News @ M-Media

Tag: EPL2020-21

  • တနင်္ဂနွေနေ့ ဘောလုံးသတင်းများ

    တနင်္ဂနွေနေ့ ဘောလုံးသတင်းများ

    စက်တင်ဘာ ၂၇၊ ၂၀၂၀
    M-Media

    ဘ၀တွင် တစ်ခါတစ်ရံ မမျှတမှုကို လက်ခံရတတ်သည်ဟု ဘရိုက်တန်နည်းပြ ဖွင့်ဟ

    မနေ့က ​မန်ယူနဲ့ပွဲမှာ အသင်းရဲ့ကစားပုံအတွက် ဂုဏ်ယူမိပြီး ဒီအခြေအနေကို ဆက်ထိန်းသွားဖို့ လိုအပ်တယ်လို့ ဘရိုက်တန်နည်း ဂရေဟမ်ပေါ်တာက ပြောကြားလိုက်ပါတယ်။

    ဘရိုက်တန်ဟာ ဒီပွဲမှာ ကစားပုံကောင်းခဲ့ပေမယ့် နာကျင်အချိန်ပိုက အငြင်းပွားဖွယ် ပင်နယ်တီကြောင့် ၃ ဂိုး ၂ ဂိုးနဲ့ ရှုံးနိမ့်ခဲ့ရတာပါ။

    ပေါ်တာက ဒါဟာ နာကျင်ဖွယ်ရာအခြေအနေမျိုးဖြစ်ပြီး မိမိကြောင့်မဟုတ်ဘဲ ဒိုင်လူကြီးကြောင့်သာ ရှုံးနိမ့်ခဲ့ရတာဖြစ်ကြောင်း၊ ဘ၀မှာ တစ်ခါတစ်ရံ မမျှတတဲ့အခြေအနေမျိုး ကြုံတွေ့ရတဲ့ပြီး မနေ့က ပွဲဟာ ဒီလိုအနေအထားမျိုးဖြစ်ကြောင်း၊ အသင်းကတော့ တိုးတက်လာကြောင်း ထည့်သွင်းပြောကြားခဲ့ပါတယ်။

    ဝက်စ်ဘရွန်းပွဲမှာ သင်ခန်းစာရခဲ့တဲ့ လမ်းပတ်

    မနေ့က ဝက်စ်ဘရွန်းနဲ့ပွဲမှာ သင်ခန်းစာ ကောင်းကောင်းရလိုက်ပြီး အသင်းပိုကောင်းလာအောင် လုပ်ဆောင်စရာ အများကြီးရှိသေးတယ်လို့ ချယ်ဆီးနည်းပြ ဖရန့်လမ်းပတ်က ပြောကြားလိုက်ပါတယ်။

    ၃ ဂိုးစီသရေကျခဲ့တဲ့ အဲဒီပွဲမှာ ဝက်စ်ဘရွန်းက ပထမပိုင်းမှာတင် ၃ ဂိုး သွင်းထားတာပါ။ ဒုတိယပိုင်းရောက်မှ ချယ်ဆီးက ချေပဂိုးရခဲ့ပြီး ပွဲအပြီး နာကျင်အချိန်ပိုဂိုးနဲ့ တစ်မှတ်ခွဲယူနိုင်ခဲ့ပါတယ်။

    လမ်းပတ်က ဒီပွဲမှာ အမှားတွေကြောင့် သူတို့အသင်း ၂ မှတ်ဆုံးရှုံးခဲ့ရတယ်လို့ ဆိုပါတယ်။

    ငွေမက်သည့် ဘောလုံးလောကကို မန်စီးတီးနည်းပြ ဝေဖန်

    ဘောလုံးလောကဟာ ကစားသမားတွေကို ဂရုမစိုက်ဘဲ ငွေရဖို့သာ လုပ်ဆောင်နေတယ်လို့ မန်စီးတီးနည်းပြ ပက် ဂွာဒီယိုလာက ဝေဖန်လိုက်ပါတယ်။

