ဇန်နဝါရီ ၂၈၊ ၂၀၂၀ (ည ၈ နာရီ)
M-Media
– ကိုရိုနာဗိုင်းရပ်စ်ပိုးစ် ပြန့်နှံ့ဖြစ်ပွားရာ တရုတ်နိုင်ငံအလယ်ပိုင်း ဝူဟန်မြို့ကို သွားရောက်ခြင်းမရှိတဲ့ ဂျပန်အမျိုးသားတစ်ဦး ရောဂါကူးစက်နေတယ်လို့ ဂျပန်နိုင်ငံက ဒီကနေ့မှာ ထုတ်ပြန်လိုက်ပါတယ်။ အသက် ၆၀ အရွယ်အဲဒီ အဘိုးအိုဟာ ခရီးသွားဘတ်စ်ကားယဉ်မောင်းဖြစ်ပြီး ဝူဟန်မြို့ကနေ လာရောက်တဲ့ တရုတ်ခရီးသွားတွေကို ဇန်နဝါရီ ၈ ရက်ကနေ ၁၆ ရက်နေ့အတွင်း လိုက်လံပို့ဆောင်ပေးခဲ့သူပါ။ ဒါဟာ ဝူဟန်ကိုမသွားဘဲနဲ့ ကိုရိုနာဗိုင်းရပ်စ် ပထမဆုံး ကူးစက်မှုလည်း ဖြစ်ပါတယ်။
– ဝူဟန်ဗိုင်းရပ်စ်ပိုး ကူးစက်သူတစ်ဦးကို ပထမဆုံးတွေ့ရှိတယ်လို့ မနေ့မှာကြေငြာထားတဲ့ သီရိလင်္ကာက ဒီကနေ့မှာ တရုတ်နိုင်ငံသားတွေကို ဆိုက်ရောက်ဗီဇာထုတ်ပေးမှု ရပ်ဆိုင်းလိုက်ပါတယ်။
– ဂျာမနီက ကိုရိုနာဗိုင်းရပ်စ်သစ်ကူးစက်သူတစ်ဦးကို ပထမဆုံးတွေ့ရှိခဲ့တယ်လို့ ဒီကနေ့မှာ သတင်းထုတ်ပြန်ခဲ့ပါတယ်။ ကူးစက်သူဟာ အသက် ၃၃ နှစ်အရွယ် ဂျာမန်အမျိုးသားဖြစ်ပြီး ပြီးခဲ့တဲ့တစ်ပတ်က ဂျာမနီကိုလာရောက်ခဲ့တဲ့ တရုတ်အမျိုးသမီး လုပ်ဖော်ကိုင်ဖက်ထံကနေ ကူးစက်တာဖြစ်ပါတယ်။ ဂျာမနီဟာ ယူကေပြီးတဲ့နောက် ဝူဟန်ဗိုင်းရပ်စ်တွေ့ရှိတဲ့ ဒုတိယမြောက် ဥရောပနိုင်ငံ ဖြစ်လာပါတယ်။
– ဟောင်ကောင်အစိုးရက တရုတ်ပြည်မကြီးနဲ့ ဆက်သွယ်ထားတဲ့ ရထားလိုင်း၊ သင်္ဘောလိုင်းတွေကို ဇန်နဝါရီ ၃၀ ရက်နေ့ကစပြီး ရပ်ဆိုင်းတော့မယ်လို့ ကြေငြာလိုက်ပါတယ်။ လေကြောင်းခရီးစဉ်ကိုလည်း ထက်ဝက်အထိ လျှော့ချမှာဖြစ်ပြီး ပြည်မကြီးလူတွေအတွက် တစ်ကိုယ်ရေ ခရီးသွားဗီဇာ ထုတ်ပေးမှုကိုလည်း ရပ်ဆိုင်းမယ်လို့ ဆိုပါတယ်။
– ကမ္ဘာ့ကျန်းမာရေးအဖွဲ့ WHO အကြီးအကဲ Tedros Adhanom Ghebreyesus က တရုတ်နိုင်ငံဟာ ကိုရိုဗိုင်းရပ်စ်သစ်ကို တားဆီးနိုင်စွမ်းရှိတယ်လို့ ယုံကြည်ကြောင်း ပြောကြားခဲ့ပြီး တည်တည်ငြိမ်ငြိမ်ရှိဖို့ မိမိတို့နိုင်ငံသားတွေကို တရုတ်နိုင်ငံကနေ ပြန်လည်ခေါ်ဆောင်ရေး အလျင်စလိုမလုပ်ကြဖို့ တိုက်တွန်းခဲ့ပါတယ်။
Ref: Aljazeera
