နိုဝင်ဘာ ၁၅၊ ၂၀၂၀
M-Media

-ကမ္ဘာ့အကြီးဆုံး ကုန်သွယ်ရေးသဘောတူညီချက်တစ်ခု ဖြစ်လာမယ့် RCEP ကို အာဆီနိုင်ငံတွေအပါအဝင် နိုင်ငံပေါင်း ၁၅ နိုင်ငံက ဒီကနေ့မှာ လက်မှတ်ရေးထိုးလိုက်ပါတယ်။

တရုတ်၊ ဂျပန်၊ တောင်ကိုရီးယား၊ နယူးဇီလန်၊ ဩစလေးလျတဲ့ အာဆီယံ ၁၀ နိုင်ငံတို့မှာ အကောင်အထည်ဖော်မယ့် အဲဒီ ကုန်သွယ်ရေး သဘောတူညီချက်ကို ၂၀၁၂ ခုနှစ်မှာ စတင် အဆိုပြုခဲ့တာပါ။ ကမ္ဘာလူ့ဦးရေရဲ့ ၃ ပုံ ၁ ပုံအပေါ် သက်ရောက်မှုရှိမှာဖြစ်ပြီး၊ ကမ္ဘာ့ဂျီဒီပီရဲ့ ၂၉ ရာခိုင်နှုန်း ရှိမှာဖြစ်ပါတယ်။

လက်မှတ်ရေးထိုးနိုင်ဖို့အတွက် ညှိနှိုင်းဆွေးနွေးမှုပေါင်း ၄၆ ကြိမ်၊ ဝန်ကြီးအဆင့် အစည်းအဝေး ၁၉ ကြိမ် လုပ်ခဲ့ရပြီး ပါဝင်မယ့် အချက်အလက်တွေကို ပြီးခဲ့တဲ့နှစ်မှာ သဘောတူခဲ့ကြပါတယ်။

လက်မှတ်ရေးထိုးမှုကိုတော့ အာဆီယံ ထိပ်သီးအစည်းအဝေးမှာ ပြုလုပ်ခဲ့တာပါ။သဘောတူညီချက်ပါ အချက်အလက်တွေကို လက်ခံအကောင်အထည်ဖော်မှာဖြစ်ကြောင်း အဖွဲ့ဝင်နိုင်ငံတွေက ၂ နှစ်အတွင်း လက်မှတ်ရေးထိုးရမှာဖြစ်ပြီး အဲဒီနောက်မှာတော့ စာချုပ်အသက်ဝင်လာမှာ ဖြစ်ပါတယ်။

ဆွေးနွေးမှုအစပိုင်းမှာ အိန္ဒိယနိုင်ငံ ပါဝင်ခဲ့ပေမယ့် ​အကောင်အထည်ဖော်ရင် နိုင်ငံအတွင်း တရုတ်လုပ်ပစ္စည်းတွေ အုံနဲ့ကျင်းနဲ့ဝင်လာတဲ့အခါ ပြည်တွင်းမှာရှိနေတဲ့ ထုတ်လုပ်သူတွေကို ထိခိုက်လာနိုင်မယ်ဆိုတဲ့ စိုးရိမ်မှုကြောင့် ပြီးခဲ့တဲ့နှစ်မှာ နှုတ်ထွက်သွားခဲ့ပါတယ်။ အဖွဲ့ဝင်နိုင်ငံတွေကတော့ အိန္ဒိယအတွက် တံခါးဖွင့်ထားတယ်လို့ ပြောကြားခဲ့ပါတယ်။

သဘောတူညီချက်မှာ အခွန်ကင်းလွတ်ခွင့်၊ လွတ်လပ်စွာ ကုန်စည်စီးဆင်းခွင့်၊ လွတ်လပ်စွာ ရင်းနှီးမြှုပ်နှံခွင့်တွေ ပါဝင်မှာပါ။

သဘောတူညီချက်ကို အကောင်အထည်ဖော်ရာမှာ အာဆီယံဒေသက အရေးပါတဲ့ အခန်းကဏ္ဍကနေ ပါဝင်နိုင်လိမ့်မယ်လို့ အာဆီယံခေါင်းဆောင်တွေက မျှော်လင့်နေကြပါတယ်။

