News @ M-Media

Tag: Asean

  • အာဆီယံထိပ်သီးအစည်းအဝေးတွင် မြန်မာအာဏာသိမ်းစစ်ခေါင်းဆောင်ကို ပြင်းပြင်းထန်ထန် ဝေဖန်

    အာဆီယံထိပ်သီးအစည်းအဝေးတွင် မြန်မာအာဏာသိမ်းစစ်ခေါင်းဆောင်ကို ပြင်းပြင်းထန်ထန် ဝေဖန်

    အောက်တိုဘာ ၂၆၊ ၂၀၂၁
    M-Media

    -ဒီကနေ့မှာ စတင်ကျင်းပတဲ့ အာဆီယံထိပ်သီးအစည်းအဝေး အဖွင့်မိန့်ခွန်းမှာ ခေါင်းဆောင်တွေက မြန်မာအာဏာသိမ်းစစ်ကောင်စီကို ပြင်းပြင်းထန်ထန် ဝေဖန်ပြောဆိုလိုက်ပါတယ်။

    ဖေဖော်ဝါရီလ ၁ ရက်နေ့ စစ်တပ်က အာဏာသိမ်းပြီးနောက်ပိုင်း မြန်မာနိုင်ငံမှာ ဖြစ်ပေါ်လာတဲ့ မတည်ငြိမ်မှုတွေကို ဖြေရှင်းရေး အာဆီယံရဲ့ အစီအစဉ်တွေကို ပူးပေါင်းဆောင်ရွက်မှု မရှိတဲ့အတွက် အာဏာသိမ်းစစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်ကို အာဆီယံက ထိပ်သီးအစည်းအဝေး တက်ခွင့် မပေးပါဘူး။

    ဒါဟာ နှစ် ၆၀ နီးပါး သက်တမ်းရှိပြီဖြစ်တဲ့ အာဆီယံအဖွဲ့က အဖွဲ့ဝင်နိုင်ငံတစ်ခုအပေါ် ထူးထူးခြားခြား ဖယ်ကျဉ်မှုဖြစ်ပါတယ်။ စစ်ကောင်စီ နိုင်ငံခြားရေးဝန်ကြီးဌာန အမြဲတမ်းအတွင်းဝန် ဦးချမ်းအေးကို နိုင်ငံရေးနယ်ပယ်က မဟုတ်တဲ့ မြန်မာကိုယ်စားလှယ်အဖြစ် အာဆီယံက ဖိတ်ကြားခဲ့ပေမယ့် မြန်မာစစ်ကောင်စီက ခေါင်းဆောင်ကိုဖိတ်မှ တက်ရောက်မယ်လို့ အကြောင်းပြန်ခဲ့ပါတယ်။

    လာမယ့်နှစ်မှာ အာဆီယံဥက္ကဌအဖြစ် တာဝန်ယူမယ့် ကမ္ဘောဒီယားဝန်ကြီးချုပ် ဟွန်ဆန်က စစ်ကောင်စီဟာ ကိုယ့်အခွင့်အရေးကို ကိုယ်တိုင်စွန့်လွှတ်လိုက်တာ ဖြစ်တယ်လို့ ဒီနေ့ အဖွင့်မိန့်ခွန်းမှာ ပြောကြားခဲ့ပါတယ်။

    “ဒီကနေ့ အာဆီယံဟာ မိမိတို့ရဲ့ မူဘောင်စည်းမျဉ်းကနေ မြန်မာနိုင်ငံကို ထုတ်ပယ်လိုက်တာ မဟုတ်ပါဘူး။ မြန်မာကသာ ကိုယ့်အခွင့်အရေးကို ကိုယ်တိုင်စွန့်လွှတ်လိုက်တာပါ။ အခု အာဆီယံက အနှုတ်-၁ ဖြစ်သွားတဲ့ အခြေအနေမျိုးပါ။ ဒါဟာ အာဆီယံအဖွဲ့ကြောင့်မဟုတ်ဘဲ မြန်မာနိုင်ငံကြောင့်သာ ဖြစ်ပါတယ်”

