News @ M-Media

မြန်မာပြည်သူများအား ကူညီရန်ပင် မလွယ်ကူဟု အာဆီယံအထူးကိုယ်စားလှယ် ပြော

မေ ၉၊ ၂၀၂၂

M-Media 


-မြန်မာနိုင်ငံကို လူသားချင်းစာနာထောက်ထားမှုဆိုင်ရာ အကူအညီတွေ ပေးအပ်ရေး ဆောင်ရွက်နေရာမှာ တိုးတက်မှုတွေ ရှိနေပမယ့် အခက်အခဲအများအပြား ကျန်ရှိနေတယ်လို့ မြန်မာနိုင်ငံဆိုင်ရာ အာဆီယံ အထူးကိုယ်စားလှယ် ပရက်ဆိုခွန်က ပြောပါတယ်။ 

အာဆီယံအဖွဲ့၀င်နိုင်ငံတွေ၊ အကူအညီပေးရေးအဖွဲ့အစည်းတွေက တာ၀န်ရှိသူတွေဟာ မေလ ၆ ရက်နေ့က ကမ္ဘောဒီယားနိုင်ငံ ဖနွမ်ပင်မြို့မှာ အစည်းအ၀ေးလုပ်ပြီး မြန်မာပြည်သူတွေကို အကူအညီပေးနိုင်ရေး ဆွေးနွေးခဲ့ကြတာပါ။ 

ဒီအစည်းအ၀ေးကို အာဏာသိမ်းစစ်ကောင်စီခန့်၀န်ကြီး ဦကိုကိုလှိုင် ဦးဆောင်တဲ့အဖွဲ့လည်း တက်ရောက်ခဲ့ပါတယ်။ 

အစည်းအ၀ေးမှာ အကူအညီပေးရေးကဏ္ဍမှာ ရှိနေတဲ့ စိန်ခေါ်မှုတွေကို ဖြေရှင်းနိုင်ရေး၊ အာဆီယံ လူသားချင်း စာနာထောက်ထားမှုဆိုင်ရာ ကူညီထောက်ပံ့မှုအတွက် မူဘောင်တစ်ခုနဲ့ ကိုဗစ်ကာကွယ်ဆေး စီမံမှုဆိုင်ရာ မူဘောင်တစ်ခု ချမှတ်ရေး အဓိကထား ဆွေးနွေးခဲ့ကြပါတယ်။ 

ကယားပြည်နယ်၊ ကရင်ပြည်နယ်၊ မကွေးတိုင်းဒေသကြီး၊ စစ်ကိုင်းတိုင်းဒေသကြီးနဲ့ ပဲခူးတိုင်းဒေသကြီးတွေကို အကူအညီတွေ အရင်ဆုံး ပေးအပ်ရေး အစည်းအ၀ေးမှာ ဆုံးဖြတ်ခဲ့ကြပါတယ်။ 

ဦးကိုကိုလှိုင်ဦးဆောင်တဲ့အဖွဲ့ကလည်း သူတို့အလုပ်အဖွဲ့ဟာ ထိထိရောက်ရောက် အကူအညီပေးရေး ဆောင်ရွက်သွားဖို့ သဘောတူညီခဲ့ကြပြီး လုပ်ငန်းတွေမဆောင်ရွက်ခင် လိုအပ်တဲ့ စာရွက်စာတမ်းတွေ အရင်ဆုံး ပေးအပ်ဖို့ တောင်းဆိုခဲ့ပါတယ်။ 

စစ်ကောင်စီခန့်အဖွဲ့ကို အာဆီယံက အစည်းအ၀ေး တက်ရောက်ခွင့်ပြုမှုအတွက် ၀ေဖန်မှုတွေလည်း ရှိနေပါတယ်။ 

Ref: The Star