News @ M-Media

Tag: Egypt

  • အီဂျစ်ကို ကျူးကျော်တိုက်ခိုက်ဖို့ အစ္စရေးက ကြံရွယ်နေပြီလား

    အီဂျစ်ကို ကျူးကျော်တိုက်ခိုက်ဖို့ အစ္စရေးက ကြံရွယ်နေပြီလား

    (ဓာတ်ပုံ – ဆိုင်းနိုင်းကျွန်းဆွယ်ကို အစ္စရေးလက်မှ ပြန်သိမ်းပြီးနောက် တွေ့ရသည့် အီဂျစ်စစ်သားများ)

    သြဂုတ်လအတွင်း နေတိုးအဖွဲ့က ဖင်လန်မှာ ပြုလုပ်တဲ့ Atlantic Trident စစ်ရေးလေ့ကျင့်မှုမှာ ပြင်သစ်ထုတ် Dassault Rafale လေယာဥ်တွေရဲ့ စွမ်းဆောင်ရည်ကြောင့် ဒီလေယာဥ်တွေကို ပိုင်ဆိုင်ထားတဲ့ အီဂျစ်ဟာ အစ္စရေးအတွက် စိုးရိမ်စရာ ကောင်းလာနေတယ်လို့ ဟီဘရူးမီဒီယာတွေက ပြီးခဲ့တဲ့သီတင်းပတ်ကစပြီး ဖော်ပြလာပါတယ်။

    အရှေ့အလယ်ပိုင်းက နိုင်ငံတွေရဲ့ စစ်အင်အားကို အမြဲတမ်း အစ္စရေးထက် နိမ့်ပါးနေအောင် အမေရိကန်နဲ့ အပေါင်းအပါတွေက ၁၉၄၈ ခုနှစ်ကစလို့ နည်းမျိုးစုံနဲ့ လုပ်ဆောင်ပေးနေတာပါ။ ဒါပေမယ့် အစ္စရေးကတော့ နိုင်ငံတစ်ခုကို ကျူးကျော်တိုက်ခိုက်တော့မယ်ဆိုရင် စစ်အင်အားကြီးထွားလာတာကို စိုးရိမ်တယ်ဆိုတဲ့ အသံမျိုး ပိုမိုကျယ်လောင်လာအောင် လော်ဘီမီဒီယာတွေနဲ့ လုပ်ဆောင်လေ့ရှိပါတယ်။

    သြဂုတ်လ စစ်ရေးလေ့ကျင့်မှုမှာ သုံးခဲ့တဲ့ ပြင်သစ်လုပ် Dassault Rafale တိုက်လေယာဥ်တွေဟာ အစ္စရေးကို အမေရိကန်က ပေးထားတဲ့ ကမ္ဘာ့နောက်ဆုံးပေါ် တိုက်လေယာဥ် F-35 ထက် လေပေါ်စီးချင်းထိုးမှု၊ ကိုယ်ပျောက်စွမ်းရည် စတာတွေမှာ ပိုသာတယ်လို့ အစ္စရေးမီဒီယာတွေက ဖော်ပြပါတယ်။ အီဂျစ်လေတပ်ဟာ အစ္စရေးလေတပ်ထက် ၂၄ ရာခိုင်နှုန်း ပိုကြီးတယ်လို့လည်း ထောက်ပြခဲ့ပါတယ်။

    ၃ လအရင် အိန္ဒိနဲ့ ပါကစ္စတန်တို့ရဲ့ လေကြောင်းတိုက်ပွဲမှာ အိန္ဒိယက အသုံးပြုခဲ့တဲ့ ပြင်သစ်လုပ် Dassault Rafale လေယာဥ်ဟာ ပါကစ္စတန်က အသုံးပြုတဲ့ တရုတ်လုပ် J-10 လေယာဥ်ကိုတောင် မယှဥ်နိုင်ဘူးဆိုတာ ကမ္ဘာက တွေ့မြင်ခဲ့ရပါတယ်။

    အီဂျစ်ကလည်း ဒီအားနည်းချက်ကို သိတဲ့အတွက် တရုတ်ထံကနေ J-10 တိုက်လေယာဥ်တွေ ၀ယ်ယူဖို့ ကြိုးစားလာပါတယ်။ ဟီဘရူးလော်ဘီမီဒီယာတွေရဲ့ သုံးသပ်မှုမှာလည်း ဒီအချက်ကို ထည့်သွင်းဖော်ပြထားပါတယ်။