    ကိုဗစ်ကပ်ရောဂါကြောင့် ပြီးခဲ့တဲ့ရာသီမှာ ဘောလုံးပွဲတွေကို ရွှေ့ဆိုင်းတာ၊ ရပ်ဆိုင်းတာတွေ လုပ်ခဲ့ရပြီးတဲ့နောက် ဒီနှစ်မှာတော့ ကလပ်အသင်း၊ နိုင်ငံအသင်းပြိုင်ပွဲတွေကြောင့် ပွဲတွေ ခပ်စိပ်စိပ် ကစားရဖို့ ရှိနေပါတယ်။

    ဂွါဒီယိုလာက ဒီနေ့ လက်စတာနဲ့ပွဲအတွက် ကြံ့ခိုင်မှုပြည့်၀တဲ့ စီနီယာကစားသမား ၁၃ ဦးသာရှိကြောင်း ရာသီကြို ၂ ပတ်သာ ပြင်ဆင်ခွင့်ရတဲ့ ကစားသမားတွေဟာ ၃ ရက် ၁ ပွဲနှုန်းနဲ့ ၁၁ လဆက်တိုက် ကစားရတော့မှာဖြစ်ပြီး သူတို့ဟာ စက်ရုပ်တွေမဟုတ်ကြောင်း ထည့်သွင်းပြောဆိုခဲ့ပါတယ်။

    Ref: BBC

  • တနင်္ဂနွေနေ့ ဘောလုံးသတင်းများ

    တနင်္ဂနွေနေ့ ဘောလုံးသတင်းများ

    စက်တင်ဘာ ၂၀၊ ၂၀၂၀
    M-Media

    အောင်မြင်မှုကို ဆာလောင်နေဆဲဟု ဘေးလ်ဖွင့်ဟ

    ပွဲကစားဖို့ စိတ်အားထက်သန်မှုရှိပြီး၊ အောင်မြင်မှုကိုဆာလောင်နေဆဲ ဖြစ်တယ်လို့ စပါးအသင်းကို ပြန်ရောက်လာတဲ့ တိုက်စစ်မှူး ဂါရက်ဘေးလ်က ပြောကြားလိုက်ပါတယ်။
    စပါးကို ၁၇ နှစ်မှာ ဆောက်သက်တမ်အသင်းကနေ ရောက်ရှိလာခဲ့ပြီး ၂၀၁၃ ခုနှစ်က ကမ္ဘာ့စံချိန်တင်ပြောင်းရွှေ့ကြေးနဲ့ ရီးယဲလ်မက်ဒရစ်အသင်းကို ပြောင်းသွားတဲ့ ဘေးလ်ဟာ တစ်နှစ်အငှားစာချုပ်နဲ့ ပြန်ရောက်လာတာပါ။
    ဘေးလ်က စပါးဟာ မိမိနာမည်တစ်လုံးရအောင် လုပ်ပေးတဲ့အသင်းဖြစ်ပြီး ထွက်သွားကတည်းက ပြန်လာမယ်ဆိုတဲ့ စိတ်ဆန္ဒရှိခဲ့တယ်လို့ ပြောကြားခဲ့ပါတယ်။
    လက်ရှိမှာ ဒူးဒဏ်ရာရနေပြီး လာမယ့် အောက်တိုဘာလမှ အသင်းမှာ ပါဝင်ကစားနိုင်မယ့် ဘေးလ်ဟာ ပရီးမီးယားလိဂ်ခေတ်မှာ ဗြိတိသျှရဲ့ အကောင်းဆုံးပို့ကုန်လို့ သတ်မှတ်ခံထားရသူလည်း ဖြစ်ပါတယ်။