Ref: CNA

ဧပြီ ၁၉၊ ၂၀၂၀
M-Media

စင်ကာပူ ကူးစက်သူ ၆၀၀ နီးပါး ထပ်တွေ့

ဒီကနေ့ စင်ကာပူနိုင်ငံမှာ Covid-19 ထပ်မံကူးစက်သူအရေအတွက်ဟာ ၅၉၆ ဦးရှိခဲ့ပြီး ၂၅ ဦးသာ စင်ကာပူနိုင်ငံသားနဲ့
အမြဲတမ်းနေထိုင်ခွင့်ရထားသူတွေဖြစ်ကာ ကျန်တဲ့သူအားလုံးက နိုင်ငံခြား အလုပ်သမားတွေနေထိုင်တဲ့ အလုပ်သမားတန်းလျားက ဖြစ်ပါတယ်။ မနေ့ကလည်း ကူးစက်မှု ၉၀၀ ကျော်ရှိခဲ့ပြီး စုစုပေါင်း ကူးစက်သူအရေအတွက် ၆၅၈၈ ဦး ရှိလာပါပြီ။ စင်ကာပူဟာ ဒုတယိအကြိမ်မြောက် အကြီးအကျယ်ကူးစက်မှုကို ကြုံတွေ့နေရပြီး အခုတစ်ခေါက်ကူးစက်မှုဟာ နိုင်ငံခြားသား အလုပ်သမားတန်းလျားကနေ စတင်တာဖြစ်ပါတယ်။ အာဆီယံမှာ ကူးစက်မှုအများဆုံး ဖြစ်လာပါတယ်။

မလေးရှားတွင် ကူးစက်သူ ၅၉ ရာခိုင်နှုန်း ပျောက်ကင်း

မလေးရှားမှာ ဒီကနေ့ ကူးစက်သူအရေအတွက် ၈၄ ဦးရှိခဲ့ပြီး၊ သေဆုံးသူ ၁ ဦး ရှိပါတယ်။ ဒါ့ကြောင် စုစုပေါင်း ကူးစက်သူ ၅၃၈၉ ဦးနဲ့ သေဆုံးသူ ၈၉ ဦး ရှိလာတာပါ။ မနေ့က ကူးစက်သူအရေအတွက်ဟာ ၅၀ ကျော်သာရှိခဲ့ပြီး ၂ လနီးပါးအတွင်း တစ်ရက်တာအနည်းဆုံးပမာဏာ ဖြစ်ပါတယ်။ ဧပြီလ ၁၆ ရက်နေ့ အင်ဒိုနီးရှားကနေ ပြန်လာတဲ့ ကျောင်းသား ၄၀ ကျော်အုပ်စုမှာ အများအပြား ကူးစက်နေတာကို ထပ်တွေ့ခဲ့ရပြီး လက်ရှိမှာ အဲဒီကျောင်းသားတွေကို သီခြားခွဲထား စောင့်ကြည့်နေပါတယ်။ ဗိုင်းရပ်စ်ပျောက်ကင်းပြီး ဆေးရုံကဆင်းသွားသူအရေအတွက်က ဒီကနေ့မှာ ၉၅ ဦး ရှိခဲ့ပြီး စုစုပေါင်း ပျောက်ကင်းသူ ၃၁၉၇ ဦး ရှိလာတာပါ။

