Tag: China

ဇန်နဝါရီ ၁၆၊ ၂၀၂၁
M-Media

-တရုတ်နိုင်ငံ ဝူဟန်မြို့ကနေ​ ၂၀၁၉ ခုနှစ် နှစ်ကုန်ပိုင်းမှာ စတင်ပြန့်နှံ့ခဲ့တဲ့ Covid-19 ရောဂါကြောင့် ကမ္ဘာတစ်ဝှမ်း သေဆုံးသူ အရေအတွက်ဟာ ၂ သန်းကျော်လာပြီ ဖြစ်ပါတယ်။

ဒါဟာ ဘရပ်ဆဲလ်၊ မက္ကာ၊ မင့်စ် ဒါမှမဟုတ် ဗီယင်နာမြို့မှာ နေထိုင်တဲ့ လူဦးရေ ပမာဏလောက် ရှိနေတာပါ။ ကမ္ဘာတစ်ဝှမ်း ကူးစက်သူအရေအတွက်ကတော့ ၉၃ သန်း ကျော် ရှိနေပါပြီ။

သေဆုံးမှုအများဆုံးက ဥရောပတိုက်မှာဖြစ်ပြီး ၆ သိန်းခွဲကျော်ကျော်လောက် ရှိနေတာပါ။ လက်တင်အမေရိကနဲ့ ကာရစ်ဘီယံဒေသမှာ ၄ သိန်း ၄ သောင်းကျော်ရှိပြီး ကနေနဲ့ အမေရိကန်မှာတော့ ၄ သိန်းကျော် သေဆုံးပါတယ်။

ကုလသမဂ္ဂအတွင်းရေးမှူး အန်တိုနီယို ဂူတာရက်စ်က ကိုဗစ်တိုက်ဖျက်ရေးကို စည်းစည်းလုံးလုံးနဲ့ ဆောင်ရွက်ဖို့အတွက် နိုင်ငံတကာအသိုင်းအဝိုင်းကို တိုက်တွန်းခဲ့ပါတယ်။

အမေရိကန်၊ ယူကေ၊ ကနေဒါ၊ ဂျာမနီတို့လို့ ချမ်းသာတဲ့နိုင်ငံတွေမှာ ပြည်သူတွေဟာ ကာကွယ်ဆေး တစ်ကြိမ်ထိုးတာအပါအဝင် ရောဂါကာကွယ်ရေးနည်းလမ်း အနည်းဆုံး တစ်ခုမဟုတ်တစ်ခုကို ရရှိခံစားနေရပါတယ်။

ကုလသမဂ္ဂရဲ့ ကိုဗစ်ကာကွယ်ဆေးရရှိရေးအဖွဲ့ COVAX က ဖွံ့ဖြိုးဆဲနိုင်ငံတွေထံ ကိုဗစ်ကာကွယ်ဆေး ရောက်ရှိစေဖို့ ကြိုးပမ်းနေပေမယ့် ကာကွယ်ဆေး ပြတ်လတ်တာ၊ ပို့ဆောင်ရေးခက်ခဲတာ၊ ငွေကြေးမလုံလောက်တာ၊ စတဲ့ အခက်အခဲတွေကို ကြုံတွေ့နေရပါတယ်။

ကမ္ဘာ့လူဦးရေရဲ့ ၇၀ ရာခိုင်နှုန်းမှာ ကိုဗစ်တိုက်ဖျက်နိုင်မယ့် ကိုယ်ခံစွမ်းအား ၇၀ ရာခိုင်နှုန်း ရရှိမှသာ ဒီရောဂါကို ​တားဆီးနိုင်မှာဖြစ်ပြီး အခုနှစ်အတွင်း ဒီရည်မှန်းချက် ပြည့်မြောက်ဖို့ မဖြစ်နိုင်ဘူးလို့ ကျွမ်းကျင်သူတွေက သုံးသပ်ပါတယ်။

လက်ရှိမှာ အမေရိကန်ထုတ် Pfizer-BioNTech၊ အောက်စဖို့တက္ကသိုလ်ထုတ် AstraZeneca၊ ရုရှားထုတ် Sputnik နဲ့ တရုတ်ထုတ် Sinovac စတဲ့ ကိုဗစ်ကာကွယ်ဆေးတွေကို ကမ္ဘာတစ်ဝှမ်းမှာ အသုံးပြုနေပါတယ်။

Ref: Reuters

ဇန်နဝါရီ ၁၁၊ ၂၀၂၁
M-Media

-တရုတ်နိုင်ငံအလယ်ပိုင်း ဟူဘေးပြည်နယ်မှာ ကိုဗစ်ကူးစက်မှု ၅ လအတွင်း အမြင့်ဆုံးကို ရောက်လာတာကြောင့် အာဏာပိုင်တွေက ကန့်သတ်တင်းကျပ်မှုတွေ ပိုမို လုပ်ဆောင်လာပါတယ်။