    အင်ဒိုနီးရှားနိုင်ငံခြားရေးဝန်ကြီး ရက်တနိုမာဆူဒီကလည်း ထိပ်သီးအစည်းအဝေးမှာ မြန်မာနိုင်ငံအတွက် နေရာတစ်ခု အဆင်သင့်ရှိပေမယ့် မြန်မာကိုယ်တိုင်က မတက်ဖို့ ရွေးချယ်ခဲ့တာဖြစ်တယ်လို့ ပြောကြားခဲ့ပါတယ်။

    အင်ဒိုနီးရှားသမ္မတ ဂျိုကိုဝီဒိုဒိုဟာ မြန်မာပြဿနာ ဖြေရှင်းရေး အာဆီယံက သံတမန်နည်းလမ်းနဲ့ ကြိုးပမ်းမှုတွေကို စစ်ကောင်စီက လက်မခံတဲ့ အပြုအမူအပေါ် စိတ်ပျက်ရတယ်လို့ မှတ်ချက်ပေးခဲ့ကြောင်း ထည့်ပြောခဲ့တယ်လို့ မာဆူဒီက ဆိုပါတယ်။

    “ဝင်မစွက်ရေးမူဝါဒကို အလေးထားဖို့ အရေးကြီးတယ်လို့ သမ္မတက ပြောပါတယ်။ ဒါပေမယ့် တစ်ခြားတစ်ဖက်မှာလည်း ဒီမိုကရေစီထွန်းကားရေး၊ ကောင်းမွန်တဲ့ အုပ်ချုပ်ရေး၊ လူ့အခွင့်အရေးကို လေးစားရေး၊ ဖွဲ့စည်းပုံနဲ့ညီတဲ့ အစိုးရတစ်ရပ် ပေါ်ပေါက်လာရေးလို အခြားမူဝါဒတွေကို ထိန်သိမ်းဖော်ဆောင်ဖို့ ကျွန်မတို့မှာ တာဝန်ရှိပါတယ်”

    အာဏာသိမ်းကာ ဝန်ကြီးချုပ်ဖြစ်လာတဲ့ ထိုင်းဝန်ကြီးချုပ် စစ်ခေါင်းဆောင်ဟောင်း ပရာယွတ် ချန်အိုချာက စစ်ကောင်စီအနေနဲ့ အာဆီယံက အဆိုပြုထားတဲ့ သဘောတူညီချက် ၅ ချက်ကို လိုက်နာဖို့ တိုက်တွန်းခဲ့ပါတယ်။ ချန်အိုချာဟာ မြန်မာစစ်ခေါင်းဆောင်နဲ့ နီးကပ်တဲ့ဆက်ဆံရေး ရှိသူ ဖြစ်ပါတယ်။

    မြန်မာပြဿနာဖြေရှင်းရေးဟာ အာဆီယံအဖွဲ့ရဲ့ ဂုဏ်သတင်းအတွက် အရေးပါတဲ့ စမ်းသပ်မှုတစ်ခု ဖြစ်တယ်လို့လည်း ပရာယွတ်က ထည့်သွင်းပြောဆိုခဲ့ပါတယ်။

    “ဒီပြဿနာကိုဖြေရှင်းရေး အာဆီယံက အပြုသဘောဆောင်တဲ့ အခန်းကဏ္ဍကနေ ပါဝင်ဖို့ဟာ အလွန်အရေးပါပြီး ကျွန်တော်တို့ရဲ့ ဆောင်ရွက်ချက်တွေက အာဆီယံအဖွဲ့ရဲ့ ယုံကြည်စိတ်ချရမှုကို နိုင်ငံတကာမျက်နှာစာမှာ ထင်ဟပ်စေမှာ ဖြစ်ပါတယ်”

    မြန်မာနိုင်ငံဆိုင်ရာ အာဆီယံအထူးကိုယ်စားလှယ် အရီဝမ်ယူစွဖ် မြန်မာနိုင်ငံကိုလာရောက်ကာ ဖမ်းဆီးထိန်းသိမ်းခံထားရတဲ့ နိုင်ငံတော်အတိုင်ပင်ခံ ဒေါ်အောင်ဆန်းစုကြည်အပါအဝင် နိုင်ငံရေးနယ်ပယ်က သက်ဆိုင်သူအားလုံးနဲ့ တွေ့ဆုံညှိနှိုင်းဖို့ တောင်းဆိုထားပေမယ့် အာဏာသိမ်းစစ်ကောင်စီက ခွင့်မပြုပါဘူး။