အင်ဒိုနီးရှားတွင် သေဆုံးသူ တရားဝင်ထုတ်ပြန်မှုထက် ၂ ဆများနိုင်

အင်ဒိုနီးရှားမှာ ဒီကနေ့ ဗိုင်းရပ်စ်ထပ်မံကူးစက်သူအရေအတွက် ၃၂၇ ဦး ရှိပြီး စုစုပေါင်း ကူးစက်မှုအရေအတွက်က ၆၅၇၅ ခု ဖြစ်ပါတယ်။ ဒီကနေ့ သေဆုံးသူဟာ ၄၇ ဦး ရှိခဲ့ပြီး စုစုပေါင်း ၅၈၂ ဦး ရှိလာတာပါ။ တိုင်းပြည်အတွင်း အမှန်တကယ် သေဆုံးသူအရေအတွက်ဟာ တရားဝင်ထုတ်ပြန်တာထက် ၂ ဆလောက်များနိုင်တယ်လို့ အင်ဒိုနီးရှား ဆရာဝန်များအသင်းက မနေ့မှာ သတိပေးခဲ့ပါတယ်။ လက်ရှိ အင်ဒိုနီးရှားဟာ အာဆီယံမှာ ကူးစက်မှု ဒုတိယအများဆုံးဖြစ်နေပါတယ်။

ကိုဗစ်တားမြစ်မိန့် မလိုက်နာလျှင် စစ်တပ်လွှတ်မည်ဟု ဒူတာတေး ခြိမ်းခြောက်

အာဆီယံမှာ ကူးစက်မှု တတိယအများဆုံးဖြစ်တဲ့ ဖိလစ်ပိုင်နိုင်ငံမှာတော့ ဒီကနေ့ ထပ်မံကူးစက်သူ ၁၇၂ ဦး ရှိခဲ့ပြီး စုစုပေါင်း ၆၂၅၉ ဦး ဖြစ်လာတာပါ။ သေဆုံးသူကတော့ ၄၀၉ ဦး ရှိနေပါတယ်။ ပြန်လည် သက်သာလာသူအရေအတွက်ကတော့ ၅၇၂ ဦး ရှိနေပါတယ်။ ဖိလစ်ပိုင်အစိုးရဟာ တိုင်းပြည်က ဒေသတစ်ချို့မှာ ရွေ့လျားသွားလာမှုကန့်သတ်မိန့် ထုတ်ပြန်ထားပြီး မလိုက်နာရင် မာရှယ်လော ထုတ်မယ်လို့ သမ္မတဒူတာတေးက အခုတစ်ပတ်အစောပိုင်းမှာ သတိပေးထားပါတယ်။

Ref: CNA

ဧပြီ ၃၊ ၂၀၂၀
M-Media

ထိုင်းနိုင်ငံတွင် တစ်နိုင်ငံလုံး ကာဖျူးထုတ်ပြန်

ကိုရိုနာဗိုင်းရပ်စ် ကူးစက်ပြန့်နှံ့မှုကို တားဆီးဖို့အတွက် ဧပြီလ ၃ ရက်နေ့ကနေစပြီး ညမထွက်ရအမိန့် ထုတ်ပြန်သွားမယ်လို့ ထိုင်းနိုင်ငံက မနေ့မှာ ကြေငြာလိုက်ပါတယ်။ ​ဧပြီလ ၃ ရက်နေ့အထိ ထိုင်းနိုင်ငံမှာ ကူးစက်သူ ၁၉၇၈ ဦးအထိ ရှိလာပြီး၊ သေဆုံးသူကတော့ ၁၉ ဦးရှိပါတယ်။ အခု ကာဖျူးဟာ ကျန်းမာရေးဆိုင်ရာ ဆောင်ရွက်နေသူတွေအပေါ် သက်ရောက်မှုရှိမှာ မဟုတ်ပါဘူး။ ထိုင်းနိုင်ငံဟာ ပြီးခဲ့တဲ့တစ်ပတ်က ပြည်ဝင်ခွင့် ပိတ်ပင်လိုက်ပြီး တိုင်းပြည်ကို အရေးပေါ်အခြေအနေ ကြေငြာထားပါတယ်။ ထိုင်းအစိုးရဟာ ပြည်သူတွေ အင်တာနက် အခမဲ့အသုံးပြုခွင့်ရအောင် စီစဉ်ပေးထားသလို၊ အိမ်ကနေ အလုပ်လုပ်၊ စာသင်ကြားနိုင်မယ့် ပေါ်လစီတွေကိုလည်း ချမှတ်ထားပါတယ်။

