Tag: Asean

မေ ၅၊ ၂၀၂၂

M-Media 

-မတည်မငြိမ်ဖြစ်နေတဲ့ မြန်မာနိုင်ငံကို လူသားချင်းစာနာထောက်ထားမှုဆိုင်ရာ အကူအညီတွေပေးနိုင်ရေး အာဆီယံနိုင်ငံတွေက သောကြာနေ့မှာ ဆွေးနွေးပွဲတစ်ခု လုပ်ဖို့ရှိနေပါတယ်။ 

မြန်မာနိုင်ငံဆိုင်ရာ အာဆီယံအထူးကိုယ်စားလှယ် ပရက်ဆိုခွန်၊ အာဆီယံ လူသားချင်းစာနာထောက်ထားမှုဆိုင်ရာ ညှိနှိုင်းရေးမှုး ဖြစ်တဲ့ အာဆီယံ အထွေထွေအတွင်းရေးမှုး လင်ဂျွတ်ဟွေတို့က ဒီဆွေးနွေးပွဲကို ဦးဆောင်မှာပါ။ 

ဆွေးနွေးပွဲကို ကမ္ဘောဒီးယားမြို့တော် ဖနွမ်းပင်မှာလုပ်မှာဖြစ်ပြီး အာဆီယံအဖွဲ့၀င်နိုင်ငံအားလုံးက အဆင်မြင့်အရာရှိတွေ၊ ကုလသမဂ္ဂနဲ့ နိုင်ငံတကာအဖွဲ့အစည်းက တာ၀န်ရှိသူတွေ တစ်ချို့ လူကိုယ်တိုင် တက်ရောက်ကာ၊ တစ်ချို့ကတော့ အွန်လိုင်းက တက်ရောက်မှာ ဖြစ်ပါတယ်။ 

လူသားချင်းစာနာထောက်ထားမှုဆိုင်ရာ မူတွေကို အခြေခံကာ ခွဲခြားမှုမရှိဘဲ မြန်မာနိုင်ငံအတွင်းက လူ့အဖွဲ့အစည်းအားလုံးကို အကူအညီတွေပေးနိုင်ရေး လမ်းညွှန်ချက်တစ်ရက် ထွက်လာစေမယ့် ဆွေးနွေးပွဲမျိုး ဖြစ်လိမ့်မယ်လို့ ကမ္ဘောဒီးယားရဲ့ မနေ့ကထုတ်ပြန်ချက်မှာ ဖော်ပြထားပါတယ်။ 

ကမ္ဘောဒီးယားဟာ အခုနှစ် အာဆီယံအဖွဲ့ ဥက္ကဌအဖြစ် တာ၀န်ယူထားတာပါ။ 

မြန်မာနိုင်ငံကို အကူအညီပေးရေးမှာ အာဆီယံ လူသားချင်း စာနာထောက်ထားမှုဆိုင်ရာ အဖွဲ့အစည်းက ရင်ဆိုင်နေရတဲ့ စိန်ခေါ်မှုတွေ၊ ကိုဗစ်ကာကွယ်ဆေးကို လူ့အဖွဲ့အစည်းတိုင်းရအောင် ဆောင်ရွက်နိုင်ရေး ကိစ္စတွေကို အစည်းအ၀ေးမှာ ဆွေးနွေးဖို့ ရှိနေပါတယ်။ 

Ref: The Star 

ဇန်နဝါရီ ၂၉၊ ၂၀၂၂
M-Media

-အာဆီယံ နိုင်ငံခြားရေးဝန်ကြီးများအစည်းအဝေးကို လာမယ့် ဖေဖော်ဝါရီ ၁၆ ရက်နေ့မှာ ကျင်းပမှာဖြစ်ပြီး မြန်မာနိုင်ငံမှာ လူသားချင်းစာနာထောက်ထားမှုဆိုင်ရာ အကူအညီပေးရေးကိစ္စ ဆွေးနွေးသွားမယ်လို့ ကမ္ဘောဒီးယားက ဒီကနေ့မှာ ထုတ်ပြန်ပါတယ်။

ကမ္ဘောဒီးယားဟာ ၂၀၂၂ ခုနှစ် အာဆီယံ ဥက္ကဌအဖြစ် တာဝန်ယူမှာပါ။ အစည်းအဝေးမကျင်းပခင် ကမ္ဘောဒီးယား နိုင်ငံခြားရေးဝန်ကြီး ပရက်ဆိုခွန် မြန်မာနိုင်ငံကို သွားရောက်မှာ ဖြစ်ပါတယ်။ ဆိုခွန်ဟာ မြန်မာနိုင်ငံဆိုင်ရာ အာဆီယံ အထူးကိုယ်စားလှယ်အဖြစ်လည်း တာဝန်ယူထားပါတယ်။