    မက်ဆီအား ထွက်ခွာခွင့်မပေးမှုကို ဘာကာဥက္ကဌ ဖွင့်ဟ

    တိုက်စစ်မှူး လီယွန်နယ်မက်ဆီဟာ အောင်မြင်မှု အာမခံချက်ဖြစ်တဲ့အတွက် အသင်းကနေ ထွက်ခွာခွင့်ပြုမှာ မဟုတ်ဘူးလို့ ဘာစီလိုနာအသင်း ဥက္ကဌ ဂျိုးဆက်ပ် ဘာတိုမြူက ပြောကြားလိုက်ပါတယ်။
    မက်ဆီဟာ ပြီးခဲ့တဲ့လမှာ ထွက်ခွင့်တောင်းခဲ့ပေမယ့် ဘာစီလိုနာက ခွင့်မပြုခဲ့ပါဘူး။ မက်ဆီကတော့ ဘာတိုမြူတစ်ယောက် ပေးထားတဲ့ကတိကို မတည်ဘူးလို့ Goal နဲ့ အင်တာဗျူးမှာ ဝေဖန်ခဲ့ပါတယ်။
    ဘာတိုမြူက မက်ဆီဟာ သမိုင်းတစ်လျှောက် အကောင်းဆုံးဘောလုံးသမားဖြစ်သလို အသင်းကလည်း သူ့ကို လိုအပ်တယ်လို့လည်း ဆိုပါတယ်။
    ရော်နယ် ကိုးမန်းကိုင်တွယ်နေတဲ့ ဘာစီလိုနာအသင်းဟာ ရာသီအစ ၃ ပွဲစလုံးမှာ အနိုင်ရခဲ့ပြီး မက်ဆီကလည်း ခြေစွမ်းကောင်းတွေကို ပြသခဲ့ပါတယ်။

    ဝက်စ်ဟမ်းနှင့်ပွဲက အသင်းစိတ်ဓာတ်ကို အာတီတာ ချီးကျူး

    ဝက်စ်ဟမ်းအသင်းကို အနိုင်ရခဲ့တဲ့ မနေ့ကပွဲမှာ အသင်းသားတွေရဲ့စိတ်ဓာတ်ကို အာဆင်နယ်နည်းပြ မီခေးလ်အာတီတာက ချီးကျူးလိုက်ပါတယ်။
    ပွဲပြီးကာနီး ၅ မိနစ်အလို သွင်းဂိုးကြောင့် အာဆင်နယ်က ၂ ဂိုး ၁ ဂိုးနဲ့ အနိုင်ရခဲ့ပြီး ပရီးမီးယားလိဂ် အဖွင့်ပွဲစဉ် ၂ ခုစလုံးမှာ အမှတ်ပြည့် ယူနိုင်ခဲ့တာပါ။
    အာတီတာက ဒီပွဲမှာ မိမိတို့ ကံကောင်းခဲ့ပြီး နောက်ဆုံးအထိ လုပ်နိုင်တယ်ဆိုတဲ့ စိတ်ဓာတ်မျိုး အသင်းမှာရှိလာကြောင်း၊ တိုးတက်အောင်လုပ်ရမယ့်အရာတွေ အများကြီးရှိနေကာ လိုချင်တဲ့အနေအထားရောက်ဖို့အတွက် အဝေးကြီးသွားရအုံးမှာဖြစ်ကြောင်း ထည့်သွင်းပြောဆိုခဲ့ပါတယ်။
    Ref: Goal

  • သောကြာနေ့ ဘောလုံးသတင်းများ

    သောကြာနေ့ ဘောလုံးသတင်းများ

    စက်တင်ဘာ ၁၈၊ ၂၀၂၀
    M-Media

    Social Distancing နှင့်ကစားသည့် ဘောလုံးအသင်း ၃၇ ဂိုးပြတ်ရှုံး

    ဂျာမနီ အပျော်တမ်းလိဂ်တစ်ခုက Ripdorf အသင်းဟာ ကိုဗစ်ကိုကြောက်ပြီး ခပ်ခွာခွာစည်းမျဉ်း (Social Distancing) နဲ့ ကစားတာကြောင့် ပြိုင်ဘက် SV Holdenstedt II အသင်းကို ၃၇ ဂိုး ဂိုးမရှိနဲ့ ရှုံးနိမ့်ခဲ့ပါတယ်။

