ဇန်နဝါရ ၂၇၊ ၂၀၂၀
M-Media

• ကိုရိုနာဗိုင်းရပ်စ်ပိုးသစ်ကနေ ဖြစ်ပွားတဲ့ အဆုတ်ရောင်ရောဂါကြောင့် သေဆုံးသူအရေအတွက်ဟာ ၈၁ ဦးအထိ ရှိလာခဲ့ပြီး ကူးစက်ခံနေရသူ အရေအတွက်က ၂၇၀၀ ကျော်ရှိတယ်လို့ တရုတ်အာဏာပိုင်တွေက ဒီကနေ့မှာ သတင်းထုတ်ပြန်ပါတယ်။ ရောဂါပိုးဝင်ပြီး လက္ခဏာမပြခင်အဆင့်မှာတင် ကူးစက်တတ်တယ်လို့လည်း သတိပေးခဲ့ပါတယ်။
• ကမ္ဘာ့ကျန်းမာရေးအဖွဲ့ WHO အကြီးအကဲ Tedros Adhanom Ghebreyesus ဟာ ဒီကနေ့မနက်ပိုင်းက မြို့တော်ဘေဂျင်းကို ရောက်ရှိလာပြီး အစိုးရတာဝန်ရှိသူတွေ၊ ရောဂါတားဆီးကာကွယ်ရေး ဆောင်ရွက်နေသူတွေနဲ့ တွေ့ဆုံဆွေးနွေးဖို့ ရှိပါတယ်။
• အာရှမှာ တောင်ကိုရီးယား၊ နီပေါ၊ ဂျပန်၊ ထိုင်ဝမ်၊ ထိုင်း၊ ဗီယက်နမ်၊ မလေးရှား၊ စင်ကာပူ၊ ဩစတေးလျနိုင်ငံတွေကို ရောဂါပိုး ပြန့်နှံ့ရောက်ရှိနေပြီး၊ ဥရောပမှာ ပြင်သစ်၊ အမေရိကတိုက်မှာ အမေရိကန်နဲ့ ကနေဒါတို့ကို ရောက်ရှိနေပြီ ဖြစ်ပါတယ်။
• ဂျပန်၊ စပိန်၊ ယူကေနဲ့ ဂျာမနီနဲ့ အီရတ်တို့က ဝူဟန်မှာရှိတဲ့ သူတို့နိုင်ငံသားတွေ၊ ကျောင်းသားတွေကို ပြန်ခေါ်ဖို့ ဆောင်ရွက်နေပြီး မလေးရှားနဲ့ မကာအိုတို့ကလည်း ဝူဟန်နဲ့ ဟူဘေးပြည်နယ်က လာရောက်လည်ပတ်တဲ့ တရုတ်နိုင်ငံသားတွေကို ပြည်ဝင်ခွင့် ယာယီ ပိတ်ပင်လိုက်ပါတယ်။ မွန်ဂိုလီးယားကလည်း တရုတ်နယ်စပ်ကနေ ကားတွေ၊ လူတွေ ဝင်ရောက်မှုကို ပိတ်ပင်လိုက်ပြီး၊ စာသင်ကျောင်းတွေကိုလည်း ပိတ်ထားလိုက်ပါတယ်။
• ရောဂါစဖြစ်တဲ့ ဟူဘေးပြည်နယ်က ဝူဟန်မြို့နဲ့ ပတ်ဝန်းကျင်မြို့တစ်ချို့ကို တရုတ်အစိုးရက အသွားအလာ ဖြတ်တောက်ထားသလို၊ နိုင်ငံတစ်ဝှမ်းက မြို့ကြီးတော်တော်များများကိုလည်း ခရီးသွားခွင့် ပိတ်ပင်ထားပါတယ်။ ရာဂါကူးစက်ပြန့်နှံ့မှုဟာ ဝူဟန်မြို့မှာ သိသိသာသာကိုမြင့်တက်လာပါတယ်။
• ကိုရိုနာဗိုင်းရပ်စ်ပိုးအသစ်ဟာ တောရိုင်းတိရစ္ဆာန်တွေကနေ စတင်ကူးစက်တယ်လို့ ယူဆထားတဲ့အတွက် တောရိုင်းတိရိစ္ဆာန်ရောင်းချမှုကို တရုတ်အစိုးရက ယာယီပိတ်ပင်ထားပါတယ်။
• မြန်မာအစိုးရရဲ့ ကျန်းမာရေးနဲ့ အားကစားဝန်ကြီးဌာနက ကိုရိုနာဗိုင်းရပ်စ်အသစ်ဟာ လက်ရှိအချိန်အထိ မြန်မာနိုင်ငံကို ရောက်ရှိခြင်းမရှိသေးဘူးလို့ ထုတ်ပြန်ထားပါတယ်။ မြန်မာ-တရုတ်နယ်စပ် မူဆယ်ဂိတ်ကို ဝင်ထွက်သွားလာမှု ပိတ်ပင်ထားတယ်လို့ သတင်းထွက်ခဲ့ပေမယ့် နယ်စပ်တာဝန်ရှိသူတွေက ငြင်းဆိုခဲ့ပြီး အသွားအလာနည်းသွားတာမျိုးသာရှိတယ်လို့ ဆိုပါတယ်။
• နိုင်ငံခြားရေးဝန်ကြီးဌာနက ဝူဟန်မြို့မှာရှိနေတဲ့ မြန်မာကျောင်းသား၊ ကျောင်းသူတွေ ဆောလျင်စွာ ပြန်ရောက်နိုင်ရေး ဆောင်ရွက်နေတယ်လို့ ဇန်နဝါရီ ၂၆ ရက်နေ့က သတင်းထုတ်ပြန်ပါတယ်။