    အာဏာသိမ်းပြီးနောက်ပိုင်း စစ်ကောင်စီတပ်တွေရဲ့ အကြမ်းဖက်မှုကြောင့် နိုင်ငံတစ်ဝှမ်း လူပေါင်း ၁၁၀၀ ကျော် သေဆုံးခဲ့ပြီး ထောင်နဲ့ချီ ဖမ်းဆီးခံထားရပါတယ်။ ဧပြီလ အာဏာသိမ်းစစ်ခေါင်းဆောင် တက်ရောက် သဘောတူခဲ့တဲ့ အာဆီယံရဲ့ သဘောတူညီချက် ၅ ချက်မှာ အကြမ်းဖက်သတ်ဖြတ်မှု ရပ်တန့်ရေး၊ ဖမ်းဆီးခံထားရသူတွေကို ပြန်လွှတ်ပေးရေး ပါဝင်ပေမယ့် စစ်ကောင်စီက အကောင်အထည် ဖော်ခြင်း မရှိပါဘူး။

    ၃ ရက်တာကြာမြင့်မယ့် အာဆီယံ ထိပ်သီးအစည်းအဝေးအပြီး ထုတ်ပြန်မယ့်ကြေငြာချက်မှာ အာဆီယံရဲ့ သံတမန်ရေး​ဆောင်ရွက်ချက်တွေကို လိုက်နာရေး စစ်ကောင်စီကို ဆက်လက်ဖိအားပေးသွားမယ့်အကြောင်း ပါဝင်ဖို့ ရှိနေပါတယ်။

    အာဆီယံခေါင်းဆောင်တွေဟာ အမေရိကန်၊ တရုတ်၊ တောင်ကိုရီးယား ခေါင်းဆောင်တွေနဲ့လည်း အွန်လိုင်းကတစ်ဆင့် ဆွေးနွေးဖို့ ရှိနေပါတယ်။

    Ref: Reuters

  • မြန်မာ့အရေးအတွက် အမေရိကန်က သံအဖွဲ့တစ်ခုကို အာဆီယံနိုင်ငံများထံ စေလွှတ်မည်

    မြန်မာ့အရေးအတွက် အမေရိကန်က သံအဖွဲ့တစ်ခုကို အာဆီယံနိုင်ငံများထံ စေလွှတ်မည်

    အောက်တိုဘာ ၁၇၊ ၂၀၂၁
    M-Media

    -ဖေဖော်ဝါရီ ၁ ရက် စစ်တပ်က အာဏာသိမ်းပြီးနောက်ပိုင်း မြန်မာနိုင်ငံမှာ ဖြစ်ပေါ်လာတဲ့ မတည်ငြိမ်မှုတွေကို ဖြေရှင်းရေး တစ်စိတ်တစ်ပိုင်းအဖြစ် ကိုယ်စားလှယ်အဖွဲ့ကို ထိုင်း၊ စင်ကာပူနဲ့ အင်ဒိုနီးရှားနိုင်ငံတို့ထံ စေလွှတ်သွားမယ်လို့ အမေရိကန်က ပြောကြားလိုက်ပါတယ်။

    ကိုယ်စားလှယ်အဖွဲ့ကို အမေရိကန်အစိုးရ အကြံပေး ဒဲရစ် ခိုလက် ဦးဆောင်မှာပါ။ ခိုလက်ဟာ အမေရိကန်နိုင်ငံခြားရေးဝန်ကြီး အန်တိုနီ ဘလင်ကန်ရဲ့ မူဝါဒရေးရာ အကြံပေးလည်းဖြစ်ပါတယ်။

    အမေရိကန် ကိုယ်စားလှယ်အဖွဲ့ရဲ့ အရှေ့တောင်အာရှ ခရီးစဉ်အတွင်း မဟာမိတ်တွေ၊ မိတ်ဖက်နိုင်ငံတွေနဲ့ ပူးပေါင်းဆောင်ရွက်မှု ချဲ့ထွင်သွားဖို့ ဆွေးနွေးမှာဖြစ်သလို၊ ဒေသတွင်း တည်ငြိမ်အေးချမ်းရေးမှာ အာဆီယံအဖွဲ့ရဲ့ အခန်းကဏ္ဍကို ပိုမိုအားကောင်းအောင် ဆောင်ရွက်ပေးသွားမယ်လို့ အမေရိကန်အစိုးရရဲ့ ထုတ်ပြန်ချက်မှာ ဖော်ပြထားပါတယ်။