    SV Holdenstedt II အသင်းဟာ ပြီးခဲ့တဲ့တစ်ပတ်က ကိုဗစ်ပိုးတွေ့သူတစ်ဦးနဲ့ ထိတွေ့မှုရှိခဲ့တာပါ။ ပြိုင်ဘက်တစ်သင်းလုံး ကိုဗစ်စစ်ပြီး ပိုးမရှိပေမယ့် ၁၄ ရက်မပြည့်သေးတဲ့အတွက် စိတ်ချရတဲ့အခြေအနေမျိုးဖြစ်နေတာကြောင့် Socail Distancing နဲ့ကစားတာလို့ Ripdorf အသင်းက ထုတ်ပြန်ပါတယ်။

    ပွဲကိုရွှေ့ဆိုင်းဖို့ တောင်းဆိုခဲ့ပေမယ့် ပြိုင်ပွဲကျင်းပရေးအဖွဲ့က လက်မခံဘဲ ပွဲမကစားရင်လည်း ဒဏ်​ငွေဆောင်ရမှာကြောင့် ကွင်းအတွင်းရှိရမယ့် အနည်းဆုံး ကစားသမားပမာဏ ၇ ဦးနဲ့ Ripdorf က ပွဲကို ကစားခဲ့တာ ဖြစ်ပါတယ်။

    ဘာစီလိုနာထက် ရီးယဲလ်မက်ဒရစ်ကို ကိုင်ချင်သည်ဟု ပိုချက်တီနို ဖွင့်ဟ

    ဘာစီလိုနာက ဆက်သွယ်လာတယ်ဆိုတဲ့ သတင်းတွေကို စပါးနည်းပြဟောင်း ပိုချက်တီနိုက ငြင်းဆိုခဲ့ပြီး လာလီဂါမှာဆိုရင် ရီးယဲလ်မက်ဒရစ်အသင်းကို နည်းပြခွင့်ရရေးဟာ သူ့ရဲ့အိပ်မက် ဖြစ်တယ်လို့ ပြောဆိုလိုက်ပါတယ်။

    ဖလားလက်မဲ့ရာသီကို ကြုံရတဲ့အတွက် နည်းပြ စတီယန်ကို ထုတ်ပယ်ခဲ့ပြီးနောက် ဘာစီလိုနာအသင်းဟာ ပိုချက်တီနိုကို ချိတ်နေတယ်ဆိုပြီး သတင်းတွေ ထွက်နေတာပါ။

    ပြင်သစ်လိဂ်ဝမ်းက ပီအက်စ်ဂျီနဲ့ မိုနာကို၊ စီးရီးအေက ဂျူဗင်တပ်စ်နဲ့ အင်တာမီလန်၊ ပေါ်တူဂီက ဘင်ဖီကာ စတဲ့ အသင်းတွေက ဆက်သွယ်နေတယ်ဆိုတဲ့ သတင်းတွေကိုလည်း ပိုချက်တီနိုက ငြင်းပါတယ်။

    ၂၀၁၈ ခုနှစ်က ပိုချက်တီနိုကို ရီးယဲလ်က ခေါ်ယူဖို့ ကြိုးစားခဲ့ပေမယ့် စပါးနဲ့ စာချုပ်ရှိတဲ့အတွက် မသွားဖြစ်ခဲ့ပါဘူး။