ဧပြီလအလယ်တွင် မလေးရှား၌ ကူးစက်မှု အမြင့်ဆုံးရောက်မည်

မလေးရှားနိုင်ငံမှာ ဗိုင်းရပ်စ်ကူးစက်မှုဟာ ဧပြီလ အလယ်ပိုင်းကျရင် အမြင့်ဆုံးကို ရောက်ရှိနိုင်တယ်လို့ ကမ္ဘာ့ကျန်းမာရေးအဖွဲ့ WHO က မနေ့မှာ ပြောကြားလိုက်ပါတယ်။ မလေးရှားမှာ ဧပြီလ ၂ ရက်နေ့အထိ ကူးစက်သူ ၃၁၁၆ ဦး၊ သေဆုံးသူ ၅၀ ဦး ရှိနေကာ အရှေ့တောင်အာရှဒေသမှာ အမြင့်ဆုံး ဖြစ်ပါတယ်။ အချက်အလက်တွေအရ အစိုးရရဲ့ ကာကွယ်တားဆီးရေးလုပ်ငန်းတွေဟာ ထိရောက်တယ်လို့ ကျန်းမာရေးတာဝန်ရှိသူတစ်ဦးက မနေ့မှာ ပြောကြားခဲ့ပါတယ်။ လက်ရှိမှာ မလေးရှားအစိုးရဟာ တစ်နိုင်ငံလုံးမှာ လှုပ်ရှားသွားလာမှု ကန့်သတ်မိန့် ထုတ်ပြန်ထားပြီး ဧပြီလ ၁၄ ရက်နေ့အထိ အတည်ဖြစ်မှာ ဖြစ်ပါတယ်။

ဗိုင်းရပ်စ်ကာကွယ်ရေးအတွက် အင်ဒိုနီးရှားက အကျဉ်းသားများ လွှတ်ပေး

လူကြပ်နေတဲ့ အကျဉ်းထောင်တွေမှာ ဗိုင်းရပ်စ်ပြန့်နှံ့မှု တားဆီးရေးကာကွယ်ရေးအတွက် အင်ဒိုနီးရှားနိုင်ငံဟာ အကျဉ်းသား ၁၈၀၀၀ လောက်ကို မနေ့မှာ လွှတ်ပေးခဲ့ပါတယ်။ ရောဂါကူးစက်ဖို့ လွယ်ကူနိုင်တဲ့ အကျဉ်းသားတွေကို လွှတ်ပေးဖို့အတွက် ကမ္ဘာ့ကျန်းမာရေးအဖွဲ့ WHO က နိုင်ငံတွေကို တိုက်တွန်းထားပြီး အင်ဒိုနီးရှားနိုင်ငံက ၃ သောင်းလောက် ပြန်လွှတ်ပေးဖို့ စီစဉ်ထားပါတယ်။ အိမ်ပြန်ရောက်တဲ့အခါ ၁၄ ရက်ကြာ သီးခြားနေထိုင်ဖို့လည်း အစိုးရက ညွှန်ကြားခဲ့ပါတယ်။