    မြန်မာအာဏာသိမ်းစစ်ကောင်စီရဲ့ အကြမ်းဖက် သတ်ဖြတ်မှုတွေ ရပ်တန့်ရေး၊ ဖမ်းဆီးထားတဲ့ နိုင်ငံရေးအကျဉ်းသားတွေ ပြန်လွှတ်ပေးရေး၊ ဒီမိုကရေစီ ပြန်လည်ထွန်းကားရေးတို့မှာ အိမ်နီးချင်းနိုင်ငံတွေအပါအဝင် နိုင်ငံတကာအသိုင်းအ၀ိုင်းရဲ့ အရေးကြီးမှုကို ထောက်ပြတာမျိုး ကိုယ်စားလှယ်အဖွဲ့က လုပ်ဆောင်သွားဖို့ ရှိနေပါတယ်။

    ထိုင်းနိုင်ငံခရီးစဉ်မှာတော့ အမေရိကန်ကိုယ်စားလှယ်အဖွဲ့ဟာ နယ်စပ်ကိုဖြတ်ပြီး မြန်မာဖက်ကို လူသားချင်း စာနာထောက်ထားမှုဆိုင်ရာ အကူအညီတွေ ပေးနိုင်ရေး ဆွေးနွေးမှာ ဖြစ်ပါတယ်။

    အာဏာသိမ်းပြီးနောက် ဖြစ်ပေါ်လာတဲ့ မတည်ငြိမ်မှုတွေကို ဖြေရှင်းရေး အာဆီယံအဖွဲ့နဲ့ ရရှိထားတဲ့ သဘောတူညီချက်တွေကို လိုက်နာခြင်းမရှိတဲ့အတွက် လာမယ့်တစ်ပတ်မှာလုပ်မယ့် ထိပ်သီးအစည်းအဝေးမှာ စစ်ကောင်စီအကြီးအကဲ ဗိုလ်ချုပ်မှူးကြီးမင်းအောင်လှိုင်ကို တက်ရောက်ခွင့်မပေးဖို့ အာဆီယံအဖွဲ့က သောကြာနေ့မှာ ဆုံးဖြတ်ခဲ့ပြီး ဒီဆုံးဖြတ်ချက်ကို အမေရိကန်ကလည်း ကြိုဆိုခဲ့ပါတယ်။

    Ref: ANI

  • ကိုဗစ်ကုသရေးအတွက် အာဆီယံက မြန်မာကို အကူအညီများပေးပို့

    ကိုဗစ်ကုသရေးအတွက် အာဆီယံက မြန်မာကို အကူအညီများပေးပို့

    စက်တင်ဘာ ၁၈၊ ၂၀၂၁
    M-Media

    -ကိုဗစ်ကပ်ရောဂါ ကုသရေးအတွက် အထောက်အကူဖြစ်စေမယ့် ဆေးဝါးပစ္စည်း စုစုပေါင်း ကန်ဒေါ်လာ ၁.၁ သန်းဖိုးကို အာဆီယံအဖွဲ့က မြန်မာနိုင်ငံဆီ ပေးပို့လိုက်ပါတယ်။

    မြန်မာနိုင်ငံက ကြက်ခြေနီအဖွဲ့ကို ပေးအပ်ခဲ့တာဖြစ်ပြီး မြန်မာနိုင်ငံကို လူသားချင်း စာနာထောက်ထားမှုဆိုင်ရာ ကူညီထောက်ပံ့မှု ပြုလုပ်သွားမယ်လို့ ဩဂုတ်လ ၁၈ ရက်နေ့မှာ အာဆီယံအဖွဲ့က ကတိပြုခဲ့ပြီးတဲ့နောက် ပထမဆုံး ပေးပို့မှုဖြစ်တယ်လို့ အာဆီယံ အတွင်းရေးမှူးရုံးက ထုတ်ပြန်တဲ့ ကြေငြာချက်မှာ ဖော်ပြထားပါတယ်။