    Ref: BBC

  • ကြာသာပတေးနေ့ ဘောလုံးသတင်းများ

    ကြာသာပတေးနေ့ ဘောလုံးသတင်းများ

    စက်တင်ဘာ ၁၇၊ ၂၀၂၀
    M-Media

    ဘိုင်ယန်ကွင်းလယ်လူ သီယာဂိုကို လီဗာပူးလ်ခေါ်ယူ

    လီဗာပူးလ်အသင်းဟာ ဘိုင်ယန်မြူးနစ်အသင်းရဲ့ ကွင်းလယ်လူ သီယာဂို အလ်ကန်တာရာကို ၄ နှစ်စာချုပ် ပေါင် ၂၅ သန်းနဲ့ခေါ်ယူဖို့ သဘောတူညီချက် ရခဲ့ပါတယ်။

    အသက် ၂၉ နှစ်အရွယ် သီယာဂိုဟာ ၂၀၁၃ ခုနှစ်က ဘာစီလိုနာကနေ ဘိုင်ယန်ကို ရောက်လာတာပါ။ လီဗာပူးလ်မှာ နံပါတ် ၆ ဂျာစီ ဝတ်ဆင်မှာ ဖြစ်ပါတယ်။

    သီယာဂိုဟာ ဂရိနောက်ခံလူ ကော့စ်တက်စ် စီမီကက်စ်နောက် လီဗာပူးလ်အသင်းက အခုနှစ် ဒုတိယမြောက်ခေါ်ယူတဲ့ ကစားသမား ဖြစ်ပါတယ်။

    ဘိုင်ယန်နည်းပြ ဟန်ဆီ ဖလစ်က သီယာဂိုဟာ ခြွင်းချက်မဲ့ ပရော်ဖက်ရှင်နယ် ကစားသမားတစ်ယောက်ဖြစ်ပြီး သူအသင်းကထွက်သွားတဲ့ ဒီနေ့ဟာ စိတ်မကောင်းစရာနေ့ဖြစ်တယ်လို့ ပြောကြားခဲ့ပါတယ်။

    ရီးယဲလ်တိုက်စစ်မှူး ဂါရက်ဘေးလ် စပါးကို ပြန်လာမည်

    ရီးယဲလ်မက်ဒရစ်တိုက်စစ်မှူး အသက် ၃၁ နှစ်အရွယ် ဘေးလ်ဟာ အသင်းဟောင်းစပါးကို အငှားနဲ့ ပြန်လာတော့မှာဖြစ်ပြီး သောကြာနေ့မှာ လန်ဒန်ကို လာရောက်ဖို့ ရှိနေပါတယ်။

    ၂၀၀၇ ခုနှစ်က ဆောက်သက်တမ်ကနေ စပါးကိုပြောင်းလာတဲ့ ဘေးလ်ဟာ ၂၀၁၃ ခုနှစ်မှာ အဲဒီတုန်းက စံချိန်တင်ပြောင်းရွှေ့ကြေး ပေါင် ၈၅ သန်းနဲ့ ရီးယဲလ်ကို ရောက်ရှိကာ ဂိုး ၁၀၀ ကျော်သွင်းပြီး ချန်ပီယံလိဂ်ဖလား ၄ ကြိမ် ရရှိခဲ့ပါတယ်။

    ဘေးလ်အတွက် ဆွေးနွေးမှုတွေဟာ တိုးတက်မှုရှိပေမယ့် စပါးနည်းပြ မော်ရင်ဟိုကတော့ ဒီကိစ္စအတွက် ထုတ်မပြောလိုဘူးလို့ ဆိုပါတယ်။ ဘေးလ်ဟာပြီးခဲ့တဲ့ ရာသီတွေမှာ ရီးယဲလ်ကနေ ထွက်ခွာဖို့ ကြိုးစားပေမယ့် လက်တွေ့မှာ ဖြစ်မလာခဲ့ပါဘူး။

