုက မိမိတို့တိုင်းပြည်ဟာ ဒီမိုကရေစီစနစ် ကျင့်သုံးနေပြီး ဒေသတွင်း စစ်အာဏာရှင်စနစ်ကို လက်ခံမှာမဟုတ်ကြောင်း၊ မြန်မာစစ်တပ်ရဲ့ လူ့အခွင့်အရေး ချိုးဖောက်မှုကို လစ်လျူရှုမှာမဟုတ်ကြောင်း ကြာသာပတေးနေ့က ဖွင့်ဟ ပြောကြားခဲ့ပါတယ်။  

“(ပဋိပက္ခအဆုံးသတ်ရေး) မြန်မာစစ်အာဏာရှင်ကို အာဆီယံက မစည်းရုံးနိုင်ဘူးဆိုရင် တီမောလက်စ်တေက ဒီအဖွဲ့ကို ၀င်မှာမဟုတ်ပါဘူး” 

၂၀၂၁ ခုနှစ် ဖေဖော်၀ါရီ ၁ ရက်နေ့ မြန်မာနိုင်ငံမှာ စစ်အာဏာသိမ်းပြီးကတည်းက အာဆီယံဟာ ဒီပြဿနာကို ဖြေရှင်းဖို့ ကြိုးစားခဲ့တာပါ။

စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်နဲ့ ဘုံသဘောတူညီချက် ၅ ရပ် သဘောတူခဲ့ပေမယ့် စစ်ကောင်စီဖက်က အကောင်အထည်ဖော်မှု မရှိပါဘူး။ 

လက်ရှိ အာဆီယံ ဥက္ကဌ အင်ဒိုနီးရှားက မြန်မာ့အရေး ဖြေရှင်းနိုင်ဖို့ သက်ဆိုင်သူအားလုံးနဲ့ အကြိမ်တော်တော်များများ တွေ့ဆုံဆွေးနွေးမှု ပြုလုပ်ထားတယ်လို့ ထုတ်ပြန်ထားပါတယ်။ 

Ref: Jakarta Post