    အခုပေးပို့လိုက်တဲ့ အကူအညီတွေဟာ အင်ဒိုနီးရှား၊ ဖိလစ်ပိုင်၊ ထိုင်း၊ တူရကီနဲ့ Temasek Foundation International တို့က လှူဒါန်းတာဖြစ်ပါတယ်။

    အာဆီယံ အထွေထွေအတွင်းရေးမှူး ဒါတွန် လင်ဂျွတ်ဟိုက အကူအညီဟာ အာဆီယံအဖွဲ့အစည်းရဲ့ စည်းလုံးမှုစိတ်ဓာတ်ကို ဖော်ညွှန်းတာဖြစ်ပြီး ပြည်သူအခြေပြု အာဆီယံအသိုင်းအ၀ိုင်းဖြစ်ရေး ဆောင်ရွက်ရာမှာ မြန်မာပြည်သူတွေကို တစ်ဖက်တစ်လမ်းကနေ ကူညီပံ့ပိုးပေးတာဖြစ်တယ်လို့ ပြောကြားခဲ့ပါတယ်။

    လှူဒါန်းတဲ့နိုင်ငံတွေနဲ့ အဖွဲ့အစည်းတွေကို ကျေးဇူးတင်ကြောင်း ဒါတွန်လင်ဂျွတ်ဟိုကပြောကြားခဲ့ပြီး အကူအညီတွေဟာ အတိဒုက္ခရောက်နေတဲ့အချိန်မှာ မြန်မာပြည်သူတွေ ထိခိုက်ခံစားရမှုတွေ လျော့ကျဖို့ အထောက်ဖြစ်စေလိမ့်မယ်လို့လည်း ဆိုပါတယ်။

    ဒါ့အပြင် လူသားချင်းစာနာထောက်ထားမှုဆိုင်ရာ အကူအညီ အဆင့် ၁ ချက်ခြင်းပေးဖို့ပို့နဲ့ နောက်ပိုင်း အဆင့် ၂ ကိုပါ ဆောင်ရွက်သွားဖို့လည်း အထွေထွေအတွင်းရေးမှူးက တိုက်တွန်းခဲ့ပါတယ်။

    အဆင့် ၂ အကူအညီပေးရေးမှာ ဘရူနိုင်း၊ ကမ္ဘောဒီးယား၊ စင်ကာပူ၊ ဗီယက်နမ်နဲ့ အခြား အလှူရှင်နိုင်ငံတွေ အဖွဲ့အစည်းတွေကနေ ပေးပို့လှူဒါန်းမှာ ဖြစ်ပါတယ်။

    Ref: The Star

  • ကိုဗစ်ကြောင့် ဗီယက်နမ်ဆီးဂိမ်းကို လာမည့်နှစ်သို့ ရွှေ့ဆိုင်း

    ကိုဗစ်ကြောင့် ဗီယက်နမ်ဆီးဂိမ်းကို လာမည့်နှစ်သို့ ရွှေ့ဆိုင်း

    ဇူလိုင် ၈၊ ၂၀၂၁
    M-Media

    -အခုနှစ် ဗီယက်နမ်နိုင်ငံမှာ ကျင်းပပြုလုပ်ဖို့ စီစဉ်ထားတဲ့ အရှေ့တောင်အာရှ အားကစားပြိုင်ပွဲ (ဆီးဂိမ်း) ကို ကိုဗစ်ကပ်ရောဂါအန္တရာယ်ကြောင့် လာမယ့်နှစ်ကို ရွှေ့ဆိုင်းလိုက်ပါတယ်။

    ၂ နှစ်တစ်ကြိမ်ကျင်းပတဲ့ ဆီးဂိမ်းကို နိုဝင်ဘာ ၁၁ ရက်နေ့ကနေ ဒီဇင်ဘာ ၂ ရက်နေ့အထိ ဗီယက်နမ်နိုင်ငံက နေရာ ၁၂ ခုမှာ ကျင်းပဖို့ စီစဉ်ထားတာပါ။