မနေ့က တရုတ်နိုင်ငံတစ်ဝှမ်း ပြည်တွင်းကူးစက်မှု ၈၅ ခု ရှိခဲ့ရာမှာ ၈၂ ခုက ဟူ​ဘေးပြည်နယ်က ဖြစ်ပါတယ်။ နိုင်ငံရပ်ခြားက ဝင်လာသူတွေထဲမှာ ကူးစက်မှုကတော့ ၁၈ ခု ရှိပါတယ်။ စုစုပေါင်းကူးစက်မှု ၁၀၃ ခုဟာ ဇူလိုင် ၃၀ ရက်နေ့နောက်ပိုင်း အများဆုံး ဖြစ်ပါတယ်။

လာမယ့်လမှာ ကျရောက်မယ့် နှစ်ကူးကာလမှာ သန်းနဲ့ချီတဲ့ တရုတ်ပြည်သူတွေ ခရီးသွားကြမှာကြောင့် အခု ကူးစက်မှုအပေါ် အာဏာပိုင်တွေက စိုးရိမ်လာကြပါတယ်။

ဟူဘေးပြည်နယ်မြို့တော် ရှီကျာကျွမ်းကို လော့ဒေါင်းချလိုက်ပြီး တစ်မြို့လုံးကလူတွေကို ကိုဗစ်စစ်ဆေးမှုလည်း လုပ်ဆောင်နေပါတယ်။ ဘတ်စ်ကား ဒရိုက်ဘာတွေနဲ့ ကျန်းမာရေးဝန်ထမ်းတွေကတော့ နေ့စဉ် ကိုဗစ်စစ်ဆေးဖို့လည်း အာဏာပိုင်တွေက အမိန့်ထုတ်ထားပါတယ်။

ကပ်ရောဂါကို ကိုင်တွယ်ထိန်းချုပ်ရာမှာ လစ်ဟင်းမှုတွေ ရှိတဲ့အတွက် ပြည်နယ်အစိုးရက တာဝန်ရှိသူ ၃ ဦး ပြီးခဲ့တဲ့သီတင်းပတ်မှာ ရာထူးကနေ ထုတ်ပယ်ခံခဲ့ရပါတယ်။

Ref: Aljazeera

ဒီဇင်ဘာ ၃၀၊ ၂၀၂၀
M-Media

-မိမိတို့ထုတ်လုပ်တဲ့ Sinopharm ကိုဗစ်ကာကွယ်ဆေးဟာ ၇၉ ရာခိုင်နှုန်း ထိရောက်မှုရှိတယ်လို့ တရုတ်နိုင်ငံက ဒီကနေ့မှာ ကြေငြာပါတယ်။

တရုတ်ဟာ အနည်းဆုံး ကိုဗစ်ကာကွယ်ဆေး ၅ မျိုးလောက်ကို နောက်ဆုံးအဆင့် စမ်းသပ်မှု လုပ်ဆောင်နေပြီး Sinopharm ရဲ့ ရလဒ်ကို ပထမဆုံး ထုတ်ပြန်ခဲ့တာဖြစ်ပါတယ်။

လက်ရှိ အမေရိကန်-ဂျာမန် ကိုဗစ်ကာကွယ်ဆေး Pfizer-BioNTech နဲ့ အမေရိကန် ကိုဗစ်ကာကွယ်ဆေး Moderna တို့ဟာ ၉၀ ရာခိုင်နှုန်းကျော် ထိရောက်မှု ရှိနေတာပါ။ တရုတ်ရဲ့ Sinopharm ဆေးကလည်း ကပ်ရောဂါတိုက်ဖျက်ရေးမှာ အရေးပါတဲ့ အခန်းကဏ္ဍကနေ ပါဝင်လာနိုင်ပါတယ်။

Sinopharm ကုမ္ပဏီရဲ့ ထုတ်ပြန်ချက်မှာ ကာကွယ်ဆေးဟာ ၇၉.၃၄ ရာခိုင်နှုန်း ထိရောက်မှုရှိခဲ့ပြီး ပြည်သူလူထုကို ထိုးပေးနိုင်ရေး တရုတ်အစိုးရထံမှာ ခွင့်ပြုချက် တောင်းထားတယ်လို့ ဖော်ပြထားပါတယ်။

စမ်းသပ်ထားတဲ့ ကိုဗစ်ကာကွယ်ဆေးရဲ့ အချက်အလက်အသေးစိတ်ကို တရုတ်က လူသိရှင်ကြား ထုတ်မပြောတဲ့အတွက် နိုင်ငံတကာ အသိုင်းအဝိုင်းက တရုတ်ကာကွယ်ဆေးတွေအပေါ် ယုံကြည်မှု နည်းနေကြပါတယ်။ ဒါ့ကြောင့် နိုင်ငံရပ်ခြားမှာ စမ်းသပ်နိုင်မှုကလည်း အားနည်းပါတယ်။