Ref: BBC, Aljazeera, mmtimes

mmHelthNews

ဇန်နဝါရီ ၂၁၊ ၂၀၂၀
M-Media

-အမည်မသိအဆုတ်ရောင်ရောဂါ လူလူချင်း ပထမဆုံး ကူးစက်မှုကို တွေ့ခဲ့ရတယ်လို့ တရုတ်နိုင်ငံက မနေ့မှာ အတည်ပြုပြောကြားလိုက်ပြီး တရုတ်နှစ်ကူးခရီးသွားရာသီမှာ ကမ္ဘာတစ်ဝှမ်း မြန်မြန်ဆန်ဆန် ပြန့်နှံ့လာနိုင်တယ်ဆိုတဲ့ စိုးရိမ်မှုလည်း မြင့်တက်လာပါတယ်။

နိုင်ငံအလယ်ပိုင်း ဝူဟန်မြို့ ပင်လယ်စာစျေးကွက်ကနေ ၂၀၁၉ ခုနှစ်နှောင်းပိုင်းက စတင်ဖြစ်ပွားခဲ့တဲ့ ဒီရောဂါဟာ အခုအချိန်မှာတော့ တရုတ်နိုင်ငံက မြို့ကြီးတစ်ချို့နဲ့ အာရှနိုင်ငံ ၃ ခုကို ရောက်ရှိနေပြီဖြစ်ပါတယ်။ ပြီးခဲ့တဲ့တစ်ပတ်အတွင်း တရုတ်နိုင်ငံတစ်ဝှမ်း ဒီရောဂါ ပြန့်နှံ့မှုပေါင်း ၁၄၀ ကျော်‌ ဖြစ်ပွားခဲ့ပြီး လူ ၂၁၆ ဦး ကူးစက်ခံနေရပါတယ်။ သေဆုံးသူကတော့ ဇန်နဝါရီ ၂၀ ရက်နေ့အထိ ၄ ဦး ရှိလာပြီ ဖြစ်ပါတယ်။

တရုတ် အမျိုးသား ကျန်းမာရေးကော်မရှင် အကြီးအကဲ ကျုံးနန်ရှာက နိုင်ငံတောင်ပိုင်း ဂွမ်ဒုန်းပြည်နယ်မှာ လူ ၂ ဦးဟာ ဝူဟန်ကို သွားရောက်လည်ပတ်တဲ့ မိသားစုဝင်တွေထံကနေတစ်ဆင့် ကူးစက်ခဲ့ပြီး၊ ကျန်းမာရေးဝန်ထမ်း ၁၄ ဦး လူနာတွေထံကနေ ကူးစက်ခဲ့တယ်လို့ မနေ့က နိုင်ငံပိုင် CCTV သတင်းဌာနနဲ့ အင်တာဗျူးမှာ ပြောကြားခဲ့ပါတယ်။

လူလူချင်းကူးစက်မှုဟာ ရောဂါကို အလျင်အမြန် ပြန့်နှံ့စေနိုင်ပြီး ကမ္ဘာ့ကျန်းမာရေးအဖွဲ့ WHO က ဒီရောဂါကို ‘နိုင်ငံတကာကျန်းမာရေး အရေးပေါ်အခြေအနေ’ အဖြစ် ကြေငြာရမလားဆိုတာ ဗုဒ္ဓဟူးနေ့မှာ အရေးပေါ်အစည်းအဝေး ‌ခေါ်ယူဆွေးနွေးမှာဖြစ်ပါတယ်။

