နိုဝင်ဘာ ၁၄၊ ၂၀၂၀
M-Media

လူစားလဲမှု စည်းမျဉ်းသစ်တစ်ခုကို အင်္ဂလန်တွင် ကျင့်သုံးမည်

လူစားဝင်ကစားသမား ၃ ဦး ပြည့်သွားပေမယ့် ဦးခေါင်းထိခိုက်တာမျိုးလို ပြင်းထန်တဲ့ဒဏ်ရာ ရချိန်မှာ နောက်ထပ် ကစားသမားတစ်ဦး လူစားလဲနိုင်မယ့် အစီအစဉ်ကို အင်္ဂလန်ဘောလုံးလောကမှာ လာမယ့်နှစ်ကစတင်ပြီး ကျင့်သုံးသွားမှာ ဖြစ်ပါတယ်။ နိုင်ငံတကာ ဘောလုံးအဖွဲ့ချုပ်ဘုတ်အဖွဲ့ (Ifab) နဲ့ အင်္ဂလန်ဘောလုံးအဖွဲ့ချုပ် တာဝန်ရှိသူတွေဟာ အခုနှစ် နောက်ဆုံး ၂ လအတွင်း ဒီကိစ္စကို ဆွေးနွေးမှာဖြစ်ပြီး ဇန်နဝါရီမှာ စမ်းသပ်ကျင့်သုံးဖို့ စီစဉ်ထားပါတယ်။ ‘ဒဏ်ရာပြင်းထန်တဲ့ ကစားသမားအတွက် လူစားလဲရင် ပြိုင်ဘက်အသင်းကလည်း နောက်ထပ်ကစားသမားတစ်ဦး လူစားလဲခွင့်ရမယ်’ ဆိုတဲ့အချက်လည်း ပါဝင်ပြီး စည်းမျဉ်းကို အလွဲသုံးစားမပြုနိုင်ဖို့အတွက် ဒီအချက်ကို ထည့်သွင်းထားတာ ဖြစ်ပါတယ်။ ဒီစည်းမျဉ်းကို ၂၀၂၀ တိုကျိုအိုလံပစ်မှာ စတင်အသုံးပြုဖို့ စီစဉ်ထားပေမယ့် ကိုရိုနာဗိုင်းရပ်စ်ကြောင့် ပြိုင်ပွဲကို ရွှေ့ဆိုင်းထားရပါတယ်။

ရော်နယ်ဒိုကို ပြန်ခေါ်မည်ဆိုသည့် သတင်းကို မန်ယူငြင်း

ဂျူဗင်တပ်စ်တိုက်စစ်မှူး ခရစ္စတီယာနို ရော်နယ်ဒိုကို ပြန်လည်ခေါ်ယူမယ်ဆိုတဲ့ သတင်းတွေကို မန်ယူအသင်းက ငြင်းဆိုလိုက်ပါတယ်။ လာမယ့်နှစ် လုပ်ခလစာကုန်ကျမှုကို လျှော့ချဖို့ စီစဥ်နေတဲ့ ဂျူဗင်တပ်စ်မှာ ရော်နယ်ဒိုရဲ့ အနာဂတ်ဟာ မရေမရာဖြစ်နေပြီး မန်ယူက ခေါ်ယူဖို့ တရား၀င်ကမ်းလှမ်းမှုတောင် လုပ်ဆောင်ထားတယ်လို့ အာဂျင်တီးနားနဲ့ ပေါ်တူဂီတို့က သတင်းရင်းမြစ်တွေက အခုရက်ပိုင်းအတွင်းမှာ ဖော်ပြကြပါတယ်။ မန်ချက်စတာမြို့အခြေစိုက် သတင်းစာတစ်စောင်ဖြစ်တဲ့ Manchester Evening News က မန်ယူဟာ မြင့်မားတဲ့ ရော်နယ်ဒိုရဲ့ လုပ်ခလစာနဲ့ ပြောင်းရွှေ့ကြေးတွေကို ပေးချေလိုတဲ့ စိတ်ဆန္ဒမျိုး မရှိဘူးဆိုတာ သိရကြောင်း၊ ဒေါ့မွန်အသင်းတိုက်စစ်မှူး ဂျာဒန်ဆန်ချိုကိုလည်း ဒီအချက်ကြောင့်ပဲ ခေါ်ယူဖို့ ဖြစ်လာမှာမဟုတ်ကြောင်း ရေးသားဖော်ပြခဲ့ပါတယ်။