    အီဂျစ်ဟာ ဂါဇာက အစ္စရေးရဲ့ လူမျိုးတုန်းသတ်ဖြတ်မှုနဲ့ပတ်သက်ပြီး ပြင်းပြင်းထန်ထန် ၀ေဖန်ထားတာပါ။ ဂါဇာက ပါလက်စတိုင်းပြည်သူတွေကို အီဂျစ်ပိုင် ဆိုင်းနိုင်းကျွန်းဆွယ်ကို မောင်းထုတ်ဖို့ အစ္စရေးရဲ့ ကြိုးပမ်းမှုကို အီဂျစ်အစိုးရက ပြင်းပြင်းထန်ထန် သတိပေးထားပြီး နယ်စပ်ဖက်မှာလည်း တပ်တွေကို ထပ်တိုးချထားပါတယ်။

    မိမိတို့မြေကို ကျူးကျော်မှုမှန်သမျှ စစ်ကြေငြာမှုအဖြစ် မှတ်ယူမယ်လို့လည်း အီဂျစ်က ထုတ်ပြန်ထားပါတယ်။

    အီဂျစ်နဲ့ အစ္စရေးတို့ဟာ ၁၉၇၃ ခုနှစ်က ထိပ်တိုက်တွေ့ဆုံဖူးပါတယ်။ ၁၉၆၇ ခုနှစ် ၆ ရက်စစ်ပွဲမှာ အစ္စရေးက ကျူးကျော် သိမ်းပိုက်ခဲ့တဲ့ ဆိုင်းနိုင်ကျွန်းဆွယ်ကို အီဂျစ်က ၁၉၇၃ ခုနှစ်စစ်ပွဲမှာ ပြန်လည်ရယူနိုင်ခဲ့ပါတယ်။ ထိုစဥ်ကလည်း အီဂျစ်ဟာ အစ္စရေးစစ်တပ်ထက် များစွာအားနည်းခဲ့ပါတယ်။

    Ref: Royal News

  • စက်တင်ဘာ ၆ ရက်နေ့ သတင်းတို

    စက်တင်ဘာ ၆ ရက်နေ့ သတင်းတို

    M-Media

    မွတ်စလင်နိုင်ငံများတွင် အရောင်းကျလာပြီဖြစ်တဲ့ Coke နှင့် Pepsi
    —————
    ပြီးခဲ့တဲ့နှစ် အောက်တိုဘာ ၇ ရက်နေ့က စတင်တဲ့ ဂါဇာက အစ္စရေးရဲ့လူသတ်ပွဲ နောက်ဆက်တွဲ မွတ်စလင်နိုင်ငံတွေမှာ Coke နဲ့ Pepsi တို့ကို သပိတ်မှောက်မှုကြောင့် ပြည်တွင်းထုတ် အချိုရည်စျေးကွက် ပိုမို အားကောင်းလာပါတယ်။ ဂျူးလုပ်ငန်းတွေဖြစ်ကြတဲ့ Coke နဲ့ Pepsi တို့ဟာ အစ္စရေးကို ဒေါ်လာသန်းရာထောင်ချီ ထောက်ပံ့နေကြတာဖြစ်လို့ မွတ်စလင်နိုင်ငံတွေက သပိတ်မှောက်ကြတာပါ။ အီဂျစ်၊ ပါကစ္စတန်နဲ့ ဘင်္ဂလားဒေ့ရှ်တို့လို နိုင်ငံတွေမှာ ဒေသထုတ် အချိုရည်တွေဟာ Coke နဲ့ Pepsi တို့နေရာမှာ သိသိသာသာကို နေရာယူလာပြီ ဖြစ်ပါတယ်။

    ဟာလာလ်စျေးကွက်တွင် ရုရှား၀င်လာပါက မလေးရှား ကူညီမည်
    ——————-
    မလေးရှားဟာ အစ္စလာမ့်ဘဏ်လုပ်ငန်းနဲ့ ဟာလာလ်စျေးကွက်မှာ အတွေ့အကြုံ ကြွယ်၀နေပြီဖြစ်တာကြောင့် ရုရှားနိုင်ငံက ဒီလုပ်ငန်းတွေမှာ ပါ၀င်လုပ်ကိုင်ချင်ရင် ကူညီပေးမယ်လို့ ၀န်ကြီးချုပ် အန်၀ါရ်အီဘရာဟင်က ပြောပါတယ်။ လက်ရှိ ရုရှားကိုရောက်နေတဲ့ အန်၀ါရ်ဟာ သမ္မတပူတင်၊ ရုရှားမွတ်စလင်ခေါင်းဆောင်တွေနဲ့ တွေ့ဆုံကာ စီးပွားရေးမှာ ပူးပေါင်းဆောင်ရွက်ရေး ဆွေးနွေးခဲ့ကြပါတယ်။