လာမယ့်တစ်ပတ် တရုတ်နှစ်ကူး အားလပ်ရက်မှာ သန်းနဲ့ချီတဲ့ တရုတ်နိုင်ငံသားတွေ ခရီးသွားမှာကြောင့် ရောဂါပြန့်နှံမှု မြင့်တက်လာနိုင်ပြီး ဒါကို ထိန်းချုပ်နိုင်တယ်ဆိုတဲ့ ယုံကြည်မှုမျိုး ရှိတယ်လို့လည်း ကျုံးနန်ရှာက ထည့်သွင်း ပြောကြားခဲ့ပါတယ်။

ဝူဟန်ကပြန်လာတဲ့ အသက် ၃၅ နှစ်အရွယ် အမျိုးသမီးတစ်ဦး ဒီရောဂါလက္ခဏာတွေ့ရတယ်လို့ တောင်ကိုရီးယားနိုင်ငံက မနေ့မှာ ထုတ်ပြန်ခဲ့ပြီး ထိုင်းနဲ့ ဂျပန်တို့ပြီးတဲ့နောက် ရောဂါရောက်ရှိလာတဲ့ တတိယမြောက် အာရှနိုင်ငံ ဖြစ်လာပါတယ်။

Ref: AFP

ဇန်နဝါရီ ၂၀၊ ၂၀၂၀
M-Media

-အမည်မသိ နမိုးနီးယားရောဂါကြောင့် လူတစ်ဦး ထပ်မံသေဆုံးခဲ့ပြီး ကူးစက်မှု ၁၄၀ နီးပါးဖြစ်လာကာ နိုင်ငံရဲ့ အခြားဒေသတွေအထိ ရောက်ရှိလာတယ်လို့ တရုတ်အာဏာပိုင်တွေက ဒီကနေ့မှာ အတည်ပြု ပြောကြားလိုက်ပါတယ်။

နိုင်ငံအလယ်ပိုင်း ဝူဟန်မြို့က ပင်လယ်စာစျေးကနေ စတင်ကူးစက်ဖြစ်ပွားတဲ့ အဆုတ်ရောင်ရောဂါဟာ အခုအချိန်မှာတော့ အရှေ့ပိုင်းက မြို့တော်ဘေဂျင်းနဲ့ တောင်ပိုင်းက ဂွမ်ဒုန်းပြည်နယ်တွေအထိ ပြန့်နှံ့ရောက်ရှိနေပြီ ဖြစ်ပါတယ်။

တောင်ပိုင်းက ရှင်ကျန်းမြို့မှာ အသက် ၆၆ နှစ်အရွယ်အမျိုးသားတစ်ဦး မနေ့က သေဆုံးသွားခဲ့ပြီး ဒါဟာ အမည်မသိ အဆုတ်ရောင်ရောဂါကြောင့် တတိယမြောက်သေဆုံးသူ ဖြစ်ပါတယ်။ ဝူဟန်ကို သွားရောက်ခဲ့တဲ့ အဲဒီအမျိုးသားကို ဇန်နဝါရီ ၁၁ ရက်နေ့ကတည်းက သီးသန့်ခွဲထား ကုသခဲ့တာ ဖြစ်ပါတယ်။

ပြီးခဲ့တဲ့တစ်ပတ်အတွင်း နောက်ထပ် ကူးစက်မှု ၁၃၆ ခု တွေ့ခဲ့တယ်လို့ ဝူဟန်အာဏာပိုင်တွေက အတည်ပြုခဲ့ပါတယ်။ ဘေဂျင်းမှာ ကူးစက်မှု ၂ ခုရှိခဲ့ပြီး ဂွမ်ဒုန်းမှာ ကူးစက်မှု တစ်ခု ရှိခဲ့ပါတယ်။ ရောဂါသံသယကြောင့် စောင့်ကြည့်ကုသရသူ အရေအတွက်ဟာ တရုတ်နိုင်ငံတစ်ဝှမ်းမှာ ၂၀၁ ဦး ရှိခဲ့ပြီး ၉ ဦးက စိုးရိမ်ရတဲ့အနေအထားမှာ ရှိနေပါတယ်။

နိုင်ငံရပ်ခြား ကူးစက်မှုကတော့ ထိုင်းနိုင်ငံမှာ ၂ ဦး၊ ဂျပန်နိုင်ငံမှာ ၁ ဦး ရှိနေပါတယ်။ အခုတစ်ပတ် တရုတ်နှစ်ကူး အားလပ်ရက်မှာ တရုတ်နိုင်ငံသားတွေ ခရီးထွက်မှာကြောင့် ဒီရောဂါ အလွန်အမင်း ပြန့်နှံ့သွားနိုင်တယ်ဆိုတဲ့ စိုးရိမ်မှုတွေလည်း ရှိနေပါတယ်။

Ref: CNA