နိုဝင်ဘာ ၄၊ ၂၀၁၉
M-Media
– အစ္စလာမ်သာသနာကို စတင်ဟောကြားတင်ပြခဲ့တဲ့ တမန်တော် မုဟမ္မဒ်ရဲ့ မွေးနေ့မင်္ဂလာ နီးကပ်လာတဲ့အချိန်မှာ အီဂျစ်နိုင်ငံမြို့တော် ကိုင်ရိုက သမိုင်းဝင် ဘာ့ဘ် အလ်-ဘဟာရ်လမ်းမကြီးမှာ ပွဲတော်အငွေ့အသက်တွေပျံ့လွင့်လာပါတယ်။
အစ္စလာမ့်ပြက္ခဒိန် ရဘီအွလ်အောင်ဝလ်လ ၁၂ ရက် (နိုဝင်ဘာ ၉ ရက်) နေ့မှာ ကျရောက်မယ့် ‘တမန်တော်နေ့’ အခမ်းအနားအတွက် ကမ္ဘာတစ်ဝှမ်းက အစ္စလာမ်ဘာသာဝင်တွေဟာ ပုံစံမျိုးစုံနဲ့ ကြိုဆိုကျင်းပကျမှာဖြစ်ပါတယ်။ ဝတ်ပြုဆုတောင်းတာ၊ တရားဒေသနာဟောကြားတာ၊ စတုဒီသာကျွေးတာမျိုးတွေအပြင် နိုင်ငံအလိုက်၊ လူမျိုးအလိုက် ရိုးရာဓလေ့ထုံးတမ်းတွေနဲ့ ထုံးမွှမ်းထားတဲ့ အခမ်းအနားတွေလည်း ရှိနေပါတယ်။
တမန်တော်နေ့နီးကပ်လာရင် ကိုင်ရိုမြို့က ဘာ့ဘ် အလ်-ဘဟာရ်လမ်းမကြီးမှာ နှစ်စဉ်ပေါ်ပေါက်လာလေ့ရှိတဲ့ အခြေအနေကတော့ ထူးခြားပါတယ်။ လမ်းမကြီးတစ်လျှောက် ရိုးရာ မုန့်အချိုဆိုင်တွေ ပေါ်ပေါက်လာပြီး အရသာအကောင်းဆုံး၊ အဆင်းအလှဆုံး မုန့်တွေကို သူ့ထက်ငါ အပြိုင်အဆိုင် ဖန်တီးကြတာပါ။
“ပျော်ရွှင်ဖွယ်ရာခံစားမှုကို မျှဝေရတာ ကျွန်တော်တို့ ကြိုက်ပါတယ်။ နှစ်စဉ် ဒီလိုအချိန်ရောက်ရင် ဘာ့ဘ် အလ်-ဘဟာရ်လမ်းမကြီးကို ရောက်လာပြီး သကြားမုန့်တွေနဲ့ ဆင်ယင်ချယ်သကြပါတယ်” လို့ မုန့်အချိုဆိုင်ပိုင်ရှင်တစ်ဦးက ပြောပါတယ်။
သကြားမုန့်အချိန်တွေနဲ့ အရုပ်တွေဖန်တီးကာ ရောင်စုံပစ္စည်းတွေနဲ့ လှပအောင်ချယ်သပြရဲ့ သူ့ရဲ့ဆိုင်ရှေ့မှာတော့ ကလေးလူကြီးအားလုံး စိတ်ဝင်တစား ၀ိုင်းအုံကြည့်ရှုနေကြပါတယ်။
တမန်တော် မုဟမ္မဒ်သခင်ဟာ လွန်ခဲ့တဲ့ နှစ်ပေါင်း ၁၄၅၀ အရင်က ဒီကနေ့ ဆော်ဒီအာရေဗျလို့ခေါ်တဲ့ နိုင်ငံရဲ့ မက္ကာမြို့မှာ ဖွားမြင်ခဲ့တာဖြစ်ပါတယ်။ ဖွားမြင်ခြင်းအထိမ်းအမှတ်နဲ့ အစ္စလာမ်ကမ္ဘာမှာ ကျင်းပတဲ့ တမန်တော်နေ့အခမ်းအနား (Al Mawlid Al Nabawi) ကို အီဂျစ်နိုင်ငံမှာတော့ လွန်ခဲ့တဲ့ နှစ်ပေါင်း ၁၀၀၀ အရင် ဖာတီမိုက်မင်းဆက်တွေလက်ထက်မှာ စတင်ပြုလုပ်ခဲ့တာ ဖြစ်ပါတယ်။
ကိုင်ရိုက ဘာ့ဘ် အလ်-ဘဟာရ်လမ်းမကြီးက မုန့်အချိုဆိုင်တွေကတော့ တမန်တော်နေ့ အထိမ်းအမှတ် အဖြစ် မုန့်တွေကို မြေပဲ၊ နှမ်း၊ အုန်းသီးနဲ့ အခြားသစ်စေ့တွေနဲ့ အထူးကောင်းမွန်အောင် ဖန်တီးကြပါတယ်။
“လွန်ခဲ့တဲ့ ၃၅ နှစ်လုံးလုံး ကျွန်တော် ဒီနေရာကို နှစ်တိုင်းလာတယ်။ မုန့်အချိုတွေကို လှတပတဖြစ်အောင် ဖန်တီးရတာကို ကျွန်တော် နှစ်သက်တယ်လေ။ ဆင်းရဲ၊ ချမ်းသာမရွေး ဒီမုန့်တွေကို ဝယ်စားနိုင်ပါတယ်” လို့ အသက် ၅၆ နှစ်အရွယ် အဘ်ဒူက ပြောကြားခဲ့ပါတယ်။
အသက် ၂၅ နှစ်အရွယ် ဆယဒ်ကတော့ သကြားအိုးကို သစ်သားယောက်မကြီးနဲ့ မွှေနေပါတယ်။
“အသက် ၁၂ နှစ်အရွယ်ကတည်းက ကျွန်တော် ဒီဆိုင်မှာ အလုပ်လုပ်လာတာပါ”
သူ့ရဲ့အလုပ်က အီဂျစ်နိုင်ငံမှာရှိတဲ့ မုန့်အချိုကြိုက်သူတွေကို ပျော်ရွှင်အောင် ထားရတဲ့အလုပ်ဖြစ်ပြီး တမန်တော်နေ့ပွဲတော်ပြီးရင်တော့ အိမ်ပြန်ကာ ပုံမှန် ချောကလက်တွေ၊ မုန့်အချိုတွေ လုပ်တယ်လို့လည်း သူက ဆိုပါတယ်။
Ref: Yahoo