    အစ္စလာမ်သာသနာကို အမြတ်မထုတ်ရေး ပါကစ္စတန်ဆော်သြ
    ———————-
    အကြမ်းဖက်၀ါဒ လှုံ့ဆော်ရေးမှာ အစ္စလာမ်သာသနာကို တစ်လွဲအသုံးချ အမြတ်ထုတ်နေတာကို ရပ်တန့်ဖို့ ပါကစ္စတန် ပြည်ထဲရေး၀န်ကြီး မိုရှင်နက်ဗီက တိုက်တွန်းလိုက်ပါတယ်။ ပါကစ္စတန်မှာ ခွဲထွက်ရေး အစွန်းရောက်အဖွဲ့တွေရဲ့ တိုက်ခိုက်မှု လတ်တလောမှာ မြင့်တက်နေတာဖြစ်ပါတယ်။ ဘာသာပေါင်းစုံ လူ့အဖွဲ့အစည်းကြားမှာ ညီညွတ်ရေး ကူညီပေးကြဖို့လည်း ပါကစ္စတန်အစိုးရက ဘာသာရေးခေါင်းဆောင်တွေကို တောင်းဆိုထားပါတယ်။

    Ref: Reuters, The Star

  • နှစ်သန်း ၇၀ က ရေချိုလိပ် ရုပ်ကြွင်းတစ်ခု အီဂျစ်တွင် တွေ့ရှိ

    နှစ်သန်း ၇၀ က ရေချိုလိပ် ရုပ်ကြွင်းတစ်ခု အီဂျစ်တွင် တွေ့ရှိ

    ဧပြီ ၃၊ ၂၀၂၃

    M-Media 


    -လွန်ခဲ့တဲ့ နှစ်သန်းပေါင်း ၇၀ လောက်က ရှင်သန်ခဲ့တဲ့ ရေချိုလိပ် ရုပ်ကြွင်းတစ်ခုကို အီဂျစ်မှာ တူးဖော်တွေ့ရှိခဲ့ပါတယ်။ 

    ဒီလိပ်ကြီးတွေဟာ ဒိုင်နိုဆောတွေလက်ထက်က ရှင်သန်ခဲ့တာ ဖြစ်ပါတယ်။ 

    နိုင်ငံအနောက်ပိုင်း ခါရ်ဂါဒေသက သဲကန္တာရမှာ ရှေးဟောင်းသုတေသနအဖွဲ့နှစ်ခုရဲ့ ပူးပေါင်းတူးဖော်မှုအတွင်း ပေါ်လာတာဖြစ်ပြီး အီဂျစ်နဲ့ မြောက်အာဖရိကမှာ ဒီလိုသတ္တ၀ါရုပ်ကြွင်းမျိုး ပထမဆုံး တွေ့ရှိရတာပါ။  

    “အီဂျစ်က အနောက်ဖက်သဲကန္တာရရဲ့ အရေးပါမှုကို ဒီတူးဖော်မှုတွေကနေ အများကြီး သိရပါတယ်။ အာဖရိက နိုင်ငံတွေမှာတွေ့ရတဲ့ ကျောရိုးရှိသတ္တ၀ါရုပ်ကြွင်း အများအပြားကို တွေ့ရတဲ့အတွက် ဒီသတ္တ၀ါတွေ ရှင်သန်ဖို့ ဒီဒေသမှာ ရေခံမြေခံ ရှိခဲ့တယ်ဆိုတာကိုလည်း သိလာရပါတယ်” လို့ ကိုင်ရိုတက္ကသိုလ်က သုတေသနပညာရှင် အဟ်မဒ် အဘ်ဒဲလ် ရရှစ်ဖ်က ပြောပါတယ်။ 