    ဒါပေမယ့် အရှေ့တောင်အာရှဒေသအတွင်း ကိုဗစ်ကူးစက်မှု မလျော့ကျသေးတဲ့ အခြေအ​နေကြောင့် ဒီနှစ်အတွင်း ပြိုင်ပွဲမကျင်းပဖို့ ဆီးဂိမ်းကျင်းပရေး လုပ်ငန်းအဖွဲ့က ဒီကနေ့မှာ အစည်းအဝေးထိုင် ဆုံးဖြတ်လိုက်တယ်လို့ စင်ကာပူအမျိုးသား အိုလံပစ်ကောင်စီက ထုတ်ပြန်ပါတယ်။

    နောက်နှစ်ကျင်းပမယ့် ရက်အတိအကျကို ဗီယက်နမ် အမျိုးသား အိုလံပစ်ကော်မတီက သတ်မှတ်ထုတ်ပြန်သွားမှာ ဖြစ်ပါတယ်။

    ထိုင်းအိုလံပစ်ကော်မတီကလည်း ဗီယက်နမ်ဆီးဂိမ်းကို အခုနှစ်အတွင်း ကျင်းပဖြစ်မှာ မဟုတ်ဘူးဆိုတာ အတည်ပြု ပြောကြားခဲ့ပါတယ်။ ဒီလိုရွှေ့ဆိုင်းလိုက်တာဟာ ကိုဗစ်ကပ်ရောဂါကြောင့်ဖြစ်ပြီး လာမယ့်နှစ် ဧပြီ၊ မေလောက်မှာ ကျင်းပနိုင်ချေရှိတယ်လို့လည်း ဆိုပါတယ်။

    ဆီးဂိမ်းပြိုင်ပွဲကို လာမယ့်နှစ်မှ ကျင်းပဖို့ ဗီယက်နမ်အစိုးရက အစောပိုင်းမှာ အဆိုပြုခဲ့ပေမယ့် အားကစားပြိုင်ပွဲတွေ များနေတာကြောင့် အရှေ့တောင်အာရှ ၈ နိုင်ငံက ကန့်ကွက်တယ်လို့ ပြီးခဲ့တဲ့လမှာ သတင်းထွက်ခဲ့ပါတယ်။

    ဗီယက်နမ်နိုင်ငံခြားရေးဝန်ကြီးဌာန ပြောဆိုရေးဆိုခွင့်ရှိသူက ၃၁ ကြိမ်မြောက် ဆီးဂိမ်းကို ရွှေ့ဆိုင်းဖို့ အာဏာပိုင်တွေက အကြံပြုခဲ့ပေမယ့် အားကစားပြိုင်ပွဲ​တွေ များနေတဲ့ လာမယ့်နှစ်မှာ သင့်လျော်တဲ့အချိန်မျိုး မတွေ့သေးဘူးလို့ ဒီကနေ့ သတင်းထောက်တွေကို ပြောကြားခဲ့ပါတယ်။

    Ref : CNA

  • တစ်ခြားနိုင်ငံက ​ကြားဝင်ရသည့်အခြေအနေအထိ မရောက်ခင် ပြဿနာကိုဖြေရှင်းရန် စစ်ကောင်စီကို အာဆီယံ တိုက်တွန်း

    တစ်ခြားနိုင်ငံက ​ကြားဝင်ရသည့်အခြေအနေအထိ မရောက်ခင် ပြဿနာကိုဖြေရှင်းရန် စစ်ကောင်စီကို အာဆီယံ တိုက်တွန်း

    မတ် ၂၊ ၂၀၂၁
    M-Media

    -နိုင်ငံရပ်ခြားက ဝင်ရောက်ဖြေရှင်းပေးရတဲ့အထိ အခြေအနေတွေ မတင်းမာခင်မှာ ပြဿနာကို ညှိနှိုင်းဆွေးနွေးအဖြေရှာကြဖို့ အာဆီယံအဖွဲ့ နိုင်ငံခြားရေးဝန်ကြီးတွေက အာဏာသိမ်းစစ်ကောင်စီကို တိုက်တွန်းလိုက်ပါတယ်။

