သြဂုတ် ၁၁၊ ၂၀၁၄
M-Media
ပြီးခဲ့သည့်နှစ် ချန်ပီယံလိဂ်ဖလားရရှိခဲ့သည့် ယုံကြည်မှုက ယခုနှစ်တွင် ချန်ပီယံဘွဲအား ကာကွယ်ရန် တွန်းအားဖြစ်စေပြီး ရီးယဲလ်အား ချန်ပီယံလိဂ် နှစ်ကြိမ်ဆက်ရ ပထမဆုံး အသင်းဖြစ်လာရန် ဆောင်ရွက်ပေးသွားမည်ဟု ရီးယဲလ်နည်းပြ အန်ဆယ်လော့တီက ပြောကြားလိုက်သည်။
၁၉၉၀ ပြည့်နှစ်များကတည်း ချန်ပီယံလိဂ်အဖြစ် အမည်ပြောင်းကာ ကျင်းပခဲ့သည့် အဆိုပါပြိုင်ပွဲတွင် မည်သည့်အသင်းမှ နှစ်ကြိမ်ဆက် ဗိုလ်စွဲနိုင်ခြင်း မရှိသေးပေ။ အန်ဆယ်လော့တီမှာ ယခင် ဥရောပချန်ပီယံရှစ် ပြိုင်ပွဲတွင် အေစီမီလန်အား ၁၉၈၉၊ ၁၉၉၀ ခုနှစ်များတွင် နှစ်ကြိမ်ဆက် ဗိုလ်စွဲနိုင်စေရန် စွမ်းဆောင် ပေးနိုင်ခဲ့သည်။
“(ချန်ပီယံလိဂ်အဖြစ် ပြောင်းလဲကျင်းပခဲ့တဲ့) သမိုင်းမှာ ဘယ်သူမှ ချန်ပီယံဘွဲ့ကို မကာကွယ်နိုင်သေးပါဘူး။ ဒါဟာ သိပ်ကို ခက်ခဲမယ်ဆိုတာ ကျွန်တော်တို့ သိပါတယ်။ မကြာခင်က ရရှိခဲ့တဲ့ အောင်မြင်မှုတွေကြောင့် ကျွန်တော်တို့ဟာ ယုံကြည်မှုတွေ ပိုရှိနေပါတယ်။ ဒါဟာ အခုနှစ် ချန်ပီယံလိဂ်အတွက် ပိုသာတဲ့အရာတစ်ခုခုကို ဖြစ်စေမယ်လို့ ကျွန်တော် ထင်ပါတယ်” ဟု အန်ဆယ်လော့တီ၏ ပြောကြားမှုကို ရီးယဲလ်အသင်း ၀ဘ်ဆိုက်တွင် ဖော်ပြထားသည်။
ချန်ပီယံလိဂ်ချန်ပီယံ ရီးယဲလ်မှာ ယူရိုပါလိဂ် ချန်ပီယံ ဆီးဗီးလားအသင်းနှင့် မနက်ဖြန်တွင် ဆူပါဖလားလုပွဲ ကစားရမည်ဖြစ်သည်။
အန်ဆယ်လော့တီကမူ ဆီးဗီးလားအသင်းမှာ အသင်းလိုက်ကောင်းမွန်သည့် ကစားသမားများဖြင့် ဖွဲ့စည်းထားသည့် အသင်းဖြစ်ကြောင်း၊ ယခုနှစ်တွင် အနည်းငယ် ပြောင်းလဲသွားပြီး အဆိုပါပွဲတွင် မည်သို့ဖြစ်လာမည်ကို ကြည့်ရမည်ဖြစ်ကြောင်း ထပ်လောင်းပြောကြားခဲ့သည်။