Ref: CNA

မတ် ၂၂၊ ၂၀၂၀
M-Media

• ထိုင်းနိုင်ငံမှာ မနေ့ကတစ်ရက်တည်း ကိုရိုနာဗိုင်းရပ်စ်ကူးစက်သူ အရေအတွက် ၁၁၈ ဦး ရှိခဲ့ပြီး တစ်ရက်တာ အမြင့်ဆုံး ကူးစက်မှုဖြစ်ပါတယ်။ ကူးစက်သူအများစုဟာ မြို့တော်ဘန်ကောက်က လူငယ်တွေဖြစ်ပြီး အသွားအလာများတဲ့သူတွေဖြစ်တဲ့အတွက် သူတို့ကနေတစ်ဆင့် နောက်ထပ် ကူးစက်မှုတွေ ပိုများလာနိုင်တယ်လို့ ကျန်းမာရေးတာဝန်ရှိသူ Taweesin Wisanuyothin က ပြောကြားခဲ့ပါတယ်။ ထိုင်းနိုင်ငံမှာ စုစုပေါင်း ကူးစက်သူအရေအတွက် ၅၅၉ ဦး ရှိလာတာပါ။ ဘန်ကောက်မှာ ကျောင်းတွေ၊ ဘားတွေကို ပိတ်ထားသလို၊ ရှော့ပင်းမောလ်ကလွဲလို့ စူပါမားကတ်တွေကိုလည်း ပိတ်ထားလိုက်ပါတယ်။
• အင်ဒိုနီးရှားမှာလည်း မနေ့က သေဆုံးသူ ၁၀ ဦး ကူးစက်သူ ၆၄ ဦး ရှိခဲ့ပါတယ်။ ဒါ့ကြောင့် သေဆုံးသူ စုစုပေါင်း ၄၈ ဦး၊ ကူးစက်သူ ၅၁၄ ဦး ရှိလာတာပါ။ ပြန်လည်ကောင်းမွန်သူက မနေ့မှာ ၉ ဦး ရှိတာကြောင့် စုစုပေါင်း ၂၉ ဦး ရှိလာတာ ဖြစ်ပါတယ်။ သေဆုံးသူတွေထဲမှာ ဆရာဝန် ၃ ဦး ပါဝင်တယ်လို့ Jakarta Post သတင်းစာက မနေ့မှာ ဖော်ပြခဲ့ပါတယ်။
• မလေးရှားနိုင်ငံမှာ မနေ့က ကူးစက်သူ ၁၂၃ ဦး၊ သေဆုံးသူ ၂ ဦး ရှိပါတယ်။ စုစုပေါင်း သေဆုံးသူဟာ ၁၀ ဦးရှိကာ ကူးစက်သူအရေအတွက်က ၁၃၀၆ ဦးအထိ မြင့်တက်လာတာပါ။ မလေးရှားက ကူးစက်သူတော်တော်များများနဲ့ သေဆုံးသူ ၆ ဦးတို့ဟာ ကွာလာလမ်ပူ ဆင်ခြေဖုံးမှာ ဖေဖော်ဝါရီ နှောင်းပိုင်းက ပြုလုပ်ခဲ့တဲ့ အစ္စလာမ်ဘာသာရေးအခမ်းအနားတစ်ခုနဲ့ ဆက်စပ်နေသူတွေဖြစ်ပါတယ်။
• ဖိလစ်ပိုင်မှာလည်း မနေ့က ကူးစက်သူ ၇၃ ဦးရှိခဲ့ပြီး စုစုပေါင်း ၃၈၀ ဦး ရှိလာခဲ့တာပါ။ သေဆုံးသူက ၆ ဦးနဲ့ ၂၅ ဦးအထိ ရှိလာပါတယ်။ ဗိုင်းရပ်စ်ကူးစက်ပြီးတဲ့နောက် ပြန်ကောင်းသွားသူအရေအတွက်က ဖိလစ်ပိုင်မှာ ၁၅ ဦးအထိ ရှိလာပြီး အများစုက သက်လတ်တန်းတွေဖြစ်ပါတယ်။
• မြန်မာနိုင်ငံမှာ ကူးစက်ခံရသူ မတွေ့သေးပေမယ့် သံသယနဲ့ စောင့်ကြည့်နေတဲ့သူအရေအတွက်ကတော့ ၁၀၀ ကျော် ရှိလာပါတယ်။ ရောဂါကူးစက်လာရင် သီးသန့်ခွဲထား စောင့်ကြည့် ကုသဖို့အတွက် ပြင်ဆင်မှုတွေလည်း လုပ်ဆောင်နေပါတယ်။ ရောဂါပြန့်နှံ့နေတဲ့ ထိုင်းနိုင်ငံမှာ အလုပ်လုပ်နေသူ ထောင်နဲ့ချီ အခုရက်ပိုင်းအတွင်း ပြန်ဝင်လာတာကြောင့် သူတို့နဲ့အတူ COVID-19 ပါလာနိုင်တယ်ဆိုတဲ့ စိုးရိမ်မှုတွေလည်း မြင့်တက်နေပါတယ်။

Ref: CNA