    စစ်တပ်ရဲ့ ဖေဖော်ဝါရီ ၁ ရက်နေ့ အာဏာသိမ်းမှုကြောင့် ဖြစ်ပေါ်လာရတဲ့ မြန်မာနိုင်ငံက နိုင်ငံရေးအကြပ်အတည်းအတွက် အာဆီယံနိုင်ငံခြားရေးဝန်ကြီးတွေဟာ ဒီနေ့နေ့လည်ပိုင်းက အထူးအစည်းအဝေးတစ်ရပ် ကျင်းပခဲ့တာပါ။

    အဲဒီအစည်းအဝေးမှာ အာဏသိမ်း စစ်ကောင်စီက ခန့်ထားတဲ့ နိုင်ငံခြားရေးဝန်ကြီး ဦး၀ဏ္ဏမောင်လွင်လည်း တက်ရောက်ခဲ့ပါတယ်။

    ဒီအစည်းအဝေးနဲ့ပတ်သက်ပြီး အာဆီယံကအဖွဲ့က ကြေငြာချက် မထုတ်သေးပါဘူး။
    အာဆီယံနိုင်ငံတွေက နိုင်ငံအကြီးအကဲတွေ၊ တက်ရောက်ခဲ့တဲ့ နိုင်ငံခြားရေးဝန်ကြီးတွေက ထုတ်ပြောတာမျိုးကို ကြည့်ရင် စစ်ခေါင်းဆောင်တွေနဲ့ ဒေါ်အောင်ဆန်းစုကြည်အကြား စားပွဲဝိုင်းမှာ ဆွေးနွေးကာ ဒီပြဿနာကို ဖြေရှင်းဖို့ အစည်းအဝေးမှာ အဓိကပြောခဲ့တာကို တွေ့ရပါတယ်။

    မလေးရှားနိုင်ငံခြားရေးဝန်ကြီး ဟီရှာမွတ်ဒင် ဟူစိန်က အခြေအနေတွေ တင်းမာလာပြီး နိုင်ငံခြားကဝင်လာတဲ့အခြေအနေမျိုး မရောက်ခင် စစ်ခေါင်းဆောင်တွေနဲ့ ဒေါ်အောင်ဆန်းစုကြည်တို့အကြား ညှိနှိုင်းဆွေးနွေးတာဟာ ဒီပြဿနာကိုဖြေရှင်းဖို့ အကောင်းဆုံးအခွင့်အလမ်း ဖြစ်တယ်လို့ ပြောပါတယ်။

    စင်ကာပူဝန်ကြီးချုပ် လီရှန်လွန်းကလည်း ဆွေးနွေးပွဲမတိုင်ခင် အင်တာဗျူးမှာ ဒီလို စကားမျိုး ပြောကြားခဲ့ပါတယ်။

    “နိုင်ငံခြားက ဝင်ရောက်ဖြေရှင်းပေးဖို့ လက်ယက်ခေါ်ရတဲ့ လက်ယက်ခေါ်တဲ့ အနေအထားအထိ တင်းမာမှုတွေ မြင့်တက်မလာခင်မှာ နိုင်ငံရေးအကြပ်အတည်းကို စားပွဲဝိုင်းမှာ ဖြေရှင်းတဲ့လမ်းကြောင်း ပြန်သွားရေး စဉ်းစားဖို့ မြန်မာနိုင်ငံကို ကျွန်တော်တို့ တိုက်တွန်းပါတယ်”
    မလေးရှားနိုင်ငံခြားရေးဝန်ကြီးဟာ အဆိုပြုချက် ၃ ချက်ကိုလည်း တင်ပြခဲ့ပါတယ်။

    အဲဒါတွေက

    ၁ – စစ်တပ်က အာဏာသိမ်းရာမှာ အကြောင်းပြတဲ့ မဲစာရင်းကိစ္စ စီစစ်နိုင်ရေး ‘သမာသမတ်ကျတဲ့ လူတွေနဲ့ ‘အဖွဲ့တစ်ခုဖွဲ့ဖို့