    ခါရ်ဂါသဲကန္တာရမှာ လွန်ခဲ့တဲ့ ၃ နှစ်လောက်ကတည်းက ရှေးဟောင်း သုတေသနဆိုင်ရာ တူးဖော်မှုတွေ လုပ်ဆောင်ခဲ့ပြီး၊ အခုတွေ့ရှိရတာတွေဟာ ကမ္ဘာ့အခြားနေရာတွေမှာ တွေ့ရှိရတာတွေနဲ့ မတူပါဘူး။ 

    “လွန်ခဲ့တဲ့ နှစ်သန်းပေါင်း ၇၀ လောက်ကတည်းက အာဖရိကတိုက်ကနေ ပျောက်ကွယ်သွားတဲ့ ခေါင်းတစ်စောင်း ရေချိုလိပ်တွေနဲ့ပတ်သက်တဲ့ သမိုင်းဆိုင်ရာ ကွက်လပ်ကြီးတစ်ခုကို အခုတွေ့ရှိမှုက ဖြည့်ပေးလိုက်တာပါ” လို့ ရရှစ်ဖ်က ထည့်သွင်းပြောဆိုခဲ့ပါတယ်။ 

    Ref: Arab News 

  • အာရဘီစကားပြော ပထမဆုံး သူနာပြုစက်ရုပ်ကို အီဂျစ်တက္ကသိုလ် တီထွင်

    အာရဘီစကားပြော ပထမဆုံး သူနာပြုစက်ရုပ်ကို အီဂျစ်တက္ကသိုလ် တီထွင်

    ဩဂုတ် ၁၃၊ ၂၀၂၁
    M-Media

    -အီဂျစ်နိုင်ငံ ကိုင်ရိုင်မြို့က Ain Shams တက္ကသိုလ်ဟာ အာရစကားပြောတဲ့ ပထမဆုံး သူနာပြုစက်ရုပ်တစ်ခုကို တီထွင်လိုက်ပါတယ်။

    ကိုဗစ်ကပ်ရောဂါ ပြန့်နှံ့မှု၊ ကြိုတင်ကာကွယ်ရေး လုပ်ဆောင်ရမှုတွေကြောင့် ဒီလိုစက်ရုပ်မျိုးတီထွင်ဖို့ စိတ်ကူးရခဲ့တာလို့ တက္ကသိုလ်ဥက္ကဌ မဟ်မူးဒ် အလ်-မာတီနီက ပြောပါတယ်။

    ပရောဂျက်ဖြစ်မြောက်ရေးအတွက် တက္ကသိုလ်က ကွန်ပျူတာဌာန၊ သတင်းအချက်အလက်ဌာန၊ ဆေးဝါးဌာန၊ သူနာပြုဌာနတို့က ကျောင်းသားတွေ ပူးပေါင်းဆောင်ရွက်ခဲ့တာ ဖြစ်ပါတယ်။

    စက်ရုပ်ကို Shams လို့ အမည်ပေးထားပြီး အာရဘီစကားပြောဆိုနိုင်ကာ ဆရာဝန်တွေ၊ လူနာတွေရဲ့ မျက်နှာတွေကို မှတ်မိနိုင်တဲ့စွမ်းရည်တွေ ရှိပါတယ်။ လူနာတွေရဲ့ လိုအပ်ချက်ကို ဖြည့်ဆည်း ဆောင်ရွက်ပေးနိုင်သလို ကျန်းမာရေး အချက်အလက်တွေကိုလည်း ထည့်သွင်းပေးနိုင်ပါတယ်။

    စက်ရုပ်ရဲ့ လုပ်ဆောင်ချက်တွေထဲမှာ ဆေးစစ်ချက် နမူနာတွေကို သက်ဆိုင်ရာ ဌာနတွေဆီ သယ်ယူပို့ဆောင်ပေးတာ၊ ဆေးဌာနကနေ လိုအပ်တဲ့ ဆေးဝါးတွေကို လူနာဆီ သယ်ဆောင်ပေးတာ၊ ဆရာဝန်နဲ့ လူနာအကြား ဗီဒီယိုကနေတစ်ဆင့် ဆက်သွယ်ပေးတာ၊ ပိုးသတ်ရေးလုပ်ငန်း လုပ်ဆောင်ပေးတာတွေ ပါဝင်ပါတယ်။