ကမ္ဘောဒီးယား နိုင်ငံခြားရေးဝန်ကြီးဌာနက ထုတ်ပြန်ချက်မှာတော့ ဆိုခွန်ရဲ့ခရီးစဉ်မှာ ပြီးခဲ့တဲ့နှစ်က ရရှိတဲ့ အာဆီယံသဘောတူညီချက် ၅ ချက် အကောင်အထည်ဖော်ရေးကို စစ်ကောင်စီနဲ့ ဆွေးနွေးမှာဖြစ်ပြီး အာဆီယံနိုင်ငံခြားရေးဝန်ကြီးများအစည်းအဝေးမှာ ပြန်လည်တင်ပြလိမ့်မယ်လို့ ဖော်ပြထားပါတယ်။

ဇန်နဝါရီလ အစပိုင်းမှာ ကမ္ဘောဒီးယားဝန်ကြီးချုပ် ဟွန်ဆန် မြန်မာနိုင်ငံကိုသွားရောက်ကာ အာဏာသိမ်းစစ်ကောင်စီ ခေါင်းဆောင်တွေနဲ့ တွေ့ဆုံမှုကို အာဆီယံအဖွဲ့ဝင်နိုင်ငံတွေက မကျေနပ်တဲ့အတွက် ဇန်နဝါရီ နှောင်းပိုင်းမှာလုပ်ဖို့ စီစဉ်ထားတဲ့ အာဆီယံနိုင်ငံခြားရေးဝန်ကြီးများအစည်းအဝေးကို ဖျက်သိမ်းခဲ့ရပါတယ်။

Ref: Reuters

နို၀င်ဘာ ၂၂၊ ၂၀၂၁
M-Media

-တရုတ်-အာဆီယံ ခေါင်းဆောင်တွေရဲ့ ထိပ်သီးအစည်းအ၀ေးကို ဒီကနေ့ စတင်ကျင်းပခဲ့ပြီး မြန်မာနိုင်ငံက အာဏာသိမ်း စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင် တက်ရောက်ခွင့် မရပါဘူး။

အွန်လိုင်းကပြုလုပ်တဲ့ ဒီထိပ်သီးအစည်း၀ေးကို မြန်မာစစ်ခေါင်းဆောင်တက်ရောက်ဖို့ တရုတ်ဖက်က ကြိုးပမ်းခဲ့ပေမယ့် အာဆီယံနိုင်ငံတွေက ကန့်ကွက်ခဲ့တာ ဖြစ်ပါတယ်။

မလေးရှားနိုင်ငံခြားရေး၀န်ကြီး ဆိုက်ဖူဒင် အဘ်ဒူလာက အစည်းအ၀ေးမှာ ဗိုလ်ချုပ်မှူးကြီးမင်းအောင်လှိုင်ကို တက်ခွင့်မပေးဖို့ အာဆီယံနဲ့ တရုတ်တို့ သဘောတူခဲ့တယ်လို့ မီဒီယာတွေကို ပြောပါတယ်။

မြန်မာအာဏာသိမ်းစစ်ကောင်စီဖက်က ဒီကိစ္စနဲ့ပတ်သက်ပြီး ထုတ်ပြန်တာမျိုး မရှိသေးပါဘူး။

စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်ဟာ အောက်တိုဘာလအတွင်းက ကျင်းပပြုလုပ်တဲ့ အာဆီယံ ထိပ်သီးအစည်း၀ေးကိုလည်း တက်ခွင့်မရပါဘူး။ ဖေဖော်၀ါရီ ၁ ရက်နေ့ စစ်တပ်က အာဏာသိမ်းပြီးနောက်ပိုင်း မြန်မာနိုင်ငံမှာ ဖြစ်ပေါ်လာတဲ့ မတည်ငြိမ်မှုတွေကို ဖြေရှင်းရေး အာဆီယံနဲ့ ရရှိထားတဲ့ သဘောတူညီချက်တွေကို မလိုက်နာတဲ့အတွက် အစည်းအ၀ေးတက်ရောက်ခွင့် ပိတ်ပင်တာလို့ အာဆီယံဖက်က သတင်းထုတ်ပြန်ပါတယ်။

နိုင်ငံရေးဖက်က မဟုတ်တဲ့ စစ်ကောင်စီနိုင်ငံခြားရေး၀န်ကြီးဌာနက အကြီးတန်းတာ၀န်ရှိသူတစ်ဦးကို အာဆီယံက အောက်တိုဘာထိပ်သီးအစည်းအ၀ေး တက်ခွင့်ပေးပေမယ့် စစ်ကောင်စီက မစေလွှတ်ခဲ့ပါဘူး။

အဖွဲ့၀င်နိုင်ငံတစ်ခုကို အခုလို ဖယ်ကျဥ်တာဟာ အာဆီယံသမိုင်းမှာ မကြုံစဖူးကိစ္စလည်း ဖြစ်ပါတယ်။

Ref: CNA