    ၂- အာဆီယံ အထွေထွေအတွင်းရေးမှူး လင်ဂျော့က်ဟိုနဲ့၊ ဥက္ကဌနိုင်ငံ ဘရူးနိုင်းက ဘုရင် ဆူလ်တန် ဟာဆန်နဲလ် ဘိုလ်ကီးယားတို့ကို မြန်မာနိုင်ငံ လာရောက်ခွင့်ပေးဖို့
    ၃- အာဆီယံ၊ မြန်မာ၊ အခြားအင်အားကြီးနိုင်ငံပါဝင်တဲ့ သုံးပွင့်ဆိုင်အဖွဲ့ ‘Asean Troika’ ဖွဲ့စည်းပြီး ညှိနှိုင်းဆွေးနွေး အဖြေရှာဖို့ ဖြစ်ပါတယ်။

    အင်ဒိုနီးရှားနိုင်ငံခြားရေးဝန်ကြီး ရက်တနို မာဆူဒီက ဒေါ်အောင်ဆန်းစုကြည်နဲ့ အခြား ဖမ်းဆီးခံထားရသူ​တွေကို ချက်ခြင်းလွှတ်ပေးပြီး ​ဆွေးနွေးအဖြေရှာကြဖို့ အစည်းအဝေးမှာ တိုက်တွန်းခဲ့ကြောင်း ပြောကြားခဲ့ပါတယ်။ ‘မြန်မာနိုင်ငံက အာဆီယံကို တံခါးမဖွင့်ပေးဘူးဆိုရင် အာဆီယံရဲ့ စိတ်စေတနာကောင်းတွေ၊ အဆင်သင့်ဖြစ်နေမှုတွေဟာ အဓိပ္ပါယ်မဲ့သွားမယ်’ လို့လည်း သူမက ထည့်သွင်း ပြောကြားခဲ့ပါတယ်။

    ဖိလစ်ပိုင် နိုင်ငံခြားရေးဝန်ကြီး တက်ဒီ ဘွိုင် လော့စင် ဂျနာရ်က အစည်းအဝေးမှာ ဘာတွေပြောခဲ့သလဲဆိုတာ ထုတ်ပြောဖို့ ငြင်းဆန်ခဲ့ပြီး အလွန်အဆင်ပြေခဲ့တယ်လို့သာ ပြောကြားခဲ့ပါတယ်။

    အာဏာသိမ်းမှုဆန့်ကျင်ရေး ဆန္ဒပြသူတွေကို လုံခြုံရေးတပ်ဖွဲ့တွေက အကြမ်းဖက်နှိမ်နှင်းတာကို၊ အာဆီယံနိုင်ငံတွေက အစည်းအဝေးမှာ ရှုတ်ချခဲ့ပြီး၊ ဖမ်းဆီးထားသူတွေိကို ချက်ခြင်းပြန်လွှတ်ပေးဖို့လည်း တောင်းဆိုခဲ့ပါတယ်။

    ပညာချွန်းအုပ်ဖို့ လီရှန်လွန်းတိုက်တွန်း

    အာဆီယံရဲ့ ဆွေးနွေးပွဲမတိုင်ခင် မြန်မာနိုင်ငံ​ရဲ့ လက်ရှိအခြေအနေနဲ့ပတ်သက်လို့ BBC သတင်းဌာနနဲ့ မေးမြန်းမှုမှာ စစ်တပ်ကလုပ်တဲ့ ၂၀၁၀ ဒီမိုကရေစီ အသွင်ကူးပြောင်းမှုကို ရည်ညွှန်းပြီး အကောင်းဖက်ကို မျှော်လင့်ထားတယ်လို့ စင်ကာပူဝန်ကြီးချုပ် လီရှန်လွန်းက ပြောဆိုခဲ့ပါတယ်။

    “စစ်တပ်ဟာ အရင်ကလိုမျိုး ပညာနဲ့ ချွန်းအုပ်ဖြေရှင်းနိုင်မယ်လို့ ကျွန်တော် မျှော်လင့်ပါတယ်။ စစ်အာဏာရှင်စနစ်နဲ့သွားရင် ဘာမှဖြစ်မလာနိုင်ဘဲ ဒီမိုကရေစီနည်းကျ ရွေးကောက်တင်မြောက်ထားတဲ့ အရပ်သားအစိုးရနဲ့ ညှိနှိုင်းဆွေးနွေး အဖြေရှာရမယ်ဆိုတာမျိုးကို တပ်မတော်က နားလည်သဘောပေါက်မှာပါ”

    Ref: South China Morning Post