လောင်းကစားစွဲခဲ့သော်လည်း နောင်တမရဟု အာဆင်နယ် တိုက်စစ်မှူးဟောင်းပြော

လောင်းကစားစွဲမှုကနေစပြီး ဘောလုံးကစားသမဘ၀ ပျက်ဆီးတဲ့အထိ အမှားတွေ လုပ်မိခဲ့ပေမယ့် နောင်တမရဘူးလို့ အာဆင်နယ်တိုက်စစ်မှူးဟောင်း နစ်ကလက်စ် ဘန်တနာက ပြောကြားလိုက်ပါတယ်။ အသက် ၁၆ နှစ်အရွယ် ၂၀၀၅ ခုနှစ်မှာ အာဆင်နယ်အသင်းကြီးနဲ့ ပွဲထွက်ခွင့်ရခဲ့တဲ့ ဘန်တနာဟာ ထွန်းတောက်လာမယ့် ကြယ်တစ်ပွင့်လို့ သတ်မှတ်ခံခဲ့ရပါတယ်။ လောင်းကစားစွဲတာ၊ အွန်နရီလို စီနီယာကစားသမားမျိုးနဲ့ မကျေမလည်ဖြစ်တာ၊ ကြံ့ခိုင်ရေးကို ထိခိုက်စေနိုင်မယ့် ကားမတော်တဆမှုဖြစ်တာ၊ တက္ကဆီယဥ်မောင်းကို ကိုယ်ထိလက်ရောက်ပြုမူလို့ ဖမ်းဆီးခံရတာ စတဲ့ ပြဿနာတွေနဲ့ ရင်ဆိုင်ခဲ့ပြီးတဲ့နောက် အာဆင်နယ်ကနေ ၂၀၁၄ ခုနှစ်မှာ ထွက်ခွာခဲ့ရကာ မထင်မရှား ကစားသမားဘ၀အဖြစ်နဲ့သာ ကျင်လည်ဖြတ်သန်းခဲ့ရပါတယ်။ ဘန်တနာက ပိုကောင်းတဲ့ လမ်းကြောင်းမျိုးကို လျှောက်လှမ်းသင့်ခဲ့ပေမယ့် လုပ်ဆောင်ခဲ့တာတွေအတွက် ကျေနပ်တယ်လို့ ဆိုပါတယ်။ လက်ရှိ အသက် ၃၂ နှစ်အရွယ်ရှိတဲ့ ဘန်တနာဟာ သူ့ဘ၀ အထုပတ္တိ စာအုပ်ဖြစ်တဲ့ Both Sides ကို ရေးထားပါတယ်။

Ref : BBC

အောက်တိုဘာ ၆၊ ၂၀၂၀
M-Media

ပါတေးကို အာဆင်နယ်က ခေါ်ယူခဲ့မှုအတွက် အက်သလက်တီကို ဒေါသထွက်

အသက် ၂၇ နှစ်အရွယ် ဂါနာကွင်းလယ်လူ သောမတ်စ် ပါတေးကို အာဆင်နယ်အသင်းက ခေါ်ယူသွားမှုအတွက် အက်သလက်တီကိုမက်ဒရစ်အသင်းက မကျေမနပ်ဖြစ်နေပြီး၊ နည်းပြ ဆီမြွန်နီလည်း ဒေါသအိုး ပေါက်ကွဲခဲ့တယ်လို့ သတင်းတွေ ထွက်လာပါတယ်။

၂၀၂၃ ခုနှစ်အထိ သက်တမ်းရှိနေတဲ့ ပါတေးကို လာလီဂါစည်းမျဉ်းအရ လျော်ကြေးပေးကာ ပေါင် ၄၅ သန်းနဲ့ အာဆင်နယ်က မနေ့မှာ ခေါ်ယူခဲ့တာပါ။