    လက်ရှိ ဒီစက်ရုပ်ကို Ain Shams တက္ကသိုလ်ဆေးရုံမှာ စမ်းသပ်အသုံးပြုနေပါတယ်။ ဉာဏ်ရည်တုနည်းပညာ အသုံးပြုပြီး တစ်ခြားလုပ်ငန်းတွေ ခိုင်းစေနိုင်ဖို့လည်း တီထွင်သူတွေက စီစဉ်နေပါတယ်။

    တက္ကသိုလ် ကွန်ပျူတာနှင့် သတင်းအချက်အလက်ဌာန လက်ထောက်ပါ​မောက္ခဖြစ်ပြီး Shams စက်ရုပ်တီထွင်မှုမှာ ပါဝင်ခဲ့တဲ့ မိုဟာမက် မာရိုင်က တက္ကသိုလ် ဆေးရုံမှာ အသုံးပြုဖို့အတွက် နောက်ထပ် စက်ရုပ် ၂၀ လောက် ထုတ်လုပ်သွားမယ်လို့ ပြောကြားခဲ့ပါတယ်။

    အာရပ်ဒေသ စက်မှုဖွံ့ဖြိုးရေးအဖွဲ့ Arab Organization for Industrialization နဲ့ ပေါင်းပြီး စီးပွားဖြစ်ထုတ်လုပ်သွားဖို့လည်း ရည်ရွယ်ထားပါတယ်။

    Ref: Arab News

  • မြေထဲပင်လယ်တွင် အီဂျစ်က ရေတပ်စခန်းတစ်ခု ဖွင့်လှစ်

    မြေထဲပင်လယ်တွင် အီဂျစ်က ရေတပ်စခန်းတစ်ခု ဖွင့်လှစ်

    ဇူလိုင် ၄၊ ၂၀၂၁
    M-Media

    -မြေထဲပင်လယ်က အရေးပါတဲ့ ရေတပ်စခန်းတစ်ခုကို အီဂျစ်က မနေ့မှာ ဖွင့်လှစ်လိုက်ပါတယ်။

    အလက်ဇန်းဒရီးယားမြို့ အနောက်ပိုင်း လစ်ဗျားနယ်စပ်နားမှာရှိတဲ့ အဲဒီ ရေတပ်စခန်းဟာ ဖြတ်သန်းသွားလာတဲ့သင်္ဘောတွေကို ပိုမိုစောင့်ရှောက်ပေးနိုင်မှာဖြစ်ပြီး နိုင်ငံရဲ့ မြောက်ဖက်နဲ့ အနောက်ဖက် ရေပိုင်နက်တွေကို လုံခြုံစေလိမ့်မယ်လို့ အီဂျစ်သမ္မတရုံးက ထုတ်ပြန်တဲ့ ကြေငြာချက်မှာ ဖော်ပြထားပါတယ်။

    ရေတပ်စခန်း ဖွင့်ပွဲအခမ်းအနားကို အီဂျစ် သမ္မတ ဖာတာ အလ်စီစီ ယူအေအီး အိမ်ရှေ့မင်းသား ရှိခ် မိုဟာမက် ဘင် ဇယက် အလ်နဟ်ယန်၊ လစ်ဗျားသမ္မတကောင်စီ ဥက္ကဌ မိုဟာမက် အလ် မန်ဖီတို့ တက်ရောက်ခဲ့ပါတယ်။

    အလ်စီစီဟာ စခန်းက စစ်သင်္ဘောတွေ၊ တိုက်လေယာဉ်တွေ၊ ရဟတ်ယာဉ်တွေနဲ့ စစ်ဖက်ဆိုင်ရာ ပစ္စည်းတွေကို လှည့်လည်ကြည့်ရှု စစ်ဆေးခဲ့ပါတယ်။

    ရေတပ်စခန်းကို July 3 လို့ အမည်ပေးထာပြီး နိုင်ငံရဲ့ ပထမ​ဆုံး ဒီမိုကရေစီနည်းကျ ရွေးကောက်တင်မြှောက်ခံရတဲ့ သမ္မတ မိုဟာမက် မော်စီအစိုးရကို အလ်စီစီဦးဆောင်တဲ့ စစ်တပ်က ဖြုတ်ချအာဏာသိမ်းလိုက်တဲ့နေ့ကို မှည့်ခေါ်တာ ဖြစ်ပါတယ်။

    အီဂျစ်ဟာ မြေထဲပင်လယ်မှာ ရေတပ်စခန်း ၃ ခု၊ ပင်လယ်နီမှာ ၁ ခု ရှိနေပါတယ်။

    Ref: Aljazeera