တရုတ်အစိုးရကတော့ ဒီဆေးတွေဟာ အန္တရာယ်ကင်းတယ်လို့ အာမခံထားပါတယ်။ တရုတ်နိုင်ငံမှာ အရေးပေါ်အစီအစဉ်နဲ့ ပြည်တွင်းထုတ်ကာကွယ်ဆေး ထိုးထားသူ ၁ သန်းကျော်လောက်ရှိပြီး ရှေ့တန်းက ကျန်းမာရေးဝန်ထမ်းတွေနဲ့ အစိုးရဝန်ထမ်းတွေ ပါဝင်ပါတယ်။

Sinopharm ကာကွယ်ဆေးကို ယူအေအီးက အခုလအစောပိုင်းမှာ ထိုးခွင့်ပြုခဲ့ပြီး ၈၆ ရာခိုင်နှုန်း ထိရောက်မှုရှိတယ်လို့ ထုတ်ပြန်ထားပါတယ်။ ဒါဟာ နိုင်ငံခြားတိုင်းပြည်တစ်ခုက ပထမဆုံး ခွင့်ပြုမှုပါ။

Ref: NDTV

ဒီဇင်ဘာ ၂၈၊ ၂၀၂၀
M-Media

-ဝူဟန်မြို့မှာ ကိုရိုနာဗိုင်းရပ်စ် ကူးစက်ဖြစ်ပွားနေကြောင်း သတင်းရေးသားဖော်ပြတဲ့ အမျိုးသမီး ဂျာနယ်လစ်ကို တရုတ်အစိုးရက ဒီကနေ့မှာ ထောင်ဒဏ် ၄ နှစ် ချမှတ်လိုက်ပါတယ်။

အသက် ၃၇ နှစ်အရွယ် ကျန်းကျန်ဆိုသူဖြစ်ပြီး ‘မတည်မငြိမ်ဖြစ်အောင် လှုံ့ဆော်မှု’ စွဲချက်နဲ့ ထောင်ချခံခဲ့ရတာပါ။ တရုတ်အစိုးရဟာ တက်ကြွလှုပ်ရှားသူတွေ၊ အတိုက်အခံတွေကို နှိပ်ကွပ်ဖို့ ဒီစွဲချက်ကို မကြာခဏ အသုံးပြုလေ့ ရှိပါတယ်။

ဝူဟန်မြို့က ကိုဗစ်ကပ်ရောဂါအကြောင်း အဖြစ်မှန်ကို တင်ပြတဲ့ ပြည်တွင်းဂျာနယ်လစ်တွေကို တရုတ်အစိုးရက ပြီးခဲ့တဲ့လတွေမှာ နှိပ်ကွပ်ခဲ့ပြီး ကျန်းကျန်ဟာ အဲဒီထဲကတစ်ယောက်ပါ။

ဖေဖော်ဝါရီလအတွင်း ဝူဟန်မြို့က အခြေအနေတွေနဲ့ပတ်သက်လို့ ကျန်းကျန်ရဲ့ သတင်းတွေ Live လွှင့်မှုတွေကို တရုတ်လူထုက စိတ်ဝင်တစား စောင့်ကြည့်ခဲ့ကြပါတယ်။

ကျန်းကျန် တင်ဆက်တဲ့ သတင်းတွေထဲမှာ ကိုဗစ်ကပ်ရောဂါကို အမှန်အတိုင်းတင်ပြတဲ့ ဂျာနယ်လစ်တွေ အဖမ်းခံရတာ၊ ထိထိရောက် ကုသဆောင်ရွက်ပေးဖို့ တောင်းဆိုတဲ့ ကိုဗစ်လူနာရှင် မိသားစုတွေကို အာဏာပိုင်တွေက နှိပ်ကွပ်တာတွေ ပါဝင်တယ်လို့ တရုတ်လူ့အခွင့်အရေး ကာကွယ်သူများကွန်ယက် (CHRD) က ပြောပါတယ်။

ကျန်းကျန်ဟာ မေလ ၁၄ ရက်နေ့က ပျောက်ဆုံးသွားခဲ့ပြီး ရှန်ဟိုင်းမြို့မှာ အဖမ်းခံရကြောင်း ၁၅ ရက်နေ့မှာ သတင်းထွက်လာပါတယ်။ တရုတ်အစိုးရဟာ သတင်းအမှားဖြန့်တယ်ဆိုတဲ့ စွဲချက်နဲ့ သူမကို နိုဝင်ဘာလမှာ တရားစွဲဆိုခဲ့တာပါ။

ဒီလိုဖမ်းဆီးခံရမှုကို မကျေနပ်တဲ့အတွက် ကျန်းကျန်ဟာ အစာငတ်ခံ ဆန္ဒပြခဲ့တာကြောင့် ကျန်းမာရေးအခြေအနေ ဆိုးရွားနေတယ်လို့ သူမရဲ့ရှေ့နေက ပြောကြားခဲ့ပါတယ်။

Ref: BBC