အက်သလက်တီကိုက ကစားသမားဟာ စာချုပ်ကို တစ်ဖက်သက်ရပ်ဆဲသွားတာ ဖြစ်တယ်လို့ Twitter စာမျက်နှာမှာ ရေးသားခဲ့ပါတယ်။

အာဆင်နယ်နည်းပြ အာတီတာက အချိန်အတိုင်းအတာတစ်ခုအထိ စောင့်ကြည့်ပြီးတဲ့နောက် ဒီလို အဆင်မြင့်ကစားသမားတစ်ဦးကို ခေါ်ယူနိုင်ခဲ့တဲ့အတွက် ကျေနပ်မိတယ်လို့ ပြောကြားခဲ့ပါတယ်။

ပိုချက်တီနိုကို မန်ယူက ဆက်သွယ်နေသည်ဟု သတင်းထွက်

လက်ရှိ အသင်းလက်မဲ့ဖြစ်နေတဲ့ စပါးနည်းပြဟောင်း ပိုချက်တီနိုကို ခေါ်ယူဖို့ မန်ယူက ဆက်သွယ်နေတယ်လို့ ကောလဟာလ ထွက်လာပါတယ်။

ရာသီအစ အသင်းရဲ့စွမ်းဆောင်ရည်ကို မန်ယူတာဝန်ရှိသူတွေက မနှစ်မြို့ဘဲ ပိုမိုတိုးတက်တာမျိုး မြင်ချင်နေတာပါ။ အမှုဆောင် ဒုတိယဥက္ကဌ အဒ်ဝုဒ်ဝါ့ဒ်ဟာ ပိုချက်တီနိုကို အလွန်ကြိုက်နှစ်သက်သူတစ်ဦး ဖြစ်ပါတယ်။

အသက် ၄၈ နှစ်အရွယ် ပိုချက်တီနိုဟာ စပါးအသင်းက ထွက်ခွာခဲ့ပြီးနောက်ပိုင်း အသင်းကြီးတစ်ချို့က ကမ်းလှမ်းမှုကို ပယ်ချထားသူပါ။ အခွင့်အရေးရရင် မန်ယူကို နည်းပြချင်တယ်လို့ တရားဝင် ထုတ်ဖော်ပြောဆိုထားဖူးပါတယ်။

ပရီးမီးယားလိဂ်၏ နွေရာသီအပြောင်းအရွှေ့စားရိတ် ပြီးခဲ့သည့်နှစ်ကထက် လျော့ကျ

ပရီးမီးယားလိဂ်ရဲ့ အခုနှစ်နွေရာသီအပြောင်းအရွှေ့ သုံးစွဲမှုဟာ ပေါင် ၁.၂၁၈ ဘီလီယံရှိခဲ့ပြီး ပြီးခဲ့တဲ့နှစ်ကထက် ပေါင် ၁၅၈ သန်း လျော့သွားတာပါ။

ဒါပေမယ့် ဥရောပ ဘောလုံးပြိုင်ပွဲတွေမှာ အပြောင်းအရွှေ့အတွက် ငွေကြေးအများဆုံးသုံးတဲ့ လိဂ်တစ်ခုအဖြစ် ရပ်တည်နေဆဲဖြစ်ပါတယ်။

မနေ့က အပြောင်းအရွှေ့နောက်ဆုံးနေမှာ ပရီးမီးယားလိဂ်အသင်းတွေဟာ ကစားသမား ၁၂ ဦးအထိ ခေါ်ယူခဲ့ပါတယ်။

ဥရောပက ဘောလုံးပြိုင်ပွဲအားလုံးဟာ အခုနှစ်မှာ ကစားသမားတွေခေါ်ယူမှု နည်းခဲ့ပြီး ကိုဗစ်ကပ်ရောဂါကြောင့်ဖြစ်တယ်လို့ ဘောလုံးကျွမ်းကျင်သူတွေ ကသုံးသပ် ခဲ့ပါတယ်။

Ref: BBC