ဇွန် ၁၄၊ ၂၀၂၁
M-Media
-စက်မှုထိပ်သီး G7 နိုင်ငံတွေဟာ ရှင်ကျန်းပြည်နယ်က ဝီဂါမွတ်စလင်အရေးကို နိုင်ငံရေးအမြတ်ထုတ်ဖို့အတွက် အသုံးချနေတယ်လို့ တရုတ်နိုင်ငံက ရှုတ်ချပြောဆိုလိုက်ပါတယ်။
အင်္ဂလန်နိုင်ငံမှာ ၃ ရက်တာပြုလုပ်ခဲ့ပြီးနောက် G7 အဖွဲ့ရဲ့ ထုတ်ပြန်ချက်မှာ ရှင်ကျန်းပြည်နယ်က လူမျိုးစုတွေနဲ့ ဟောင်ကောင်ပြည်သူတွေအပေါ် လူ့အခွင့်အရေး ချိုးဖောက်နေတာ၊ ညှင်းပမ်းနှိပ်စက်နေတာတွေကို ပြင်းပြင်းထန်ထန် ရှုတ်ချထားပါတယ်။
အမေရိကန်သမ္မတ ဂျိုးဘိုင်ဒန်ကလည်း တရုတ်အစိုးရအနေနဲ့ နိုင်ငံတကာစံတွေ၊ လူ့အခွင့်အရေးတွေအပေါ်မှာ တာဝန်ယူရပ်တည်ဖို့ တိုက်တွန်းခဲ့ပါတယ်။
ယူကေမှာရှိတဲ့ တရုတ်သံရုံးကတော့ G7 အဖွဲ့ကို ပြင်းပြင်းထန်ထန် တုန်ပြန်ခဲ့ပြီး တရုတ်နိုင်ငံရဲ့ ပြည်တွင်းရေးကို ဝင်ရောက်စွက်ဖက်နေတယ်လို့ ဆိုပါတယ်။
“နိုင်ငံရေးအမြတ်ထုတ်ဖို့၊ တရုတ်နိုင်ငံရဲ့ ပြည်တွင်းရေးကို ဝင်ရောက်စွက်ဖက်ဖို့အတွက် G7 အဖွဲ့ဟာ ရှင်ကျန်းပြည်နယ်နဲ့ သက်ဆိုင်တဲ့ ပြဿနာတွေကို အမြတ်ထုတ်နေပါတယ်။ ဒါကို ကျွန်တော်တို့ ပြင်းပြင်းထန်ထန် ဆန့်ကျင်ပါတယ်” လို့ သံရုံးရဲ့ထုတ်ပြန်ချက်မှာ ဖော်ပြထားပါတယ်။
G7 အဖွဲ့ဟာ လိမ်ညာ၊ ဝါဒဖြန့်နေပြီး၊ အခြေအမြစ်မရှိတဲ့ စွပ်စွဲချက်တွေ လုပ်ဆောင်နေတယ်လို့လည်း တရုတ်သံရုံးက ပြောကြားခဲ့ပါတယ်။
ရှင်ကျန်းမှာ ဝီဂါနဲ့ အခြား အစ္စလာမ်ဘာသာဝင် လူမျိုးစု ၁ သန်းလောက်ကို တရုတ်အစိုးရက အကျဉ်းစခန်းတွေထဲထည့်ကာ ဘာသာရေး၊ လူမျိုးရေး အမှတ်သညာပျောက်အောင် ဆောင်ရွက်နေတာ ဖြစ်ပါတယ်။
ဒါ့အပြင် ညှင်းပမ်းနှိပ်စက်တာ၊ လူ့အခွင့်အရေးချိုးဖောက်တာ၊ အမျိုးသမီးတွေကို သားကြောဖြတ်တာ၊ လူ့အဖွဲ့အစည်းတစ်ခုလုံးရဲ့ တစ်ကိုယ်ရည်လွတ်လပ်ခွင့် ချိုးဖောက်တာ စတာတွေကိုလည်း တရုတ်အစိုးရက ကျူးလွန်နေတာပါ။
လူ့အခွင့်အရေးနဲ့ အခြေခံလွတ်လပ်ခွင့်ကို လေးစားလိုက်နာရေး တရုတ်အစိုးရကို တောင်းဆိုမှုအပါအဝင် မိမိတို့ရဲ့ စံသတ်မှတ်ချက်တွေအတိုင်း ဆက်လက်လုပ်ဆောင်သွားမယ်လို့လည်း G7 အဖွဲ့ရဲ့ ကြေငြာချက်မှာ ထည့်သွင်းဖော်ပြထားပါတယ်။
Ref: AFP