    ပြင်သစ်ဘောလုံးအဖွဲ့ချုပ်က နေးမာကို ၂ ပွဲပယ်ပြစ်ဒဏ်ချ

    တနင်္ဂနွေနေ့ မာဆေလ်းနဲ့ပွဲက အပြုအမူအတွက် ပီအက်စ်ဂျီတိုက်စစ်မှူး နေးမာကို ပြင်သစ်ဘောလုံးအဖွဲ့ချုပ်က ၂ ပွဲ ကစားခွင့် ပိတ်လိုက်ပါတယ်။

    ပီအက်စ်ဂျီရှုံးခဲ့တဲ့ အဲဒီပွဲမှာ နှစ်ဖက်အသင်းသမားတွေ စကားများတာကြောင့် ၅ ဦးအထိ အထုတ်ခံခဲ့ရပါတယ်။ မာဆေးလ်နောက်ခံလူ အလ်ဗာရိုဂွန်ဇာလက်ကို ဦးခေါင်းရိုက်မှုအတွက် ထုတ်ပယ်ခဲ့ရတဲ့ နေးမာက ဂွန်ဇာလက်ဟာ သူ့ကို လူမျိုးရေးခွဲခြား စော်ကားပြောဆိုခဲ့တယ်လို့ ဖွင့်ဟခဲ့ပါတယ်။

    ပြင်သစ်ဘောလုံးအဖွဲ့ချုပ် တာဝန်ရှိသူတွေက လူမျိုးရေးခွဲခြားတယ်ဆိုတဲ့ကိစ္စကို စုံစမ်းစစ်ဆေးသွားမယ်လို့ ကတိပြုခဲ့ပါတယ်။

    ပီအက်စ်ဂျီနောက်ခံလူ လေဗင် ကူရ်ဇာဝါက ၆ ပွဲ၊ လီယန်ဒရို ပရာဒက်စ်က ၂ ပွဲ၊ မာဆေးလ်က ဂျော်ဒန် အေမာဗီက ၃ ပွဲ၊ ဒါရီယို ဘန်ဒက်တိုက ၁ ပွဲ အသီးသီး ပွဲပွယ်ပြစ်ဒဏ်တွေ ချမှတ်ခံခဲ့ရပါတယ်။

    Ref : BBC

  • တနင်္ဂနွေနေ့ ဘောလုံးသတင်းများ

    တနင်္ဂနွေနေ့ ဘောလုံးသတင်းများ

    စက်တင်ဘာ ၁၃၊ ၂၀၂၀
    M-Media

    တိုက်စစ်မှူးဆာလာဟ်မှာ ထူးရှယ်ကစားသမားဟု ကလော့ပ်ပြော

    တိုက်စစ်မှူး မိုဟာမက် ဆာလာဟ်ဟာ ထူးရှယ်ကစားသမားတစ်ဦးဖြစ်ပြီး အနာဂတ်ကာလ အချိန်အတော်ကြာတဲ့အထိ ဒီအတိုင်း ရှိနေလိမ့်မယ်လို့ လီဗာပူးလ်နည်းပြ ယာဂန် ကလော့ပ်က ပြောကြားလိုက်ပါတယ်။ မနေ့က လိဒ်နဲ့ ပရီးမီးယားလိဂ်အဖွင့်ပွဲစဉ်မှာ ဆာလာဟာ ဟက်ထရစ် သွင်းယူခဲ့ပြီး တက်ဒီရှာရင်ဂမ်ပြီးရင် ၄ ရာသီဆက်တိုက် ရာသီအဖွ့င်ပွဲတွေမှာ ဂိုးသွင်းနိုင်တဲ့ ဒုတိမြောက်ကစားသမားအဖြစ် မှတ်တမ်းဝင်ခဲ့ပါတယ်။ လီဗာပူးလ်အသင်းမှာ ၁၉၈၈-၈၉ နောက်ပိုင်း အဖွင့်ပွဲစဉ် ဟက်ထရစ်သွင်းနိုင်တဲ့ ပထမဆုံးကစားသမား ဖြစ်လာတာပါ။ နောက်ခံလူ ဗန်ဒိုက်ကလည်း မီဒီယာတွေက ဆာလာဟ်ကို ဝေဖန်နေကြပေမယ့် အသင်းကတော့ ဆာလာဟ်ကို ကျေးဇူးတင်တယ်လို့ ဆိုပါတယ်။

    အသင်းစွမ်းဆောင်ရည်ကို ဂုဏ်ယူနေတဲ့ လိဒ်နည်းပြ ဘီယဲလ်ဆာ

    လီဗားပူးလ်နဲ့ ပရီးမီးယားလိဂ်အဖွင့်ပွဲစဉ် အသင်းစွမ်းဆောင်ရည်အတွက် ဂုဏ်ယူမိတယ်လို့ လိဒ်နည်းပြ မာဆယ်လို ဘီယဲလ်ဆာက ပြောပါတယ်။ ၄ ဂိုး ၃ ဂိုးနဲ့ ရှုံးခဲ့ပေမယ့် လိဒ်က ကစားပုံကောင်းခဲ့သလို၊ ဂိုးတွေလည်း အပြန်အလှန်သွင်းနိုင်ခဲ့ပြီး ပွဲပြီးကာနီး ပင်နယ်တီကြောင့်သာ အမှတ်ဆုံးရှုံးခဲ့ရတာပါ။ ဘီယဲလ်ဆာက မိမိတို့ဟာ လီဗာပူးလ်ကို ယှဉ်ကစားနိုင်ခဲ့ပြီး အသင်းရဲ့ တိုးတက်မှုတွေအတွက် ကျေနပ်မိတယ်လို့ ဆိုပါတယ်။ တစ်ဂိုးသွင်းပေးခဲ့တဲ့ တိုက်စစ်မှူး ပက်ထရစ် ဘမ်ဖို့ဒ်က ရှုံးနိမ့်ခဲ့ပေမယ့် အသင်းသားတွေအကြား အားရကျေနပ်မှုရရှိပြီး ဒီီပုံစံကို ဆက်လက်ထိန်းသိမ်းသွားမယ်လို့ ပြောကြားခဲ့ပါတယ်။

    ပရီးမီးယားလိဂ်ဖလားကို မန်စီးတီး စိန်ခေါ်နိုင်မည်

    အခုနှစ်ပရီးမီးယားလိဂ်ရာသီသစ်မှာ မန်စီးတီးဟာ ချန်ပီယံဘွဲကို စိန်ခေါ်နိုင်လိမ့်မယ်လို့ တောင်ပံကစားသမားဟောင်း ရှောင် ရိုက်ဖီးလစ်က ​ပြောပါတယ်။ ၂၀၁၈-၂၀၁၉​ ပရီးမီးယားလိဂ်ချန်ပီယံဖြစ်ခဲ့တဲ့ မန်စီးတီးဟာ မနှစ်က ချန်ပီယံဘွဲကို မကာကွယ်နိုင်ခဲ့ဘဲ လီဗာပူးလ်အသင်းကို လွှဲပြောင်းပေးခဲ့ရပါတယ်။ ရိုက်ဖီးလစ်က လီဗာပူးလ်ဟာ ဒီနှစ်မှာ ကစားသမားတွေရဲ့ ကြံ့ခိုင်မှုပြဿနာကို ကြုံတွေ့ရနိုင်ပြီး၊ မန်စီးတီးရဲ့ ကစားသမား ဝယ်ယူအားဖြည့်မှုက အားရစရာ ကောင်းတာကြောင့် ကွာဟချက်ကို လျှော့ချနိုင်မှာဖြစ်ကြောင်း၊ ချယ်ဆီးကလည်း လီဗာပူးလ်ကို စိန်ခေါ်နိုင်မှာဖြစ်ကြောင်း ထည့်သွင်းပြောဆိုခဲ့ပါတယ်။

    Ref: Goal, BBC